WEAWEA 18 - ASII LAKDAP Bible (BSI)

Ramwebi Nai Lewinok Jaqsham

¹ Tatiwe raq Aron ma nguto, “Ümnaq nai ümsetiim kiimaq Lewi phan raq Ngi miitu Ngi asi Tombutiip mong na jaqsham tlan kiijaq shutphit han jiila, kra mra hotlan kha ka namshiq raq mo mihohan. Shatmaq ramwe jaqsham na shut phit han jiila, ümnaq nai ümsetiim lam lam riili kriikha miitu mo mihohan.

² Ümniima tanyang senobi, Lewi phan ka shea wan laq, ümnaq nai ümsetiim raq Tombutiip na jaqsham tlan kiijaq, namshiq khrumke miitu.

³ Tsangshiq raq ümnaq choke wan jaqsham sitlaq kra nai Tombutiip miitu tsangshiq raq jaqsham chang sitlaq kriika sham raa dongdii. Shatmaq tsangshiq ka Asii Khok na sitlaq asii hupsam thun ka tsangshiq jaq maq sham maimak. Riimakla berong-wacha ka jaq ma shamwa maimak. Tsangshiq raq krii thun ka jaq miila sham raüla, tsangshiq nai ümniika khoshi na tsea baiq chang miraq.

⁴ Tsangshiq ka ümniirai adam maq jaq sham dam chang. Raüta Tombutiip miitu tsangshiq raq jaqsham chang holai ümchu wa sitlaq kra khaq khaq sham ratlo. Shatmaq tri maq tseatsiiq wanhüti riika, ju riimin ümniirai jaqsham dam maimak.

⁵ Asii Khok nai berong-wacha na jaqsham chang sitlaq kriika ümnaq nai ümsetiim riili dongdii jaq ka sham chang. Kra riihan jiitiq Israilnok khuthaq na itsankhiq walü ka nyai nong mak she miraq.

⁶ Ngi raq ümta ümwii Lewi phan ka Israilnok phong wa ümniima kongphiq akuq ikha tsangshiq ka tsea wan lata ümniima kuqkang. Tsangshiq ka Ngi ma akiinongke wan wishe. Krai mren, tsangshiq raq Tombutiip na jaqsham chang sitlaq kra sham miitu tseatsiiq wan kang.

⁷ Shatmaq Asii Pinthum Khok nai berong-wacha na ramwe jaqsham chang ümchuwa sitlaq kriika ümnaq nai ümsetiim raq lam lam riili sham ratlo. Arthun jaqsham arka ümnaq arang. Jamkhano ngukla Ngi raq ramwe jaqsham kongphiq ka ümnaq miili kuqkang. Krai mren, maiq juwa arthun jaqsham miitu shong wan mak dea, kriiti weshi ra ka arthun asii hupsam thun artho niila wa raüla, apaiq ka atsea mirbaiq.”

Ramwebi Rii Saqseng

⁸ Tatiwe raq Aron ma nguto, “Tsan na tiitsanglaq, Ngi ma kuqtlaq honglu thun wa na chaq chang riimak tlotli akhek jaqmiiq thun kriika, Ngi raq ümniimiishe kuqtiikang. Ngi kriithun ka ümniima nai ümsaü ümsetiim rii pattup pat-sa miitu saqseng athiiq ikha kuqtiikang.

⁹ Asii pinthum honglu kuqtlaq thun wa, berong-wacha na wa na chaq mak honglu thun kriiwa, arthun arka ümniiriishe miraq: wong-honglu thun kra, ngarai-honglu thun kra, kiimaq thiitham honglu thun kra. Ngi ma ümchuwa ram tiibok honglu akuq thun kriika ümniirii nai ümsetiim rii she.

¹⁰ Ümniiraq arthun ka asii silaitap maq phaqsea chang. Kiimaq maiqwere riili phaqsea chang. Arthun arka asii nguta kai shreng laq.

¹¹ “Arthun arthaq niimin, Israilnok raq akhek atiitsang laihin jaqmiiq Ngi ma kuqtlaq thun kriika ümniirii she miraq. Kriithun ka Ngi raq ümniima, ümsetiim ma, kiimaq ümse jechak setiim ma pattup pat-sa miitu she kuq tiikang. Ümjamtitiim khum asii maq siti loweatek raq arthun ara phaqsea dam mimai.

¹² “Ngi ma Israilnok raq rawiitek tsamnye siqtlaq kriiwa petsi wiq tsam ahea pinthum kuqtlaq thun kra ümniimiishe kuq tiikang: oliptai, spiqtai, kiimaq bunwong wong thun kra kuq tiikang.

¹³ Arthun arka ümniirii she. Ümjamtitiim khum asii maq siti tarü raq kriithun ka phaqsea mimai.

¹⁴ “Israil mung na jamlai phan wa jaina raükha ahü maq Ngi ma kiinong kuqtlaq thun hupsam ka ümniirii she.

¹⁵ “Ase chhikhuse riimakla nyamse chhikhuse Israilnok raq Ngi ma kiinong kuqtlaq kriithun ka ümnii riishe. Shatmaq ümniiraq maiqse chhikhuse loweatek daa wan miitu ari athii kuqtlaq kriika ajaü ratlo. Kiimaq nyamse ashe phan chhikhuse nyungtlaq kra daa wan miitu ari, athii kuqtlaq kra kampho kiimin ümniiraq jaü ratlo.

¹⁶ Nosere ka arawii jipi lüshi she angu na thungtri na athü kampho ngam siibiingi, mung raq langtlaq thii kriimaq ri raüta daa wan ratlo.

¹⁷ Shatmaq minsaü chhikhu se, sku chhikhu se, kiimaq chhechhi chhikhu se nyungtlaq thun kriika ari kuq raüta daa wan raamak. Kriithun ka Ngi riili dongdii kha maq honglu na take ratlo. Kra ngam tiijai thun ka berong-wacha kiijaq raübaiq laq. Kiimaq kra ngam pü thun kriika phaqsea-honglu akuq la na wa na chaqlaq. Kra khiimtsang ka Ngi ma tsan tiiheali honglu.

¹⁸ Kriithun wa ngam thun ka ümniirii she. Akhuk ngam, kiimaq awühok hoktsi nüti thun akhek atiitsang honglu akuq ngam rea ka ümniirii she.

¹⁹ “Israilnok raq akhek atiitsang kongphiq thun ümchuwa Ngi ma kuqtlaq, kriithun ka Ngi raq ümniima, ümsetiim ma, kiimaq ümsetiim jechaksere ma kuq tiikang. Arka pattup pat-sa miitu she kuq tiikang. Israilnok raq Ngi ma akhek atiitsang jaqmiiq kuqtlaq thun tlotli ka ümniirii siisaq she. Arka Ngi raq ümnaq rai kiimaq ümsaü ümsetiim rai tiipanki mak phan tongshong ramkham maq atiibok jaqkhaq raü tiipa kuq tiikang.”

²⁰ Tatiwe raq Aron ma nguto, “Ümniiraq Israil mung wa tachong hupsam hiqphu ka ümniirii ka phushi min chum kuqmak ahü miraq. Ngi, Tatiwe sitiikang arli ümnii rii ka. Ngi arli she ümniima hongli.”

Lewinok Rii Saqseng

²¹ Tatiwe raq nguto, “Israilnok raq Ngi ma aroq khuwa honglu kuqtlaq thun ka Ngi raq Lewinok miishe kuqbaiq kang. Arka tsangshiq raq Ngi asi Tombutiip shiili liitlaq kra miitu tsangshiq jaq maq she kuq tiikang.

²² Israilnok maiq phan ahinti raq Tombutiip tho na awa maimak she. Kiimaq akha tsangshiq raq klo raüla, tsangshiq ka mo ho raüta atsai miraq.

²³ Ümchaü armiiphat sanha Tombutiip liikoti ka Lewinok lam lam li she miraq. Kiimaq Tombutiip miitu sham akai kunli ka tsangshiq riili she arang miho. Ara thungtri arka pattup miitu she. Ümsaü ümsetiim riimin arthun tri ara lang raüta jaqsham chang. Israil mung na Lewinok miitu tachong hupsam ka ahü miraq.

²⁴ Jamkhano ngukla Israilnok raq Ngi ma akhek atiitsang jaqmiiq aroq khu wa honglu kuqtlaq kra, Ngi raq tsangshiq ma tachong hupsam ikha kuqbaiq kang she. Arningkhan na Ngi raq tsangshiq ma chongkuq kang she, Israil mung na tsangshiq rii pattup tachong hupsam ka ahü miraq.”

Lewinok Raq Akuq Aroq Khu Honglu

²⁵ Tatiwe raq Mosheq ma aming kuqto

²⁶ Lewinok ma akha chong kuqlaq nguta: “Namshiq raq ümtiikiiwa Israilnok jaqwa aroq khu honglu, Tatiwe raq namshiq miitu tachong hupsam la na kuqtlaq kra laptlan akhing na, kriiwa namshiq raq aroq khuwa honglu ka lam lanta Tatiwe ma akhek atiitsang jaqmiiq la na ke wan ratlo.

²⁷ Ara akhek atiitsang jaqmiiq kuqtlan arka, wak shamseati raq tsamnye wong honglu nai spiqtai anye honglu kuqtlaq irkhan miraq.

²⁸ Akha namshiq riimin Israilnok raq akuq honglu thun laptlan kiiwa, aroq khu wa lam lanta Tatiwe rii akhek atiitsang jaqmiiq kra kuq ronglaq. Namshiq raq ara akhek atiitsang Tatiwe ma kechang arka ramwe Aron jaq na kuq ronglaq.

²⁹ Namshiq raq laptlan kriiwa ahea pinthumti ka kuq ronglaq.

³⁰ Ümtiikiiwa namshiq raq ahea pinthumti kra kuqtlan, kriiwa abung tiichongtlaq kriika, waksham seati raq honglu kewan jai abung atiichong ka apaiq riishe thühotlaq ikha namshiq riishe thüho ronglaq.

³¹ Kriiwa abung tiichongtlaq kriika ümnaq nai ümjamti raq ümbana ngalanta phaqsea min mimai she. Jamkhano ngukla arka ümniiraq Tombutiip na jaqsham tlaü kra miitu ümjaq maq akuq.

³² Ümniiraq ahea pinthumti ka Tatiwe ma kuq laü jiika, ümniiraq ara phaqsiq haü min, ümniika tiishut mak she. Shatmaq Israilnok raq akuq asii ngamrea kongphiq thun kiiwa ahea pinthum ba kra Tatiwe ma kongkhu honglu na mikuq haüshaq wiiwii, ümniiraq phaqsiq laüta tiishe baiq maimak. Ümniiraq kra tiishe shi haüla, ümniika tiitsailaq mitsatbaiq.”