WEAWEA 11 - ASII LAKDAP Bible (BSI)

Tabera Hiq Na

¹ Mungmaiqse raq Tatiwe ma tsangshiq chamchao tiikai ngutiishe bottsaü phahoto. Tatiwe raq tsangshiq bottsaü trang ka taito. Kra ningkhan apaiq ka tsangshiq ma atsan khiqto kiimaq tsangshiq khuthaq na wa tiisatto. Kra wa ka tsangshiq phong mong na nyai wanto raüta tsangshiq ka khumto. Raüta tsangshiq piitiip siimko na sitibi maiq thun ka tiithen khiimbaiqto.

² Mungmaiqse ka Mosheq phana waraüta khrum kuqlaq nguta hoq trangto. Kiimaq apaiq raq Tatiwe jaq wa achu jaüto. Krai mren wa khiim dong ka amat she riikito.

³ Kra ningkhan kra hiq ba ka Tabera nguta mangto. Jamkhano ngukla kiijaq Tatiwe wa raq tsangshiq liipan wa khumto.

Mosheq Raq Welabi Roqmiishi Shongto

⁴ Israilnok rai pongmungti maiq min laü wan damto. Tsangshiq ka ngam phaq ro tsangsü tsi hea she riito. Kiimaq Israilnok tsangshiq phong wiimin ngam phaq ro ngutiishe bottrang wanto: “Aja naishiq ka ngam phaq ro sütsi riishe haü wan kai!

⁵ Ejip mung na siji na ngiq ka chamtraq siq wankai. Athii arii min ahü miili chamtraq ngiq ka siq wankai. Tsan na tiitsang ronglaq, kumchan thun, kham kumchan thun, siq khupo jaqlu lai, siqkhupo pojong lai, kiimaq khorotsang po thun phaqsiq wan kai ira ro dongtlo?

⁶ Shatmaq ümchaü ka nashiq ningkun min wiitashe jom wanto. Nashiq raq phaqsea chang ka jamlai min ahü she. Wranaiqtek ara manna lam lamse arli she phaqsea chang ahata!”

⁷ (Manna ka asham lü ma petsi alai aransetiim ikha. Rong ka alü kiimaq mintiitii.

^8-9 Kriika rawa na bang roktlaq krai tsangshiqnok piitiip mong na roktlo. Anap ranap niishe nokmaiqse ka ki raüta tsangshiq piitiip tro kiiwa manna ka riichom kitlo. Raüta tham na tiibun thaütlo. Riimakla wong win ikha tham na thaütlo. Raüta kham maq lumtlo. Raüta kek ikha phintsiip tsiip wa na diim phaqtlo. Kra sum ka winsii olip tai maq ako ikha asumwiq phaqtlo.)

¹⁰ Mosheq raq mungmaiqse wiita ka tsangshiq tombutiip rinkea na akong akong maq riitam chap raüta, bot trangtlaq thun ka taito. Apaiq ka chapa tsihea, jamkhano ngukla Tatiwe ka tsangshiq khuthaq na kai atsan khiq riito.

¹¹ Kra ningkhan apaiq raq Tatiwe ma nguto, “Ümniiraq ngi ka atinkhan jam nguto tlitkot ho laü? Ümniika ngi ma jam nguto khiqtlaü? Ümniiraq ngi ma arnok liiwan arang ka jaram wa kuqlaü?

¹² Ngi raq tsangshiq ka phansang mang dea. Riimakla ngi raq tsangshiq ka chii mang dea! Riita ümniiraq ngi ka noboqti nyung ma jalata tsangshiq ka ijaq na do lata noshiisetiim kong ikha, ümniiraq mung ashi mikuqha nguta tsangtitiim ma kiqkham kuqlaü kra mung na saüli boq wan laq nguta jaram wa thaü tlaü?

¹³ Ngi raq mungmaiqse achu kong arma kechang ngam ka jambawo mihum kiha? Tsangshiq raq ijaq wa anyan ashan watrangla raüta ngam kuqlaq nguta bottsaü wantlaq ara,

¹⁴ Ngi laqlaqse raq tsangshiq maiq achu kong ara miitu ka arang holot mang. Arka ngi ma hekii laihea pinthum!

¹⁵ Riita ümniiraq ngi ka akhli tlitkot chang jiika, ngi ara mangchan laüta, tiitsailaq atseali riibaiqlaq. Kra nguraü ka ümniiraq ngi atinkhan tiichamchao tlaü homa arka alaq she mirbaiqha. Ninwan ruq ka nin mang she miraq.”

¹⁶ Tatiwe raq Mosheq ma nguto, “Mungmaiqse raq wela dea nguta shrengtlaqtibi wa maiq nyungwere roq miishi kra adam na triitamlaq. Laüta tsangshiq ka Ngi phana Ngi asi Tombutiip kiijaq shea wanlaq. Kiimaq tsangshiq ka kiijaq ümtho na michaplaq nguta chonglaq.

¹⁷ Ngi ka kiijaq misat kikang. Lata ümniirai kiijaq mirbom kang. Kiimaq Ngi raq ümniima akuqha wenyi kiiwa wiijam lam lata tsangshiq ma mikuqha. Kra riiha jiila, tsangshiq raq mungmaiqse miitu hekiilai ümniiraq hotlaü kra wiijam tsangshiq raq riisha hodam raüta ümniika mikhrumlot. Kiimaq kra holai ka ümnaq laqlaqse riili horea ka raamak miraq.

¹⁸ Riita ümchaü mungmaiqse ma chonglaq, ‘Anap ranaiq miitu namkhum ka atiisii ronglaq. Namshiq raq ngam miphaq han. Tatiwe raq namshiq honyi trang ka taito she. Kiimaq namshiq raq ngam phaq rohea nguta bottrang lan kiimaq namshiq ka man na Ejip mung na siji niika ümchaü arnam ma apeolin silan nguta ngulan kra taito she. Riita ümchaü min Tatiwe raq namshiq ma ngam she mikuq. Kiimaq namshiq raq phetak she miphaq siq han.

¹⁹ Namshiq raq ngam ka ranaiqshi lam lam se li riimak, kiimaq ranaiq nai lo rabiingi lo, raroqshi lo kiimaq raroqnai na saüli li min riimak.

²⁰ Shatmaq jipi lüshi lütang nyasiq lanta, namshiq nilok mong maq ngamphu ka dong kili chang she, namshiq ka ngam raq ngiirai lanta namwok riim raq atsi tiibumhap she miraq. Akha namshiq ma misaü wan, jamkhano ngukla namshiq raq Tatiwe arjaq namshiq rai adam sitiwe ka weahü tiishaü baiqlan. Kiimaq namshiq ka Ejip mung wa laü wan manli riichang wa nguta bot nyan trang lan.’”

²¹ Kiimaq Mosheq raq Tatiwe ma nguto, “Ngi raq mungmaiqse achu kong 600,000 ara shea lata watiikang. Kiimaq ümniinga tsangshiq ka jipi lüshi tinkhit ngam maq chamtraq midungha ngutlaü nya?

²² Riita minsaü kong nai sku kong ka pahea tsangshiq sükhatsi kra tiingiili chang take chang ka asi shea miraq? Khamjong chum na ngiq sitlaq kra lamki raü min tsangshiq wok ka pheli chang shea miraq?”

²³ Kiijiishe Tatiwe raq treto, “Riita Ngi ningkun jong ka achuli she riichang nguta mishangbaiq lot sha? Ngi raq chongtiikang kra miku wan sha ku wan mak wa, kra ümniiraq jaqlo liipan niili she ümmak maq michhi haü!”

²⁴ Krai mren Mosheq ka kihoto raüta Tatiwe raq jamlai wa chongtaq kra mungmaiqse ma chongto. Apaiq raq welabi roq miishi ka adam na triitam heato. Raüta Tombutiip tro na triitamto.

²⁵ Kiijiishe Tatiwe ka phumda kaü mong na satkito. Raüta apaiq rai riibom damto. Raüta apaiq raq Mosheq ma akuq wenyi kiiwa wiijam lamto. Raüta kra welabi roqmiishi ma kuqto. Ümtiikiiwa wenyi ka tsangshiq khuthaq na saütaq, tsangshiq ka shammibi ikhiishe siitranghoto. Shatmaq akhing alu miitu ka riimak.

²⁶ Welabi roqmiishi phongwa wenai, Eldad nai Medad ka tsangshiq piitiip niili khingkito. Tombutiip na kimak dea. Kiijaq tsangshiq piitiip na wenyi ka tsangnai khum na satkito. Krai mren, tsangnai kiimin shammibi ikhiishe siitranghoto.

²⁷ Jerowe ashi ka Eldad nai Medad raq jamlai wa riihotaq kra chongkai Mosheq phana juto.

²⁸ Kiijiishe Nun se Joshua noseji niiphü Mosheq jaq tretiwe raq Mosheq ma nguto, “Shiilangwe lei, tsangnai ka tiitsaqlaq!”

²⁹ Kiijiishe Mosheq raq treto, “Ümniika ngi miitu shea chapa rai tlaü? Ngi raq kla Tatiwe raq apaiq wenyi ka asenginok tlotli ma kuq raü jaq ahea, raüta tsangshiq tarü raq shammibi kong ikha siitrangho raüjaq ahea riichang nguta tiima tiikang!”

³⁰ Kra raütiishe Mosheq nai Israilnok welabi roqmiishi ka tsangshiq piitiip niishe jang wanto.

Tatiwe Raq Wupe Kong Tiiwato

³¹ Tiidongchhaq miili Tatiwe raq ra tiihaito. Raüta khamjong chum wang wa wupe kong ka hiq maq mitarshi diitoq lin maq tiibi raüta tsuq wanto. Raüta wushi kong ka piitiip mong na nai piitiip tro na hiq ham ra ham kilomitar luhea na saüli barap binrii na she thiim wanto.

³² Krai mren, kra ranaiq minru, kra rawa minru, kiimaq anap ranaiq niimin ranaiq minru, mungmaiqse ka wupe kong lap phaq niishe mowanto. Maiq loweatek raq kilogram hingshi thaq na kom mak riichomto. Raüta tsangshiq raq wushi ngam ka rashekii na piitiip tro na atiishin ma lamto.

³³ Tsangshiq jaq na wushi ngam ka aphaq chang pahea aphong along riiphong rai tlaq bala liipan niili she Tatiwe ka Israilnok ma atsan khiq she riito. Kra ningkhan, tsangshiqnok liipan na thabi tsi she tiidongto.

³⁴ Kra hiq ba mang ka Kibroth Hattaawa nguta mangto. (Kra liichum ka “Sükha Maa chiim” ngutlo). Jamkhano ngukla kra hiq na tsangshiq raq ngam phaq ma süramtibi thun jiim raitaq thun maa phong ka kiijaq lapthüto.

³⁵ Kriimaq mungmaiqse ka laü wan raüta, Hajeroth hiq niishe saüto. Raüta kiijaq tsangshiq piitiip thun ka teito.