WEAWEA 22 - ASII LAKDAP Bible (BSI)

Mob Mung Hokhamwe Raq Balaam Tiihea Wato

¹ Israilnok ka laü wanto. Raüta tsangshiq lamjap piitiip ka Mob mung hiq thung tan na, Jordan rai maq shedong nü na kiimaq Jeriko chela maq khariire na teito.

² Ümtiikiiwa Mob mung hokhamwe Jippor se Balak raq Israilnok raq Amoraiq mungti ka jamkho riita kiimaq kiijaq Israilnok ka maiq ümchuwa kra tsütsa ka taito.

³ Raüta apaiq nai asengi mungmaiqse tlotli ka phiip raq tsaito.

⁴ Mobnok raq Midiannok welabi ma akha nguto, “Arnok maiq atinkhan pahea ara riika, nashiq tro wa phanrap ka minsaü pongwe raq nyiim lung rü wa jaqloli tiisiirai phaqtlaq ikhiishe mishthen baiq.” Kra ningkhan Hokhamwe Balak raq,

⁵ Beor se Balaam kra heawatibi maiq tiiwato. Apaiq ka Amaw mung na Euphretis Rai tho na Pethor hiq na riito. Tsangshiq raq apaiq ma Balak hokham we bom ka akha chongto: “Ngi raq ümniima ara bom tiitai rotiikang, Ejip mung wa awa maiq mung ashi saü wato. Kra mungti maiq phong ka barap binrii niishe nyam wanto. Kiimaq tsangshiq raq naimung ara jiiwan tantlo.

⁶ Tsangshiq ka naishiq thaq na achan pahea. Kra ningkhan, mangchan laüta ümniika ana kira. Laüta tsangshiq khuthaq na ngi miitu man sonlaq. Jursap kra nguraü ka naishiq raq tsangshiq ka khat laita mitanghai min lo riila. Laita tsangshiq ka naimung wa mijobaiq lot hai minlo riijiiq. Ngi raq asapha, ümtiikiiwa ümniiraq maiq ma ramram kuq tlaü, raüla maiq raq achu shiiman laptlo. Kiimaq ümtiikiiwa ümniiraq maiq ka ason riitlaü, haüla kriiti ma manson tiini kitlo.”

⁷ Krai mren Mob mung welabi nai Midian mung welabi raq manson jaq maq kra howan raüta, Balaam phana wawanto. Kiimaq Balak raq tsütsa tiichong wantaq kra tiitaito.

⁸ Kiijiishe Balaam raq tsangshiq ma nguto, “Ümchaü rawa ka ajiili jap ronglaq. Anaptiq Tatiwe raq ngi ma jamlai wa chongjiiq kra namshiq ma mitaikang.” Krai mren Mob mungti welabi ka Balaam rai japto.

⁹ Shiikeawe ka Balaam phana kito raüta bom ka akha waito, “Ümniirai sitlaq maiq thun arka junok wa?”

¹⁰ Apaiq raq treto, “Mob mung Hokhamwe raq tsangshiq ka iphana

¹¹ Ejip mung wa awa maiq phong raq Mob mung ka tlotli nyam wanto nguta tiichong wa tiiwato. Apaiq ngi nang nga tsangshiq ka sonlaq, apaiq raq tsangshiq ka khat raüta tang ma kiimaq tsangshiq ka jobaiq ma nguwa.”

¹² Kiijiishe Shiikeawe raq Balaam ma nguto, “Ümniika arwetiim rai naqki damkiq. Kiimaq Israilnok ma man naq sonkiq. Jamkhano ngukla tsangshiq ka Ngi raq ashiimanke wishe.”

¹³ Kriimaq napjai na Balaam ka Balak kiimwebi phana kito raüta nguto, “Namshiq ka jam niili jangho ronglaq. Tatiwe raq ngi ka namshiq rai tiikidam mak tiiwinhoto.”

¹⁴ Krai mren, tsangshiq ka Balak phana janghoto. Raüta apaiq ma Balaam ka tsangshiq rai kidam mang nguhoto nguta chonghoto.

¹⁵ Kiijiishe Balak raq welabi ka maiq apashe tiiwa nongto. Tsangshiq ka kongkhu lak na wataq kriithaq na ajong alabi she tiiwato.

¹⁶ Tsangshiq ka Balaam phana wato. Raüta apaiq ma Balak tsütsa atiichong wan ka akha chongto: “Mangchan laüta ümniika ngi phana kai ma naq damkiq!

¹⁷ Ngi raq ümniima tiibomhü poksi chamtraq mikuq kang. Kiimaq ümniiraq achong chong ngi raq miklo kang. Mangchan laüta kira. Laüta arnok ara ngi miitu sonlaq.”

¹⁸ Shatmaq Balaam raq treto, “Balak raq ngi ma ahokham jam na sitlaq kiiwa kampho nai chaq ka wiita kuq raümin, ngi raq Tatiwe i Shiikeawe aming ka jaqsham aranse niili jiimin tlea lot mang.

¹⁹ Li jiimin, kongkhu watibi raq ngi rai rawashi jap damtaq kiikha hali, namshiq min ümchaü rawa ka jap ronglaq. Kiimaq ngi riimin, Tatiwe raq ngi ma bom anye chongke chang asi sha ahü wa kra tho hepha shaq.”

²⁰ Kra rawa Shiikeawe ka Balaam phana kito. Raüta akha nguto, “Arwetiim ka ümnaq heawa nong nguta wataq jiika, tiije laüta tsangshiq rai kidam laq. Shatmaq tiina Ngi raq jamlai wa chongtiikang kriili misham haü.”

²¹ Krai mren, napjai ranap na Balaam raq akumtoq kaü raikhü na chao raüta Mob mungti welabi krai kiho damto.

Balaam Nai Akumtoq Kaü

²² Shiikeawe ka Balaam kaihokha na akhiq riito. Kriikha na Balaam ka kumtoq kaü raikhü na nga raüta ajaqshi se wenai krai adam na lam na akai rai riito. Kiijiishe Tatiwe rase ka apaiq kai chang lam kra shangkai lam na chapkito.

²³ Ümtiikiiwa kumtoq kaü raq rase ka kiijaq nepja doraü achap raü kra chhitaq, kumtoq kaü ka wak ram nü na kihoto. Balaam raq kumtoq kaü ka pekii maq bukto. Raüta lam nü kiinahali shea wanto.

²⁴ Kiijiishe rase ka lamtsase ba, lam ka siimko nai ri na spiqtsi ro asi kiimaq siimhap ri na longmaq aruk ba kiijiishe chapkito.

²⁵ Ümtiikiiwa kumtoq kaü raq rase ka chhitaq, apaiq ka longkhetuk siim kiiniishe tiisot wanto. Raüta Balaam hokpe ka longkhetuk kiijaq tiichop thaüto. Kiijiishe Balaam raq kumtoq kaü ka thongshi ri hali pekii maq riihot bukto.

²⁶ Jangshiri hali rase ka sinkhu nü na kiho nongto. Raüta apaiq ka lam tsahea ba siimkonai wiita na aleaho chang ahü ba kiijiishe chapkito.

²⁷ Ara akhing niika, ümtiikiiwa kumtoq kaü raq rase ka chhitaq, apaiq ka abum she riikito. Balaam ka atsan khiq ninlot mak she riito. Kriikha na apaiq raq kumtoq kaü ka apekii maq hot hot she buk hoto.

²⁸ Kiijiishe Tatiwe raq kumtoq kaü ma abom miitu ningkun she kuqto. Krai mren apaiq raq Balaam ma nguto, “Ngi raq ümniima jamlai wa tiibi kang? Ümniiraq ngi ka jangtsam she jam nguto buk laü?”

²⁹ Balaam raq treto, “Ümniiraq ngi ka angiwe ma tiijaho laü kata! Ijaq na nepja asi nguraü jaq, ümniika ase baiqwi she mirha wa.”

³⁰ Kiijiishe kumtoq kaü raq treto, “Ngi ka üm rilung pattup irai khü na chao laüta khumsiq tlaü kra kaüli riimak sha? Ngi raq ümniika jangshi ra akha niqsiq kang sha? “Riimaüdea,” nguta apaiq raq treto.

³¹ Kiijiishe Tatiwe raq Balaam ma kiijaq rase nepja sham raü chaptlaq kra tiichhi kuqto. Kiimaq Balaam ka hiq na akap nü na bumsaq she bum kito.

³² Rase raq apaiq ma akhiishe shiitepto, “Ümniiraq üm kumtoq kaü ka jangtsam jam nguto tsat laü? Ngi ka ümlam tangbaiq kai akiha. Jamkhano ngukla ümniika ana kimaü chang kitlaü.

³³ Shatmaq ümkumtoq kaü raq ngi chhi raüta lamkii nü na laktsam kihoto. Kra riimak nguraü ka, ngi raq ümniika mitsat baiqha wa. Lata kumtoq kaü ka mitiiwong kuqha wa.”

³⁴ Kiijiishe Balaam raq treto, “Ngi raq ngarai tangkang. Ngi raq ümniika ngi shangkai lam na chapki laü nguta sap mang dea riikang. Shatmaq ümchaü ümniinga ngi kiina kai ka ajiq ngutlaü jiila, ngi ka jam niili mijang wanha.”

³⁵ Shatmaq rase raq nguto, “Arwetiim rai kilaq, shatmaq Ngi raq jamlai wa chongtiikang kriili mingu haü.” Krai mren, Balaam ka tsangshiq rai kiho ruq li kiho damto.

Balak Raq Balaam Taoto

³⁶ Ümtiikiiwa Balak raq Balaam ka kitlo nguta taitaq, apaiq ka Balaam humkai Ar chela na kihoto. Kra chela ka Arnon Rai kii na Mob mung hiq rai na riito.

³⁷ Balak raq apaiq ma nguto, “Ngi raq ümnaq tiihea wa apha lak tiiwa phata jamto kimaü riilaü? Ngi raq ümniima poksi hongli kuqlot mak mirsham ngutiisha tiima laü?”

³⁸ Kiijiishe Balaam raq treto, “Ngi ka saüki kang ahata. Kimang ri riimak? Shatmaq ümchaü, ijaq na jam ningkun wa asi? Ngi riika Shiikeawe raq ngi ma jamlai wa thaütlaq kriili michongha.”

³⁹ Kiimaq Balaam ka Balak rai Hujoth chela na wawanto.

⁴⁰ Kiijaq Balak raq minsaü nai skukong tato. Raüta ngam wiijam ka Balaam ma kuqto. Kiimaq welabi apaiq rai sitibi kriima kuqto.

Balaam Raq Apha Riisham Bomchong

⁴¹ Kriimaq napjai ranap niishe Balak raq Balaam ka diiluwiq Bamoth Baal kin na shea wanto. Kriiba maq Balaam raq Israilnok ka khoko chhilot-li chang ba kiina shea wanto.