WEAWEA 5 - ASII LAKDAP Bible (BSI)

Maiq Ashe Ashiti Thun

¹ Tatiwe raq Mosheq ma nguto,

² “Israilnok ma aming kuqlaq, namshiq piitiip mong wa maiq thabitsiti, riimakla akhumwa ashe kham dongtlaqti kiimaq maiq loweatek juwa maiq amaa dü na tiithantaqti maiq thun ka piitiip wa kinphai na jobaiq ronglaq.

³ Ara tsangshiq khum na apii ashe phan asi maiq kong thun ka wiita chiiphai na tiikibaiq ronglaq. Kra riihantiq tsangshiq raq Ngi isenginok rai sidam tiikang piitiip ka tiisheshi mak miraq.”

⁴ Krai mren, Israilnok raq ara aming ka langto. Raüta maiq ashe ashiti thun ka piitiip mong wa chiiphai na jobaiqto.

Ashut Kloti Raq Akha Ka Adok Chang

⁵ Tatiwe raq Mosheq ma

⁶ arthun tsii chong bomtsi ara Israilnok ma chongkuqlaq nguta aming kuqto. Ümtiikiiwa maiq ashi raq Tatiwe wokhong wa dongho raüta maiq ashi ra khuthaq na ashut klo raüla,

⁷ apaiq raq apaiq mra ka atiidii ratlo. Raüta apaiq kha tham ka kunli adok ke ratlo. Kriithaq na achan shishi khu na roqnainai amet kuq raüta akha ka juwe mo shuttaq kriiwe ma dokke ratlo.

⁸ Shatmaq kriiwe ka atsai kaiwishe jiila, kiimaq ata awii maiq ahinti kra khadok thamke tsiiq jaü phaqti maiq ahü she raüla, kra kha tham tsiiq ka Tatiwe ma ramwe miitu kechang. Ara khadok arka khum tiisii wan miitu ashutwe raq apaiq mrochhi khum tiisii miitu skupongwe kuqtlaq kriithaq na tiitsuq kechang miraq.

⁹ Kiimaq Israilnok raq akhek atiitsang kongphiq Tatiwe ma kuqtlaq thun kriika, tsangshiq raq ümriiti ramwe jaq niiwa kra kongphiq ka kuqtlaq kriiwe riishe miraq.

¹⁰ Ramwebi loweatek raq apaiq jaq na jamlai honglu wa kuqtlaq kriika apaiq riishe mithüho.

Ata-nyungre Ma Tsangwetiim Raq Sethoq Ja Kha Nyan Raüjaq

¹¹ Tatiwe raq Mosheq ma aming kuqto

^12-14 Israilnok ma arthun tsii chongke bomtsi ara chongkuqlaq. Bom ka akha moraqli miraq. Awese raq ata-nyung ka apaiq shummii raüta maiq rai kiicham kito, raüta apaiq khum ka tiisheto nguta kha mo-nyanli miraq. Shatmaq tsangwe riika riikhaqli ka sap mak. Jursap tsang-nyung raq kra bomtsi ka apaü raüta mothü min moraq miraq. Kra chhiti ka maiq saqse jumin ahü. Kiimaq tsang-nyung ka kra maiq rai sra rai tlaq akhing na jurmin chhimak dea. Riimakla, tsangwe ka tsang-nyung ma khahü na atsan ka motiikan sea moraq li miraq. Tsang-nyung riika tsangwe ma jamlai shut phit min klo mak shatmaq kha mo-nyan li miraq.

¹⁵ Akhnok kha she nguraüla, tsangwe raq tsang-nyung ka ramwe phana shea wan chang. Kiimaq apaiq raq tri na chongtlaq kra phan phan honglu kechang jaili wongwin kilogram shi lam wan ratlo. Shatmaq apaiq raq olip tai ka kriijaq nyuk raamak. Riimakla kiijaq jamlai homseng min thiidam maimak. Jamkhano ngukla arka awese raq tsang-nyung ma tsan tiikan kha nyantlaq kra miitu, tengtlaq bomtsi kra tiidong khot ma akuq honglu.

¹⁶ Ramwe raq jechak nyung ka sheawan raüta berong-wacha khaki na mitiichap.

¹⁷ Raüta apaiq raq asii kham kiiwa wiijam ka lam raüta hamlii nüchhong win pin na mithii. Kiimaq Tatiwe asi Tombutiip mong wiithung kiiwa hiq da ka mitsun. Raüta kra khampin mong na kham ka akhapwiq ma tiijabaiq miitu mithii.

¹⁸ Kra raütiishe apaiq raq jechak nyung khudap kra adü mirbaiq. Raütiishe apaiq raq jaili wongwin honglu kra kriinyung jaq niishe mithii. Kiimaq ramwe raq apaiq jaq na nüchhong win pin na akhapwiq kham manson tiinikai chang kra ajaq na misham.

¹⁹ Kra raütiishe ramwe raq kra jechak nyung kiima ramwe apaiq raq tumkham bomtsi chongtlaq kra phan phan akha bomlaq nguta michong: “Ümniiraq maiq rai sethoq jaki maü dea jiila, ara tumkham raq ümdü na manson ka tiinilot mak miraq.

²⁰ Shatmaq ümniika maiqrai sraki laü dea jiila,

²¹ Tatiwe raq ümmang ka ümnok ümta phong na manson hoti nyung nguta misilaq. Apaiq raq ümhupsam ka atiishin mirbaiqlaq. Kiimaq ümwok po ka achhang she mirkilaq.

²² Kiimaq ara kham arka ümwok mong na minyap wanlaq. Raüta ümwokpo ka atiichhang she mirbaiqlaq. Kiimaq ümhupsam ka shinriiqriiq aran she mirkilaq.” Kiijiishe krii-nyung raq bom ka akha mitre, “Ngi raq ikiq rom dam tiikang. Tatiwe raq kiikhiitiq miklolaq.”

²³ Kiijiishe ramwe raq kra manson bomtsi ka miwaiq. Raüta kra waiqtaq bomtsi ka kra kham khap winpin mong niishe mihebaiq.

²⁴ Raüta apaiq raq kra kham ka krii-nyung raq nyang raüjaq wok na atsi tsi hea motiitsi chang kra mitii-nyang shaq na,

²⁵ ramwe raq krii-nyung jaq wa jaili wongwin honglu kra mijaü, raüta ajaq na sham raüta ra na mido Tatiwe ma kiinong kewan, raüta berong-wacha niishe honglu ka mikuq.

²⁶ Kiijiishe apaiq raq kra wong win kiiwa ajaq na phanshi se ngamrea honglu ka milam. Raüta ngamrea akuq honglu ka berong-wacha niishe michaq. Kra lot jaishe apaiq raq krii-nyung ma tumkham kriishe mitii-nyang.

²⁷ Kiimaq krii-nyung raq ngohea dea sethoq jataq jiila, kra tumkham kriiraq akhum na tsihea she mitiitsi wan. Awok ka achhang she mirwan. Kiimaq apaiq hupsam kiimin ashin riiwan raüta aranse she mijaki. Kiimaq apaiq mang ka tsangshiqnok liipan na manson tiihap chang miishe mijaki

²⁸ Shatmaq apaiq ka shut mak dea, sepii jiila, manson ka akhum na nikhi walot mak miraq. Krai mren apaiq raq asetiim ka mihum wan.

^29-30 Riita maiq awese ashi ka ata-nyung ma sethoq jakito nguta kha nyanho raüta tsang-nyung ka shuho raüla, ara tri armaq kha ka phoke chang. Kra nyung ka berong-wacha khaki na tiichap chang. Raüta ramwe raq arthun tumkham ramtam ara klo chang.

³¹ Tsangwe dü na kha ka ahü miraq. Shatmaq jechak nyung ka ngohea dea shuttaq jiila, apaiq ngarai miitu chamchao chang miraq.