RUTHA 2 - ASII LAKDAP Bible (BSI)

Rut Ka Boaj Wak Na Tsamsokai Kito

¹ Riita Naomi ma ata awiiti maiq weshi asi. Apaiq mang ka Boaj. Apaiq ka tsangwe maa Elimelekh jamti. Boaj ka wiimang wrawe.

² Ranaiqshi Rut raq anyaichhi Naomi ma chongto, “Ngi ka nanok wak tsamhanrü na kipha. Lata maiqjai wa tsamso soki pha. Maiq weshi raq ngi ma tsangshiq wak wa, tsamso ka mitiisokuq ahiq.” Kiijiishe, “Ise lei, ahea na, kilaq,” nguta Naomi raq treto.

³ Krai mren, Rut ka tsamhan rü wak ram kiina kihoto. Raüta apaiq ka maiq tashi wak na tsamhanti jai na tsamso kra, tsangshiq jai phan phan khum raüta riichomto. Riita kra apaiq raq tsamso riichom tlaq kra wakchongtiwe mang ka Boaj. Apaiq ka Elimelekh jamti riito.

⁴ Heashi sijai niishe, Bethlehem maq aki Boaj ka wak na saükito. Raüta ningchangtibi rai, “Tatiwe ka namshiq rai misi laq!” nguta riibomto. “Tatiwe raq ümniima mishman laq!” nguta tsangshiq raq treto.

⁵ Boaj raq ajaqshi se ningchangti liitiwe ma, “Riita ara junrii nyung arka ju wa?” nguta waito.

⁶ Kriiwe raq treto, “Apaiq ka pong mungti junrii nyung. Apaiq ka Mob mungti. Naomi rai ajang wadam ira.

⁷ Apaiq raq ngi nangnga, ningchangti jaiwa tsamso riichom hanpha nguta aming jaüto. Apaiq ka ranap chu miiphü tsamso riichom chaphotaq kriika, atok ra niimin domak, tsamso riichom jutlo. Ara ümchaü linlintiq dongdii apaiq ka baüli tiipse na niitiitsak heashi ngatlo.”

⁸ Kiijiishe Boaj raq Rut ma akha chongto, “Ngi raq ümniima tsii chongkuq pha. Ümniika tsamso han kai nanok maiq ahinti wak na naqkikiq. Arjaq jechakre ningchangti rai tsamso ka riichom han dam laq.

⁹ Laüta tsangshiq raq tsam ka ümbawo hantlaq, kra liishat riilaq. Laüta, tsangshiq jai phanphan tsamso ka hanlaq. Ngi raq ningchangti maiqwere ma ümniika naq shummii rongkiq nguta tsii min achongke kun she. Kiimaq ümkham nyangtsi raüla, tsangshiq raq kham athiiki hamtak na totlaq kiiwa tsüm nyang walili riilaq.”

¹⁰ Kra tai raüta, Rut ka hiq na bumsaq raüta, “Ngi ka ümniiraq atinkhan mangchanli chang ka thek mang. Ngi ka pongmungti wanse,” nguta Rut raq Boaj ma nguto.

¹¹ Kiijiishe Boaj raq treto, “Ümniiraq ümwese tsaikai jai maq ümnyai-chhi miitu lungwii tsii ümtinkhan wa tiichikuq laü, kra ngi raq atai wi she. Ümniiraq ümnyung ümwe ümphan ümmaq kiimaq maiqmii mung kra wiita baiqthü laüta, ümniiraq mak maq chhiwa maünok mangtang ramang phan rai siwa dam wawan laü. Kra thun ka wiita ngi raq asapha she.

¹² Riita, ümniiraq atinkhan ahea awa jaqsham wan laü ara miitu Tatiwe raq ümniima aliip apha maq mitham songkuq laq. Israilnok Tati Shiikeawe puk na ümnaq nyap wan tlaü kra riitiq ümniima poksi mikuq laq!”

¹³ Kiijiishe Rut raq, “Shiilangwe lei, ümniiraq ngi ma pinthum lungwii tsantsii tiichhi kuq laü. Ngi khoshose akhnok arka ümkoli ümjaqshisetiim sitlaq kra phongwa nyungshi ra kra khan min thekmang. Shatmaq ümniiraq ngi ma lungwii tsantsii jonghea tiichhi kuq laü. Kra ningkhan, ngi ma tsaiji kongtam puqshi she,” nguta Rut raq treto.

¹⁴ Ranaiq dungsea akhing niishe, Boaj raq Rut ma, “Wara ana. Laüta ara winsii ara jaü laq. Laüta ara weashaütai arjaq tsam laüta phaq laq,” nguta heato. Kiijiishe Rut ka ningchangtibi rai adam na nga damto. Kiimaq Boaj raq apaiq ma atiishin ako araq winsii phu wiijam kra hali kuq nongto. Krai mren Rut riimin tsan tiiheali wok phetak phaqto. Kiimaq apaiq raq phaqsea lot jai she, winsii ka achan ana asi riito.

¹⁵ Phaqsea lot jai Rut ka tsamso riichomkai ngutiishe tiidohoto. Kiijiishe Boaj raq ningchangtibi kiima, “Apaiq ma tsam ka adap tiiphong tlaq kiiwa min tiitsun ronglaq. Apaiq ka naqson rongkiq.

¹⁶ Kiimaq namshiq raq tsamte jaq na te wan tlan kiiwa min tsam nyam wiijam ka jai na chat kuq thü ronglaq. Kriiwa apaiq raq mirchom laq. Kra riichom kiiphan la, namshiq raq apaiq ka naqson rongkiq,” nguta chongkuqto.

¹⁷ Krai mren, Rut ka tsamso riichom tsamhan rü kiijaq kihonongto. Raüta ra tiiji li tsamso riichomto. Raüta raji na apaiq raq tsamso riichom hantaq kriishe bukto. Raüta liikiita tsam ka tokroq shi saünam riito.

¹⁸ Rajiko niishe apaiq raq tsam ka howan raüta, chela niishe wawanto. Raüta anyaichhi ma tsamso riichom han wantaq kra tiichhito. Kiimaq apaiq raq ranaiq minphong jai atiichong phaqsea bung kriimin anyaichhi ma kuq wanto.

¹⁹ Naomi raq apaiq ma waito, “Ümniiraq arthun arka ümbawo riichom wan laü? Juta wak wiiwa tsam ka sowan laü? Shiikeawe raq ara wakchongtiwe ma achu shiiman jonghea mikuq laq.” Kiijiishe Rut raq Naomi ma apaiq raq tsamso riichom han wantaq wakchongtiwe mang ka Boaj nguta chongto.

²⁰ “Tatiwe raq Boaj ma achu shiiman jonghea mikuq laq!” nguta Naomi raq Rut bom ka treto. “Tatiwe riika atrati nai amaati miitu apaiq bomkham raütu thü wan tlaq kriika tiihongkuq wan ruq phan,” nguta Naomi raq bom ka chongto. “Riita ija, kriiwe ka nashiq ma tatiseno, nashiq jamti sii. Apaiq ka nashiq liikoke wanti tanyang seno phong wa weshi,” nguta apaiq raq Rut ma bom ka phanchan kuqto.

²¹ Kiijiishe Rut raq Naomi bom ka treto, “Arthaq niimin ahea pinthum ka apaiq raq ngi nangnga tsangshiq tsamhan kra mithum shaq wiiwii, tsangshiq wak kiiwali tsamso ka riichom hanki lili riiliijo nguta ngi ma bom ka chongkuqto.”

²² Kiijiishe Naomi raq Rut ma nguto, “I se lei, kriika riikhaqli dea. Ümniika Boaj tahii wak niili kilaüta, jechakre ningchangti jai na tsamso riichom kai riiwe ka ümniima ahea pinthum miraq. Ümniika nanok maiq ahinti wak wa tsamso riichom kai kihaü jiika, tsangshiq raq ahai ahü min mirkii phaü.”

²³ Krai mren, jaili nai bunwong tsam han mikun shaq wiiwii, Rut raq tsamso riichom han ka Boaj tahii ningchangti rai li hansiq wanto. Kiimaq apaiq ka ara jaqsham ara thum jai niimin anyaichhi nyung rai adam na siwanto.