WEAWEA 25 - ASII LAKDAP Bible (BSI)

Israilnok Peor Hiq Na

¹ Ümtiikiiwa Israilnok ka Akasia tan na piitiip hai raüta sitaq, maiqwere ka kiijaq siti Mob mungti sheare rai haingahoto.

² Ara jechak nyungre raq tsangshiq ka tsangshiqnok raq Mob phra shomnoq poi ma ataa ngam kra phaqsea dam miitu tiiheato. Israilnok raq kra thatsang poi phaqsea kra lomdamto kiimaq Peor hiq wa Baal phra ka shomnoqto.

³ Kra ningkhan Tatiwe ka tsangshiq ma atsan khiqto.

⁴ Kriikha Mosheq ma nguto, “Israilnok welabi ka wiita shea laq, kiimaq Ngi aming wokhong maq ranaiq shethung pii na tsangshiq thun ka jiipbaiq laq. Kra riihaütiq Ngi ka mungmaiqse ma itsan tiikhiq mangshe mirha.”

⁵ Krai mren Mosheq raq ajong alabi kiima thaüto, “Namshiq loweatek raq maiqmii phan wa jurwa Peor hiq wa Baal phra shomnoqti ma jakitiiti thun kra jiipbaiq ratlo.”

⁶ Israilnok phongwa maiq weshi raq Mosheq nai mungmaiqse makki na Midiannok shea ka apaiq tombutiip mong na shea wanto. Kiitiikaq Mosheq nai mungmaiqse kunli ka Tatiwe asi Tombutiip rinkea na maaho manyi ahotrang riito.

⁷ Kiijiishe ramwe Aron ma asaü kiimaq Eleajar se Phinehas raq kra chhito. Raüta apaiq ka mungmaiqse phungtu ngatlaq kiiwa tiido pot wa wanto. Raüta apaiq raq ajaq na piq kaü kra sham raü,

⁸ kra maiqwe nai jechak nyung kra tsangshiq nyap wataq tombutiip mong na jowanto. Raüta piq maq tsangnai wiita tlat chhat tiitsai laq shuk baiqto. Apaiq raq akha klo raüta thabi dongraq Israilnok phaq wantlaq kra tiitsaqto.

⁹ Shatmaq thabi dongtaq maiq ka hingroqnai ri hingblai atiijiim baiq kun she riito.

¹⁰ Tatiwe raq Mosheq ma nguto,

¹¹ “Phinehas raq jaqsham ahea klo kha maq, Ngi ka Israilnok ma itsan tiikhiq mang she. Apaiq raq laihin phra shomnoq ka pinthum ninlot mak Ngi li shomnoqtlo. Kra ningkhan tsangshiq ka itsan khiq li jiimin, Ngi raq tsangshiq ka tiijiimbaiq mang dea riikang.

¹² Kra ningkhan, apaiq ma chonglaq, Ngi raq apaiq rai pattup pat-sa miitu tongshong tiikang.

¹³ Apaiq nai asaü asetiim ka Ngi raq pattup pat-sa miitu ramwebi miishe shongtiikang. Jamkhano ngukla apaiq raq Ngi ngachang jiiti lai hin phra ka ninlot mak riito. Kiimaq apaiq raq jaqsham raüta mungmaiqse ngarai kra dobaiq wan miitu lam tanto.”

¹⁴ Kra Israilnok we Midiannok nyung rai tsat baiq tiiwe mang ka Jimri. Apaiq ka Salu se. Salu ka Simeon phan wa akhupo welajong riito.

¹⁵ Kiimaq kra jechak nyung mang ka Kojbi. Awe mang ka Jur. Jur kiimin Midiannok weraü thun wa aweraü ashi thaq na welawe.

¹⁶ Tatiwe raq Mosheq ma aming kuqto,

¹⁷ “Midiannok ka khat laq. Laüta tsangshiq ka chongthum tiija baiq laq.

¹⁸ Jamkhano ngukla tsangshiq raq Peor hiq maq abi kiimung raüta namshiq laoto. Kiimaq Peor hiq maq thadong na tsaitaq Kojbi lümaq lao wanto.”