WEAWEA 1 - ASII LAKDAP Bible (BSI)

Israilnok Mungmaiqse Maiqwea Pha Shaq Shaq

¹ Israilnok ka Ejip mung wa laü wan li maq wiinai she angu na, kra rawii wa jipi lünai she angu na jiha ranaiqshi ranaiq na, Sinai wang Kumtsaiphii binjü maq Tatiwe raq apaiq asi tombutiip maq Mosheq ma akha nguto,

² “Aron nam nai raq Israilnok ka kaüwa weraü phan phan kiimaq ata ata maq maiq ka wea ronglaq. Maiqwere thun mang ka wiita wea wea raüpot na waiq ronglaq.

³ Tsangshiq ka arawii wiiroqnai maq phawan raüta maiqlare phenla ma jawan milottibi mang ka waiq ronglaq.

⁴ Maiq phan kaüwa weraütek wa welabi ka weshi shi ümnaq khrumke miitu thaülaq.”

^5-16 Kra tsangshiq maiq aphan aphan khuthaq wa welabi ka arthun ara jaqsham miitu tsea tsiiq wanto: Maiq Phan Aphan wa welawe Reuben phan wa Shedeur se Elijur Simeon phan wa Jurishaddai se Shelumiel Juda phan wa Amminadab se Nahshon Isakar phan wa Juar se Nethanel Jebulun phan wa Helon se Eliab Ephraim phan wa Ammihud se Elishama Manase phan wa Pedahjur se Gamaliel Benjamin phan wa Gideoni se Abidan Dan phan wa Ammishaddai se Ahiejar Ashar phan wa Ochran se Pagiel Gad phan wa Deuel se Eliasaph Naphtali phan wa Enan se Ahira

Maiq Phan Aphan wa welawe

¹⁷ Ara welabi roqshiri wenai ara khrum ma Mosheq nai Aron raq

¹⁸ mungmaiqse kunli ka jipi lünai she angu wa jiha ranaiq shi na adam na triitam heato. Raüta mungmaiqse mang ka aweraü mang maq nai ata mang maq wea raüta rejistar na waiqto. Maiqwere angu kunli arawii roq nai maq pha wan raüta kiima maiqlabi thun mang ka aheawiq wea raüta waiq thüto.

¹⁹ Arka Tatiwe raq jamkho aming kuqtaq kra phan phan kloto. Sinai wang Kumtsaiphii binjü maq Mosheq raq maiq mang ka lakdap na waiq thüto.

^20-46 Maiqwere arawii wiiroqnai kiimaq kriima maiqlabi thun, rekhat kai amai phenla ma mijalotti thun maiq mang ka aweraü rai ata ata maq waiq raüta lakdap na waiq thüto. Ara mang waiq arka Jakob se chhikhuwe Reuben weraü maq waiq phahoto. Riita maiq mang waiq wantaq tlotli ka achu riito: Maiq phan maiqwea Reuben phan wa 46,500 Simeon phan wa 59,300 Gad phan wa 45,650 Juda phan wa 74,600 Isakar phan wa 54,400 Jebulun phan wa 57,400 Ephraim phan wa 40,500 Manase phan wa 32,200 Benjamin phan wa 35,400 Dan phan wa 62,700 Ashar phan wa 41,500 Naphtali phan wa 53,400 Maiq tlotli ka: 603,550

Maiq phan maiqwea

⁴⁷ Lewi phan wa maiq wea ka maiq phan ahinti rai waiq dam mak riito.

⁴⁸ Jamkhano ngukla Tatiwe raq Mosheq ma nguto,

⁴⁹ “Ümtiikiiwa ümniiraq maiq ka rekhat kai miitu maiq weatlaü akhing na Lewi phan wa maiq ka naq tlom damkiq.

⁵⁰ Kra rii na Lewi phan maiq thun miika, Ngi asi Tombutiip nai kra mong na sitlaq hupsam thun kra shiililii jaqsham arang kra kuqlaq. Tsangshiq raq tiip nai kiijaq sitlaq hupsam thun kra mihopi wan. Raüta kra tiip mong wa jaqsham thun kra misham laq. Raüta tsangshiq tiip thun ka tombutiip tro na mitei wan laq.

⁵¹ Ümtiikiiwa namshiq ka lamjap piitiip kiiwa laüwan nong tlan, Lewi phan raq Tombutiip kra arun miraq. Raüta piitiip anye kiijaq hali tiip ka mihai wan nong. Juwa kra Tombutiip tho na wajiiq, kriiti ka tiitsailaq atsea baiq chang.

⁵² Kiimaq kiiwa chantlaq Israilnok maiq phan ümchuwa sitlaq kra riika akong akong maq tsangshiqnok piitiip kra tei wan chang. Aphan thaq na wela sitlaq kra wokhong na maiqmii aphan alan kra shong raq chhaq maq tsangshiq piitiip kra tei wan ratlo.

⁵³ Shatmaq Lewi phan raq tsangshiq piitiip ka Tombutiip tro na tei wan ratlo. Raüta Tombutiip kra khe ratlo. Kriika maiq ahinti jumin kra tho na wamak chang miitu. Kiimaq itsan tiikhiq raüta Ngi raq Israilnok ka jiipbaiq mang chang miitu khe wan ratlo.”

⁵⁴ Krai mren, Tatiwe raq Mosheq ma jam kho aming tattaq kra phan phan Israilnok raq kloto.