Marko 1 - Sumu Yedi ya Isa Masiya 1906 Kitamo 1897 Malumbo 1905

¹ Kuwoka kwa Anjili ya Yesu Masihi, Mwana wa Izuwa;

² sandu itamiwe ghati ya mroti, Yoa, natuma mwondo wangu msongorana wa usho wako, eye eneareha nzia yako msongorana wako,

³ Ighonda lakwe eiya ghati ya ishighati, Areheni nzia ya Mzuri, urongeshe mawetio makwe.

⁴ Akaoka Yohana ekibatija ghati ya ishighati, na ekitinda lubatijo lwa kugharuka lwa kuwushijwa kwa kutekwa.

⁵ Wakamfumia isanga lose la Uyahudi, na Yerusalemi, wakabatijwa naye ghati ya mfuro wa Yardeni, wekighamba matekwa mawo.

⁶ Naye Yohana edokie nyui ja ngamela, na ngana ya kitanga kikudini hakwe, ekila nzighe na nzoke ya mbakoni.

⁷ Akaghamba, ekiteta, Eza eokie echee kukela mi nyuma yangu, nete mi siidima niiname kuchungua mikwa ya viratu vyakwe.

⁸ Mi nambatija na mbombe, uu enembatija na Ngoma Mshenete.

⁹ Ikaoka misi ila, akaza Yesu ghati ya Nazareti ya Galilaya akabatijwa na Yohana ghati ya Yardeni.

¹⁰ Chwi ekikwea ghati ya mbombe, akawona wanga jajughuka, na Ngoma sa ibeta akasea wanga yakwe;

¹¹ ighonda likaoka ghati ya wanga, Niwe Mwana wangu mkundwa, nimwizihirwe henaye.

¹² Chwi Ngoma akamkinya mtano ishighati.

¹³ Akaoka ghati ya ishighati misi makumaane, ekigheshwa ni Shetani, akaoka hamwe na nyama, malaika wakamwindia.

¹⁴ Mtano kutera ya kugerwa gerezeni Yohana, akaza Yesu ghati ya Galilaya ekitinda Anjili ya ufumwa wa Izuwa,

¹⁵ na ekiteta, ti, Magheri mafika, wusongeria ufumwa wa Izuwa, chweni‐muti, mwitikije Anjili.

¹⁶ Ekisela mbai ya ndiwa ya Galilaya, akawona Siman na Andrea mundwawo, wekitagha nyavu hena ndiwa: amu weokie wesakia.

¹⁷ Akawawurra Yesu, Haya, nyuma yangu, nami ninemwosha wesakia wa wandu.

¹⁸ Chwi wakashigha nyavu jawo, wakamratera.

¹⁹ Ekirongora uko hadongo, akambona Yakob wa Zebedayo na Yohana mundwawo, nawo awa ghati ya ngalawa wekijiareha nyavu.

²⁰ Chwi akawaitanga, wakamshigha wawee Zebedayo hamwe nawo waesi, wakamratera.

²¹ Wakaingia ghati ya Kapernaum; na chwi musi wa sabato akaingia ghati ya sunagogi, akalosha.

²² Wakarighiwa hena kucha kwakwe; amu eokie ekilosha sa mwenye kuidima, nete si sa watami.

²³ Heokie ghati ya sunagogi yawo mundu mwenye luhungu luwiwi;

²⁴ akaloza, ekiteta, Ah tuna kini nawe, Yesu Mnazareti? waza ututeshe? nikutisiwe niani, Mshenete wa Izuwa.

²⁵ Akambohia Yesu, ekiteta, Huja, ufume hakwe.

²⁶ Luhungu luwiwi akambaja, akaloza na ighonda ibaha, akafuma hakwe.

²⁷ Wakarighiwa wose, mtano kuwujanyana, wekiteta, Nikini iki? Kucha ani uku kusha? Amu hena zinya amaaghanya maluhungu mawiwi, namo mamwinga isikio!

²⁸ Mburi jakwe jikafuma chwi ghati ya masanga mose mejunguluke Galilaya.

²⁹ Nawo wekifuma ghati ya sunagogi wakatonga chwi ghati ya nyumba yakwe Siman na Andrea, hamwe na Yakob na Yohana.

³⁰ Mkwee Siman akayajwa ekigurwa isemu, chwi wakamburra mburi yakwe.

³¹ Akaza hakwe akambushija, ekimgura mkono, isemu kikamshiga chwi, akawainda.

³² Ikaoka chamagheri, hekinaswe, wakamwetie wose wewadjua, nawo wenye luhungu,

³³ kaa yose ikawunganyika mbereni.

³⁴ Akawahoja weingi weokie wewajua hena ndwari jingi jingi, akakinya maluhungu meingi, nete tashigha maluhungu matete, amu memtisiwe.

³⁵ Mtano heyawo kerre muno kio ekiwuka akatonga handu hesina wandu, uko akaomba.

³⁶ Wakamratera Siman nawo weoho naye,

³⁷ mtano wekimbona wakamburra, Wose wakuenda we.

³⁸ Akawawurra, Tutonge hena viikaa vioho afuhi, niwone kutinda na uko, amu hena iyo nafuma.

³⁹ Akaoka ekitinda ghati ya masunagogi mawo ghati ya Galilaya pia, na ekimakinya maluhungu.

⁴⁰ Akaza hakwe mwenye ukoma, ekimsemba na ekimdung’utia, na ekimburra, ti Ukikunda, waidima kunizerija.

⁴¹ Yesu ekimsaria, akaronga mkono, akamkuwara, akamburra, Nakunda, uzerike.

⁴² Mtano ekiteta, chwi ukoma ukamshigha, akazerika.

⁴³ Chwi akamwaghanya muno, akamkinya.

⁴⁴ Akamburra, Yoa, usimburre mundu kiteto, kake tonga hako, ukuwonjanye hena mkohani, ung’ole hena kuzerijwa kwako sandu eaghanyie Musa hena kuwonja mburi hawo.

⁴⁵ Naye ekifuma akawoka kutinda nyingi na kutoranya kiteto, mtano teidimewa kuingia kaa na some, nde eokie handu hesina wandu, wakamzia kufuma hose.