WEAWEA 20 - ASII LAKDAP Bible (BSI)

Kadesh Hong Na Mra Pintaq Thun Kra

¹ Rawii phawan apha jipi lü na Israilnok ka Jin kumtsaiphii wang na Kadesh hong na saüto. Raüta tsangshiq piitiip ka kiijaq teito. Kiijaq Miriam ka tsaito. Raüta amaa ka lapto.

² Kiijaq tsangshiq piitiip teitaq ba niika kham ahü riito. Kra ningkhan mungmaiqse ka Mosheq nai Aron tro na riitamto.

³ Raüta tsangshiq ka akha bot trangto: “Nashiq armin naphu nanobi Israilnok Tatiwe Tombutiip rinkea na jiimraitaq ikhiisii jiimrai haijaq khoti ahea riichang wa.

⁴ Ümniiraq naishiq ka ara bintang jüngi mung arjaq jamlai nguto tsuqho laü? Arjaq naishiq ka nyamsekong rai chiimshi na mijiim rai laq ngutiisha tsuqho laü?

⁵ Ümniiraq naishiq ka Ejip mung wa ara jamlai phan min dong man lot mak chang pinthum maiq chamchao chang hiq mung arjaq jaram wa tsuq wan laü? Arjaq bunwong min ahü, phupmup chong min ahü, spiqtsi ro min ahü, pomegrenet petsi ro min ahü. Kiimaq anyang chang khu akham dongdii min ahü!”

⁶ Kiijiishe Mosheq nai Aron ka mungmaiqse phong wa tiisot wanto. Raüta Tombutiip kilam chong na chap wato. Raüta tsangnai ka hiq na bum rang bumkito. Kiimaq makse chat-hit Tatiwe chhainyii liliim kra tsangshiq makki na chhai wanto.

⁷ Kiijiishe Tatiwe raq Mosheq ma nguto,

⁸ “Tongshong Tek kaü khaki na nyeakii tiithütlaq kra lam laq. Laüta ümnaq nai Aron raq mungmaiqse kunli ka adam na tiithung ronglaq. Kiijaq mungmaiqse tlotli makki na iniikiijaq longraq kaü jonghea kriima bomlaq. Raüla, kiiwa kham ka aphok alok miphok. Akha kra longraq kaü mong wa ümniiraq kham ka mitiidong haü. Raüta mungmaiqse nai tsangshiq jam nyamsekong raq minyang.”

⁹ Kiimaq Mosheq ka Tombutiip mong na wato. Raüta Tatiwe raq aming kuqtaq kra phan phan kra nyeakii kra lam wato.

¹⁰ Raüta apaiq nai Aron raq mungmaiqse kunli ka kiijaq longraq kaü khaki na tiithungto. Raüta Mosheq raq akha nguto, “Tairong laq, namshiq kiqkhii sruriitibi lei! Nainai raq namshiq miitu ara long raq mong arwa kham ka tiidongke chang shea miraq ngukai?”

¹¹ Kra ngu raütiishe Mosheq raq anyeakii ka ra nü na do saq riito. Raüta kriimaq longraq na jangnai hot hot bukto. Kiimaq kham rai ashi ajongwiq kra longraq mong kiiwa phok saq li phok wanto. Kiimaq mungmaiqse kunli raq nai nyamsekong kunli raq kham ka nyangto.

¹² Shatmaq Tatiwe raq Mosheq nai Aron ka sonto. Apaiq raq akha nguto, “Ümniiraq Ngi asii ningkun ka Israilnok makki na tiichhike wan miitu kamtsantsii hongli rüm maü dea kha maq, Ngi raq tsangshiq ma mikuqha nguta kiqkham kuqkang mung kriijaq ümniiraq tsangshiq ka shea wan lot maü she mirhaü.”

¹³ Ara mra pintaq arka Meriba hiq maq pinto. Kriiba maq Israilnok raq Tatiwe ngeng ma bottrangto. Kiimaq kiijaq apaiq raq tsangshiq ma apaiq ka asii nguta tiichhi kuqto.

Edom Mung Hokhamwe Raq Israilnok Tiiwa Mak Riito

¹⁴ Mosheq raq Kadesh wang maq Edom mung hokhamwe phana tsasoqti tiiwato kiimaq tsangshiq raq akha chongto, “Ara tsütsa arka ümphu ümno Israilnok maiq phan thun raq atiichong wan. Ümniiraq naishiq chamchao wankai thun kra asap haü.

¹⁵ Naititiim ka Ejip mung na jamkho laü hotaq, raüta kra mung na naishiq ka rawii luhea sikai. Ejip mungti raq naititiim pat na kai tiichamchao wanto. Kiimaq naishiq min tiicham chao wanto.

¹⁶ Kiimaq naishiq ka Tatiwe man na khrum jaü hoqtrangkai. Apaiq raq naishiq hotrang ka taito. Raüta naishiq khrumti rase ashi tiikito. Apaiq raq naishiq ka Ejip mung wa tsuq wanto. Ümchaü naishiq ka Kadesh wang na. Üm mung hiqrai tho chela na.

¹⁷ Mangchan laüta naishiq ka üm mung lam maq leawan miitu aming kuqlaq. Naishiq nai naishiq nyamse kong thun ka lam jong phan phan li miwahai. Lamphai ka jinkimai. Riimakla üm wak ram thun na riimakla üm spiqtsi ro thun niimin ji maq niki mai. Kiimaq naishiq raq üm khappong thun wiimin kham ka nyang wan mai. Naishiq ka mangjong maiqse lamjong kra phan phan li üm mung wiilü miwa wan hai. Lamphai ka jinki mai.”

¹⁸ Shatmaq Edomnok raq treto, “Naishiq raq namshiq ka nai mung lam maq tlea wan mai! Kiimaq namshiq ka naimung lam maq laü wan han la, naishiq raq namshiq ka akhat mirki hai.”

¹⁹ Kiijiishe Israilnok raq nguto, “Naishiq ka mangjong lam kra phan phan li miwa hai. Kiimaq naishiq raq kiimaq naishiq nyamse kong raq namshiq kham chum wa ümkhii miiwa kham nyang wan haijiila, kra miitu naishiq raq ari mikuq kai. Naishiq ka lamjong phan phan lea wan miituli chongtiikai.”

²⁰ Shatmaq Edomnok raq hali tre nongto, “Naishiq raq tiiwa mai!” Krai mren tsangshiq ka phenlabi pahea sheaho raüta Israilnok khatkai kihoto.

²¹ Edomnok raq Israilnok ka tsang mung lam maq tiiwa mak kha miishe, Israilnok ka lam ahin nü miishe wawanto.

Aron Tsaito

²² Israilnok ka Kadesh wang maq laü wanto. Raüta Hor pum wang niishe saüto.

²³ Kriika Edom mung hiq rai na. Kiijaq Tatiwe raq Mosheq nai Aron ma nguto,

²⁴ “Aron ka Ngi raq Israilnok ma mung ashi mikuqha nguta kiq kham kuq kang kiijaq saü wa lot mak. Apaiq ka atsai she miraq. Jamkhano ngukla namnai wiita Meriba wang maq ikiq khiilan.

²⁵ Aron nai ase Eleajar ka Hor pum na shea wanlaq.

²⁶ Laüta kiijaq Aron ramwe rohun samtong jong thun ka chhut baiq laq. Laüta ase Eleajar ma tiisam kuqlaq. Aron ka kiijiishe mitsai.”

²⁷ Tatiwe raq aming kuqtaq kra phan phan Mosheq raq jaq ka shamto. Tsangshiq ka mungmaiqse makki na Hor pum na wawanto.

²⁸ Kiimaq Mosheq raq Aron dü wa ramwe rohun thun ka chhutto. Raüta kriithun miirii ka Eleajar miishe tiisam kuqto. Kiijaq kra pum khuthaq na Aron ka tsaito. Kiimaq Mosheq nai Eleajar ka pumji niishe sat kito.

²⁹ Mungmaiqse tlotli raq Aron ka tsaikito she nguta tsütsa ka sapto. Kiimaq tsangshiq tlotli raq Aron majo ka raroqtsam hoqto.