WEAWEA 14 - ASII LAKDAP Bible (BSI)

Mungmaiqse Bottrangto

¹ Rawa minru mungmaiqse ka chapatsi ma hoq trangto.

² Tsangshiq raq Mosheq nai Aron tiishaü bomto. Kiimaq akha nguto, “Nashiq ka Ejip mung niili tsai hai jaq riiwe ka ahea riichang wa. Riimakla ara rumnyangkhi binjü arjaq tsairai hai riiwe ka ahea riichang wa!

³ Tatiwe raq nashiq ka kra mung na jaram wa tsuq wantla? Nashiq ka re na mitsai rong i. Kiimaq nachaktiim nai nasetiim thun ka re raq shumwi kong ma mitsuq wan. Kra nam miika, Ejip mung na jangho nong riiwe khoti ahea lin miraq riimak sha?”

⁴ Krai mren, tsangshiq liipan na weshi raq weshi ma akha nguto, “Nashiq liipan wa wela ashi tsea laita shong rong i. Laita Ejip mung niili jangho nong rong i!”

⁵ Kiijiishe Mosheq nai Aron ka mungmaiqse khaki na hiq na bumki tlii bumkito.

⁶ Kiimaq Nun se Joshua kiimaq Jephunne se Kelib, siwe wiinai raq tsangnai dü wa khea ka tsangnai tsanbitsi ma chai hea hea she chaito.

⁷ Kiimaq mungmaiqse ma nguto, “Naishiq raq sisin wakai mung ka hiqpo hiq win pinthum ahea.

⁸ Tatiwe raq nashiq ma lungwiitsii thü raüla, apaiq raq nashiq ka kra mung na mishea wan. Raüta kra hiqpo hiq win mung ka nashiq ma mikiinong kuq.

⁹ Tatiwe kiq ka naq khii rongkiq. Kiimaq kra mung na siti maiqse miika naqhai rongkiq. Nashiq raq tsangshiq ka jeriiq riiqli khat laita mitang rong i. Tatiwe ka nashiq rai asi. Krai mren, tsangshiqnok phra kong tsangshiq tiikhup wongti thun ka apaiq raq khat raüta wiita tangto she. Kra ningkhan ahai ka naqhai rongkiq.”

¹⁰ Shatmaq mungmaiqse tlotli raq tsangshiq ka long maq tiitsailaq tiiqbaiq rong i nguta danto. Shatmaq tiihanghiiq miili mungmaiqse raq Tatiwe asi makse chathit chhainyii raitlaq kra Tombutiip khuthaq na chhito.

Mosheq Raq Mungmaiqse Miitu Achu Jaüto

¹¹ Kiijiishe Tatiwe raq Mosheq ma nguto, “Arnok raq Ngi ka ümtincho na saüli wa mishishe baiq wan? Tsangshiq raq Ngi ma kamtsan tsii thümak maq ümtincho na saüli wa milan phan wan? Ngi raq tsangshiq liipan na ümtinkhan wa awang chang jaqsham kuq wan kang jumin kammak ka jaro?

¹² Arningkhan Ngi raq thabi tiidong lata tsangshiq ka mitiijiim baiqha. Shatmaq Ngi raq ümniika mung ashi khuthaq na awejong ma mitiija wanha. Kriika arnok arthaq niimin maiq ka apa kiimaq tsangshiq thaq na ningkun ajong nok she mitiija wanha!”

¹³ Shatmaq Mosheq raq Tatiwe ma akha nguto, “Ümniiraq arnok ka ümningkun jong ma Ejip mung wa tsuq wan laü. Riita ümniiraq ümsenginok ka jamkho riilaü kra tsütsa ka Ejip mungti raq tai haü jiila,

¹⁴ tsangshiq raq armung na shongti maiq mung thun kiima michong. Armungti thun raq tsütsa ka atai kun she ümniika, Tatiwe, naishiq rai asi, kiimaq ümniika naishiq rai dea sitlaü nguta phumda kaü ka naishiq khuthaq na khingkitlaq kra chhitlo. Kiimaq ümniika naishiq khaki na ranaiq niika phumda kaü khamchong ma jalaüta wawan tlaü, kiimaq rawa niika walütu kaü khamchong ma jalaüta wawantlaü nguta achhitai wan wishe.

¹⁵ Riita ikhiijiiha ümchaü ümniiraq, ümsenginok kra kunli jiipbaiq haü jiika, maiqmung thun ümmang chong jong tsaki ratsa ikha tai wanti thun riika akha mingu,

¹⁶ ümniiraq ümsenginok rumnyangkhi bintang jüngi mung na tsatbaiq laü kriika, ümniiraq tsangshiq ma mung ashi mikuqha nguta kiq kham kuq laü mung kiijaq shea wan lot maü kha miishe jiipbaiq laü nguta mingu.

¹⁷ Arningkhan Tatiwe lei, ümchaü min, Ngi raq ümjaq wa achu jaü tiikang, ümningkun ka tiichhi kuqlaq. Kiimaq ümniiraq jamlai jaq misham kuqha ngutiiwa ngulaü kra shamkuqlaq.

¹⁸ Ümniiraq ngulaü, ‘Ngi, Tatiwe ka mokhiq ka khiq mang. Kiimaq Ngi raq lungwiitsii jonghea tiichhikuq tiikang kiimaq pinthum tsapkapkap tiikang kiimaq ngarai kiimaq ikiq khiiti mra ka diikuq tiikang. Li jiimin, anyungwe ngarai thun kriikha na, asetiim nai asaütiim ma maiq pat pat-sam na nai patblai na saüli, anyungwe ngarai kha na mo tiihohü ka tlea baiq mang mirha.’

¹⁹ Riita ümchaü min, Tatiwe lei, ngi raq achu jaütiikang, ümnaq lungwii tsantsii ümtiikiimin klai kimak phan rümtlaü kriimaq mra ka diikuqlaq. Ümniiraq tsangshiq ka Ejip mung maq wawan li miiphat, ümchaü niitaq saüli jamkho diikuq wan laü kiikha diikuqlaq.”

²⁰ Kiijiishe Tatiwe raq treto, “Ümniiraq jamkho jaülaü kra phan phan Ngi raq tsangshiq mra ka midii kuqha.

²¹ Shatmiitiina, Ngi raq ikiq kham lata toqtan tiikang, Ngi atra sitiikang kra phan phan kiimaq Ngi asi kharii raq mangjong hiq ara mashat wiiwii,

²² arnok arwa maiq weshi ra riimin kra mung na saüwan li chang atra silot mak miraq. Tsangshiq raq Ngi asi makse chathit chhainyiitlaq walü kra kiimaq Ngi raq Ejip mung na awang chang jaqsham wan kang thun kra kiimaq rumnyangkhi kumtsaiphii mung na awang chang jaqsham wan kang thun kra wiita chhi wanto she. Kiitinkhan tiichhike wan taü miimin, tsangshiq raq Ngi raq anin wan tsantsii rümtiikang kra bliiq kiki maitai wantlo. Kiimaq tsangshiq raq ibom tai mak maq ikiq khiitlo.

²³ Ngi raq tsangtitiim ma mikuqha nguta kiqkham kuqkang mung na tsangshiq ka ümkhii riitiimin saü wanlot mak. Ngi shulii wantibi thun wiika maiq jumin kra mung na saü walot mak miraq.

²⁴ Shatmaq ijaqshise Kaleb tsantsii ka pong. Krai mren apaiq ka iwokhong na tsapkapkap maq siwantlo. Ngi raq apaiq ka apaiq raq sisin wataq mung na mishea wanha. Kiimaq asaü asetiim raq kra mung ka misiq wan.

²⁵ Ümchaü kra hiq thung tan thun na Amalakaiqnok kiimaq Kanannok shongtlaq kriijaq tsangshiq ka mishong wan. Namshiq ka anap jai na jangho ronglaq. Lanta rumnyangkhi mung na Akaba khamjong chum nong wang nü nü kiina laüho ronglaq.”

Tatiwe Raq Abottsaü Kha Mungmaiqse Ma Mo Tiihoto

²⁶ Tatiwe raq Mosheq nai Aron ma nguto,

²⁷ “Ara abi pinthumnok ariiraq Ngi shra bottsaü arka ümtincho na saüli wa mibot nyan trang wan? Ngi raq tsangshiq bottsaü trang ka pahea achan she tai tiikang!

²⁸ Ümchaü tsangshiq ma ara bomtre arli she chongkuq ronglaq: ‘Ngi ka atiitum lata chongtiikang, Ngi ka atra sishat wiiwii, namshiq raq jamlai wa jaü tlan kriishe miklo kuqha. Arka, Ngi, Tatiwe raq toqtan tiikang.

²⁹ Namshiq ka mijiim han. Kiimaq namshiq maa phong ka ara rumnyangkhi bintang jüngi mung na minyin baiq wan. Namshiq raq Ngi ngeng wan bottsaü wan lan kha na, namshiq phong wa maiq arawii wiiroqnai pat thaq na siti thun ka juwe riimin kra mung na saü wan lot man she mirhan.

³⁰ Ngi raq namshiq ka kra mung na tiishong nga wan miitu kiq kham kuqkang. Shatmsq Kaleb nai Joshua kra tlea raüta, namshiq phong wa maiq ahinti ka jumin kiina shong wan lu man mirhan.

³¹ Namshiq raq namsetiim ka re raq milap wan ngulan. Shatmaq Ngi raq tsangshiq ka namshiq raq tiishaübaiq lan mung na mishea wanha. Krai mren, kra mung ka tsangshiq hiqshong rahai she mija wan.

³² Namshiq ka ara bintang jüngi mung arjaq li mijiim wan han.

³³ Namsetiim ka ara bintang jüngi mung arjaq rawii roqblai mimang mii wan. Tsangshiq ka namshiq raq Ngi shishe baiq lan kriikha na micham chao wan. Kra chamchao ka namshiq phong wa atiisup tsaitiwe kra mitsai shaq wiiwii michamchao wan.

³⁴ Namshiq ka namshiq maiqmii ngarai kra ningkhan rawii roqblai michamchao wan han. Kanan mung sisin wa raroqblai kriiwa ranaiq shi la na rawii shishi she michamchao wan han. Namshiq raq Ngi ka namshiq ngengtiwe ma tiija wan ka akhiidea shea ngutiishe misap wan han!

³⁵ Ngi raq arka namshiq abi pinthumnok khuthaq na mikloha dongdii nguta tumkhamkok tolata ngutiikang. Namshiq ka Ngi ngeng lanta adam na riitu lanta, Ngi ka shulii wan lan. Ara bintang jüngi mung arjaq namshiq loweatek mijiim wan han. Arka, Ngi, Tatiwe raq toqtan tiikang.’”

^36-37 Mosheq raq welare ka Kanan mung kra sisin wa tiiwakiita tsangshiq raq arot tsütsa chonghoto. Kra ningkhan na mungmaiqse raq Tatiwe ngeng wan bombi bot nyan trangto. Kra ningkhan Tatiwe raq tsangshiq ka tha tiidong raütiishe tiijiim baiqto.

³⁸ Siwebi roqshi ri wenai atiiwa kriiwa Joshua nai Kaleb li tsai mak atra tiichongto.

Apha Shaq Shaq Kanan Mung Khat Wato

³⁹ Ümtiikiiwa Mosheq raq Israilnok ma Tatiwe raq jamlai wa ngutaq kra chongkiita, tsangshiq ka kai tiishudaq hoqsiqto.

⁴⁰ Anap ranaiq na ranap chu maq li she tsangshiq ka ku-akin tong long wang kra khat walai nguta akha nguto, “Ümchaü nashiq ka Tatiwe raq chongtaq hiqshong kiina wa ma khekham she. Nashiq ka shutkai dea. Shutmai ka ngumai.”

⁴¹ Shatmaq Mosheq raq nguto, “Riita ümchaü namshiq raq Tatiwe kiq ka jam nguto khiitlan? Namshiq raq tang man mirhan!

⁴² Naq wa rongkiq. Tatiwe ka namshiq rai pongdam mak. Krai mren, namjaqtinok raq namshiq ka mitang.

⁴³ Ümtiikiiwa namshiq raq Amalakaiqnok nai Kanannok rai riikhat tlan, namshiq ka re na mitsai han. Tatiwe ka namshiq rai lomdam mak miraq. Jamkhano ngukla namshiq raq apaiq bom chong taiman riitlan. Namshiq raq apaiq jai phan man.”

⁴⁴ Kra taü maq dongdii min, tsangshiq ka haimak maq ku akin tonglong hiq kiina wawanto. Shatmaq, Tatiwe Tongshong Tek nai Mosheq ka tsangshiq piitiip wa tiido mak dea.

⁴⁵ Kiijiishe, kiijaq shongti Amalakaiqnok nai Kanannok raq Israilnok ka khatto. Raüta tsangshiq raq Israilnok ka tangto. Kiimaq tsangshiq ka Horma hiqshong na saüli joho raüta khatto.