Yoel 2 - ASII LAKDAP Bible (BSI)

Kupriipu Ramdong Tsamkuwa Ka Tatiwe Saükai Miithii

¹ Lerong tsü ronglaq. Shiikeawe asii hiqlam maq, Shiikeawe raq atsea wan Jajon hiqlam maq tsü ronglaq. Juda mungti lei atiikhai rokrok phiip ronglaq! Tatiwe khapho wan ranaiq ka saüho tlo she!

² Kra khapho akhing ranaiq ka rathup ranyaq tangtang miraq. Rathaiq ranyaq ranaiq miraq. Ramak min tiichhi mak phum raq mipang ho. Kupchi thawa hiq nyaq tlii maq mipang wan. Raüta raham hiqham miwa wan. Ku akin thaq na phumthup shenyaq raq, pang wan tlaq ikha miraq. Ara thawa akhiika mannii min ahü riito. Jainiimin akhiika chhimai miraq.

³ Ara kupchi thawa arka wak chaq wa raq, rum khiim wan tlaq ikha miraq. Kupchi milong shaq na rum ka Eden sunruk ikha, shamhea shamjii riito. Pechong wiirü ahü shinram shinriiq, rumnyangkhi kumtsaiphii ikha maiqsi maimak. Kupchikong jai niika jamlai pechong wiirü, atra phan ka tiichong mak she.

⁴ Kupchikong ka kumrangkong wa tlaq ikha, kupchikong ka rekhatti kumrang kong jutlaq ikha jutrang tlo.

⁵ Kupchi kong ka kin thaq kiijaq kongtahushhu maq, adoq watrang lea longwan tlo. Rekhatti kumrang leng hitti kong jutrang tlaq ikha jutrang tlo. Kupchi watrang ka, tsamkü wapatwa trang ikha, trangtlo Kupchikong ka rewe watrang ikha, akong ada watlo.

⁶ Kupchikong watrang chhiraüta, maiqse angu kunli phiipraq tsai wanto. Maiqse theaphi tapdali she riito.

⁷ Kupchikong raq rewe watlaq ikha long wanto, Kupchikong ka rewe wa ikha chela peruk komtam maq, kom wantlii long wanto. Kupchi kong ka sinkhu nü na tlintea wawantlo. Tsangshiq walam kongtahuhu klai mak phan.

⁸ Kiimaq tsangshiq khum lam jong na, tsangshiq liipan na riithu riiliiq riimak. Tsangshiq raq makki na jamlai wa hum wan tlaq, Kra wiita pat wan tlii wawan tlo. Tsangshiq ka juwe riimin shangta lotmak.

⁹ Tsangshiq raq chela kiimin teimak longliiq wantlo. Tsangshiq raq chela peruk jinwan tlo. Tsangshiq raq maiqjam maiqwak kra, wiita bok wan tlii wawantlo. Rongkhü kilü pu thun kiimaq, ahuk nyap wan ikha, maiqjam mong na tiiphong miitsok.

¹⁰ Tsangshiq longwan kiijiila hiq atiikhai banban. Ra dea min atiikhai banban lishe. Ra min kiikuq mak she. Jipi min likuq mak she, ranyaq tangtang lishe. Raiqsaiq dea min chhaikuq mak she.

¹¹ Tatiwe raq asengi kupchi re ma, aho anyi waliishe aming kuq wantlo. Asengi kupchi re raq apaiq aming taitlo. Asengi rewe ra ma hiq ma, kiimaq srea nola ahong ala. Tatiwe ranaiq ngutlaq pinthum phiiptsi chang. Ara khapho rung wa juro mitiichhii lot?

Mra Tiidii Miitu Tsiichong

¹² Shatmaq Tatiwe raq ngutlo, Ümchaü li jiimin namshiq raq riikhaqli maq, amang maq makphai trok lanta aho ajü achu jaü rong laq, lanta ngarai tiidii lanta, ngi phana jang wan rongra,

¹³ Namkhu namkhea chailanta riimak, namtsantsii ka chai lanta, Warong ra, jang wan ronglaq nam Tati Shiikeawe phana. Apaiq pinthum ka mangchan rümtiwe. Apaiq ka pinthum anin wantiwe. Apaiq kiqkham ka tiipoi mak phan. Apaiq ka shokkhot nokhot tsiiti, mra kechang lam wa tsii klaitlo.

¹⁴ Jursap namshiq Tati Shiikeawe raq, apaiq tsantsii kiiwa klai wan jiiq riila, Raüta namshiq ka rongboq jawan miitu, ramram jaqsham misham kuq wan. Kriishe nguraü ka namshiq raq apaiq ma, tü atsam honglu mikuq wan han.

¹⁵ Jajon hiqlam maq lerong tsürong laq. Lanta mungmaiqse ka adam mirtam laq, dungsea tlea achu jaü aming kuq ronglaq!

¹⁶ Mungmaiqse triitam ronglaq, mungmaiqse tiisiidii ronglaq, nyungwere riichom ronglaq. Nosere kiimin pünyangtibi kiimin, riichom rong laq. Maita riilamnye kiimin, maiqmii tap ka lilanta dong ronglaq.

¹⁷ Ramwebi tombu tiip shomjam na, Tatiwe shomnoq jaqshamti, berong-wacha nai Shomjam kilamchong na, jaqshamti min, wiita triitam hea ronglaq. Lanta makphai khüshang maq achu jaü ronglaq. “O Tatiwe lei, ümsenginok khuthaq na, mangchan tsantsii thülaq, pongmungti ma naishiq ka naq tiishummiikiq. Tsangshiq ma naishiq ka, ‘Namshiq Shiikeawe ka ümbano?’ nguta, naq tiisaisikiq,”

Shiikeawe Raq Israil Mung Ka Hiqpo Hiqwin Ma Tiija Nongto

¹⁸ Kra riikiitiishe Tatiwe raq asenginok mangchanto. Apaiq raq asenginok khuthaq na, tiihang wan mangchan tsii tiichhikuqto.

¹⁹ Apaiq raq tsangshiq achu jaü treto. Tatiwe raq treto: “Ümchaü san ngi raq namshiq ma, püwong, kiimaq spiqtai, oliptsi tai pahea she, mishman kuqha. Namshiq ka chojong chise miishe, mishong nga wan han. Pongmungti raq nashiq tsaihai mak she miraq.

²⁰ Ngi raq kupchi sawa hiqkhu nü, mung maq asaü wan kra, ajoshe mirbaiq ha. Ngi raq kupchikong wiijam ka, rumnyangkhi kumtsaiphii niishe mitsuq baiq ha. Kupchi kongla ma lamsheati kong ka, Ama Khamjong chum mong niishe mitsuq baiq ha. Tsangshiq ma jai na rewatikong ka, Mediterenian Khamjong chum mitsuq baiqha. Tsang maa ka hiq ma rama minam wan. Ngi raq tsangshiq ka tiisiirai mijiipbaiq ha. Namshiq tiichamchao wantaq kha na.

²¹ “Ai, hiqkhu rakhu lei naqhai rongkiq, shatmaq kai chochi ronglaq, ümkhiiwa nguraüla, Tatiwe raq namshiq ma jaqsham jonghea klotlo.

²² Rumngam saü ngiqse lei, naq tiima rongkiq, Namshiq dungchang nyiimlung tümlüm tümli she. Pechong wiirü atsi ango, Phupmup nai spiq tsi min, atu alu.

²³ “Jajon saünai setiim lei, pinthum chochi ronglaq. Namshiq Tati Shiikeawe raq, namshiq miitu shamkuq wantaq, kai khoqriiq ronglaq. Apaiq raq liidong wan rajun min akhing riikhaqli na kuqto. Kiimaq ralii rajun min hongli tiisaü kuqto. Kiimaq lamsesat jun min riikhaqli kuqto.

²⁴ Raüta namshiq khaolüm phong chang niimin, tsam ka hiqlam kaütiim ikha, tsamphong raham hiqham. Spiqtsi tiikit wanchang longtham kaü min, long piikhaü tiim, alüm alei che nai olip petsi tsai raq ama.

²⁵ Kupchilong thawa akhing rawii liipan, namshiq raq tü atsam sumwan lan, wiita mijang kuq wan nongkang. Ngi raq tiina kupchi ramwa, namshiq phana tiisaü wan kang.

²⁶ Ümchaü namshiq ka rongboq she, mishongnga wan han. Namshiq raq nam Tati Shiikeawe mitiitsam kam han. Apaiq raq namshiq ma amao chang jaqsham kuqto. Namshiq ka chojong chise miishe misi han. Isenginok ka jurmin shummii mak she.

²⁷ Kra akhing niishe, Israilnok lei, namshiq raq, ngi ka namshiq rai adam miidea sitiikang nguta misap han. Kiimaq namshiq raq, ngi namshiq Tati Shiikeawe ka ardea, Kiimaq ngi tea raüta, ahin shiikea ahü nguta misap han. Israilnok ka maiqmung ahinti raq, saisi mak she miraq.

Tatiwe Ranaiq

²⁸ Arjai niishe, ngi raq iwenyi ka isenginok khuthaq na miraükuqha. Kra akhing namsetiim maiqwesere, kiimaq jechaksere raq riisham bom maq itsütsa ka, chiiriim raüta michongkuq wan. Namwetiim tikiibi riimin rawa ma maq michhi wan. Kiimaq namsetiim jerobi riimin, riisham mak maq michhi wan.

²⁹ Kra akhing ngi raq iwenyi ka namshiq jam na, jechaksere maiqwesere jaqshisetiim miimin, asii wenyi miraükuq ha.

³⁰ “Kra saü tlaq ranaiq niika, ra na nai mangjong hiq thaq na, awangchang tiijai, wa, kiimaq phumthup mitiichhikuqha.

³¹ Ara pinthum phiiptsi chang nai kiinyiichang Tatiwe ranaiq misaü shaq na, rashekaü ka minyaqki. Jipi min tiijai ikha miklaiki.

³² Kiijiishe jurwa Tatiwe mang chong tlaq, kriiti thun mitiichhii wan. Arka Tatiwe raq, ‘Jerusalem wa ngi raq tsea wan kang thun mitiichhii wan,’ ” ngutaq kra phanphan miraq.