WEAWEA 12 - ASII LAKDAP Bible (BSI)

Miriam Ma Mo Tiihoto

¹ Mosheq raq Kushaiq phan nyung lamto. Kra ningkhan na Miriam nai Aron raq apaiq ka chongsiqto.

² Tsangnai raq nguto, “Tatiwe riika Mosheq lamlam lü miili sha bom ka chongtla? Apaiq riika naishiq lü miimin bom ka chong kuqtlo riimak sha?” Tsangshiq raq jamlai wa nguta kra Tatiwe raq taito.

³ (Mosheq ka tsan nin heawe, mangjong hiq na apaiq khan tsan nin pinthum ka maiq ahü.)

⁴ Kiijiishe tiihanghiiq miili Tatiwe raq Mosheq, Aron kiimaq Miriam ma akha nguto, “Namtsam atsam ka Ngi asi Tombutiip kiina warong ra.” Krai mren tsangtsam ka wawanto.

⁵ Kiimaq Tatiwe ka ra wa phumda kham mong na sat kito. Raüta Tombutiip kilamchong na chap kito. Raüta tsang nai ka akha heato, “Aron! Miriam!” Krai mren, tsangnai ka khaki nü na kiim wiisaq raüta khaki na chapto.

⁶ Kiimaq Tatiwe raq nguto, “Ümchaü Ngi raq jamlai bom wa chongtiikang ara tai ronglaq! Namshiq phong na shammibi siraüla, Ngi ka tsangshiq rai isham ka riisham makchhi maq tiichhikuq tiikang. Kiimaq tsangshiq rai rawa ma maq riibom dam tiikang.

⁷ Shatmaq ümtiikiiwa Ngi ka i jaqshise Mosheq rai she riibom dam tiikang, kriika pong she. Ngi raq apaiq ka isenginok Israilnok khuthaq na tsangshiq hupkhang wan miitu arang apaiq ma kuqkang.

⁸ Kra ningkhan, Ngi raq apaiq rai ka mantut na tiqtaq riibom dam tiikang. Linham linhok riibom dam tiikang. Shiiwang bomtsi miika riimak. Apaiq raq Ngi sham ka jam khiiwa kriimin chhito! Ikhla namnai raq ijaqshise khuthaq na bombi kiqsü ka jaram wa kuq tlan?”

⁹ Tatiwe ka tsangnai ma atsan khiq riito. Krai mren, apaiq ka kiiwa wawanto.

¹⁰ Kiimaq Tombutiip khuthaq wa phumda ka ra na wawanto. Kiimaq Miriam khum niika rampun tsi mi phong li she riito. Raüta akhum wa ahan na akhü thun ka tsakhiiq ikha lüdiidii she riito. Riita Aron raq Miriam khum na liikiita, apaiq khum ka rampun mitam tonglong lishe riito.

¹¹ Apaiq raq Mosheq ma nguto, “O, Shiilangwe lei, ajiq dea shutraikai, kriikha na akhii lang lang mo ka naq tiihokiq.

¹² Apaiq ka anyung puk mong maq amaa she ami atsi tamli tha raq aphaq wan wi rawü chhitlaq ikhiika naq tiijakiq.”

¹³ Kra ningkhan Mosheq raq Tatiwe jaq wa akha achu jaüto, “O, Shiikeawe lei, apaiq thatsi ka tiihea kuqlaq!”

¹⁴ Kiijiishe Tatiwe raq treto, “Awe raq apaiq theaphi na tho maq tho raüla, apaiq raq apaiq jeasi kha tiichhit miitu ka ramiishi na saüli munjuk maq sichang miraq. Krai mren, apaiq ka piitiip mong wa dongho raüta kinphai na ramiishi na saüli bamsi kilaq. Kra jai miitiq apaiq ka piitiip mong na hali sheakai nong mimai.”

¹⁵ Kiimaq Miriam ka piitiip mong wa chiiphai na thükito. Kiimaq apaiq ka mitiijang sheaki shaq wiiwii, mungmaiqse ka kiiwa tiido wan mak riito.

¹⁶ Kra raütiishe, tsangshiq ka Hajeroth hiq kiiwa laü wanto. Raüta Paran rumnyangkhi wang niishe tsangshiq piitiip ka tei wanto.