Luka 1 - Sumu Yedi ya Isa Masiya 1906 Kitamo 1897 Malumbo 1905

¹ Nikinawone wandu weingi wekigera mkono kutama mburi ya vindu viokie hetu,

² sandu tuuhie hena wala weokie wewonie na wahiri wa kiteto too kuwoka;

³ mi nami niwonie keba, nikinaratere hena lunyarki viteto vyose too kuwoka, kukutamia we, Teofilo,

⁴ sandu meraterane, nesa uwone kutisiwa kididi cha viteto uviloshijwe.

⁵ Misi yakwe Herode mfumwa wa Uyahudi, heokie na mkara izina lakwe Zakariya, wa siri ya Abia; na mche wakwe eokie wa waana wa kiche wakwe Harun, na izina lakwe Elizabeti.

⁶ Nawo wose weri weokie na ngoro ya kurongeka msongorana wa Izuwa, wekitonga ghati ya kiteto na uwedi wose wa Mzuri, wesiokie na ng’oki.

⁷ Nawo weokie tewena mwana, amu Elizabeti eokie ndasa, nawo wose weri weokie wetonga hae hena misi yawo.

⁸ Haya ikaoka ekihira ndima yakwe ya ukara msongorana wa Izuwa hena lukamba lwa siri yakwe,

⁹ ikamfikia hena ndima ya ukara kufukija ekiingia hekaluni ha Mzuri.

¹⁰ Na matorano mose ma wandu weokie wekiomba shighati hena magheri ma kufukija.

¹¹ Akamfumia malaika wa Mzuri, ekiimuka hena mkono wa kuume wa kisiko cha kufukijia.

¹² Ekinambone akaing’asiwa Zakariya, fole ikamwingia.

¹³ Kake malaika akamburra, Usiituke, Zakariya, amu kuomba kwako kwasikiwa, na mche wako Elizabeti enekuwonia mwana wa kiume, na izina lakwe unemwitanga Yohana.

¹⁴ Uneoka na kuizihirwa na kuisejwa, na wandu weingi weneizihirwa hena kuwoneka kwakwe.

¹⁵ Amu eneoka mbaha msongorana wa Mzuri, tenenywa mawa nete kiengeja; naye eneizujwa na Ngoma Mshenete too ndeni ha mee.

¹⁶ Na weingi ghati ya waana wa Israeli enewagharusha hena Mzuri Izuwa wawo.

¹⁷ Naye enemrongoria hena ngoro na zinya ja Eliya, kujigharusha ngoro ja wawee hena waana wawo, na wala wesisikie hena kucha kwa wandu wekundie uwedi, kumwarehia Mzuri waana wearehike.

¹⁸ Zakariya akamburra malaika, Ninetwarijaze kiteto iki? amu mi ni mughosi, na mche wangu naye atonga hae hena misi yakwe.

¹⁹ Malaika akatalua ekimburra, Nimi Gabrieli, niimuka msongorana wa Izuwa, nami nitumiwe kuteta nawe na kukutindia mburi ii yedi.

²⁰ Yoa, uneoka bubu, usiidime kuteta, mtano musi vineikavifume vindu ivi; amu toitikije we viteto vyangu, vinefishwa hena magheri mawo.

²¹ Na wandu weokie wekimwinda Zakariya, wakarighiwa hena kushesha kwakwe hekaluni.

²² Mtano ekinafume teidima kuteta nawo: wakatwarija ti efumiwe ni kiteto hekaluni: naye mwenye akawakonyia mkono ekiikaa bubu.

²³ Ikaoka misi ya kuhira kwakwe ikinafishwe akatonga nyumbeni hakwe.

²⁴ Kutera kwa misi iyo, mche wakwe Elizabeti akaemea, akakuwisa mieji misano, ekiteta,

²⁵ Ni huwo Mzuri aniketia ghati ya misi ya kuniyoa, kuning’olia soni yangu ghati ya wandu.

²⁶ Na mweji wa katandatu malaika Gabrieli akaingijwa na Izuwa, kutonga kiongo cha Galilaya, izina lakwe Nazareti,

²⁷ ha isiri cokie eowowe na mume, izina lakwe Yusufu, wa nyumba ya Daudi; na izina la isiri eitangwa Maryamu.

²⁸ Akaingia hakwe akateta, Ngezia hako uingiwe mvono, Mzuri nawe.

²⁹ Akaituka muno hena kiteto ikyo, akakusara ni ngezia ani ii.

³⁰ Malaika akamburra, Usiituke, Maryamu, amu wawona mvono ha Izuwa.

³¹ Yoa, uneemea, unewona mwana wa kiume uneitanga izina lakwe Yesu.

³² Uu eneoka mbaha, enemwitangwa mwana wakwe eoho wanga, na Mzuri Izuwa enemwinga kichumbi cha Daudi wawee;

³³ eneitoria nyumba yakwe Yakobo tendarasi, nete kifumwa chakwe tekineoka na kuidiwika.

³⁴ Maryamu akamburra malaika, Kineokaze kiteto iki, amu simmaije mume?

³⁵ Malaika akatalua akamburra, Ngoma Mshenete inekuzia, na zinya jakwe eoho wanga jinekugera mvuri: amu iyo kila kinewonwa kineitangwa Kishenete, Mwana wa Izuwa.

³⁶ Na yoa, Elizabeti mbare yako, naye eemee mwana wa kiume ghati ya ucheku wakwe, na mweji uu ni wa katandatu hakwe eitangwe ndasa.

³⁷ Amu tehena kiteto kisiidimika ha Izuwa.

³⁸ Maryamu akateta, Yoa, mi kamwana ka kibora ka Mzuri, na kioke hangu hena kiteto chako. Malaika akafuma hakwe.

³⁹ Misi ila Maryamu akawuka, akatonga ekisara nduwini mtano kiongo cha Yuda,

⁴⁰ akaingia nyumbeni hakwe Zakariya, akamkezia Elizabeti.

⁴¹ Ikaoka, Elizabeti ekinasikie ngezia ya Maryamu, mwana akatoroka ndeni hakwe, Elizabeti akaizujwa Ngoma Mshenete:

⁴² akateta hena ighonda ibaha, akaghamba, Watasiwe we ghati ya wache, itasiwe ndunda ya ndeni hako.

⁴³ Na kiteto iki hangu chafumahi, mee Mzuri wangu anizie mi?

⁴⁴ Amu ighonda la ngezia yako likinaingie masikioni hangu, mwana akatoroka ndeni hangu hena kuizihirwa.

⁴⁵ Keba naye eitikije, amu vinefishwa viteto vila eviwurrirwe ni Mzuri.

⁴⁶ Maryamu akateta, Ngoro yangu imwisisa Mzuri,

⁴⁷ Na ngoma yangu yaizihirwa hena Izuwa Mukija wangu.

⁴⁸ Amu auyoa udongo wa muzoro wakwe: Amu yoa, too ingeriaha marika mose meneitanga mtasiwe.

⁴⁹ Amu ye mwenye zinya eniarehie mabaha, Na izina lakwe nilo lishenete.

⁵⁰ Na lusario lwakwe hawo wemkundie, Mtano marika mose.

⁵¹ Eareha zinya na mkono wakwe, Awabarasakanya wala wena mafuti ghati ya makusaro ma ngoro jawo.

⁵² Awaseja wabaha ghati ya vichumbi vyawo, Awakweja wafaa.

⁵³ Awaighusha na mawedi wesikie zaa, Awawushija wenye mali wasiwone kindu.

⁵⁴ Amghenja mzoro wakwe Israeli, Ekikumbuka lusario.

⁵⁵ Sandu ewawurrire waapa wetu, Ibrahimu na kuwonwa kwakwe tendarasi.

⁵⁶ Maryamu akaikaa hakwe sandu mieji mitatu, akahunduka nyumbeni hakwe.

⁵⁷ Elizabeti akafisha magheri makwe ma kuwona, akawona mwana wa kiume.

⁵⁸ Na walatya na mbare yakwe wakasikia ti Mzuri enetija lusario lwakwe, wakaizihirwa hamwe naye.

⁵⁹ Ikaoka, musi wa kanane, wakaza kumtawana mwana, wakamwitanga izina la wawee, Zakariya.

⁶⁰ Mee akatalua akateta, Si huwo, eneitangwa Yohana.

⁶¹ Wakamburra, Tehena mundu ghati ya mbare yako eitangwa izina ilo.

⁶² Wakamkonyia wawee, nesa watisiwe ekundie aitangwe izina ani.

⁶³ Akakunda iboho la kutamia, akatama, ekiteta, Izina lakwe ni Yohana. Wakarighiwa wose.

⁶⁴ Likajughuwa itmubu lakwe, na lumi lwakwe chwi ila, akateta, ekimwisisa Izuwa.

⁶⁵ Wakaingiwa ni fole wose weikee mbai na mbai jawo; na viteto ivi vyose vikatetwa ghati ya nduwi jose ja Uyahudi;

⁶⁶ na wose wesikie wakavigera ngoroni hawo, wekighamba, Mwana uu eneoka mwana ani? Na mkono wa Mzuri ukaoka hamwe naye.

⁶⁷ Zakariya wawee akaizujwa na Ngoma Mshenete, akatinda, ekiteta,

⁶⁸ Etasiwe Mzuri Izuwa wa Israeli: Amu awayoa awakombola wandu wakwe.

⁶⁹ Akatuwushijia luhembe lwa lukio: Hena nyumba ya Daudi mundu wakwe.

⁷⁰ Sandu etetie hena itumbu la mroti wakwe washenete: weokie too kuwoka.

⁷¹ Lukio hena maring’a metu, na mikononi hawo wose wetushishirwa.

⁷² Kuareha lusario hena waapa wetu, Na kukumbuka maaghano makwe mashenete.

⁷³ Kiraro ekimrarie apa wetu Ibrahimu,

⁷⁴ Ya kuoka enetuinga, tukikia mikononi ha maring’a metu, Tuwone kumtumikia tusiituke

⁷⁵ Ghati ya ushenete na uwedi msongorana wakwe misi yetu yose.

⁷⁶ Na we, Mwana, uneitangwa mroti wakwe eoho wanga ya vyose: Amu unerongora msongorana wa wusho wa Mzuri uarehe nzia jakwe;

⁷⁷ Uwatisiwije wandu wakwe lukio, Ghati ya kuwushijiwa ng’oki jawo.

⁷⁸ Amu ya lusario lwedi lwa Izuwa wetu, Hawo kuwaiwa kwa wanga kunetufumia;

⁷⁹ Kuwawaiya weikee kijeni na mvurini wa kifwa; Kurongeshija maghu metu ghati ya nzia ya luworo.

⁸⁰ Mwana akaeha, akaneta kuketa zinya ngoroni, akaikaa mashighati, mtano musi wa kufuma kwakwe hena Waisraeli.