WEAWEA 15 - ASII LAKDAP Bible (BSI)

Honglu Take Thungtri

¹ Tatiwe raq Mosheq ma kuqto

² arthun thungtri raütu ara, apaiq raq Israilnok ma mung ashi kuq wantlaq kiijaq tsangshiq raq lang wan miitu.

³ Minsaü pongwe ashi, skure pongwe ashi, sku ashi, riimakla chhechhi ashi kra Tatiwe ma chaqtlii-honglu na ke mimai. Riimakla sinkham tiikhoi honglu na mimai, riimakla maiqmii tsantsii honglu riimakla akhing khing na kamasham poi klotlaq kiijaq ke mimai. Ara phaqsea-honglu akuq khiimtsang ka Tatiwe ma tsan tiiheali miraq.

^4-5 Jurwa sku ashi honglu na kuqtlaq riimakla chhechhi ashi ka chaqtlii-honglu na Tatiwe ma kuqtlaq, kriiti raq nyamse ashi krai bunwong win kilogram shi ka olip tai litar shi rai shot raüta wong-honglu na spiqtai litar shi krai adam na kechang.

⁶ Ümtiikiiwa skure pongwe kra honglu na kuqtlaq, krai ka bunwong win kilogramnai ka oliptai litar shi ri athiq krai adam na shot raüta wong-honglu na kechang.

⁷ Arka spiqtai litarshi ri athiq rai adam na kechang. Arthun honglu akuq khiimtsang ka Tatiwe ma tsan tiiheali miraq.

⁸ Ümtiikiiwa minsaü pongwe ka Tatiwe ma chaqtlii-honglu na kuqtlaq riimakla sinkham tiikhoi honglu na kuqtlaq riimakla rintii-honglu na kuqtlaq,

⁹ ariirai ka wong-honglu ka bunwong win kilogram atsam kriika oliptai litarnai rai adam na shot raüta honglu na kedam chang.

¹⁰ Arka spiqtai litarnai krai adam na kechang. Ara honglu khiimtsang ka Tatiwe ma tsan tiiheali miraq.

¹¹ Akha minsaü pongwe ashi rai, skure pongwe rai, sku rai, riimakla chhechhi ashi rai honglu ka akha kechang.

¹² Ümtiikiiwa nyamse honglu ka kaüshi thaq na apalin she kuqtlaq, raüla kriirai honglu na kedam chang laihin honglu thun kriimin kra tiithithi sii hali tiipa wan wan raüta kechang.

¹³ Ümtiikiiwa Israilnok noktiwe loweatek raq wong-honglu khiimtsang, Tatiwe ma tsan tiiheali kuqtlaq akhingtek na, akhiisii kewan lili riichang.

¹⁴ Kiimaq, ümra akhing niili jiimin, maiq weshi ra pong mungti namshiq rai sidamti, alo se miitu lo, riimakla pattup miitu lo, shongtlaq kriiraq phaqsea-honglu kuqtlaq khiimtsang ka, Tatiwe ma tsan tiiheali miraq, kra akhing na apaiq raq thungtri ka kriisiili lang chang.

¹⁵ Pattup pat-sa miitu, namshiq ma kiimaq pong mungti namshiq rai sidamtlaqti ma, thungtri ka raütu ka ashili. Namshiqnok nai tsangshiqnok ka Tatiwe maklii na adam siili.

¹⁶ Thungtri raütu thun nai tri raütu thun ka namshiq khuthaq niimin kiimaq tsangshiq khuthaq niimin mren chhaq siili miraq.

¹⁷ Tatiwe raq Mosheq ma,

¹⁸ arthun thungtri raütu ara Israilnok raq apaiq raq tsangshiq ma kuqtlaq mung maq lang miitu kuqto.

¹⁹ Ümtiikiiwa wak na adong man wa phaq asea chang phan kra phaqsiqtlaq, kiiwa wiijam ka pong na lam raüta akhek atiitsang Tatiwe ma ke miitu raithü chang.

²⁰ Ümtiikiiwa namshiq raq winsii ka wa na kotlan, tsamnye sea pha shaq shaq bunwong win lumtlan kra phu ka Tatiwe ma akhek atiitsang kongphiq ma kuq ronglaq. Arka namshiq raq bunwong ni lot jai na winsii lum hanjaq akhek atiitsang kongphiq Tatiwe ma kuqtlan kiikhiisii kechang.

²¹ Arka pattup pat-sa na saüli, namshiq winsii lumphaq tlan kiiwa Tatiwe ma akhek atiitsang kongphiq ma kuq wan ruq riichang.

²² Shatmaq maiq ashi ra raq hemak lam maq arthun thungtri raütu Tatiwe raq Mosheq lümaq kuqtaq ara thungtri wiijam ka lang wan mak dea laq thaq raüla,

²³ kiimaq bom shiiton Israilnok mungmaiqse raq rawiichii akhing na Tatiwe raq Mosheq ma akuq thungtri raütu thun kra kunli lang wan mak tiikhea wan raüla,

²⁴ kiimaq kra shut phit wantaq kriika mungmaiqse raq sap mak kha ma shut wantaq jiila, tsangshiq raq minsaü pongwe ka chaqtlii-honglu na kechang. Ara khiimtsang ka Tatiwe ma tsang tiiheali miraq. Arka riikhaqli tri maq wong-honglu nai spiqtai-honglu rai adam na kechang. Arthaq niimin, tsangshiq raq chhechhi pongwe ashi ka ngarai-honglu na kechang.

²⁵ Ramwe raq mungmaiqse khuliiq mrochhi poi kra miklo kuq. Kiimaq tsangshiq ngarai ka midiikuq. Jamkhano ngukla kra shut wantaq kriika hemak lam maq shutto. Kiimaq tsangshiq raq tsangshiq ngarai-honglu ka phaqsea-honglu ikha Tatiwe ma kuqto.

²⁶ Israilnok mungmaiqse kunli kiimaq tsangshiq rai siti pong mungti thun mra kiimin wiita adii mirkuq. Jamkhano ngukla maiq loweatek tarü raq kra shuttaq kiijaq lomdamto.

²⁷ Kiimaq maiq weshi ra raq hemak lam maq ngarai tang raüla, apaiq raq chhechhi kaü akaü arawii wiishi kra ngarai-honglu na kechang.

²⁸ Berong wacha kiijaq ramwe raq kra mrochhi khuliiq poi ka kriiwe ngarai tiisii wan miitu miklo kuq. Kiimaq apaiq ngarai ka midii kuq.

²⁹ Kra thungtri ka maiq loweatek miitu jurwa hemak lam maq ngarai klotlaq, Israilnok phan noktiwe jiimin kiimaq pong mungti wanshawe raq klo raü min kiikhiisii klo wan chang.

³⁰ Shatmaq maiq ashi ra raq sam sam maq ngarai la klo raüla, apaiq ka Israilnok phan noktiwe lo, riimakla pong mungti wanshawe lo, kriika Tatiwe ka ji maq nishishi ngarai tangtiwe miraq. Krai mren, apaiq ka tiitsai laq tsea baiq chang.

³¹ Jamkhano ngukla Tatiwe raq jamlai wa chongtaq kra apaiq raq shisheto. Kiimaq apaiq raq sapshat taü maq tam lam lam maq Tatiwe aming thun wa aming ashi kra jinto. Krai mren, apaiq miisaq thumtlaq kha ka apaiq khupo niili miraq.

Asii Niitiitsak Ranaiq Tri Jintiwe

³² Israilnok ka rumnyangkhi bintang jüngi mung na siji na, ranaiqshi maiq weshi ka Asii Niitiitsak Ranaiq na chinkii riichom rea chhito.

³³ Kriikha na apaiq ka Mosheq, Aron, kiimaq mungmaiqse kunli man na shea wanto.

³⁴ Raüta apaiq ka kintsongti ma tiikheshat thüto. Jamkhano ngukla apaiq ka jamkha riichang wa bom ka tsangmak shaq li riito.

³⁵ Kiijiishe Tatiwe raq Mosheq ma nguto, “Kriiwe ka tiitsailaq tsea baiq ratlo. Mungmaiqse tlotli raq apaiq ka piitiip phai kiina sheaho raüta long maq tiitsai laq thong baiq ratlo.”

³⁶ Krai mren, mungmaiqse tlotli raq apaiq ka piitiip phai na sheahoto. Raüta apaiq ka long maq tiitsailaq Tatiwe raq aming kuqtaq kra phan phan tiiq baiqto.

Kheani Nyamtu

³⁷ Tatiwe raq Mosheq ma aming kuqto,

³⁸ Israilnok ma akha chongkuqlaq nguta: “Namshiq miirii kheani na anyamtu setiim tiihong paq ronglaq. Lanta kra kheani nyamtu kra paq chang ka raiwai maq ataq raülo maq paq ronglaq. Arka namshiq raq pattup pat-sa lang wan ratlo.

³⁹ Ara kheani nyamtu paqtlan thun arka namshiq ma tsan na tiitsang shat thü wan miitu miraq. Ara chhitlan akhingtek na, namtsan na Ngi raq akuqha aming thun kra mitiitsang han. Lanta kra aming thun ka milang han. Kra riihanla namshiq ka iwokhong wa ahin na juho man mirhan. Kiimaq namshiq raq athithi lam phan na kiimaq namshiq raq aroro lam phan na kiho man mirhan.

⁴⁰ Kra kheani nyamtu raq namshiq tsan mong na Ngi raq akuqha aming thun kra lang chang nguta mitiichhi kuq. Krai mren, namshiq ka Ngi rai iwokhong na tiipumtlii lantli misi wan han.

⁴¹ Ngi ka Tatiwe namshiq Shiikeawe. Ngi raq namshiq ka Ejip mung wa tsuq wan kang. Arka Ngi ka namshiq Shiikeawe ma jawan miitu tsuq wan kang. Ngi ka Tatiwe.”