WEAWEA 7 - ASII LAKDAP Bible (BSI)

Welabi Raq Kechang Honglu Thun

¹ Ranaiqshi Mosheq raq Tatiwe asi Tombutiip kra chan lotto. Raüta Tombutiip nai kiijaq lang chang ta awii thun kunli kiimaq berong-wacha kiimaq krai lang chang hupsam thun kra ramkham tel maq nyatto. Raüta Tatiwe ma kiinong kuqto.

² Kiijiishe Israilnok maiq phan ümchuwa sitlaq kra khuthaq na aphan mungtubi, juwa maiq wea wan jaqsham arang hotibi thun raq,

³ tsangshiq raq Tatiwe ma kechang honglu thun kriishe lam wanto: Kriika hit-leng trok, kiimaq minsaü pong wetiim roqshiri anai, wela wenai miitu hit-leng ashi ashi lam wanto. Tsangshiq raq arthun honglu ka kewan jai she,

⁴ Tatiwe raq Mosheq ma nguto,

⁵ “Arthun kongphiq ara ümniiraq taolaq. Laüta Tombutiip na jaqsham miitu thülaq. Laüta arthun arka Lewinok ma tsangshiq jaqsham chang sitlaq kra tiiphan phan kuqlaq.”

⁶ Krai mren, Mosheq raq hit-leng thun nai minsaü pongwetiim ka Lewinok ma kuqto.

⁷ Apaiq raq Gershon phan miika hit-leng anai kiimaq minsaü pongwetiim blai kuqto.

⁸ Kiima hit-leng blai kiimaq minsaü pongwetiim tiichat ka Merari phan ma kuqto. Tsangshiq jaqsham chang ümchuwa sitlaq kriika Aron se Ithamar aming miitiq sham chang riito.

⁹ Shatmaq Mosheq raq Kohathaiq phan miika hit-leng thun wa kiimaq minsaü pongwetiim kiiwa ashi min kuq mak dea, Jamkhano ngukla tsangshiq raq asii hupsam thun shiikum pantlaq thun kriika tsangshiq raq phaq na siisaq pi chang.

¹⁰ Kiimahali welabi riika berong-wacha kra kiinong kewan akhing na lang chang honglu thun kiimin kuq wanto. Ümtiikiiwa tsangshiq ka berong-wacha na tsangshiq kongphiq thun kra kewan akhing na saütaq,

¹¹ Tatiwe raq Mosheq ma nguto, “Tsangshiq ma, raroqshi ri ranaiqnai liipan na welabi phong wa, weshi shi raq, apaiq kongphiq ka berong-wacha kra kiinong kewan miito kechang nguta chonglaq.”

^12-83 Tsangshiq raq tsangshiq honglu thun ka akha kuq wanto: Aranaiq Maiq phan Welawe apha ranaiq na Juda phan wa Amminadab se Nahshon raq ranaiqnai ngoja na Isakar phan wa Juar se Nethanel raq ranaiq tsam ngoja na Jebulun phan wa Helon se Eliab raq rablai ngoja na Reuben phan wa Shedeur se Elijur raq rabiingi ngoja na Simeon phan wa Jurishaddai se Shelumiel raq ratrok ngoja na Gad phan wa Deuel se Eliasaph raq ramiishi ngoja na Ephraim phan wa Ammihud se Elishama raq ratiichat ngoja na Manase phan wa Pedahjur se Gamaliel raq ratiikaü ngoja na Benjamin phan wa Gideoni se Abidan raq raroqshi ngoja na Dan phan wa Ammishaddai se Ahiejar raq raroqshi ri ranaiq shi ngoja na Ashar phan wa Ochranse Pagiel raq raroqshi ri ranaiq nai ngoja na Naphtali phan wa Enan se Ahira raq. Maiq loweatek raq kuq wantaq honglu thun ka mren adam dam siisaq: kampho maq alo nüchhong pinpo ashi alaiq nü na 1.5 kilogram kiimaq kampho maq alo lairap hechang pin alaiq nü na 800 gram, arka mung raq langtlaq tok maq ashin, kra wiinai ka bunwong win ka tel rai shot raüta malili chhaq wong-honglu miitu; chaq winpin ashi alaiq nü na 110 gram, kiijaq homseng ka tuptup; minsaü pongwe arese ashi, sku pongre se ashi, kiimaq arawii wiishi skuse ashi, kriika chaqtlii-honglu miitu; ngarai-honglu miitu chhechhi ashi; kiimaq minsaü pongwe anai, sku pongre setiim biingi, chhechhi biingi, kiimaq arawii wiishi shi skusetiim biingi kriika rintii-honglu miitu.

Aranaiq Maiq phan Welawe

^84-88 Welabi roqshi ri wenai raq berong-wacha kiinongke miitu honglu thun akuq wan tlotli ka achu riito: kampho maq alo nüchhong pinpo roqshi ri anai kiimaq jaqhe chang kampho maq alo nüchhong pin roqshiri anai. Arthun tlotli shin kiita 27.6 kilogram riito chaq winpin roqshi ri anai, kra shinkiita tlotli ka 1.32 kilogram riito. Arthun na homseng ka tuptup riito minsaü pongwetiim roqshi ri anai, sku pongre setiim roqshi ri anai, kiimaq arawii wiishishi sku setiim ka roqshi ri anai, arthun ariirai wong-honglu kedam chang sitlaq krai nongnong maq chaqtlii-honglu ka kuqtlo ngarai-honglu kechang chhechhi ka roqshi ri anai minsaü pongwetiim roqnai ri blai, sku pongre setiim roqtrok, chhechhi ka roqtrok, arawii wiishishi skusetiim ka roqtrok, arka rintii-honglu miitu

⁸⁹ Ümtiikiiwa Mosheq ka Tombutiip mong na Tatiwe rai riibom wa wawantaq, apaiq raq Tatiwe ka Tongshong Tek pang chang hap kriithaq maq cherubim kaü nai chaptlaq heawea maq apaiq rai riibomdam ka taito.