WEAWEA 21 - ASII LAKDAP Bible (BSI)

Kanannok Khat Raüta Tangto

¹ Ümtiikiiwa Arad chela na siti Kanan mung hokhamwe raq Israilnok ka Atharim hiq lam maq watlo nguta tsütsa ka taitaq, apaiq raq tsangshiq ka khatto. Raüta maiq wiijam ka shumwi ma lap wanto.

² Kiijiishe Israilnok raq Tatiwe ma sinkham akha tiitumto: “Ümniiraq naishiq ma arnok ara tiitang kuq haüla, naishiq raq tsangshiq nok nai tsangshiqnok chela thun ka ümniima jai na bomchan shun mai maq kunli mikiinong kuqhai.”

³ Kiimaq Tatiwe raq tsangshiq achu jaü ka taito. Raüta tsangshiq ka khrum kuqto kiimaq Kanannok ka tiitang kuqto. Krai mren Israilnok raq Kanannok ka miq chup jiip baiqto. Kiimaq tsangshiq chela thun kiimin wiita tiithen baiqto. Raüta kra hiq ka Horma nguta mangto.

Miiki Ngam Maq Atiiq Paü Sumla

⁴ Israilnok ka Hor Pum maq tiido wan raüta, Akaba Khamjong Nong chum lam nü niishe wawanto. Kriika Edom mung kra shüp wan wawanto. Shatmaq mungmaiqse raq lam na alaü wan lam maq athenge atsutsa she riiwanto.

⁵ Raüta Shiikeawe ngeng nai Mosheq ngeng bom bomto. Tsangshiq raq akha bottrangto, “Ümniiraq naishiq ka Ejip mung wa tsuq wan laüta ara bintang jüngi kumtsaiphii mung na jaram wa tiitsai tlaü? Arjaq aphaq asea chang min ahü. Anyang chang kham min ahü? Naishiq ka ara aphaq asea chang min riimak manna ariiraq achok she!”

⁶ Kiijiishe Tatiwe raq paü alai henghea phan ka tsangshiq phana pahea tiikito. Kiimaq Israilnok maiq pahea paüraq kaq raüta jiimto.

⁷ Kiijiishe mungmaiqse ka Mosheq phana wato. Raüta akha nguto, “Naishiq raq Tatiwe ma nai ümniima bom abi bomlaita ngarai tangkai. Ümchaü min Tatiwe jaq paü kong ara lambaiq laq nguta achu jaülaq.” Krai mren Mosheq raq Mungmaiqse miitu achu jaüto.

⁸ Kiijiishe Tatiwe raq Mosheq ma miiki ngam maq paü sumla ashi tiiqlaq. Laüta kra sumla ka lükii ashi na tsomlaq. Kiimaq juwa paü raq thaütlaq, kriiti raq kra lükii na atsom paü sumla kra miliilaq. Raüla atsi ka ahea mirki nguta chongto.

⁹ Krai mren, Mosheq raq miiki ngam maq paü sumla ashi tiiqto. Raüta kra paü sumla ka lükii na tsomto. Kiimaq juwa paü raq thaütlaq kriiti raq kra paü sumla kra liitlo. Raüta atsi ka heakitlo.

Hor Pum Maq Riita Mob Mung Hiqthung Tan Na

¹⁰ Israilnok ka kriimaq laü wan raüta Oboth hiq na piitiip tei wanto.

¹¹ Kriimaq laü wan raüta, tsangshiq ka Mobnok mung hiq rai maq shedong nü na kumtsaiphii hiq wang na Abarim hiqshong ram na tsangshiq piitiip ka teito.

¹² Kriimiishe tsangshiq piitiip ka Jered tan niishe teito.

¹³ Kriimahali wawan nong raüta, Arnon Rai maq shekhu siim na, Amoraiqnok hiq rai na saüli bintang jüngi wang bin kiijaq tsangshiq piitiip ka teito. (Arnon rai ka Mobnok mung nai Amoraiq mung hiq trai na.)

¹⁴ Arningkhan, Tatiwe Rekhat Thun Lakdap na chongtlo “…Waheb chela ka Supha wang na, kiimaq hiq thung tan thun kra; Arnon Rai kra,

¹⁵ kiimaq hiq thung tan na sat hotlaq lam hong thun kra Ar chela na saüli kiimaq Mob mung hiq rai nü na saüli.”

¹⁶ Kriimiishe tsangshiq ka hiq bashi Khappong thun ngutlaq kiina laü wanto. Kiijaq Tatiwe raq Mosheq ma akha ngutlo, “Mungmaiqse ka adam na triitamlaq. Ngi raq tsangshiq ma kham mikuqha.”

¹⁷ Kra akhing na Israilnok raq ara shingeto: “Khappong thun lei, namshiq kham ka tiidong ronglaq. Kra riihanla naishiq raq namshiq ka ashi ange mitao wankai.

¹⁸ Hokham setiim raq athu khappong thun lei, kiimaq mungtubi raq athu thun, mungpeng chang hokham chongwai kii maq athu, kiimaq hokhambi raq nyeakii maq athu.” Tsangshiq ka bintang jüngi wang kriimaq Mattana hiq na laü wanto.

¹⁹ Kiimaq tsangshiq ka Nahaliel hiq niishe laü wanto. Kiimaq Nahaliel hiq maq Bamoth niishe laü wanto.

²⁰ Kiimaq Bamoth hiq maq Mob mung hiq rai hiq thung tan niishe wawanto. Arka Pisga Pumji na. Armaq bintang jüngi kumtsaiphii wang ka khariire na ra shii ra liithü raüta wa wanto.

Sihon Hokhamwe Nai Og Hokhamwe Khat Raüta Tangto

²¹ Kiitiikaq Israilnok raq tsasoqti maiq tiiwa raüta Amoraiqnok hokhamwe Sihon ma akha tiichong wato:

²² “Naishiq ka ümmung lam maq laü wan phai. Naishiq nai naishiq nyamse kong raq lamphai jinki mai. Kiimaq namshiq wak ajam riimakla spiqro niimin ji maq niki mai. Kiimaq namshiq khappong thun wiimin kham ka nyang mai. Naishiq ka ümmung ara milea wan hai shaq wiiwii mung lam jong kra phan phan li miwa wan hai.”

²³ Shatmaq Sihon raq Israilnok ka tsang mung lam maq tiiwa mak riito. Apaiq raq asengi mungmaiqse ka shunto. Raüta kra bintang jüngi wang na Jahaj hiq na tsangshiq khatkai asengi phenlabi tsuqho raüta kihoto kiimaq Israilnok ka khatto.

²⁴ Shatmaq Israilnok raq renok ka khatto raüta pahea jiipto kiimaq tsang mung ka Arnon Rai maq riita Jabok Rai maq shekhu nü nü kiina saüli, kriika Ammonaiqnok mung na saüli jiiwanto. Jamkhano ngukla Ammonaiq mung hiq rai ka thepthep peruk weshaü raüta tiiwong shat riito.

²⁵ Kra ningkhan Israilnok raq Ammoraiqnok chela thun ka tlotli khat raüta jiiwanto. Heshbon chela nai kra chela tro binjü wa chela thun ka kun kun khat raüta jiiwanto. Raüta tsangshiq ka kra chela thun niishe shong wanto.

²⁶ Heshbon chela ka Amoraiqnok hokhamwe Sihon chela nyungchong. Apaiq raq man niiwa Mob mung hokham wechü we krai riikhatto. Raüta Mob hokhamwe hiq ka wiita tlotli Arnon Rai na saüli khat raüta jiiwanto.

²⁷ Arningkhan na shiwebi raq akha shito, “Heshbon chela na warong ra, Sihon hokhamwe chela na! Naishiq raq ara chela ka arun arbaiq wa thongshi haihun raüta atiihea wan chhiro tiikai.

²⁸ Man na ara Heshbon chela armaq, Sihon phenlabi thun ka waniitu ikha rekhatkai wawanto; Raüta tsangshiq raq Mob mung wa Ar chela ka khat raüta tiithen baiqto Kiimaq Arnon rai jükhü nü wang kin thun phaqbaiqto.

²⁹ Mob mungti lei, phiiptsi chang jo namshiq ma! Khemosh phra shomnoqtinok lei thenki lan she jo! Namshiq phra kaü raq namshiq ka munglu wanshanok miishe tiijato, Kiimaq jechakre ka Amoraiq hokhamwe shumwi kong ma tiija baiqto.

³⁰ Shatmaq ümchaü tsangshiq saüsetiim ka wiita she jiipbaiqto, Heshbon chela maq riita Dibon chela na saüli, Kiimaq Nashim chela maq riita Nophan chela na saüli, Medeba hiq tho na saüli tiithen baiqto.”

³¹ Krai mren Israilnok ka Amoraiqnok mung niishe shong wanto.

³² Kiimaq Mosheq raq siwebi ka Jajer chela khat wan chang lam kra siwa tiiwato. Israilnok raq kra chela ka khatto. Raüta jiiwanto. Kiimaq kra tro wa chela thun kra jiiwanto. Kiimaq kiijaq siti Amoraiqnok ka wiita jobaiqto.

³³ Kra raütiishe Israilnok ka Bashan mung nü na wawanto. Kiimaq Bashan hokhamwe Og ka asengi phenlabi sheaho raüta Edrel chela khat kai kito.

³⁴ Kiijiishe Tatiwe raq Mosheq ma nguto, “Apaiq ma naq haikiq. Ngi raq ümniima apaiq ka, asenginok tlotli, kiimaq apaiq mungtan kra wiita mitiitang kang. Ümniiraq Sihon hokhamwe Heshbon chela pengtiwe ka jamkho riilaü, ikha apaiq kiimin kiikhiisii tiibiilaq.”

³⁵ Krai mren, Israilnok raq Og hokhamwe, asetiim, kiimaq asengi thun thumthum, weshi min atra tiichong mak jiipbaiqto. Raüta tsangshiq raq amungtan kra jiiwanto.