WEAWEA 23 - ASII LAKDAP Bible (BSI)

¹ Apaiq raq Balak ma chongto, “Ngi ma arjaq berong-wacha miishi hailaq. Kiimaq ngi ma minsaü pongwetiim miishi kiimaq sku pongresetiim miishi lam wanlaq.”

² Kra chongtaq kra phan phan Balak raq kloto. Kiimaq apaiq nai Balaam raq berong-wacha aweatek na minsaü pongwe kiimaq sku pongse achhuq chhuq tato.

³ Raütiishe Balaam raq Balak ma nguto, “Ümniika ara chaqtlii-honglu ümniiraq kuqlaü arjiili chapli laq. Tatiwe ka ngi rai mirhumki sha riihumki mak wa, inii kiina walata liiwapha. Apaiq raq ngi ma jamlai wa tiichhi kuq jiiq kra ümniima michong kang.” Krai mren apaiq laqlaqse hiqlam ashi kriithaq kiina wawanto.

⁴ Kiimaq Shiikeawe ka apaiq rai riihumto. Balaam raq apaiq ma nguto, “Ngi raq berong-wacha miishi haikang. Lata berong-wacha loweatek na minsaü pongwe ashi sku pongse ashishi honglu na takang.”

⁵ Kiijiishe Tatiwe raq Balaam ma jamlai bom chong chang wa kra chongkuqto. Raüta apaiq ka Balak phana hali apaiq tsütsa kra tiichongkai tiijang hoto.

⁶ Krai mren apaiq ka janghoto. Kiimaq Balak ka apaiq raq chaqtlii-honglu kuqtaq kiijaq Mob mungti welabi tlotli rai adam chap shat li lohoto.

⁷ Balaam raq akha riisham bom chongto: “Balak Mob mung hokhamwe raq ngi shea wato Siria mung wa, shedong mung pum tonglong hiq wa. ‘Kira laüta ngi miitu chonglaq,’ nguta apaiq raq nguto. ‘Laüta Israilnok mung thaq na mansonlaq’

⁸ Ngi raq jamkho mison Shiikeawe raq son mak wa, Riimakla chongthum she nguta jamkho mingu Tatiwe raq ngohü maq?

⁹ Diiluhea longraq khu maq ngi raq tsangshiq chhitiikang; Ngi raq tsangshiq ka kin thun maq liitiikang. Tsangshiq ka maiq mung ashi tsangshiq hon hon li siti; Tsangshiq raq asap tsangshiq ka nanok mung ahin thun thaq na shiiman mung.

¹⁰ Israil saüse phan ka botkhulai ikha- Tsangshiq ka awealot mai pahea. Irilung ka Shiikeawe sengi ashi ikha tiisungpha; Ngi ka hansang maq kechu maiqse tsai tsaipha.”

¹¹ Kiijiishe Balak raq Balaam ma nguto, “Ümniiraq ngi ka jamkhiishe wa riilaü? Ngi raq ümniika arjaq ijaqtinok kra son miitu shea wakang. Shatmaq ümniiriika tsangshiq ma ram khoti ram kuq laü.”

¹² Apaiq raq treto, “Ngi riika Tatiwe raq ngi ma jamlai wa tiichongtlaq kriili michongha.”

Balaam Raq Thongnai Ngoja Riisham Bom Chongto

¹³ Kiijiishe Balak raq Balaam ma nguto, “Wara ngi rai hiq ba bashi niishe. Kriiba miika Israilnok ka wiijam li she michhi haü. Kriiba maq tsangshiq ka ngi miitu sonlaq.”

¹⁴ Apaiq raq Balaam ka Pisga pum khupong na Jophim wak ram niishe shea wanto. Kriiba niimin apaiq raq berong-wacha ka miishi haito. Raüta berong-wacha aweatek na minsaü pongwe nai sku pongse ka achhuqchhuq honglu na tato.

¹⁵ Balaam raq Balak ma nguto, “Ümniika ara chaqtlii-honglu ümniiraq kuqlaü arjiili chapli laq. Kiimaq ngi ka Shiikeawe rai iniikiijaq riihum wa pha.”

¹⁶ Kiimaq Tatiwe ka Balaam rai riihumto. Raüta apaiq raq jamlai bom chong chang wa kra chong kuqto. Raüta apaiq ka Balak phana apaiq tsütsa kra tiichongkai tiijang kinongto.

¹⁷ Kiimaq apaiq ka jangho nongto. Raüta apaiq raq Balak ka chaqtlii-honglu kuqtaq kriijaq Mob mungti welabi rai chapshat li lohoto. Balak raq apaiq ma Tatiwe raq jamlai wa nguta kra waito.

¹⁸ Kiimaq Balaam raq riisham bom ka akha chongto: “Wara, Jippor se Balak lei, Laüta ngi raq jamlai wa chongtiikang ara tailaq.

¹⁹ Shiikeawe ka maiq ikha riimak, arot chong ma; Apaiq ka maiqse ri riimak, atsantsii klai ma. Apaiq raq jamlai kiq wa khamtlaq, apaiq raq klotlo; Apaiq raq bomtlo, kra sham kuqtlo.

²⁰ Ngi ma ramkuqlaq nguta tsii chongto, Kiimaq Shiikeawe raq shiiman keje ka, Ngi raq tiijanglot mang.

²¹ Ngi raq Israilnok rawiichii rilung chhikang she Apaiq miitu kaükhea la-nyea ahü, riimakla chamchao ahü miraq. Tatiwe tsangshiq Shiikeawe ka tsangshiq rai; Tsangshiq raq lachong dok dok apaiq ka tsangshiq Shiikeawe ngutlo.

²² Shiikeawe raq tsangshiq ka Ejip mung wa tsuq wanto; Apaiq ka tsangshiq tiiwongke rum wa minsaü pongwe ikha maiq thaütlo.

²³ Mintin riimin, awuq raü min, Israil mung thaq na tailot mak. Ümchaü maiqse raq Israilnok miitu akha mingu, ‘Liironglaq Shiikeawe raq jamlai wa shamtaq kra!’

²⁴ Israil mung ka honghea pinthum hangsikaü ikha; Apaiq raq ngam ka bunlak buncha chaibaiq hü maq, raüta phaq baiq hü maq sanglili bum mak, Apaiq raq kaqtaq thun tiijai thun ka mishup nyang shaq wiiwii, sanglili bum mak.”

²⁵ Kiijiishe Balak raq Balaam ma nguto, “Ümniiraq Israilnok ka son maü ngiimki laü. Riikaüli jiimin, tsangshiq ka ramkham maq naq tiibokkiq!”

²⁶ Kiijiishe Balaam raq treto, “Ngi raq ümniima chongkang ihata, ngi riika Tatiwe raq ngi ma jamlai wa chongtaq kriili mishamha nguta?”

Balaam Raq Laktsam Ngoja Riisham Bom Chongto

²⁷ Kiijiishe Balak raq nguto, “Ikhla ngi rai wara. Ngi raq ümniika hiq bahin niishe shea wan pha. Jursap tsangshiq ka ümniima Shiikeawe raq kriiba maq ngi miitu mitiison wa riila.”

²⁸ Kra ningkhan, apaiq raq Balaam ka Peor pum khuthaq na kumtsaiphii wang tiichhi rashra kiiniishe shea wanto.

²⁹ Balaam raq apaiq ma nguto, “Ngi miitu arjaq berong-wacha miishi hailaq. Laüta minsaü pongwe miishi kiimaq sku pongresetiim miishi lamki kiq.”

³⁰ Balak riimin apaiq ma jamkho chongtaq kra phan phan kloto. Raüta berong-wacha aweatek na minsaü pongwe ashi kiimaq skupongrese ashi honglu na tato.