Yoel 3 - ASII LAKDAP Bible (BSI)

Shiikeawe Raq Maiqmung Thun Kha Mipho

¹ Tatiwe raq ngutlo, ara akhing na ngi raq Juda mungti nai Jerusalem chelati ma, arong awin maq siwan miitu achu mishman kuqha.

² Kra akhing na ngi raq mangjong hiq na siti maiqmung thun wiita, khapho chang hiqthung tan na mitriitam ha. Kra khapho chang tan kiimaq, tsangshiq raq isengi israilnok, tiichamchao wantaq kra kha mipho ha. Tsangshiq raq isengi israilnok ka, mungrap mungrii na tiipin jobaiq wanto. Raüta tsangshiq raq ihiq ira Israil mung ka, tsangshiq liipan wiita chumtap riiphea wanto.

³ Tsangshiq rewe raq tsangshiq liipan na, Israilnok shumwikong alap wan ka, langlii raüta riiphea phaq wanto. Tsangshiq rewebi raq, maiqwe sere nai jechaksere di ma shaphaq wanto. Raüta jechaksere ka mephe ma tiija wanto. Kiimaq chekok pha na shaphaq wanto.

⁴ “O Tajar mungti nai Sidon mungti lei, kiimaq Philistain mungti lei, namshiq raq ngi ma jamlai phan khü akha thamke wan chang ngtiiwa tankhan tlan? Namshiq raq kiikha tankhan tlan jiila, ngi riimin namshiq ma mithamkuq wan kang! Kherong laq ahea na!

⁵ Jamlai jiq ngukai, namshiq raq itsiiq inyam ikampho ichaqtum thun run wan lanta namshiq phra sumla shomjam thun na phong wan lan.

⁶ Namshiq raq Juda mungti khat lanta tsuq wan. Kiimaq namshiq raq tsangshiq ka pongmung luhea na Grik mungti ma shaphaq wan lan.

⁷ Riita ümchaü sanha ngi raq tsangshiq ka namshiq raq ümriimung niiwa shaphaq lan, kra mung thun wa mirchom wanha. Namshiq raq tsangshiq ka jamkho tiichamchao lan, kiitinkhan hali ngi riimin namshiq ka mitiichamchao wanha.

⁸ Ngi raq namsetiim maiqwesere nai jechaksere thun ka, Juda mungti ma mishaphaq ha. Juda mungti raq namsetiim ka luhea Sabeannok ma mishaphaqbaiq. Arka ngi Tati Shiikeawe raq toqtan tiikang.

⁹ “Maiqmung thun na ara aming tiitai ronglaq. ‘Re riikhat miitu rechap sürii wan rong laq. Namshiq srea nolabi ka triitam hea ronglaq. Namshiq phenlabi ka triitam lanta, rechap tiipha ronglaq!

¹⁰ Nithechang thai pen ka, nepjasai miishe tiiq ronglaq. Kiimaq petsi chong dongnin rip han chang khingkhum kiimin, piqkhu miishe tiisi min ronglaq. Lanta re na kai tiije ronglaq. Namshiq phong na, wepuq wese sitlan kiimin wiita, rekhat kai miitu tiije shat sironglaq.

¹¹ Jaqlo thitthit tiije lanta warong ra. Namshiq Israilnok mung trotam na siti, maiqmung thung lei. Lanta, rekhat chang tan kiina thungtii wanli ronglaq’” nguta Tatiwe raq aming kuqto. O, Tatiwe loi, tiikiliishe na, ümsengi phenlabi thun ka. Laüta re ka khat laq.

¹² “Riita, ümchaü san, maiqmung thun lei, namshiq ka tiije shat chang she dongdii. Lanta Khapho Chang Tan kiijaq thung tiije wanli ronglaq. Kiijaq, ngi Tatiwe ka ngalata, namshiq Israilnok mung tro na siti, maiqmung thun kha kra miphoha.

¹³ Tsangshiq ka abi pinthum, Tsam ka aman she, saikong maq han ronglaq, spiqtsi tiikit chang tham na tiikit ronglaq, spiqtsi tai tsabum min amashe,” nguta Tatiwe raq aming kuqto.

¹⁴ Maiqphong li, maiqphong li, khapho chang Tan na. Maiqphong ka khunyaq khukhi.

¹⁵ Rashekaü kaü min kiimak she, jipikaü min limak she. Ranyaq tangtang li she. Raiqsaiq thun min chhai mak she.

Shiikeawe Raq Asenginok Ma Mishman

¹⁶ Tatiwe raq Jajon hiqlam maq chap raüta hok tlo, Apaiq bomtsi ramoktrang ikha, Jerusalem chela maq mok tlo. Ra ahiq atiikhai banban. Shatmaq Tatiwe apaiq ka asengi tiiwongchang ba, Israilnok miitu peruk weshaü.

¹⁷ Riita namshiq raq ngi dea, Tati namshiq Shiikeawe ka, asii Jajon hiqlam pumkhu thaq na sitiikang nguta sap ronglaq. Jerusalem chela ka asii chela she mija wan. Pongmungti raq kra chela ka niwamak she miraq.

¹⁸ Kra akhing na pum thun ka, spiqro tonglong li she miraq. Kiimaq kin thun ka dut siisaq li miraq. Kiimaq Juda mung wa jükhü thun na, kham ama miraq. Kiimaq Tatiwe jam mong maq, kham miphok. Raüta Wadi Shittim Thung na minyamho.

¹⁹ “Kra akhing na Ejip mung ka athenshe mirki. Raüta kumtsaiphii miishe mijaki. Kiimaq Edom mung ka wiita athen mirki. Raüta hiqmiq changkhü miishe mijaki. Jamkhano ngukla tsangshiq raq, Shiikeawe sengi Juda mungti khatto. Raüta tsangshiq maiqsang mungmaiqse, pahea jiipbaiqto.

^20-21 Ngi raq tsangshiq phuk milamha. Ngi raq matwe thun ka tiihang mang. Krai mren Juda mung na kiimaq Jerusalem na, mungmaiqse ka tuptup she mipuchi wan. Raüta pattup she mishting ngang wan. Kiimaq ngi Tatiwe ka Jajon hiqlam niishe misi wan ha,” nguta Tatiwe raq ngutlo.