WEAWEA 13 - ASII LAKDAP Bible (BSI)

Siwebi

¹ Tatiwe raq Mosheq ma nguto,

² “Maiq phan phan roqshi ri phan nai kiiwa wela weshi shi tsealaq. Laüta tsangshiq ka Ngi raq Israilnok ma kuqtiikang Kanan mung kra aheawiq misi sin walaq.”

^3-15 Mosheq raq kra aming ka taito. Raüta Paran wang rumnyangkhi binjü maq, apaiq raq welabi arthun ara tiiwato: Maiq phan Welawe Reuben phan wa Jakur se Shammua Simeon phan wa Hori se Shaphat Juda phan wa Jephunne se Kaleb Isakar phan wa Joseph se Igal Ephraim phan wa Nun se Hoshea Benjamin phan wa Raphu se Palti Jebulun phan wa Sodi se Gaddiel Manase phan wa Susi se Gaddi Dan phan wa Gemalli se Ammiel Ashar phan wa Mikel se Sethur Naphtali phan wa Wophsi se Nahbi Gad phan wa Machi se Geuel

Maiq phan Welawe

¹⁶ Mosheq raq siwebi Kanan mung sisinwa tiiwataq ka arthun ara riito. Apaiq raq Nun se Hoshea mang ka Joshua ngutiishe klaito.

¹⁷ Ümtiikiiwa Mosheq raq tsangshiq ka tiiwataq, apaiq raq tsangshiq ma akha chong kuqto, “Armaq shekhu nü nü na walanta, Kanan mung shemai nü nü wang kiina waronglaq. Kriimiishe ku akin tonglong wang kiiniishe waronglaq.

¹⁸ Lanta kra mung ka jamkhiiwa kra sisin wa rongkiq. Maiq ka apa sha atsap wa sitla; kiimaq tsangshiq ka ümtinkhan hong alanok wa.

¹⁹ Lanta hü ahiq ka jamkhiiwa, ahea sha abi wa, kiimaq maiq ka chela thun ruk-hü niisha sitla, shea peruk weshaü chela thun mong niiwa sitla.

²⁰ Kiimaq hiq ka hiqpo hiq win sha, kiimaq kra mung na pechong wiirü rum ka asi sha. Kiimaq kra mung na petsi tsingo tlaq kriiwa panho lanta lamho ka naq laq rongkiq.” (Kra akhing ka spiqtsi manchoji riito.)

²¹ Krai mren, siwebi ka shekhu nü nü wang kiina wa wanto. Raüta mung ka shemai nü na Jin rumnyangkhi wang maq sipha wan raüta, shekhu nü wang na Hamath Pumchit tho na Rehab wang binjü na saüli siwanto.

²² Tsangshiq raq apha na shemai nü mung kiimaq kongkhu siwapha wanto. Raüta Hebron chela niishe siwanto. Kiijaq maiq phan ajong wiq phan Anakim ngutlaq jonghea luhea phan wa Ahiman weraü, Sheshai weraü, kiimaq Talmai weraü phan maiq thun kra shongtlo. (Hebron chela ka Ejip mung wa Joan chela tei wantaq kriima wiimiishi kongkhu na tei wanto.)

²³ Raütiishe tsangshiq ka Eshkol tan thung kiiniishe saü wanto. Kiiwa tsangshiq raq spiqtsi raü tsung wa küshi, atsi tu ka tujongwiq kaü kra chumto. Kra petsi tu nyam ka jonghea kiimaq laihea kha maq, maiq wenai raq pepum pumshi na paq raüta pihoto. Kiimaq tsangshiq raq pomegrenet petsi kiimaq phupmuptsi min wiijam lamhoto.

²⁴ (Kra hiq thung tan mang ka Eskol tan ngutlo. Jamkhano ngukla Israilnok raq spiqtsi tu daqhoto.)

²⁵ Kra mung ka raroqblai na saüli sisinwalot raütiishe siwebi ka jangkito

²⁶ Mosheq, nai Aron, kiimaq Israilnok mungmaiqse tlotli phana Paran rumnyangkhi mung na Kadesh wang na janghoto. Raüta tsangshiq raq jamlai wa sisin wataq tsütsa ka chonghoto kiimaq petsi tu tsangshiq raq pihotaq kra tsangshiq ma tiichhi kuqto.

²⁷ Raüta tsangshiq raq Mosheq ma akha nguto, “Naishiq raq mung ka liiwakai. Laita mung ka chiithe jong hiq kiimaq hiqpo hiq win mung chhiwakai. Arjaq lamhokai petsi wiq tsam tu thun arli liimanta.

²⁸ Shatmaq kiijaq shongtinok maiq ka sra nola jong siisaq, kiimaq tsangshiqnok chela thun kiimin jonghea hea siisaq kiimaq trotam maq kiitelong maq aruk siisaq. Kriithaq niimin tiibitaq she ka, naishiq raq maiq phan jonghea saüse phan kra chhikai.

²⁹ Kiimaq Amalakaiqnok ka Kanan mung shemai nü wang na shongtlo. Kiimaq Hitaiqnok, Jebusaiqnok, kiimaq Amoraiqnok thun ka ku akin tonglong wang kiina shongtlo. Kiimaq Kanannok ka Mediterenian khamjong kii wang na nai Jordan rai khü phan phan na shongtlo.”

³⁰ Kiijiishe Kaleb raq mungmaiqse phong wa Mosheq ma bomnam keti thun kra tiitsaqto kiimaq akha nguto, “Nashiq raq kra mung ka ümchaüli khatwa rong i. Laita mung ka jiiwan rong i: Nashiq ningkun asi mitang rong i.”

³¹ Shatmaq siwebi Kaleb rai wadamtibi riishe akha nguto, “Raamak. Nashiq ka ningkun ahü. Tsangshiq ka khat lot mai. Kra mungti ka nashiq thaq na ningkun aheng riimtlo.”

³² Krai mren, tsangshiq raq mung sisin wataq bom ka Israilnok mungmaiqse liipan na arot tsütsa kriishe tiinyam wanto. Tsangshiq raq akha nguto, “Kra mungwa hiq ka abi ningkhan tü atsam min kra mungti raq hongli ka lap phaq siq mak. Kiijaq naishiq raq maiq ümchuwa chhikai thun ka ajong alu maiq tonglong.

³³ Kiimaq naishiq raq maiq jonghea luhea phan Anak saüse phan kriimin chhikai. Tsangshiq man na naishiq ka kupchi kaüsetiim ikha tsaiji ranto. Kiimaq tsangshiq makki na naishiq ka jammin tairai mai kong ikha chhito sham.”