WEAWEA 16 - ASII LAKDAP Bible (BSI)

Kora, Dathan Kiimaq Abiram Raq Mosheq Ngachang Nyea Tanto

^1-2 Kora ka Ijhar se, Lewi weraü wa, Kohath ta wa. Apaiq ka Mosheq wokhong wa dongho raüta pong wela jahoto. Apaiq rai pongdamti ka Reuben phan wa Dathan nai Abiram, Eliab se nai Kiimaq Peleth se On raq pong damto. Kiimaq Israilnok phong wa mung maiqse raq atsea maiq welabi amang chong ra tsa ikha siti maiq 250 raq pong damto.

³ Tsangshiq ka adam na Mosheq nai Aron khaki na thungto. Raüta tsangnai ma akha nguto, “Namnai ka chan hea she tiichan ne kilan! Israilnok mungmaiqse kunli ka Tatiwe sengi siisaq. Kiimaq Tatiwe ka naishiq tarü rai adam na asi. Kra taü maq, Mosheq ümniika Tatiwe sengi mungmaiqse thaq na ajong nguta jam nguto tiitsaki tlaü?”

⁴ Ümtiikiiwa Mosheq raq ara bom ka taitaq, apaiq ka hiq na bum kitlii raüta achu jaüto.

⁵ Kra raütiishe apaiq raq Kora nai asenginok ma akha nguto, “Anap ranap Tatiwe raq nashiq ma, apaiq rii maiq ka juwa tsea wantaq, kriiwe ka nashiq ma mitiichhikuq. Apaiq raq juwa ajaqshi ma shongtaq, kriiwe ka apaiq phana mitiiwa. Raüta berong-wacha na honglu ka mitiikuq wa.

^6-7 Anap ranap na, ümnaq nai ümsenginok raq honglu kechang wapin thun kra achhuq chhuq jaq na sham ronglaq. Lanta kiijaq wachan wiiwa kra thii ronglaq. Kriithaq na homseng kra thii ronglaq. Lantiishe berong-wacha kiina kuq wa rongkiq. Kiijiishetiq nashiq raq milii rong i, nashiq phong wa Tatiwe raq juwa apaiq ramwe miitu shongtaq kra milii rong i. Namshiq Lewinok riiwe ka chanhea thittlai phok she tri jin tlan!”

⁸ Mosheq raq Kora ma akha nguto, “Tai ronglaq! Namshiq Lewi phan raq!

⁹ Israilnok Shiikeawe raq namshiq ka Israilnok phong wa pong na tsea wanto, raüta namshiq raq apaiq tho na wa lanta, Tatiwe Tombutiip na apaiq shiikum pan jaqsham arang kuqto, kiimaq mungmaiqse miitu shomnoq jaqsham kuqto kiimaq tsangshiq shiikum pan jaqsham kuqto, arka hiqtilise kuqto ngutiisha tiima tlan?

¹⁰ Apaiq raq ümnaq nai Lewinok phan tlotli ma ara rahea phan jaqsham kuqto. Kra taü miisha, ümchaü ümnii riika ramwe jaqsham kriimin ümniiraq sham chang nguta phephiiq tlaü!

¹¹ Ümtiikiiwa ümniiraq Aron ngeng bom bomtlaü, kriika riikhaqli maq ümniiraq nai ümsenginok raq Tatiwe ngeng bom bom tlan.”

¹² Kiijiishe Mosheq raq Dathan nai Abiram ka tiiheakito. Shatmaq tsangnai raq akha treto, “Nainai ka wamai!

¹³ Riita ümniiraq naishiq ka hiqpo hiq win hiq Ejip mung wa arjaq tsuq wan laüta, ara bintang jüngi mung arjaq tseabaiq ma tsuq wan laü armin hong mak dea ngutiisha tiima tlaü? Kriithaq niimin ümniika naishiq khuthaq na dü laüta naishiq ka kai jamshaha jaq ngutiisha tiima tlaü?

¹⁴ Ümniiraq naishiq ka hiq po hiq win mung na shea wan maü shaq li. Riimakla naishiq ma wak ajam kiimaq spiqtsi ro sunruk thun ka naishiq ma tachong hupsam kuq maü shaq li. Kiimaq ümchaü ümniiraq naishiq ka alao riiha jaq nguta dan tlaü. Naishiq ka ümphana wamai!”

¹⁵ Mosheq ka atsan khiqto. Kra ningkhan Tatiwe ma nguto, “Arwetiim raq honglu kuqtlaq thun ka ashi min naq taokiq. Ngi raq tsangshiq phong wa ju miimin ashut klomang. Ngi raq tsangshiq kumtoq kong wa kaüshi ra dongdii min lamho mang.”

¹⁶ Mosheq raq Kora ma nguto, “Anap ranaiq ümnaq kiimaq ümsengi 250 ka Tatiwe asi Tombutiip na wa ratlo. Aron min kiijaq asi miraq.

¹⁷ Namshiq loweatek raq maiqmii jaq na wa winpin kra sham raq mirhan, lanta kiijaq homseng kra thii ronglaq. Lanta berong-wacha na honglu kra kuq ronglaq.”

¹⁸ Krai mren, maiqwere loweatek raq maiqmii jaq na wa win pin kra doraq chhaq riito. Raüta wachan wiiwatam ka kiijaq thiito. Kiimaq homseng ka kiijaq thiito. Raütiishe Mosheq nai Aron rai Tombutiip na walam kilamchong na chapto.

¹⁹ Kiijiishe Kora raq asengi kong ka wiinoktam kiijaq tiithungto. Raüta tsangshiq ka Mosheq nai Aron rai khariire na Tombutiip kilamchong na chapto. Kiijiishe tiihanghiiq miili makse chathit achhai anyii Tatiwe asi chhainyii ka tlotli mungmaiqse mak ki na saükito.

²⁰ Kiimaq Tatiwe raq Mosheq nai Aron ma nguto,

²¹ “Namshiq ka arkong tho wa jai na tiijin tlo ronglaq. Kiimaq Ngi raq tsangshiq ka ümchaü tlothit mitiijiim baiqha.”

²² Shatmaq Mosheq nai Aron ka hiq na bum rang bum kito. Raüta akha nguto, “O, Shiikeawe lei, ümniika tlotli ma rilung tsitsü raü chong. Ngarai ka maiq weshi riili tangto. Riita ümniiraq mungmaiqse tlotli miisha mikhiq haü?”

²³ Tatiwe raq Mosheq ma nguto,

²⁴ “Mungmaiqse ma tsangshiq ka Kora, Dathan, kiimaq Abiram sichang tombutiip thun kra tho wa alu na jutlo ronglaq nguta chonglaq.”

²⁵ Kiijiishe Mosheq raq apaiq rai Israilnok welabi thun ka shea raüta, Dathan nai Abiram phaniishe kito.

²⁶ Raüta apaiq raq mungmaiqse ma nguto, “Ara abi wetiim tombutiip thun tho kiiwa alu na chap ronglaq. Kiimaq tsangshiq hup asam thun ka ashi min jaq maq naq sham rongkiq. Riimakla, namshiq kiimin tsangshiq ngarai kha na wiita khoshi na mitsuq baiq wan.”

²⁷ Krai mren, tsangshiq ka Kora, Dathan, kiimaq Abiram tombutiip thun tho wa alu niishe tiijin wanto. Dathan nai Abiram ka tsangshiq tombutiip mong wa dongki raüta, tsangshiq tombutiip thun kilamchong na tsang chaktiim nai tsang setiim thun rai chap raqraq riito.

²⁸ Mosheq raq mungmaiqse ma nguto, “Riita ümchaü sanha ngi raq arthun jaqsham tiikang arka Tatiwe raq shong raü tiidea shamtiikang, ngi tsiitsii maq ashamha riimak nguta, namshiq raq misaphan.

²⁹ Kriika arwetiim arka Shiikeawe raq mo tiiho raüta riimak, miinan joli maiqse tsaitlaq ikhla tsaiki raüla, Tatiwe raq ngi ka shong mak dea ngushat.

³⁰ Shatmaq Tatiwe raq phanshi ra, maiqse raq ni maq taimai phan jaqsham raüta, kiimaq hiq raq anübok ka tiiki raüta tsangshiq ka tsangshiq tachong hupsam rai nongnong maq jok wan raüla, raüta tsangshiq ka hiqmong na atra maq hiq raq lam wan raüta, wulum mung na tsuq wan raüla, arwetiim raq Tatiwe ka tiishaü baiqto dea nguta misap han.”

³¹ Mosheq raq apaiq bom chong kra tiithum lot ri lishe, Dathan nai Abiram chap chang ba hiq kra tiikholiiq tlinhok khokito.

³² Raüta tsangshiq ka achak asetiim nong nong maq, Kora sengi kong nai tsangshiq hupsam ta awii thun hutjok miishe hiq tiichaikita nübok mong na jok wanto.

³³ Krai mren, tsangshiq ka atra miili she hiqkho mong na wulum mung na tsangshiq hup asam thun nong nong maq jok wanto. Hiq raq anübok ka tsangshiq jok wan raüta tiiphup baiqto. Krai mren tsangshiq ka miqchup miqto.

³⁴ Israilnok mungmaiqse kiijaq asiti thun ka tsangshiq hotrang tai raüta wiita apin ajin pin trangto. Tsangshiq ka, “Jutlo ronglaq! Hiq raq nashiq min jok baiq wan dam jiiq!” nguta gitrangto.

³⁵ Kiijiishe Tatiwe raq watu tiikito. Raüta kra walü nyai hengtlaq kriiraq maiqwere 250 homseng honglu berong-wacha na kewati kra tiihihut khiimbaiqto.

Wawinpin Thun

³⁶ Kiijiishe Tatiwe raq Mosheq ma nguto,

³⁷ “Ramwe Aron se Eleajar ma chonglaq, maiq ümchuwa wa raq khum raüta jiimtaq maa chiim na miiki wawinpin thun kra adam na riichom laq. Laüta wapin mong wa wachan thun kriika hiq ba ahin na wanbaiqlaq. Jamkhano ngukla wawinpin thun ka asii.

³⁸ Kra wawinpin thun ka ümtiikiiwa Tatiwe berong wacha na kuqtaq kriikha maq asii she jakito. Kra ningkhan tsangshiq ngarai tang kha na tsaitaq wetiim wa winpin thun kra adam na riichomlaq. Laüta pisaisai diimsetiim ma tiiqlaq. Laüta kra diimsetiim maq berong-wacha kra joblaq, kriika Israilnok miitu tsii lam chang saqse misilaq.”

³⁹ Krai mren, ramwe Eleajar raq kra wa winpin thun kra riichomto. Raüta kriithun ka tiiqwe ma kuq raüta pisaisai setiim adiim liim tiitiiqto. Raüta kra diim thun maq berong-wacha kra jopto.

⁴⁰ Arka Aron saüse phan riimakti raq, juli jiimin berong-wacha tho na Tatiwe ma homseng honglu chaq wa maimak nguta, Israilnok miitu honlam bomchong ashi riito. Kriiti ka Kora nai asenginok khiimbaiqtaq kiikha wa raq apaiq kiimin mikhiimbaiq. Arthun jaqsham klo wantaq arka Tatiwe raq Mosheq lümaq aming kuqtaq kra phan phan Eleajar raq kloto.

Aron Raq Mungmaiqse Ka Tiichhiikuqto

⁴¹ Kriimaq nap jai ranaiq she mungmaiqse tlotli raq Mosheq nai Aron tiishut bomto. Tsangshiq raq akha nguto, “Namnai raq Tatiwe sengi maiq wiijam tsatbaiq lan.”

⁴² Tsangshiq ka Mosheq nai Aron tiishut ma adam na kunli riitam wan jai she, tsangshiq ka Tombutiip nü na liito. Kiimaq tsangshiq raq phumda kaü ka satki raüta tiip ka pang wanto. Kiimaq Tatiwe asi makse chathit chhainyii liliimtlaq ka kiijaq chhairaitlaq kra chhito.

⁴³ Kiijiishe Mosheq nai Aron ka wa raüta Tombutiip rinkea kiijaq chap wato.

⁴⁴ Kiimaq kiijaq Tatiwe raq Mosheq ma nguto,

⁴⁵ “Namnai ka arkong artho wa jai nü kiina chap ronglaq. Ngi raq tsangshiq ka ümchaü li arjaq mijiip baiqha!” Kiijiishe tsangnai ka hiq na bum rang she bumkito.

⁴⁶ Kiimaq Mosheq raq Aron ma nguto, “Üm wapin ka ümjaq na shamtlolaq. Laüta berong-wacha kiiwa wachan wiiwatam maq kiijaq tso laüta thiilaq. Laüta homseng honglu wiijam ka wapin na thiilaq. Laüta kra ümjaq na doshat maq jaqlo thit thit mungmaiqse khum kra tiisii wan mro ka chhikuq tlolaq. Kotsi jaqlo! Tatiwe tsankhiq walü ka anyai wan kun she. Thabi tsi ka adong wan kun she.”

⁴⁷ Krai mren, Aron raq kra aming ka langto. Raüta apaiq wa winpin ka ajaq na doshat maq apaiq ka mungmaiqse thungtlaq among tiithi ba maq juto. Riita apaiq raq thabi ka adong wanwi she chhito. Kiimaq apaiq raq homseng ka wa winpin na wachan nyaitlaq kriithaq na chaqto. Raüta mungmaiqse khum tiisiike mrochhi khuliiq jaqsham kra klo kuqto.

⁴⁸ Ara klo kiitiitiq thabi dong ka tsaq kito. Kiimaq apaiq chapkitaq kriimaq siimko niika maiq maa phongli kiimaq siimko niika maiq atrati kong phong riito. Apaiq ka aheawea na chap raü riito.

⁴⁹ Kra akhing na maiq jiim raitaq ka 14,700 riito. Arka Kora raq welaja ngarai tangtaq akhing na maiq jiim raitaq kra weahü maq chongtlo.

⁵⁰ Ümtiikiiwa thabi dong ka tsaq kitaq, kiijiishetiq Aron ka Mosheq phana Tombutiip kilamchong tho na wato.