EFESIOS 3 - Tatuyo: Dio Wadarique

Pablo encargado del evangelio para los que no eran judíos

^1-2 Yʉ Pablore Jesucristo ye quetire buiobojari majocʉ ca-anipaʉre yʉ ca-cũuwĩ Dio, mʉjaare judío maja ca-aniquẽnare ca-buiopaʉ. Diore mʉjaare yʉ jenibojanucu. Camajare Dio na cʉ̃ ca-mai tʉjʉrijere judío maja ca-aniquẽnare yʉ buio joomi Dio, na quena yʉ yarã na ãmaro ĩi. Tiere mʉja queti apiricarã to bairo Dio yʉre cʉ̃ ca-buio rotiriquere. Yucʉacã presopʉ yʉ ãa Dio ye quetire mʉjaare yʉ ca-buio teñarique wapa.

³ Judío maja mʉja ca-aniquetibato quena mʉja ca-mai tʉjʉyupi Dio. Mʉjaare mai tʉjʉri mʉjaare cʉ̃ ca-popiyeyeboriquere mʉja ca-netooñupi Dio. Ti wamere yʉ ca-majiowĩ Dio. Tiere ca-jʉgoye mʉjaare yʉ ca-buio uca joowʉ õcoacã.

⁴ Tie queti joorica pũurore tʉjʉrã mʉja majigarã tiere Dio yʉre cʉ̃ ca-majioriquere.

⁵ Cristo cʉ̃ cá-átibojapere, judío maja ca-aniquẽna quenare Dio cʉ̃ ca-mai tʉjʉpere camaja ca-majiquẽjupa tirʉmʉpʉre. Yucʉ roquere cʉ̃ Espíritu Santo jʉgori cʉ̃ yarã jãare apóstol majare, cʉ̃ ye quetire ca-buiorãre jã ca-majiowĩ Dio yua.

⁶ Oco bairo majuu ãa ca-jʉgoyepʉ camaja na ca-tʉgooña majiqueta wame: Judío maja mee quena ca-yajiqueti yeri cʉgogarãma caroa quetire na ca-apiʉjaata. Judío maja na ca-bairica wamere bairona cʉgogarãma tiere na ca-api ʉjaata. To bairi na quena judío maja menare Jesucristo ya poa macana anigarãma. Naa nipetirã Dio cʉ̃ ca-ĩi cũuricarore bairona Jesucristo ye quetire ca-apiʉjarãre caroaro na átibojagʉmi Dio.

⁷ Tie quetire ca-buio teñaʉre yʉre ca-cũuwĩ Dio, yʉre mai tʉjʉri. To bairi caroaro buio majiriquere yʉ joonucumi Dio, ocabʉtiri yʉ ca-buio majiparore bairo ĩi.

⁸ Aperã nipetirã Cristore ca-apiʉjarã yʉ netoro ca-ãna ãma. Yʉ maca cawatoa macacʉ majuu yʉ ãa. Cawatoa macacʉ yʉ ca-anibato quena Cristo ye quetire yʉ ca-buio teña rotiwĩ Dio. Judío maja ca-aniquẽnare yʉ ca-buio teña rotiwĩ. Tie quetire caroaro majuu camajare pairo cʉ̃ cá-átibojarijere mani tʉgooña peo majiquẽe.

⁹ To bairi tiere judío maja ca-aniquẽnare cʉ̃ cá-átibojapere camaja nipetirãre yʉ ca-buio majio rotiwĩ Dio. Ca-jʉgoyepʉ na quenare cʉ̃ cá-átibojapere ca-tʉgooña jʉgoyupi Dio ati ʉmʉrecóo macaje nipetiro cá-átacʉ. Ca-jʉgoyepʉ ti wamere camajare na ca-majioquẽjupi Dio mai.

¹⁰ To bairi yucʉacã, “Caroaro ca-majii ãmi Dio,” ĩi majima ati yepa macana, jõ buipʉ ʉmʉrecóopʉ macana ca-rotirã quena. Cristore ca-apiʉjarã judío maja, judío maja mee quena jicã poa macanare bairo na ca-aniere tʉjʉrã, “Dio caroaro majuu cá-ácʉ ãmi,” ĩi tʉjʉ majima na nipetirã.

¹¹ Nemoopʉre cʉ̃ ca-tʉgooña jʉgorica wamere bairona cá-ájupi Dio, mani Ʉpaʉ Jesucristore manire ca-bai yajibojapaʉre cʉ̃ joʉ.

¹² To bairi uwiquẽnana Dio mena macana mani ani maji, Jesú manire cʉ̃ ca-bai yajibojarique jʉgori. To bairi cʉ̃ apiʉjari cariapena Diore ca-jenirã mani ani maji yua.

¹³ Ti wame tʉgooñari yucʉacã yʉ ca-popiye cʉtiere tʉgooñarique paiqueticõaña. Mʉja quena Dio yarã mʉja ca-aniparore bairo ĩi Jesú ye quetire mʉjaare yʉ ca-ĩi buiowʉ. To bairi tʉgooña wariñuuña. Mʉjaare yʉ ca-queti buiorique wapa presopʉ yʉ ca-tamuorije to ca-anibato quena tʉgooña wariñuuña.

El amor de Cristo

¹⁴ Mʉja quenare judío maja ca-aniquẽnare mʉjaare Dio cʉ̃ cá-átibojariquere yʉ tʉgooña wariñuu. Tiere tʉgooña wariñuu, mani Pacʉ Diore áti nʉcʉbʉgori ejacumu, mʉjaare yʉ jenibojanucu Diore.

¹⁵ Mani Pacʉ ãmi Dio, cʉ̃ ya poa macana mani ca-ano. Meere cʉ̃ tʉpʉ ca-ãna quenare, mai ati yepapʉ ca-anicõarã quenare mani Pacʉ ãmi cʉ̃re ca-apiʉjarã mani ca-ãmata.

¹⁶ To bairi Diore mʉja jenibojaʉ oco bairo cʉ̃ yʉ ĩi jeninucu: “Dio, jã Pacʉ, caroaʉ majuu, ca-tutuaʉ majuu mʉ ãa. To bairi mʉ Espíritu Santore na joori yeri ocabʉtiriquere na mʉ joowa.

¹⁷ Cristore na ca-api nʉcʉbʉgoro mʉ Espíritu Santo na yeripʉre cʉ̃ ãmaro. Cristo nare cʉ̃ ca-mairore bairona na quena aperãre na maiato.

^18-19 Seeto majuu Cristo camajare cʉ̃ ca-mairijere na tʉgooña majiato. Aperã nipetirã mʉre ca-apiʉjarã na quena camajare Cristo cʉ̃ ca-mairijere na tʉgooña majiato. Cristo jãare cʉ̃ ca-mairijere jã tʉgooña maji petiquẽe paro. Dio, mʉ ca-aniere na yeripʉ na mʉ joowa. Caroaʉ mʉ ca-anore bairona caroarã na ãmaro ĩi,” Diore cʉ̃ yʉ ĩi, mʉjaare cʉ̃ jenibojaʉ.

²⁰ Mani Pacʉ Dio cá-áti majii majuu aniri mani yeripʉre caroare mani áti majimi, caroarã na anicõato ĩi. To bairi mani yeripʉ tʉgooña tutuarique mani joomi. Mani ca-jeniri wame netoro, mani ca-tʉgooñari wame netoro mani átiboja majimi Dio.

²¹ Jesúre ca-apiʉjarã cʉ̃ ya poa macanare Jesucristo caroaro cʉ̃ cá-átibojarique majiri Diore mani cá-áti nʉcʉbʉgo wariñuupe ãa. Camaja to canacã yʉtea macana to canacã rʉmʉ cʉ̃re na cá-áti nʉcʉbʉgo wariñuupe ãa. Amén.