WEAWEA 6 - ASII LAKDAP Bible (BSI)

Najiraiq Phan Miitu Thungtri

¹ Tatiwe raq Mosheq ma aming kuqto.

² Israilnok ma arthun thungtri ara chong kuqlaq nguta. Maiq weshi ra lo jechak nyung shi ra lo, ka Najiraiq phan ma jawan rotiikang nguta sin khamtlaq raüta akhum ka Tatiwe miishe kiinong kuq raüla,

³ apaiq raq che nai chetho ka nyang maimak. Apaiq raq spiqtsi tsai maq aklo che ngusaq kiimaq spiqtsi kiimin sea maimak riimakla spiqtsi shin kriimin phaq maimak.

⁴ Apaiq ka Najiraiq phan ma jaraüta sitlaq wiiwii, spiqtsi tsai maq aklo phan ka apaiq raq phaqsea maimak. Spiqtsi alai kriimin kiimaq spiqtsi khü kriimin phaqsea mai mak.

⁵ Apaiq ka Najiraiq phan sinkham wokhong na sishat wiiwii, apaiq raq akhu ka si maimak. Kiimaq anü bin kiimin sibaiq maimak. Apaiq khum ka Tatiwe ma kiinong kuqtaq kra sinkham wokhong niili si ratlo. Krai mren, apaiq raq akhu nai anübin ka tlu wan ruq miili si chang.

^6-7 Apaiq khu alu thütlaq kriika apaiq raq akhum ka Tatiwe ma kiinong kuqtaq kra saqse miithii. Kra ningkhan apaiq raq akhum ka maiq maa tho na ki raüta tiishe shi baiq maimak. Awe nai anyung, kiimaq aphu ano riimakla ano jechakse tsaiki raü min kai maimak.

⁸ Apaiq ka Najiraiq phan ma jashat wiiwii, apaiq khum kriika Tatiwe ma wiita akiinongke reawi she.

⁹ Kiimaq apaiq Najiraiq asii khudap kra maiq ashi ra tiidong chhaq miili tsaikai kha na, apaiq ka kriiwe tho na asi, ningkhan akhu ka sheki raüla, apaiq raq ramiishi khechang. Raütiishe akhu nai anübin kra sibaiq ratlo. Kra raütiq apaiq khum ka asii she miraq.

¹⁰ Raüta ratiichat ranaiq niishetiq apaiq raq haütaü kaünai riimakla paro kaünai kra lam wan raüta, ramwe ma Tatiwe asi Tombutiip kilam chong na kewa chang.

¹¹ Raüla ramwe raq kaü shi ka ngarai-honglu na mikuq. Kiimaq kaüshiti ka chaqtlii-honglu na mikuq. Raüta ramwe raq apaiq khum maiq maa na tiithan kha ashe jakitaq kra tiisii wan mrochhi jaqsham kra miklo. Kra ranaiq sii hali kriiwe raq akhu dap ka thongshi ri hali kiinong kewan nong ratlo.

¹² Kiimaq apaiq akhing ka Tatiwe ma thongshi ri hali Najiraiq phan ma jawan miitu kiinong kewan nong ratlo. Kongkhu lak na apaiq khum kiinong kuq wantaq kra akhing lea wantaq kriika wea mak she miraq. Jamkhano ngukla akhu asii athü wan kriika atiishe shi riiwanto. Kriikha na apaiq raq thongshiri athamke honglu arawii wiishi skuse ka ke wan chang.

¹³ Ümtiikiiwa Najiraiqwe raq apaiq sinkham akhing kriishe khoi raüla, apaiq raq sinkham shiikhoi akhing ka milam. Apaiq ka Tombutiip na wachang kilamchong kiiniishe miwa.

¹⁴ Raüta apaiq raq Tatiwe ma nyamse atsam ami atsi ahü nyeajokjok kra honglu na kechang: arawii wiishi skupong se ka chaqtlii-honglu miitu, arawii wiishi skushii arese ka ngarai-honglu miitu, kiimaq skupongre se ka rintii-honglu miitu kechang.

¹⁵ Kiimaq apaiq raq taükok shi pi maq shohü maq alum winsii thun: atheawiq bunwong win na olip tai maq shot raüta ako winsii thun kra, kiimaq biskut olip tai maq nyat je thun kra, kiimaq arthun arthaq na ratlaq bunwong win nai spiqtai honglu thun kriimin kechang.

¹⁶ Ramwe raq arthun ara Tatiwe ma mikuq raüta ngarai-honglu nai chaqtlii-honglu thun kra mikuq.

¹⁷ Apaiq raq sku pongre se ka Tatiwe ma rintii-honglu na mitaa kuq. Kiimaq kriirai taükok shi winsii kiimin honglu na mikuq dam. Kiimaq apaiq raq bunwong win nai spiqtai honglu kriimin mikuq dam.

¹⁸ Raüta Najiraiqwe raq Tombutiip na wachang kilamchong tho kiijaq apaiq khu kra misi. Raüta akhu dap kra rintii-honglu chaqtlaq wa kiijaq michaq.

¹⁹ Raütiishe, ümtiikiiwa skupongre se aphaq hok ngam ka tak na kham maq lumtlaq kra ja raüla, ramwe raq kra milam, raüta winsii atheawiq taü kok mong kiiwa ashi kiimaq taü kok mong wa biskut ka ashi kra tsun raüta kriithun ka adam na, Najiraiq phanwe jaq niishe mikuq.

²⁰ Kra jai niishe, ramwe raq kriithun ka Tatiwe ma akhek atiitsang kongphiq miishe mikuq. Arthun arka pinthum asii honglu ngamrea ramwe rii. Arka skupongse ngam wa akhuk ngam nai ahok pe ngam thun arka tri maq ramwe rii dongdii thütlaq kriithaq niishe tiitsuq kuqtlo. Arthun ara pii tiishilot jai shetiq Najiraiq phanwe raq spiqtai ka anyang mimai.

²¹ Arthun thungtri arka Najiraiq phan miitu. Shatmaq Najiraiq phanwe raq apaiq raq sinkham wantaq tri maq arthun honglu ara kewan jai niimin, achan mikuqha nguta akiqkham wantaq jiika, apaiq raq jamkho kiqkham wantaq kra phan phan tiikuwan ratlo.

Ramwe Ramram

²² Tatiwe raq Mosheq ma aming kuqto.

²³ Aron nai asetiim ma arjaq waiqtaq bomtsi ara bom raüta Israilnok ma ramkham ka tiibok kechang nguta chongto. Arka akha:

²⁴ Tatiwe raq ümniidea mishmanlaq kiimaq ümniika mishkum panlaq;

²⁵ Tatiwe raq ümniidea mimang chanlaq kiimaq ümniidea mikaphaplaq;

²⁶ Tatiwe raq ümniidea loptlii miliilaq raüta ümniika hansang maq mithülaq.

²⁷ Kiimaq Tatiwe raq nguto, “Tsangshiq raq imang chong raüta Israilnok ma, ramkham ka tiibok kuq raüla, Ngi raq tsangshiq ka mishman kuqha.”