Titus 2 - ASII LAKDAP Bible (BSI)

Awongsii Kamasham Tri Raü

¹ Shatmaq, ümniiriika phungtuti ma awongsii kamasham tri raü kli shrinke raa tlo. Ümniiraq maiqlare ma tsii ka samhea wiq maq chongkuq laq.

² Maiqlare ma tsii chongkuq ruq riilaq, tsangshiq ka maiqla nguta kamto maq misi laq. Tsangshiq ka phanrap na taksu maq sichang, kiimaq phanrap ka anin raüta sichang. Tsangshiq kamtsantsii ka awongsii mirüm laq. Kiimaq nanok ma lungwiitsii rüm tlaq kriika, khangriri hea maq mirüm laq. Kiimaq phanrap na, nin wan ruq maq misi laq.

³ Krai mren sii hali, jechakre nyungwere miimin tsii ka chongkuq laq. Tsangshiq raq maiqmii rilung ka Shiikeawe ma kiinong kuq raüta, tsangshiq rong arai ka maiqlung ngamwii, athuk atsom nyungre rilung si maq, mishong nga laq. Tsangshiq raq shapshaü miqshii tiikon raa mak. Kiimaq tsangshiq ka chechok tsampii ma ja raamak. Tsangshiq ka nanok ma, Phungmaiqse nyungre ngutlaq ka jamkhii asii arai maq singa chang wa, kra shrinketi riichang.

⁴ Tsangshiq raq maiq ma wanyeti, nose shaqli sitlaq ata-nyungre ma, maiqmii tapkun na, maiqmii we ase, kiimaq asetiim ka jamkhii lungwii chang wa, raüta jamkha tiijonglu chang wa, kra chongke chang.

⁵ Tsangshiq ka phanrap na maiqmii tiima tsantsii ka, anin raüta thüti riichang. Kiimaq siirairai nyungre riichang. Kiimaq riikhaqli maiqmii jamkun na, shongnyung chaq nyungre riichang. Kiimaq awesere bom taiti riichang. Akha sihaütiq, Shiikeawe tsütsa Ahea chongkuq tlaq kra, maiq raq abi nguta chongsiq mak miraq.

⁶ Ara chongtiikai kiikhiisii hali, noriibi miimin, phanrap na maiqmii tiima tsantsii ka anin raüta siwanti riichang nguta tsii chongkuq laq.

⁷ Phanrap na, ümniiriika ümbom ümnyiim na, ümjaq sham ümkai wa maq tiichhikuq laq. Ümniiraq nanok ma trahokuq tlaü na, tsapkapkapse maq, kiimaq atsi dada maq chongkuq laq.

⁸ Traho bom chongkuq tlaü akhing na, ümbomtsi ka khaqshkhaq, asiq areng bompo kli chongkuq laq. Akha traho kuq raüla, ümnaq ngengtibi raq, nashiq khuthaq na bom abi tiishut bom chang ka lam hum mak miraq. Krai mren, tsangshiq raq ümnaq ngengrat tlaq kra miitu tsangshiq maiqmii kli mitiijeasi rai.

⁹ Disetiim ka atijong wetiim wokhong na sichang. Raüta phaqchii nichii maq, atijong wetiim bom taiti riichang. Raüta atijong wetiim ka phanrap na tiichochi chang. Tsangshiq raq atijong wetiim kiqkhii ka ra mak.

¹⁰ Kiimaq tsangshiq raq atijong wetiim khiiq ka khot raa mak. Tsangshiq ka phanrap jaqsham kaiwa na, maiqshaq ma jawan ra tlo. Kiimaq phanrap na, atsap akap maq jaqsham ra tlo. Tsangshiq ka akha maiqshaq ma jawan raüta, kiimaq tsangshiq raq ahea jaqsham tlaq kra lümaq, Shiikeawe, nashiq Chhiiti we khushü kra, tsangshiq raq phanrap jaqsham tlaq kra lümaq mitiijong wan.

¹¹ Ara jamkhano chongtiikang ngukla, maiqse angu tarü hupli kra tiichhii wan miitu, Shiikeawe raq apaiq kaphap mangchan khoqramkii ka, Jesuq Khristo pum na tiichhikuq wanto she.

¹² Kra kaphap mangchan khoqramkii lümaq, nashiq ma, kechu maiqse rilung siwan miitu ningkun kuq tlo. Laita mangjong ngarai han-ngam tsii kharü mong wa dong wan miitu, ningkun kuq tlo. Laita, nashiq raq stiq skhaq rilung, tingting rilung, kiimaq Shiikeawe ma kiinong kuq laita asii ngamrea rilung siwan miitu ningkun kuq tlo.

¹³ Nashiq raq tsankhun maq, ranaiqshishi ka, nashiq ma Ajong Shiikeawe khushü jonghea luhea achhai anyii liliim sitlaq kra, michhi rong i nguta, khewan tiikai. Kriika nashiq Chhiitiwe Jesuq Khristo saüki tlaq, achu shiiman jonghea Ranaiq na michhi rong i nguta kamto maq khe laita sitiikai.

¹⁴ Apaiq raq nashiq miitu, amiisaq khamto. Raüta nashiq ka abi ngarai kharü mong wa daa wanto she. Raüta nashiq ka ashe ngarai jaqkhon mong wa tiisii hetse wanto she. Raüta nashiq ka apaiq sengi she nguta rairii wan raüta, awura maq tiiham wanto she. Arka nashiq raq apaiq lishe shomnoq wan miitu riito. Raüta nashiq ka shamhea kaiwa jaqsham wan miituli she nguta pong na rairiito she.

¹⁵ Ara ümchaü chongkuq kang thun, tsiichong tri raü pot thun ara ho tlaü arang thaq maq, phungtuti ma, tsaiji doke lam maq, trap tru tsii chongkuq tlaü akhing na, pha dangdang maq chongkuq lili riilaq. Ümwokhong na siti phungtuti jumiimin ümniika naq tiishummiikiq.