WEAWEA 3 - ASII LAKDAP Bible (BSI)

Aron Setiim

¹ Tatiwe raq Mosheq ma Sinai Pum maq riibomtaq akhing na Aron nai Mosheq tahii ka akha riito.

² Aron setiim ka maiqwe weblai riito: Nadab, apaiq ka chhikhuwe pinthum. Kra jai wiika Abihu, Eleajar, kiimaq Ithamar riito.

³ Tsangshiq ka ramwebi miitu tsangshiq khuna ramkham tel maq nyat kuqto. Raüta ramwebi ma shongto.

⁴ Shatmaq Nadab nai Abihu ka tsangnai raq Sinai Kumtsaiphii wang maq siimak honglu wa Tatiwe ma ke kha na tsatbaiqto. Tsangnai ka sehü riito. Kra ningkhan Eleajar nai Ithamar raq Aron pat na ramwe jaqsham wanto.

Lewi Phan Ka Ramwebi Khrumke Miitu Shongto

⁵ Tatiwe raq Mosheq ma nguto,

⁶ “Lewi phan ka shea wakiq. Laüta tsangshiq ka ramwe Aron jaqshisetiim miitu shonglaq.

⁷ Tsangshiq raq Ngi asi Tombutiip na jaqsham chang thun kra misham kiimaq ramwebi miitu nai Israilnok tlotli miitu jaq misham.

⁸ Tsangshiq raq Tombutiip na lang chang hupsam thun kra tsrupriiq arang miho. Kiimaq Israilnok miitu jaqsham chang ümchu wa sitlaq kra misham.

⁹ Lewi phan raq jaqsham chang akhek ka Aron nai asetiim kra shiikum panke ratlo kriili akhek.

¹⁰ Ümniiraq Aron nai asetiim ka ramwe jaqsham miitu mishong haü. Maiq ahinti raq ramwe jaqsham kra shamlai nguta manhii raüla, kriiti ka tiidoq ra atsea baiq chang miraq.”

¹¹ Tatiwe raq Mosheq ma nguto,

^12-13 “Lewi phan ka ümchaü Ngi rii she. Ümtiikiiwa Ngi raq Ejip mung wa maiq chhikhu setiim kra jiipbaiq kang, Ngi raq Israilnok phan wa maiq takitek wa chhikhusetiim ka ise chhikhu she nguta iramkham maq tiibok wan kang. Kiimaq tsangshiq nyamse chhikhu ümchuwa nyungtlaq kriimin Ngi rii she nguta ramkham maq tiibok wan kang. Riita ümchaü ka Ngi raq Israilnok sere chhikhu setiim ka Ngi rii she nguta lang wan la na, Ngi raq Lewi phan kriishe ise chhikhuse ma tsea wan kang. Tsangshiq ka Ngi riishe. Ngi ka Tatiwe.”

Lewi Phan Maiq Wea

¹⁴ Sinai Kumtsaiphii wang maq Tatiwe raq Mosheq ma aming kuqto

¹⁵ Lewinok ka aweraü maq kiimaq ata ata maq maiqwesere ka arawii wiishi maq phaho raüta maiqlare na saüli ka awea laüta rejistar na waiq thülaq nguta aming kuqto.

¹⁶ Krai mren Mosheq raq maiq thun ka weato.

^17-20 Lewi setiim ka maiqwesere wetsam riito: Gershon, Kohath, kiimaq Merari riito. Arka tsangshiq weraü mangpon tsangtitiim wa tsangta mang thun riito. Gershon setiim ka wenai riito: Libni nai Shimei riito. Kohath setiim ka weblai riito: Amram, Ijhar, Hebron, kiimaq Ujjiel riito. Kiimaq Merari setiim ka wenai riito: Mahli nai Mushi riito. Arka tsangshiq weraü mangpon tsangtitiim wa tsangta mang thun riito.

²¹ Gershon weraü phan ka Libni nai Shimei tahii wa riito.

²² Maiqwea tlotli maiqwere arawii wiishi maq phaho raüta maiqlare miitaq kra maiqwea akhing na mang waiq wantaq kriika 7,500 riito.

²³ Ara tsangshiq weraü phan ka Tombutiip maq shenyap nü siimjai na tsangshiq piitiip ka tei wan chang riito.

²⁴ Kiimaq tsangshiq weraü welawe ka Lael se Eliasaph riito.

²⁵ Tsangshiq ka Tombutiip, tiip mong pang chang thun kra, wukhu shap chang hupsam thun kra, kilam chong kheachan thun kra,

²⁶ kiimaq tombutiip keathung tro na chan chang khea thum thun kra, kiimaq berong-wacha tro na chan chang kheathum thun kra, kiimaq keathung kilam chong thun na chan chang kheathum thun kra liiti riito. Kiimaq tsangshiq ka arthun hupsam ara shiililii jaqsham wanti arang hotibi riito.

²⁷ Kiimaq Kohath weraü phan wa maiqta thun ka arthun ara riito. Amram ta, Ijhar ta, Hebron ta, kiimaq Ujjiel tahii riito.

²⁸ Kiimaq tsangshiq weraü wa maiqwere nosere arawii wiishi maq pha raüta maiqlare na saüli maiq mang waiq wantaq thun kriika 8,600 riito.

²⁹ Ara weraü phan arka Tombutiip maq shemai nü siim na tsangshiq piitiip ka haiwan chang riito.

³⁰ Kiimaq tsangshiq aweraü thaq na tsang welawe ka Ujjiel se Elijaphan riito.

³¹ Tsangshiq ka Tongshong Tek kaü kra, chamrii kra, lem tochang kham kra, berong-wacha thun kra, Asii Tiip na ramwebi raq langtlaq tak apin thun kra, kiimaq Asii Pinthum Khok na wachang kilamchong na chantlaq kheathum thun kra liikoti riito. Tsangshiq ka arthun hupsam ara shiililii wan arang hoti riito.

³² Lewi phan weraü thaq na tsang wela ajong pinthumwe ka ramwe Aron se Eleajar riito. Apaiq ka Asii Khok na jaqsham chang ümchuwa sitlaq thun kra liikoti riito.

³³ Kiimaq Merari weraü phan wa maiq ata thun ka Mahli nai Mushi saüse phan wa riito.

³⁴ Tsangwe raüwa maiqwea tlotli ka maiqwesere arawii wiishi maq phawan raüta maiqlare na saüli mang waiq wantaq ka 6,200 riito.

³⁵ Ara weraü phan raq tsangshiq piitiip ka Tombutiip maq shekhu nü siim na tei wan chang riito. Kiimaq tsang welawe ajongwe ka Abihail se Juriel riito.

³⁶ Tsangshiq raq jaqsham chang ka Tombutiip haichang pepum thun kra, pumpat thun kra, kham thun kra, khamchongji diim thun kra, kiimaq kra tiipha chang akop chang thun kra piwan nai shiililii wan jaqsham arang kra kuqto. Tsangshiq ka arthun hupsam thun ara shiililii wan nai saiq sam wan jaqsham arang kuqto.

³⁷ Kiimaq tsangshiq miika kham thun kra, khamchongji diim thun kra, tombutiip tiikha chan chang khaiq thun kra, kiimaq kinphai keathung ruk tiikha chan chang raütu thun kra liiko wan arang kuqto.

³⁸ Kiimaq Mosheq nai Aron nai asetiim riika Tombutiip khaki nü na shedong nü siim na tsangshiq piitiip ka tei wan chang riito. Tsangshiq ma jaqsham ka Asii Khok na Israilnok miitu jaqsham chang ümchuwa sitlaq kra liiwan chang riito. Maiq ahinti jurwa ara tsangshiq jaqsham kra sham lai nguta danjiiq, kriiti ka tiitsailaq atsea baiq chang riito.

³⁹ Lewi phan wa maiq wesere arawii wiishi riimakla, alalin maiq Mosheq raq Tatiwe aming maq ata ata maq maiq weataq thun tlotli ka 22,000 riito.

Lewi Phan Raq Rawiichhiti Chhikhuwe Pum Songto

^40-41 Tatiwe raq Mosheq ma nguto, “Israilnok setiim maiq wesere rawü chhikhu thun kriika Ngi rii. Kra ningkhan tsangshiq mang ka lakdam na waiq thülaq. Arawii jipi lüshi riimakla kriima alati ümchuwa sitlaq thun ka waiq thülaq. Shatmaq tsangshiq thun kra la na, Ngi raq Lewi phan kriishe Ngi rii nguta jaü wan tiikang! Ngi ka Tatiwe! Kiimaq Ngi riika nyamse chhikhu nyungtlaq kra rii na Lewi phan raq nyamse rümtlaq kra Ngi rii she nguta jaü tiikang.”

⁴² Mosheq raq ara aming thun ka langto. Raüta chhikhu maiqwe sere thun mang ka lakdam na waiqto.

⁴³ Arawii jipi lüshi maiq riimakla, kiima alati thun mang ka waiqto. Kra maiqwea tlotli ka 22,273 riito.

⁴⁴ Tatiwe raq Mosheq ma nguto,

⁴⁵ “Ümchaü Israilnok maiqwe chhi khusetiim kra rii na, Lewi phan ka Ngi riishe nguta Ngi ma kiinong kuqlaq. Kiimahali Israilnok nyamse chhikhu nyungtlaq kra rii na, Lewi phan raq rümtlaq nyamse ka wiita Ngi riishe nguta Ngi ma kiinong kuqlaq.

⁴⁶ Riita Israilnok maiq wesere chhikhu setiim ka Lewi phan maiqwe sere thaq na 273 achan apa. Kra nosere achan ümchuwa sitlaq kriika ümniiraq adaa wan ratlo.

⁴⁷ Maiqwesere loweatek daa wan miitu mung raq langtlaq tri maq no ashi khum ri miitu ka kampho ngam siibiingi kuqlaq.

⁴⁸ Laüta ara kampho ka Aron nai asetiim jaq na kuqlaq.”

⁴⁹ Mosheq raq kra aming ka langto. Raüta apaiq raq

⁵⁰ kampho ngamsii 1,365 kra lamho raüta

⁵¹ Aron nai asetiim jaq niishe kuqto.