WEAWEA 19 - ASII LAKDAP Bible (BSI)

Minshii Kaü Achaq Wabun

¹ Tatiwe raq Mosheq nai Aron ma,

² Israilnok ma arthun tri raütu ara kuq ronglaq nguta aming kuqto. Mosheq nai Aron ma minshii kaü ashi akhum nyeajokjok ami atsi jammin ahü kiimaq maiq raq jaq tiisham mak shaq atang kra lam kuq wan ronglaq.

³ Kiimaq tsangnai raq kra kaü ka ramwe Eleajar jaq na mikuq. Raüta kra minkaü ka piitiip phai niishe hitho chang. Raüta apaiq man na kra kaü ka ataa chang.

⁴ Raüta Eleajar raq kiiwa ngam tiijai wiijam ka ajaq na milam. Raüta ajaq shi maq jang miishi ngam tiijai ka Tombutiip nü nü kiina tiinyi raüta miwan.

⁵ Raütiishe kra ngam ka wiipumtam maq, akhü thun min nong nong maq, angam thun kra, atiijai thun kra, kiimaq apukji thun kra, ramwe man na wiita wa na chaq baiq chang.

⁶ Raütiishe apaiq raq maisak chin pan thun, hissop pekü nyam, kiimaq raishiilo kra lam raüta kriithun ka wa na michaq.

⁷ Kra lotjai, apaiq raq adü wa akhu akhea thun kra kham na hechang. Raüta kham ka akhum na nyuk chang. Kra lot jai she apaiq ka piitiip mong na minyap wa nong. Shatmaq apaiq khum ka apii ashe raji na saüli miraq.

⁸ Kiimaq minsaü kaü ka wa na chaqtiwe riimin apaiq khum wa khu akhea thun kriika kham maq hechang. Raüta adü na kham maq tiinyuk chang. Shatmaq apaiq kiimin raji na saüli, akhum ka ashe miraq.

⁹ Kra lot jai she maiq weshi akhum asii pii mak we riishe kra minsaü kaü achaq wabun kriishe mirchom. Raüta piitiip phai hiq ba ashi asii pii mak ba na phong chang. Raütiishe kriika Israilnok raq lang miitu kiijiili she phong chang. Israilnok raq kiiwa wabun kra lamki raüta kham rai shot chang. Raüta kra kham kriimaq apii phan hupsam kra tiisii bat chang. Ara apii chang phan tiisii he wantlaq arka ngarai tiisii miitu klotlo.

¹⁰ Maiq ümriiti riiwa kra wabun kra riichomtaq kriiwe raq apaiq dü wa khea samtlaq thun kra kham maq hechang. Kiimaq apaiq ka raji na saüli akhum ka apii ashe miraq. Ara thungtri arka pattup pat-sa miitu. Israilnok miitu kiimaq pong mungti wanshawe Israilnok rai siti miitu min.

Maiq Maa Jaq Maq Asham

¹¹ Jurwa maiq maa na ajaq maq shamtlaq kriiti ka ramiishi na saüli akhum ka ashe apii misi.

¹² Apaiq raq akhum ka ranaiq tsam ngoja na kham maq pii tiishi hechang. Kiimaq ramiishi ngoja na akhum ka kham maq hechang. Kra raütiq akhum ka asii she miraq. Shatmaq apaiq raq akhum ka ranaiqtsam ngoja na nai ramiishi ngoja na jang nai wiita na akhum ka kham maq hemak raüla, akhum ka apii asheli miraq.

¹³ Jurwa maiq maa ka jaq maq shamtlaq raüta akhum ashe pii tiishimak riitlaq, kriiwe ka apii asheli riishatshat miraq. Jamkhano ngukla akhum na phum ram kham maq bat mak dea. Kra ningkhan apaiq raq Tatiwe Tombutiip ka tiishetlo. Krai mren apaiq ka Tatiwe sengi nguta wea dam mak she miraq.

¹⁴ Kiimaq tombutiip mong na maiq ashi ra tsaiki raüla, kra akhing na tombutiip mong na juwa asi, riimakla juwa tiipmong na nyap watlaq, kriiti ka ramiishi na saüli ashe apii miishe mijaki.

¹⁵ Kiimaq tombutiip mong na ahap ahü loweatek hamlii tsabum kiimaq apang chang ahü hamlii tak kiimin apii ashe miishe mijaki.

¹⁶ Kiimaq maiq ashi ra raq maiq ashi ra ka maiq raq atsat lo, riimakla apaiq tsai tsai chiiphai na atsaiki lo, riimakla maiq ashi ra raq maiq rii ka jaq maq sham raüla, apaiq ka ramiishi na saüli apii ashe miishe mijaki.

¹⁷ Apii ashe kra tiisii ma, minsaü ashii kaü ngarai tiisii miitu wa na achaq wabun kra tsoq chang. Raüta hamlii tak na thiichang. Raüta kriithaq na kham anye thiichang.

¹⁸ Apha na maiq ju khum wa asii apii ahü kriiti raq hissop pekii nyamse kra toqkai chang. Raüta kra pekii nyam ka kham na tsam chang. Raüta tombutiip ka kham maq bat chang. Kiimaq tiip mong na phanrap hupsam thun sitlaq kra wiita phumram kham maq bat chang. Kiimaq tiip mong na maiq ümchuwa asi kriithun kunli dü na phumram kham maq bat chang. Kiimaq bomtsi anai ngoja na, maiq ümriiti khumwa pii mak asii sitiwe raq kra maiq rii shamtiwe riimakla, maiq maa na ajaq maq shamtiwe, riimakla maiq maakho na ajaq maq shamtiwe khum na phum ram kham maq bat chang.

¹⁹ Kriimaq ranaiqtsam ngoja niishe kiimaq ramiishi she ngoja na, maiq akhum apii riimak asii sitiwe raq, akhum apii ashe sitiwe khum na phumram kham maq bat chang. Kiimaq ramiishi ngoja na, apaiq raq arewe jurwa akhu akhea thun nai akhum na kham maq ranap rashe dong na tiinyuk raüta, akhum tiisii wantaq we kra khum ka tiisii heke wan chang.

²⁰ Juwa akhum ka apii ashe ma jakitlaq, kiimaq akhum ka tiisii mak maq sitlaq, kriiti ka ashe li miraq. Jamkhano ngukla akhum tiisii chang phumram kham maq akhum na bat mak dea. Apaiq raq Tatiwe Tombutiip ka tiishe baiqto. Kra ningkhan apaiq ka Shiikeawe sengi nguta weadam mak she miraq.

²¹ Namshiq raq ara thungtri ka pattup pat-sa lang wan ratlo. Jurwa arewe khum na phumram kham maq bat kuqtlaq, kriiwe riimin, apaiq düwa akhu akhea thun kra kham maq heraatlo. Kiimaq jurwa kra kham ka ajaq maq shamtlaq, kriiwe kiimin raji na saüli apaiq khum ka ashe apii misi.

²² Akhum ashe we raq jamlai phan hupsam wa ajaq ma shamtlaq, kriithun ka ashe apii she miraq. Kiimaq kriithun hupsam ka maiq jurwa ajaq maq than shamtlaq kriiwe kiimin raji na saüli ashe miraq.