WEAWEA 17 - ASII LAKDAP Bible (BSI)

Aron Nyeakii

¹ Tatiwe raq Mosheq ma nguto,

² “Israilnok raq ümniima nyeakii roqshiri anai kuqlaq nguta chonglaq. Maiq phan wela ashi jaq wa nyeakii ka achhuq chhuq jaülaq. Laüta maiq welatek mang ka anyeakii kiijaq waiqlaq.

³ Kiimaq Aron mang ka Lewi phan rii nyeakiiti kiijaq waiqlaq. Maiq phan aweatek welabi kra rii na nyeakii ka kiishishi miraq.

⁴ Laüta kra nyeakii thun ka Ngi asi Tombutiip mong na Tongshong Tek khaki na, Ngi raq ümniirai riihumtiikang ba kiijaq thülaq.

⁵ Krii phong kiiwa Ngi raq juwa shong wan kang kriiwe nyeakii kra acham raüta aküsetiim asi miraq. Akha klo lata Ngi raq ara Israilnok raq ümnaq ngeng bom bot wan ruq bottlaq kra tiikaiqshak she mitiikaiq baiqha.”

⁶ Akha Mosheq raq Israilnok ma chongto. Kiimaq tsangshiq raq maiq phan wela aweatek raq apaiq ma maiqmiimii phan nyeakii ka achhuq chhuq kuqto. Tsangshiq nyeakii tlotli ka roqshiri anai. Kiimaq Aron nyeakii kiimin tsangshiq nyeakii phong krai adam na thüdamto.

⁷ Kiijiishe Mosheq raq kra nyeakii thun ka Tombutiip mong na Tongshong Tek kaü khaki na thüto.

⁸ Kriimaq napjai niishe, Mosheq ka Tombutiip mong na wato. Raüta apaiq raq liikiita Lewi phan rii Aron nyeakiiti kriika aküsetiim chamto. Raüta apü setiim ka dongto. Raüta Almon petsi posetiim ka aman she riito!

⁹ Mosheq raq kra nyeakii thun ka wiita lam hoto. Raüta Israilnok ma tiichhito. Kiimaq tsangshiq raq kra jamkho jataq kra chhito. Kiimaq maiq phan welatek raq maiqmiimii nyeakii kra jang rang she janghoto.

¹⁰ Kiijiishe Tatiwe raq Mosheq ma nguto, “Aron nyeakii ka Tongshong Tek kaü khaki na thüwa nongkiq. Arka Israilnok phongwa Ngi ngengtibi thun miitu tsangshiq raq bot nyantlaq kra tsaq mak lila siraüla, tsangshiq ka atsai miraq nguta hon chong bomtsi khake ma misilaq.”

¹¹ Tatiwe raq aming kuqtaq kra phan phan Mosheq raq jaq ka shamto.

¹² Kiijiishe Israilnok raq Mosheq ma nguto, “Ikhiijiika naishiq thun ka miqkai she ahata!

¹³ Naishiq phongwa maiq weshi ra ka Tombutiip tho kiina waraü min, apaiq ka atsai chang she jiika, naishiq tarü arka amaa phong ikhli she sitiikai ahata!”