Titus 3 - ASII LAKDAP Bible (BSI)

Phungmaiqse Rong Arai

¹ Ümwokhong na siti senaino Phungmaiqsetiim ma ara tsii chongkuq lili riilaq. Tsangshiq ka munglangti, mungtu shiilangbi nai welabi jaqkhong na si raa tlo. Raüta tsangshiq aming lang raüta misi laq. Kiimaq munglangtibi raq mungjong miitu, jamlai phan wa ahea kiimung tlaq, kra jaqsham miitu tiijeshat maq misi laq.

² Tsangshiq ma tsii ka chongkuq wanruq riilaq. Tsangshiq raq nanok mungmaiqse jumiimin abi bomke ka raa mak. Shatmaq, nanok tarü rai ari aram, kiimaq sobsob bombom maq si ronglaq.

³ Jamkhano ara chongtiikang ngukla, man na lea wankai akhing ashi na, nashiq tarü ka maiqjiq, angok angikong ikha siwan kai. Shiikeawe lamphan sapmai, nilan kong siwan kai. Kiimaq ashut ashe rilung li siwan kai. Nashiq ka ngarai sükha tsii kharü mong na siwan kai. Kiimaq phanrap phanrii, ngarai han-ngam sükha polo lam phan wan laitli siwan kai. Nashiq raq nashiq rilung ka maiq chongsea nai maiq ngengseng lam miili rilung shaphaq wan kai. Nanok raq nashiq ka shuliito. Kiimaq nashiq riimin nanok ka shulii wan laitli rashe jipi tiicha wan kai.

⁴ Shatmaq, Shiikeawe nashiq Chhiiti we raq, maiqse angu tarü miitu apaiq lungwiitsii nai mangchan tsii jonghea rüm tlaq kra, nashiq ma tiichhikuqto she. Kra akhing ranaiq na nashiq ka chhii wanto she.

⁵ Apaiq raq nashiq chhii wantaq kriika, nashiq raq shamhea kaiwa jaqsham laita chhiike wan ka riimak. Shatmaq, Shiikeawe apaiq tsan mong na, nashiq tiihangke mangchan tsii rüm tlaq kriimaq chhiito. Apaiq raq nashiq chhii wantaq arka, Asii Wenyi raq nashiq khum ka hetse kuq wantaq kra, lümaq chhii kuq wanto. Ara chong tiikai, Asii Wenyi raq nashiq khum hetse kuq wantaq ara lümaq, nashiq khum na, anye rawii tiichhi kuqto she. Raüta rilung anye she kuqto.

⁶ Shiikeawe raq Asii Wenyi ka nashiq khum na, nashiq Chhii wanti Jesuq Khristo lümaq, asho awo raükhokkhok kuqto she.

⁷ Ara raükhokkhok kuqtaq arka, apaiq kaphap mangchan khoqramkii maq, nashiq ka kei raüta, Shiikeawe rai wehea she tiija wan raüta, apaiq wokhong na tiisi wan miitu kuqto. Krai mren, nashiq raq ranphan tiikai pattup pat-sa rilung kra milap wan laq nguta kuqto.

⁸ Ara chong tiikai bomtsi arka tengteng bomtsi. Ngi raq ara lak na waiq kang bomtsi thun ara, atsidada maq chongkuq laq. Akha jaqkhon tiipha shat maq chongkuq wan raütiq, Phungmaiqsetiim raq tsangshiq tsan atsi maq shamhea kaiwa jaqsham ka misham. Arka wiitarü miitu, athuk atsom jaqsham kiimaq wiitarü ma amet dong chang asi.

⁹ Shatmaq tiina, hiqtili manphanti rai ka naq riikhiilea kiq. Tipai weriim manphantibi rai, tatso ritti rai, kiimaq Jehudinok Thungtri manphanti rai ka naq riitso damkiq. Arthun manphan tlaq arka thiihü. Kiimaq amet dong chang jam min ahü.

¹⁰ Phungtu siiqti miika, laknai na saüli tsii li chongkuq laq. Laknai tsii chongke jai miimin, atsii chhi mak li riishatshat jiika, apaiq ka phungtu wa ashleq riibaiq laq.

¹¹ Ümniiriimin asap haü, akhnok maiq arka, tingting rilung lamphan ka baiqthüto she. Raüta, ngarai lamphan niishe kihoto. Ara apaiq rilung kra riili she, apaiq ka ashut we dea nguta ra na rashra tiichhikuq tlo.

Bomshat Wan Salam

¹² Ngi raq ümtiikiiwa, Artemis sha, Tikikas wa, ümphana tiiwa tiikang, kiitiikaq ümniika akhek ngi rai riihumkai miitu Nikapolis chela na kira. Jamkhano ngukla, ngi ka diwinji bala, kra chela na misiha nguta tiije tiikang.

¹³ Phowe Jenas nai Apolos raq wanhiq na wachang nguta tiijetlo. Ümniiraq tsangnai wanhiq khum pha wan miitu, ümchuwa tang tlaü kra khrumkuq laq. Tsangnai ma jamlai phan wa raa tlaq, kra wiita hongli chang liikuq dam laq.

¹⁴ Nashiqnok Phungmaiqsetiim riika, jamlai phan minshiiq raü wa ahea miraq, kra phan ka sham chang. Akha minshiiq shiichaq wan raütiq, akhek amu khrumke chang raa tlaqti ma, khrum kongphiq jaqmiiq ka mikuq ne wan lot. Tsangshiq rilung ka lam ahü na, shaphaq raa mak.

¹⁵ Ngi rai siti tarü raq, ümniima salam tiitaitlo. Naishiq salam bomtsi ka kamasham na kongtitiim ma tiitai kuq laq. Shiikeawe kaphap ka namshiq tarü rai misilaq.