RUTHA 3 - ASII LAKDAP Bible (BSI)

Rut Raq Ajamtiwe Humto

¹ Krii jai maq heashi sijai na, Naomi raq Rut ma akha chongto, “Ngi raq ümniima akhek ashong anga chang jam ritke chang she saü wato. Kra ngu raü jiitiq ümniima maiqmii jam awak ka arshe dea nguta asi miraq.

² Tsan na tiitsanglaq, ümnap ümji jechakre ningchangtibi rai tsamso hanki laü wakchongtiwe Boaj ka nashiq jamti. Tailaq, athi raji apaiq raq jaili tsamphong kra nikai miki.

³ Riita ümchaü min, ümniika ümtum ümjü ka helaq. Laüta ümkhum ka homseng maq tiijut laq. Kiimaq ümkhea ka ahea pinthumti kra tsea laüta sam laq. Laüta apaiq wak na tsambuk chang ba kiina kilaq. Shatmaq apaiq ka tsambuk lot jai phaqsea khsmnyang awok phetaktak miphaqsiq shaq wiiwii, ümsham ka apaiq ma naq tiichhikiq.

⁴ Tsamshu phong na apaiq kon chang ba kra ümniiraq samhea tiitsang liilaq. Laüta apaiq ka akon makaiq konto she angu na, ümniika atsise maq walaüta, apaiq changji nü kiijaq, apaiq raq sam tlaq khea kra atsise maq lin laüta, aji ni chong kiijaq konwakiq. Kiijiishetiq ümniiraq jamlai jaq sham chang wa, kra apaiq raq ümniima michongkuq.”

⁵ Kiijiishe, “Ümniiraq ngi ma jamlai wa chongtlaü kra ngi raq miklo kang,” nguta Rut raq treto.

⁶ Kra tsii chongkuqtaq krai mren, Rut ka tsamphong buk chang ba kiina kihoto. Raüta anyaichhi raq apaiq ma chongkuq taq kra phanphan jaq ka shamto.

⁷ Boaj ka phaqsea khamnyang lot raüta, peokhiq she riito. Raüta apaiq ka jaili tsamphong mong kiina kon wanto. Kiijiishe, Rut ka atsise maq waraüta, apaiq jichong nü kiina ahok pang kheathum kra lin raüta tiipangsaq bumkito.

⁸ Rawa jam tinkhan niishe, Boaj ka akon wa tiihanghiiq she samkito. Raüta ajichong nü na maiqnyung ashi weraü kra chhi raüta apaiq ka awang rai li she riito.

⁹ Apaiq raq waito, “Ümniika juwa?” “Shiilangwe lei, ngi ka Rut,” nguta apaiq raq treto. “Ümniika ngi ma tati shaq. Ngi dunghea wanti ka ümniili she miraq. Arkha maq, ümniiraq ngi ara dunghiq laq.”

¹⁰ “Tatiwe raq ümniima mishman kuq laq,” nguta apaiq raq nguto. “Ümniiraq ümnyaichhi ma ümtinkhan wa mangchan tiichhikuq laü kra thaq niimin, ümchaü ümniiraq ashong anga wan lamlu tiima tlaü arka, takhan holai akhek tri lam phan wan tlaü. Ümnii riika chiithe jiimin thümse jiimin, noriibi phong wa mirit wan lot haü wa. Laüta mishong nga wan lot haü wa. Shatmaq ümniiraq kra rit wan ma riilaü.

¹¹ Riita, ümchaü min Rut lei, ümniika naq chapakiq. Ümniiraq ngi ma jamlai sham akai wa kiinong kuq laü, kriika ngi raq miliikuqha dongdii. Ümniika maiqshaq nguta ara chelati maiq wiita raq asap siisaq.

¹² Bom ka tengto. Ngi ka ümniima ata awii shaq dea. Kiimaq ümnaq kra tiishong nga wan miitu takhan holai hoketiwe ashi dea. Shatmaq, ngi nam miimin, ümniima tati amak shaq wa maiq weshi ka asi hali.

¹³ Riita ahea, ümchaü min, ümchaü rawa arka ra tiiwüli ajiili she jap laq. Anap ranap niishetiq kra bom ka mirchong phan rong i. Apaiq raq ümniika tiishong nga raü jiikla ahea. Shatmaq, ngi raq atraTatiwe mang chong lata, kiqkham tiikang, apaiq raq arang homak nguraü ka, ümnaq tiishong nga wan holai ka ngi riishe mihoha. Ümchaü ümniika ra tiiwü li ajiili she jap laq.”

¹⁴ Kra bom chongkuq taq krai mren, apaiq ka ra tiiwü li kiijaq Boaj jichong niili konto. Raüta, apaiq ka ranap maiqsham nasham tiitsang mak niili tiido raüta wawanto. Jamkhano ngukla, Boaj raq Rut ka apaiq tho na konto nguta maiq ma tho tiihe raa mak nguta Rut ka ra samhea miwü shaq niili tiiwato.

¹⁵ Boaj raq apaiq ma chongto, “Ümsamtong jong kaü ka chhut laüta arjaq tiipii liita.” Krai mren, Rut riimin apaiq samtong jong kaü kra hiq na tiipiito. Kiijiishe Boaj raq jaili kra tso raüta, tokroq nai tin tso kuq raüta thop kuto. Raüta kra tsam thop ka Rut ma araikhü na tiiboq kuqto. Raütiishe Rut ka chela niishe jang wan nongto.

¹⁶ Apaiq ka jam na saü wan kiitiishe, anyaichhi raq, “Ise lei, jam khiiwa humki laü?” nguta apaiq ma waito. Kiijiishe Rut raq Boaj raq apaiq miitu ümtinkhan wa ahea klo kuqtaq kra anyaichhi ma wiita chongto.

¹⁷ Kiimahali, “Kra thaq niimin, apaiq raq ngi ka ümpha na jaqmii jang wan raamak nguta ara jaili tsamthop ara thop kuqto.”

¹⁸ Naomi raq apaiq ma nguto, “Riita, ümchaü sanha ümniika tsankhun miili she nga laq. Arthun arka kunkun mihongtha wan she. Ümchaü ranaiq liipan niili ara jaqsham ara mitiikuri wan lot shaq wiiwii, Boaj ka kaishak nga mak miraq.”