WEAWEA 9 - ASII LAKDAP Bible (BSI)

Thongnai Ngoja Tiichhiiwan Poi

¹ Tatiwe raq Mosheq ma nguto Sinai Kumtsaiphii wang maq Israilnok ka Ejip mung wa laü wan li maq wiinai she angu na kra rawii wa jipi pha wan lü na. Apaiq raq nguto,

^2-3 “Ümchaü jipi lü awa raroqshi ri rablai angu ranaiq na, rashe nyap wan pha raü na, Israilnok raq thungtri phan phan kiimaq aming thun na chongtlaq kra phan phan Tiichhiiwan Poi ka klo wan chang.”

⁴ Kra ningkhan Mosheq raq Israilnok ma Tiichhiiwan Poi ka klo wan chang nguta chongkuqto.

⁵ Krai mren, rawii pha wan apha jipi lü wa raroqshi ri rablai angu ranaiq raji na Sinai Kumtsaiphii wang maq Tiichhiiwan Poi ka kloto. Tatiwe raq Mosheq ma aming kuqtaq kra phan phan mung maiqse raq kloto.

⁶ Shatmaq tsangshiq phong na maiq wiijamti ka maiq maa na tiithan kha na apii ashe riito. Kra ningkhan tsangshiq raq kra ranaiq na Tiichhiiwan Poi ka klo wan lot mak dea riito. Kra ningkhan, tsangshiq ka Mosheq nai Aron phana wato.

⁷ Raüta akha nguto, “Naishiq raq maiq maa ka shamkai. Kra ningkhan naishiq ka apii ashe. Shatmaq naishiq ka ahinti Israilnok rai Tatiwe ma hongluke chang wa jaram tangta baiq wa?”

⁸ Kiijiishe Mosheq raq treto, “Ngi raq Tatiwe jaq wa kiq tiidea bomtsi kra milapha sha wiiwii namshiq ka akheli ronglaq.”

⁹ Kiijiishe Tatiwe raq Mosheq ma chongto

¹⁰ Israilnok ma bom ka akha chongkuqlaq nguta, “Ümtiikiiwa namshiq phong wa maiq weshi ra ka, riimakla namsaü namsetiim ka maiq maa shamki raüta apii ashe raüla, riimakla maiq hiq na wanhiq khum aluwiq na cha raüla, shatmaq Tiichhiiwan Poi kra lang wan ro raüla,

¹¹ namshiq raq kra poi ka jipi lünai she angu na raroqshi ri rablai raji ranaiq niika riimak, shatmaq jipi lüshi jai na kra poi ka klo wan mimai. Poi ka pi maq shohü winsii nai akhapwiq phan sangphii phaq lanta lang ronglaq.

¹² Kra phaqsiqtlan tü adung ka anap ranap na saüli tiichong thü raa mak. Kiimaq kra nyamse phaq tlan ka arok arii thun ka ashi min tiingoq maimak. Tiichhiiwan Poi ka thungtri na chongtlaq kra phan phan wiita klo lanta lang ronglaq.

¹³ Shatmaq juwa akhum ka asii taü maq kiimaq apaiq ka wanhiq khum lam na riimak, shatmaq apaiq raq Tiichhiiwan Poi ka lang mak raüla, kriiwe ka isengi nguta wea dam maimak she. Jamkhano ngukla apaiq raq kra akhing ranaiq na Ngi ma honglu kuqwa mak riito. Apaiq raq ngarai tangtaq kra miitu apaiq ka chamchao raa dongdii she.

¹⁴ “Kiimaq namshiq phong na pong mungti sitlaq kriiraq Tiichhiiwan Poi ka lang wan lungwiitlaq jiila, apaiq raq thungtri na chongtlaq kiimaq aming thun na chongtlaq kra phan phan klo ratlo. Tri ka wiitarü miitu adamli. Noktiwe lo kiimaq pong mungti lo.”

Waniitu Phumda

^15-16 Tatiwe asi Tombutiip ka chan wan akhing ranaiq na, phumda kaü ka sat kito. Raüta tiip ka wiita pang baiqto. Rawa niika kra phumda kaü ka watu kaü ikha riito.

¹⁷ Ümra akhing niiwa phumda kaü ka ra na wawan tlaq, Israilnok raq tsangshiq piitiip ka run wantlo. Raüta laü wantlo. Kiimaq lam na ümriibano phumda ka satkitlaq, kiijaq tsangshiq raq piitiip ka tei wantlo.

¹⁸ Tatiwe aming maq Israilnok raq tsangshiq piitiip ka run raüta laü wantlo. Kiimaq Tatiwe aming maq tsangshiq piitiip ka tei wantlo. Kra phumda kaü ka tombutiip khuthaq na sishat wiiwii, tsangshiq ka kra piitiip na siruqli sitlo.

¹⁹ Ümtiikiiwa phumda kaü ka tombutiip khuthaq na rahiq aluwiq sijiiq, raümin tsangshiq raq Tatiwe aming kra taitlo. Kiimaq tsangshiq ka kriiwa laü wan mak sitlo.

²⁰ Jangshishi ka phumda kaü ka Tombutiip khuthaq niika ranaiq naitsam miituli sitlo. Tsangshiq ka piitiip niili sichang lo, kiimaq alaü wan chang lo, Tatiwe raq aming kuqtlaq kra phan phan li tsangshiq raq klotlo.

²¹ Kiimaq jangshishi niika phumda kaü ka raji maq riita anap ranap na saüli sitlo. Krai mren tsangshiq min phumda kaü ka wawan ri li she kriiba wa laü wantlo. Phumda kaü ka ümtiikiiwa wa wanjiiq, kiitiikaq tsangshiq ka laü wantlo.

²² Krai mren, ranaiq nai li lo, jipi lüshi lo, kiimaq wiishi lo, riimakla kriithaq na alu sichang lo, phumda kaü ka Tombutiip khuthaq na sishat wiiwii, tsangshiq ka laü wan mak. Shatmaq ümtiikiiwa phumda ka wawantlaq, raüla tsangshiq kiimin laü wantlo.

²³ Tsangshiq raq piitiip tei wan chang sha, piitiip run wan chang wa, kriika Tatiwe raq Mosheq ma aming kuqtlaq kra phan phan, aming wokhong maq, tsangshiq raq klo wantlo.