WEAWEA 24 - ASII LAKDAP Bible (BSI)

¹ Kra lak niika Tatiwe raq apaiq nangnga Israilnok ka shiiman ke raa dongdii nguta thaütlo nguta Balaam riimin asap wishe riito. Kra ningkhan apaiq raq kongkhu lak na kiikha lang liimak she riito. Apaiq ka kumtsaiphii wang nü nü kiina liito.

² Kiimaq Israilnok ka aphan aphan maq piitiip thun hai raüta sitlaq kra chhito. Kriimaq Shiikeawe wenyi raq apaiq ka wiita rom wanto.

³ Kiimaq apaiq raq ara riisham bom ara chongto: “Beor se Balaam raq achong riisham bomtsi, Maiqwe ashi raq raq khangriri hea chhitlo,

⁴ Jurwa mitailot Shiikeawe raq ngutlaq kra. Ngi raq riisham mak ma tiqtiq liilata chhi tiikang Ningkun Ajong Shiikeawe raq shammi mak maq atiichhikuq.

⁵ Israilnok tombutiip thun ka kai tsomhea,

⁶ Taitsiro pahea alen alen acham ikha Riimakla jürai kii na sonruk thun na achhi ikha, Alo pero Tatiwe raq achhi ikha Riimakla maisak pero khamchum kii na ikha.

⁷ Tsangshiq ma ra chamtraq mijun kuq Raüta alai thun ka kham chamtraq Wak ram thun michhi jang. Tsang hokhamwe ka Agag thaq na ajong miraq, Kiimaq apaiq mungtan ka Luhea na misaü wan kiimaq jonghea mijong wan.

⁸ Shiikeawe raq tsangshiq ka Ejip mung wa tsuq wanto; Apaiq raq tsangshiq re ka rum wa Minsaü pongwe ikha thaükuqtlo. Tsangshiq raq tsang jaqtinok thun phaq wanto, Tsang rok tsang rii tiibun wanto, Tsang liqsin thun tiibun baiqto.

⁹ Armung ka hangsi kaü honghea ikha; Ümtiikiiwa apaiq akon sea bumtlaq, Jurmin tiisamki kham mak. Jurwa Israilnok ma ram ram kuqtlaq, Kriiti ma achu shiiman miraq, Kiimaq jurwa Israilnok ma manson tlaq, Kriiti raq manson milap.”

¹⁰ Balak ka atsan khiq tsi ma ajaq tham tiitam saq raüta Balaam ma nguto, “Ngi raq ümniika ijaqtinok sonlaq nguta tiihea kang. Shatmaq ümniiraq ümchaü jangtsam she tsangshiq ma ram kham khoti tiibok kuqlaü.

¹¹ Ümchaü min ümjam na wa wanlaq! Ngi raq ümniima poksi mikuqha nguta kiqkham kuqkang. Shatmaq Tatiwe raq ümniima poksi ka tiikuq mak she shiikhing baiqto.”

¹² Kiijiishe Balaam raq treto, “Ngi raq ümkiimwetiim ngi tiihea wati ma

¹³ ümniiraq ngi ma üm hokham jam wa kampho nai chaq tum kiiwa wiita kuq haü jiimin, ngi raq Tatiwe kiq khü lata, itsii tsii maq jamlai min klo lot mang nguta tiichong hokang ihata. Ngi riika Tatiwe raq jamlai wa tiichongtlaq kriili michongha.”

Balaam Raq Balak Ma Atiisup Riisham Bomchong

¹⁴ Kiijiishe Balaam raq Balak ma nguto, “Ümchaü ngi ka inok ita phana wa wan she. Shatmaq ngi miwa wanha shaq na, ngi raq rawiichiiji na Israilnok raq ümsenginok ma jamlai wa miraq kra, ümniima honlam bom chong kuq pha.”

¹⁵ Raüta apaiq raq ara riisham bom chongto: “Beor se Balaam raq achong riisham bom, khangriri hea chhitiwe bomtsi,

¹⁶ Jurwa Shiikeawe bom kra taitlaq Raüta Ratsan Mong Na Sitiwe raq akuq phaqchi laptla. Ngi raq riisham mak maq tiqtiq liilata chhitiikang Ningkun Ajong Shiikeawe raq riisham makchhi akuq.

¹⁷ Ngi raq rawiichii akhing chhitiikang, Kiimaq Israilnok mung kra chhitiikang. Hokham weshi, raiqsaiq ikha chhai hea, Kra mung na midong. Komet raiqsaiq po ikha apaiq ka Israil mung wa midong. Apaiq raq Mob mungti welabi thun mibuk. Kiimaq Seth mungti tlotli mitiiq baiq.

¹⁸ Apaiq raq ajaqtinok ka Edom mung na mitang Kiimaq tsang mung ka atachong ma mitiija, Israilnok raq renok ka tang wan ruqli miraq.

¹⁹ Israilnok raq tsangshiq ka hok maq nishishi mini wan Raüta aso atiichong kiimin tiisii rai mijiip baiq.”

²⁰ Kiitiikaq Balaam raq riisham mak maq Amalakaiq mung ka chhito raüta riisham bom akha chongto: “Amalakaiq mung ka maiq mung thun wiita thaq na ningkun ajong pinthum, Shatmaq atiisup na pattup pat-sa chongthum mija wan.”

²¹ Apaiq riisham mak maq Kenaiq phan mung miitu chhito raüta ara riisham bom chongto: “Ümnaq shongtlaü hiq ka re raq khat lot mak. Longraq khu na wushi chü ahai ikha.

²² Shatmaq namshiq Kenaiq mung ka mitiithenbaiq Ümtiikiiwa Asiria mung raq namshiq ka Shumwi kong ma tsuq wantlaq akhing na.”

²³ Balaam raq ara riisham bom chongto: “Ara shekhu nü mung na thungtlaq ara junok wa?

²⁴ Alongkaiti ka Saipras mung wa khamjong lam maq sangpho lai maq miki; Tsangshiq raq Asiria mung nai Ebar mung ka mitang wan, Shatmaq tsangshiq ka, maiqmii akhing na Pattup pat-sa miitu mithumki.”

²⁵ Raüta Balaam ka tiijeto raüta ahiq niishe jang wanto. Kiimaq Balak kiimin aji jai niishe wa wanto.