WEAWEA 8 - ASII LAKDAP Bible (BSI)

Lem Thun Kra Tiinyai

¹ Tatiwe raq Mosheq ma nguto,

² “Aron ma chonglaq, ümtiikiiwa apaiq raq lem setiim miishi kra atochang khamchong kiijaq totlaq akhing na lem li raq khaki nü siim kra liliim chang mitiinyailaq.”

³ Krai mren, Aron raq aming kuqtaq kra phan phan, lem setiim ka lem khamchong khaki nü siim kra liliim chang toto.

⁴ Lem khamchong ka akhupo maq riita hiq jichong na saüli chaq ngam maq alo. Arka Tatiwe raq Mosheq ma ariikom sü raüta tiichhi kuqtaq kra phan phan shiipan püsetiim ikha tiiqto.

Lewinok Khum Tiisii Wan Nai Khum Kiinong Kewan Jaqsham

⁵ Tatiwe raq Mosheq ma nguto,

⁶ “Lewi phan ka Israilnok mung maiqse phong wa pong na raithülaq. Laüta tsangshiq khum ka atiisii riilaq.

⁷ Arka akha tiisiilaq: tsangshiq khum na phumram kham maq bat laüta tiisiilaq. Kiimaq tsangshiq ma tsang khum tlotli wa abin ka asi riibaiq ronglaq kiimaq tsangshiq khu akhea thun ka kham maq he ronglaq nguta chonglaq. Kra raüla tsangshiq ka apii chang ahü asii she miraq.

⁸ Kra raütiishe tsangshiq raq minsaü pongwe arese kra lam wan chang, kiimaq tri na chongtlaq kra phan phan wong-honglu bunwong win olip tai rai shotje kra lam chang. Kiimaq ümniiraq minsaü pongwe ashi ngarai-honglu na kechang kriili lam wan chang.

⁹ Laütiishe Israilnok mungmaiqse tlotli ka adam na triitam laq. Kiimaq Lewinok ka Ngi asi Tombutiip khaki na tiichap laq.

¹⁰ Raüta Israilnok raq tsangshiq jaq ka Lewinok khupo na tiida chang.

¹¹ Kiijiishe Aron raq Lewinok ka Israilnok raq Ngi ma akhek atiitsang kongphiq akuq ikha mikiinong kuqlaq. Kriika tsangshiq raq ijaq shamke miitu.

¹² Kiijiishe Lewinok raq tsangshiq jaq maq minsaü pongwe nai khupo na misham. Kiiwa pongshi ka ngarai-honglu na take chang kiimaq pongshiti ka chaqtlii-honglu na kechang. Arka Lewi phan khum tiisii wan miitu khuliiq.

¹³ “Lewi phan ka Ngi miitu akhek atiitsang kongphiq ma kiinong kuq laq. Kiimaq Aron nai asetiim ka tsangshiq khuthaq na asheati ma shong laq.

¹⁴ Lewi phan ka Israilnok phong wa akha pong na tsea thülaq. Krai mren tsangshiq ka Ngi riishe miraq.

¹⁵ Ümniiraq Lewi phan khum ka tiisii wan jai, kiimaq tsangshiq ka Ngi ma kiinongke wan jai she, tsangshiq ka Tombutiip na jaqsham miitu riikhaqli she miraq.

¹⁶ Ngi raq tsangshiq ka Israilnok chhikhu setiim rii niishe Ngi rii nguta rai wan kang. Krai mren, tsangshiq ka Ngi rii li she dongdii.

¹⁷ Ümtiikiiwa Ngi raq Ejip mungti chhikhu setiim maiqwe sere tsat baiq wankang akhing na, Ngi raq Israilnok takitek wa maiqwe sere chhikhuse thun kiimaq jam nyamse chhikhu setiim thun ka Ngi riishe nguta iram kham maq tiibok wan kang.

¹⁸ Ngi raq ümchaü ka Israilnok chhikhu setiim kra la na, Lewi phan kriishe Ngi rii nguta lam wan tiikang.

¹⁹ Kiimaq Ngi raq Lewi phan ka Aron nai asetiim ma Israilnok raq akuq kongphiq ma kiinong kuq tiikang, tsangshiq ka Israilnok miitu Tombutiip na jaqshamke ma kiimaq Israilnok ka Asii Khok tho jehea na warai raüjaq, phiiptsi jiiptsi tsai rai chang wa tiiwongke wan miitu shong wan tiikang.”

²⁰ Krai mren Mosheq, Aron, kiimaq Israilnok raq Tatiwe raq Mosheq ma aming kuqtaq kra phan phan Lewi phan ka Tatiwe ma kiinong kuqto.

²¹ Lewinok raq tsangshiq maiqmii khum ka tiisii wanto. Kiimaq tsangshiq khu akhea thun kra kham maq heto. Kiimaq Aron raq tsangshiq ka akhek atiitsang kongphiq Tatiwe miishe kiinong kuqto. Kiimaq apaiq raq tsangshiq khum ka asii ma tiija wan miitu phum ram kham maq batto.

²² Tatiwe raq Mosheq ma Lewinok miitu jamkho aming kuqtaq kra phan phan mung maiqse raq klo wanto. Krai mren, Lewi phan ka Tombutiip na Aron nai asetiim wokhong maq jaqsham wan miitu asii she riito.

²³ Tatiwe raq Mosheq ma nguto,

²⁴ “Lewi phan wa maiq loweatek ka arawii wiiroqnai ri wiibiingi maq phaho raüta Ngi asi Tombutiip na apaiq jaqsham chang sitlaq kra misham.

²⁵ Kiimaq arawii wiiroq biingi she la saü raüla, ajaqsham ka athaq she miraq.

²⁶ Kra jai miishe ka, apaiq raq anok Lewi phan ka Tombutiip na jaqsham tlaq kra khrumke mimai. Shatmaq apaiq raq pumsii maq Tombutiip na jaqsham kainong maimak she. Ümniiraq Lewinok jaqsham ka akha tri wokhong na thü wan ratlo.”