WEAWEA 10 - ASII LAKDAP Bible (BSI)

Kampho Lerong Thun

¹ Tatiwe raq Mosheq ma nguto,

² “Mung maiqse ka adam na triitam hea ma nai piitiip ka run wan akhing na tsü ma, kampho ngam maq lerong anai tiiqlaq.

³ Ümtiikiiwa lerong wiinai ka adam na tiihong raüta shetang la tsü raüla, mung maiqse kunli ka üm tro na Ngi asi Tombutiip kilamchong na riichom thung chang.

⁴ Shatmaq ümtiikiiwa lerong ka ashili tsü raüla, aweraü phantek wa welabi thun kra üm tro na riitam chang.

⁵ Kiimaq ümtiikiiwa lerong wiinai ka jaqloseli tsü jiiq; piitiip maq shedong nü siim na siti maiq phan thun kra tiido pha wan chang.

⁶ Kiimaq ümtiikiiwa thong nai she hali lerong wiinai ka atoq se miili tsü nong jiiq, piitiip maq shemai nü siim na siti maiq phan thun kra tiido pha wan chang. Kra ningkhan, piitiip run wan miika lerong ka atoqse miili tsü chang.

⁷ Shatmaq nokmaiqse kunli kra ngong thun ma heachang raüla, lerong ka dang alu maq tsü chang.

⁸ Kra lerong wiinai ka Aron setiim, ramwebi raq tsü chang. “Arthun thungtri raütu arka pattup lang wan ruq riichang.

⁹ Ümtiikiiwa nammung ka re raq long wantlaq, kiitiikaq namshiq raq maiqmii tiichhii wan re rai riikhat ho ma, ara lerong ara tsü ronglaq. Ngi, Tatiwe, namshiq Shiikeawe raq, namshiq ka mikhrum kuq kang. Lata namshiq ka nam jaqtinok jaqkhon mong wa mitiichhii kuq kang.

¹⁰ Kiimahali poi awii chojong chise sitlan akhing niimin, namshiq raq Jinye Dong Poi akhing na kiimaq laihin kamasham poi akhing na, namshiq raq chaqtlii-honglu takuq tlan akhing na, kiimaq namshiq raq rintii-honglu kuqtlan akhing na, lerong ka tsü ronglaq. Raüla Ngi raq namshiq ka mikhrum kuqha. Ngi ka Tatiwe namshiq Shiikeawe.”

Israilnok Raq Tsangshiq Piitiip Runto

¹¹ Israilnok ka Ejip mung wa laü wanli maq wiinai she angu na, kra rawii wa jipi liinai ngoja na, kra jipi wa raroqnai ranaiq na, Tatiwe asi Tombutiip khuthaq wa phumda kaü ka wawanto.

¹² Krai mren, Israilnok raq tsangshiq ka Sinai Kumtsaiphii wang wa tiido wanto. Raüta laü wanto. Kriimiishe tsangshiq ka Paran kumtsaiphii wang na saüto. Kiijaq phumda kaü ka Tombutiip khuthaq na satki raüta khingkito.

¹³ Tsangshiq ka Tatiwe raq Mosheq lümaq aming kuqtlaq kra phan phan laü wantlo.

¹⁴ Kiimaq tsangshiq laü wantlaq akhingtek na apha na jamkho tiido pha wantaq kra phan phan laü wan lili riitlo. Juda phan lan khea chan wokhong na siti maiq phan thun ka awe raü ka akong akong maq, Juda phan ma lam tiishea raüta laü wantlo. Tsangshiq sheati tsangwe lawe Amminadab se Nashon wokhong maq watlo.

¹⁵ Kiimaq Isakar phan sheati welawe ka Juar se Nethanel. Apaiq wokhong maq Isakar phan ka shea wantlo.

¹⁶ Kiimaq Jebulun phan sheati welawe ka Helon se Eliab. Apaiq wokhong maq Jebulun phan ka shea wantlo.

¹⁷ Kiijiishetiq Tombutiip kra siiqtlo. Raüta Gershon weraü nai Merari weraü phan raq kra tombutiip haichang hupsam thun kra thop raüta piwan lili riitlo.

¹⁸ Kra jai niishe, Reuben phan alan khea chan wokhong na siti awe raü thun ka, akong akong maq, Shedeur se Elijur raq shea raüta laü wan lili riitlo.

¹⁹ Jurishaddai se Shelumiel ka Simeon phan sheati welawe.

²⁰ Kiimaq Eliasaph se Deuel ka Gad phan sheati welawe.

²¹ Kiijiishetiq Lewi phan wa Kohath weraü phan ka asii hupsam thun athop kra pi raüta wawan lili riitlo. Tsangshiq ka lamjap chang piitiip kiiniishe saü wan raüla, Tombutiip ka achanlot wishe lowan lili riitlo.

²² Kra jai niishe, Ephraim phan alan khea chan wokhong na aweraü thun ka akong akong maq, Ammihud se welawe Elishama raq shea raüta laü wantlo.

²³ Pedahjur se Gamaliel ka Manase phan sheati welawe.

²⁴ Kiimaq Gideon se Abidan ka Benjamin phan sheati welawe.

²⁵ Atiisup niishe, ka Dan phan alan khea chan wokhong na siti aweraü thun ka akong akong maq, Ammishaddai se Ahiejar raq shea raüta, kongkhu na maiq phan ümchu kong wa wawantaq kra jai tiisup na nokwe hup rekheti kong kriishe watlo.

²⁶ Ochran se Pagiel ka Ashar phan sheati welawe.

²⁷ Kiimaq Enan se Ahira ka Naphtali phan sheati welawe.

²⁸ Riita Israilnok raq tsangshiq piitiip ka siiq raüta laü wantlaq akhingtek na, tsangshiq mang laü wan akhum ka ara chongtlaq ara phan phan laü wan lili riitlo.

²⁹ Kiimaq Mosheq raq anangwe Midian phan Jethro se Hobab ma akha nguto, “Naishiq ka Tatiwe raq naishiq ma mikuq kang nguta kiqkham kuqta mung kiina laü wan she. Apaiq raq Israilnok ka pinthum aphe arongnok ma mitiijaha nguta kiqkham kuqto. Kra ningkhan, ümniimin naishiq rai li wa i. Kiimaq naishiq ümkhiiwa chiithe jawan tiikai kra ümniirai riiphea, riinyin laita misi rong i.”

³⁰ Kiijiishe Hobab raq treto, “Wamang. Ngi ka i hiqshong niili mijang wanha.”

³¹ “Mangchan laüta ümniiraq naishiq ka naq baiq thükiq,” nguta Mosheq raq nguto. “Ümniiriika ara kumtsaiphii bintang jüngi wang na ümriiba na lam jap wan chang wa hiq ara thun asap haü. Kiimaq ümniika naishiq ma lam tiichiketi mijalot haü.

³² Ümniika naishiq rai wadam haüla, Tatiwe raq naishiq ma ümchu wa achu shiiman kuq jiiq, kra wiita ümniirai riiphea riinyin laita mishong wan rong i.”

Israilnok Laü Wanto

³³ Riita Israilnok ka asii Sinai pum wa tiido wanto, raüta tsangshiq ka ranaiqtsam tinkhit wawanto. Tatiwe Tongshong Tek ka jang wrapshe tsangshiq ma lam shea sinkhu na wawan lili riitlo. Raüta tsangshiq ma lamjap chang piitiip tei wan chang hiq ba kra rit wan litlo.

³⁴ Tsangshiq ka piitiip ashi maq riita piitiip ashi na laü wantlaq na, Tatiwe phumda kaü ka ranaiq na tsangshiq khuthaq na sitlo.

³⁵ Riita ümtiikiiwa Tongshong Tek ka wawantlaq, kra akhing na Mosheq raq akha ngutlo, “Tiidolaq, Tatiwe lei; laüta ümjaqtinok thun ka tiipin baiqlaq. Laüta ümnaq ngengtibi ka tiipin miijin jobaiqlaq!”

³⁶ Kiimahali ümtiikiiwa Tongshong Tek ka akhing riikitlaq, kra akhing na apaiq raq akha ngutlo, “Jangkikiq, Tatiwe lei, Israilnok maiqta ahing amun phana.”