RUTHA 4 - ASII LAKDAP Bible (BSI)

Bowaj Raq Rut Romto

¹ Bowaj ka ngongthun chang ba chela kilam chong tho kiijaq ngaho lito. Kiijiishe Elimelekh ma ajamti, amak shaqwe ashi asi nguta Bowaj raq Rut ma chongkuqtiiwe kriishe saühoto. Kriiwe saüho kiitiishe, “Phunowe, arjaq nga laq,” nguta Bowaj raq aphunowe kra heato. Krai mren, kriiwe kiimin wa raüta kiijaq ngawa damto.

² Raütiishe Bowaj raq chelati nyungwere shiilangbi weroqshi ka kiijaq riichom heato. Raüta, “Nyungwere lei, arjaq heashi nga rong liishaq,” nguta shiilangbi ka tiingato. Krai mren, nyungwere ka kiijaq ngawa damto. Nyungwere thun ka tiinga lot raütiishe,

³ apaiq raq aphunowe apaiq jamtiwe krii miishe chongto, “Riita ija, ümchaü min la na jamti Naomi ka Mob mung maq laü wan raüta, nahiq niishe jang wan nongto. Apaiq raq najamti ahüwe Elimelekh wak phushi asi, kra ashali mirha nguta chongtlo.

⁴ Riita, ngi raq thapthi wan kla, kriika riikhaqli maq ümniiriili ri thü laq nguta tiima tiikang. Riita, ija ümchaü min la, ara welabi nga tlaq ara man na, ümniiraq ri thü liina. Kiimaq ümniiraq ri thü mang li nguta ngochang jiimin, ümchaü tsangshiq man na, bom ka rairai riirii she chongkuq laq. Shatmaq, ümniinga ri thü mang nguta ngochang jiila, kriimin tantan maq, bom ka rairai riirii chong kuq laq. Ara jamkhano chongtiikang ngukla, kra tachong hupsam tiikhup wongke wan tri raü shamke wantiwe ka ümniiraq shamke wan chang. Ümnaq jai niishetiq ngi nga tiikang.” Kiijiishe, “Ngi raq miri ha,” nguta kriiwe raq treto.

⁵ Kiijiishe, “Ahea, kriika riikhaqli. Ikhla, ümniiraq hiq phu ka Naomi jaq wa she ri thü tlaü krai mren, ümniiraq Mob shea manti-nyung Rut kiimin she ri thü tlaüjo. Laüta Rut khop kiimin ümniiriishe mithaq haü. Krai mren, kra tachong hiqphu base kriika ahüwe maa ta awii mang niishe misi wan.”

⁶ Kiijiishe, “Ikhiijiika, ngi riika ri thü mangli. Kra tachong thaq na ngi arang ka ümniimiili she wenkuq tiikang. Ara jamkhano ngutiikang ngukla, kra tachong hupsam ka isetiim riika hupkhang kilot mak she miraq. Ngi riika ri mang li. Ümniiriili she ri thü laq,” nguta kriiwe raq treto.

⁷ Kra pat na akha tachong hupsam she riirithii tlaq nai tachong hupsam she riisong phea tlaq akhing niika, hupsam kra wenke wantiwe raq hupsam ritiwe kiima, apaiq hokpa kra ahok wa chhut raüta, aritiwe kiimiishe kuqtlo. Kra pat na Israilnok riika ara chongtiikai tri raü ara langtlo. Raüta mra ka thumto she nguta maiqse liipan na tri raü ka shat thütlo.

⁸ Krai mren she, kriiwe riimin, Bowaj ma, “Arka ümniiriili she ri thü laq,” nguta bom ka tiijangto. Kiimaq, apaiq raq ahok pa ka chhut raüta, Bowaj jaq na kuqto.

⁹ Kiijiishe, Bowaj raq nyungwere nga tlaqti thun kiima nai nokwe ngatlaqti thun ma nguto, “Ümchaü ranaiq namshiq tarü saqsebi man na, ngi raq Naomi jaq wa ahüwe Elimelekh kiimaq ase nai Chilion nai Maqlon rii tachong hupsam ümchu wa sitlaq kra wiita hutjok she ritiikang.

¹⁰ Ara tachong hupsam ariirai, nong nong Mob shea, Mahlon tanyung, mantinyung Rut khop kiimin ngi riishe thaq tiikang. Riita ngi raq apaiq rom wan tiikang ara lü miishe ahüwe mang, kiimaq alai ala kra maiqmii nok ata awiishaq na kiimaq ara nahiq shong na thum mak miqmak she misi wan. Namshiq nyungwere thun ka ara takhan miitu tri raüshat wan tiikai ara saqsebi she sitlan.”

¹¹ Kiijiishe, mung shiilangbi nai nanok ahinti thun tarü raq, “Tengto. Naishiq tarü ka ara miitu saqsebi. Tatiwe raq ümjamti nyung ka nawi nai Israilnok phan ma wipai Rechel nai Lea raq nati Jakob ma asetiim ka wiqrai rü atang tiipuchi kuq wantaq ikha, mitiipu kuq wan laq. Namsetiim ka tere rü atang ikha Ephrath hiq shong na mipuchi wan laq. Raüta, Bethlehem chela na tsangshiq mangchong ka, ra tsa ikha mijong wan laq.

¹² Tatiwe raq ara jetu nyung ara lümaq ümsetiim ümchuwa tiipuchi kuq wan tlaq, kriika Perej ta, Juda nai Tamar setiim puchi wantaq ikhiitiq mipuchi wan laq.”

Bowaj Weraü Manphan

¹³ Krai mren, Bowaj raq Rut ka rom wanto. Raüta, dunghiq wanto. Tatiwe raq Rut ma achu shiiman kuqto. Krai mren, apaiq ka wiihan she riito. Kiimaq ase ashi humto.

¹⁴ Kiitiikaq jechakre raq Naomi ma, “Tatiwe kli tiitsam laq! Apaiq raq ümnaq dunghea wanti ümsaü ashi she kuqto. Ara no arka Israil mung na amang ra tsa ikha mitiijong laq!

¹⁵ Ümnam nyung raq ümniika pinthum lungwiitlo. Riita, ümchaü sanha, apaiq ka ümniima ümsetiim wemiishi khuthaq niimin, achan she. Ümchaü sanha apaiq raq ümniima ümsaü ashi she tiihum kuqto. Ümsaü raq ümniima rilung anye she mikuq wan. Kiimaq ümnaq dunghea wanti she hum wan laü,” nguta nguto.

¹⁶ Krai mren, Naomi raq asaü nonose ka akhuk na pomho tlii raüta, boqpum wanto.

¹⁷ Kiiwa chiiti jamthaq jamkiqti jechakre nyungwere raq, kra no ka Obed nguta mangto. Tsangshiq raq nanok tarü ma, “Naomi raq ase ashi humto!” ngutiishe rinwii wanto. Riita, Obed kriishe Jessiwe riito. Kiimaq Jessi ka Dawitwe riito.

¹⁸ Riita, Perej ma asaü asetiim thun ka arthun arshe. Perej ma ase ka Hejron.

¹⁹ Hejron ma ase ka Ram. Ram ma ase ka Amminadab.

²⁰ Amminadab ma ase ka Nahshon. Nahshon ma ase ka Salmon.

²¹ Salmon ma ase ka Bowaj. Bowaj ma ase ka Obed.

²² Obed ma ase ka Jessi. Kiimaq Jessi ma ase ka Dawit.