WEAWEA 4 - ASII LAKDAP Bible (BSI)

Lewi Phan Wa Kohath Weraü Raq Jaqsham Chang

¹ Tatiwe raq Mosheq ma,

² Lewi phan wa Kohath weraü phan kra tsangshiq ata ata maq kiimaq ashong wea maq maiq ka wealaq,

³ laüta maiqwere tlotli arawii wiiroqtsam maq pha raüta wiiroq biingi na saüli maiq ka wealaq, laüta Tatiwe asi Tombutiip na jaqsham milotti thun tsangshiq mang ka lakdap na waiqthülaq nguta chongto.

⁴ Tsangshiq raq jaqsham chang ka pinthum asii jaqsham thun kra shamchang.

⁵ Tatiwe raq Mosheq ma tsii ka akha chong kuqto. Ümtiikiiwa piitiip thun kra siiq wan akhing saütlaq, Aron nai asetiim ka Tombutiip mong na nyap wa chang. Raüta Tongshong Tek kaü khaki na chantlaq khea thum kra lamchang. Raüta kriimaq Tek kra pang chang.

⁶ Raüta tsangshiq raq nintata ngamkhü diim maq ara pang baiq chang. Raüta kriithaq na khea wai thum ka tiipii laüta pang chang. Kra raütiishe tek kaü pichang pepum wiinai kriishe apichang kom mong na rechang.

⁷ Kiimaq tsangshiq raq Tatiwe ma akuq winsii thüchang chamrii thaq na khea wai thum kra tiipii laüta pang chang. Raüta kriithaq na winpin thun kra, homseng honglu chaq chang nüchhong pinsetiim kra, hongluke chang nüchhong pin thun kra, kiimaq spiqtai honglu kechang tsabum thun kra thü chang. Kra chamrii thaq niika winsii ka wranaiqshe siruq riichang.

⁸ Raüta tsangshiq raq arthun thaq niishe kheashii thum kra tiipii raüta pang chang. Raüta kriithaq niishe ka nintata ngamkhü diim maq pangchang. Raütiishe kra pichang pepum wiinai kra akom mong na rechang.

⁹ Raüta tsangshiq raq khea wai khea kra milam. Raüta kriimaq lem tochang khamchong nai lem thun kra, kiipsetiim thun kra, ado chang pin thun kra, kiimaq olip tai thüchang hupsam thun kra wiita mipang.

¹⁰ Raüta tsangshiq raq lem tochang nai arong arai hupsam thun kra nintata ngamkhü diim maq aheawiq she mithop. Raüta api chang chamwii kiijaq tiida raüta mipi wan.

¹¹ Kra lot raütiishe tsangshiq raq khea wai thum ka chaq berong-wacha thaq na tiipii raüta pang chang. Raüta kriithaq niika nintata ngamkhü diim kriimiishe pang chang. Kra raütiishe kra pichang pepum wiinai kriishe apichang kom mong kiiniishe mirei.

¹² Raüta tsangshiq raq Asii Khok na langchang tak apin thun kriishe milam. Raüta kriithun ka khea wai thum maq thop chang. Raüta nintata ngamkhü diim maq arthun arthaq na pang chang. Kra raütiishe kra pichang chamwii kiijaq tiida chang.

¹³ Raüta tsangshiq raq ngampü thakotkot wabun na adarai kra berong-wacha kiiwa atso baiq chang. Raüta mintiitii kheathum kra kriithaq na tiipiisaq pang chang.

¹⁴ Raüta tsangshiq raq arthaq na berong-wacha na lang chang hupsam thun: watso chang pinthun kra, khaiq thun kra, watso baiq chang belcha thun kra, kiimaq lairap hechang pin thun kra, wiita kriithaq na mithü. Kra raütiishe tsangshiq raq nintata ngamkhü diim miishe mipang. Kra raütiishe api chang pepum wiinai kriishe akom mong na mirei.

¹⁵ Ümtiikiiwa piitiip ka arun wan cho akhing she saüjiiq, Aron nai asetiim raq asii hupsam thun nai krai lang chang hupsam thun kra wiita apang chang maq pangbaiq lottoshe angu niitiq, Kohath weraü phan ka waraüta arthun asii ta awii thun kra mipi wan. Kohath weraü phan raq ara chongtiikai asii hupsam thun ka tsangshiq jaq maq shamwa maimak. Riimakla tsangshiq ka atsai miraq. Kohath weraü phan raq Tombutiip kra tiisot wantlaq akhing na jaqsham chang ka arthun ara.

¹⁶ Aron se ramwe Eleajar miika Tombutiip miitu kunli kiimaq lem thun na chaq chang tel miitu, homseng honglu, wong-honglu thun, ram ram chang tel miitu, kiimaq Tombutiip mong na lang chang Tatiwe ma kiinong kuq wantaq hupsam thun kunli liiko wan miitu arang kuqto.

¹⁷ Tatiwe raq Mosheq nai Aron maq nguto,

¹⁸ “Kohath weraü phan wa maiq ka

¹⁹ arthun asii pinthum hupsam phong tho na naq tiiwa rongkiq. Waraüla tsangshiq ka atsea mirbaiq. Akha tsangshiq ka tsai mak chang miitu, Aron nai asetiim ka ki raüta tsangshiq maiq loweatek ma apaiq raq jamlai phan hupsam piwan chang wa kra khaq khaq pumtek ma jaqsham kra chongke wan ratlo.

²⁰ Shatmaq Kohath weraü phan wa maiq ka Tombutiip mong na nyap wa raüta, ramwebi raq kra asii hupsam thun kra api wan miitu thop jop tlaq kriila liiwa raüla, tsangshiq ka atsai miraq.”

Lewi Phan Wa Gershon Weraü Jaqsham

²¹ Tatiwe raq Mosheq ma nguto

²² Lewi phan wa Gershon weraü wa maiq ka ata ata maq kiimaq ashongtek maq maiq ka wealaq nguta aming kuqto.

²³ Kra raüta maiqwere arawii wiiroq tsam maq phaho raüta arawii roq biingi na saüli, Tatiwe asi Tombutiip na jaqsham milot titi thun mang ka lakdam na waiq thülaq nguta chongto.

²⁴ Tsangshiq ka arthun hupsam ara piwan arang hotibi miraq:

²⁵ Tombutiip kra, kra Tombutiip wukhu wang mong na shapchang thun hupsam kra, wukhu rathongti shapchang thun kra, nintata ngamkhü diim thun hupsam thaq na pang chang diim kra, kilamchong na chan chang khea thum kra,

²⁶ Tombutiip nai berong-wacha tuk chang kheathum thun kra nai kra tiikha chan chang raüthun kra, kiimaq keathum kilamchong na chan chang khea thum thun kra, kiimaq tombutiip chan wantlaq akhing na langchang hupsam atiipha kha chang amii akhiiq hupsam thun sitlaq kra piwan ratlo. Tsangshiq raq arthun jaqsham sitlaq kra sham wan ratlo.

²⁷ Mosheq nai Aron raq Gershom weraü ma, Aron nai asetiim raq tsangshiq ma arthun jaqsham arang kuqtaq thun kra riikhaqli maq shampi wan miitu aming kuqto.

²⁸ Gershom weraü raq Tombutiip na jaqsham chang ka arthun ara kiinong kuqto; Tsangshiq raq arthun jaqsham ka Aron se Ithamar ramwe wokhong maq sham wan ratlo.

Lewi Phan Wa Merari Weraü Jaqsham

²⁹ Tatiwe raq Mosheq ma Lewi phan wa Merari weraü wa maiq ka ata ata maq kiimaq shong weatek maq wealaq nguta chongto.

³⁰ Kiimaq maiqwere tlotli arawii wiiroq tsam maq phaho raüta wiiroq biingi na saüli, Tatiwe asi Tombutiip na jaqsham mitsintibi thun maiq mang ka waiq laüta lakdam na waiq thülaq.

³¹ Tsangshiq raq ariikom haichang hupsam, khetuk chang pepum thun kra, khamchong thun kra, kiimaq Tombutiip khamchong hokphi diim thun kra,

³² kiimaq khamchong thun kra, khamchong hokpe diim thun kra, khaiq thun kra, kiimaq Tombutiip keathung tro na chan chang raü thun kra, kiimaq kriithun kra hai wan na lang chang hupsam ümchuwa sitlaq kra howan arang ka tsangshiq ma kuqto. Maiq loweatek ma hupsam howan chang ka khakkhaq laqqkhaq pheakeje kuqto.

³³ Tombutiip miitu arthun jaqsham kaiwa arka Merari weraü phan raq sham wan chang nguta jaqsham ka pheakuqto: Tsangshiq raq arthun jaqsham ka Aron se ramwe Ithamar wokhong na sham chang nguta kiinong kuqto.

Lewi Phan Wa Maiq Ka Weato

^34-48 Tatiwe aming maq, Mosheq, Aron, kiimaq mungmaiqse welabi raq Lewi phan wa maiq aweraü phan tsam, Kohath phan, Gershon phan, kiimaq Merari phan maiq ka weato. Tsangshiq raq ara maiq wea wantaq arka aweraü maq kiimaq ata ata maq nai shongtek maq weato. Raüta maiqwere thun arawii roqtsam maq phaho raüta wiiroq biingi na saüli, Tatiwe asi Tombutiip na jaqsham atsinti thun kra mang waiq raüta weato. Kra maiq ka achu riito: Maiq ta wa Maiq wea Kohath ta wa 2,750 Gershon ta wa 2,630 Merari ta wa 3,200 Maiq tlotli ka 8,580

Maiq ta wa Maiq wea

⁴⁹ Maiq loweatek mang ka Tatiwe raq Mosheq ma aming kuqtaq kra phan phan lakdam na waiq thüto. Kiimaq Tatiwe raq Mosheq ma aming kuqtaq kra phan phan maiq loweatek ma apaiq raq jaqsham chang sitlaq kra riimakla aho wan chang sitlaq thun ka pheakuqto.