Romans 9 - ASII LAKDAP Bible (BSI)

Shiikeawe Nai Asengi Israilnok Manphan Bom

¹ Ngi raq chong tiikang arka tengteng. Ngi ka Khristo wokhong na siti we. Ngi ka rot mang. Asii Wenyi raq shunshea raüta, i tsan i tsii ka tsangriri maq sitiikang. Krai mren, Asii Wenyi riimin hakhi kuqtlo. Ara ngi raq chong tiikang arka tengteng. Ngi ka rotmang.

² Arka, i tsan i mong jii na, riiweatsi jonghea sitlo ara nangnga ngutiikang. Ara riiweatsi arka, athum min thum mak phan, tsi ruq li tsi tlo.

³ Ara, riiweatsi arka, i phan i maq, i nok i ta miitu tsi tlo! Tsangshiq raq, Shiikeawe manson kra howan raüta, tsai rai wan rii na, ngi ara riiwe khoti, tsangshiq rii na Shiikeawe manson homa kra holata, tsai hajaq ahea riichang nguta tsantsi mongtsi maq sitiikang. Kiimaq Khristo wokhong mong wa, atiidong riibaiq raüjaq ahea riichang, nguta tiima siq tiikang. Arka tsangshiq miitu, i tsan tsi rai kha na ngutiikang.

⁴ Ara jamkhano chongtiikang ngukla, tsangshiq ka Shiikeawe sengi. Apaiq raq tsangshiq ka asetiim miishe tiija wanto. Raüta, apaiq raq tsangshiq ma, apaiq achhai anyii khushü ngao kra, tiichhikuq wanto. Raüta, tsangshiq ka apaiq raq tongshong wantaq thun kra ram kham maq tiiham wanto. Raüta, apaiq raq tsangshiq ma Thungtri ka kuqto. Shiikeawe raq tsangshiq ma, riikhaqli maq, apaiq shomnoq wan lam kriimin tiichhi kuqto. Kiimaq, tsangshiq raq, Shiikeawe raq tsangshiq ma akuq, kiqkham kongphiq raütu kriimin lap wanto.

⁵ Tsangshiq kata chiisan Jehudinok phan. Tsangtitiim thun ka ajong ala, amang ra tsa ikha, lüsi lüwa siisaq siwanto. Atiisup niishe ka, Khristo maiqkhum na pokitaq kiimin, tsangshiq nok phan na pokito. Riita, ümchaü sanha, maiqse angu tarü raq, phanrap rümkomti we, Shiikeawe mang kli she pattup pat-sa mitiitsam laq! Amen.

⁶ Ngi riika Shiikeawe raq akuq, kiqkham kongphiq raükha kriika apoi riikito nguta ka ngu mang. Kra kiqkham ka tiiku wanto. Ara jamkhano chongtiikang ngukla, Shiikeawe raq asengi miitu maiqse ümchuwa akhek atiitsang raüta tsea wantaq thun kra, ümchaü sanha, ümsiimiiwa Israilnok phan sitlaq kra thaq niimin apa she.

⁷ Kiimahali, Abraham lai ala ümchuwa pu wantaq thun kiimin, wiitarü hutjok kriika, Shiikeawe setiim ka riimak. Ara jamkhano chongtiikang ngukla, Shiikeawe raq Abraham ma, “Isak setiim wa ümchuwa pu wantlaq, kriili chiisan ümsaü ümse phan ma mija wan,” nguta kiqkham kuqto.

⁸ Riita, ara chong tlaq ara phanphan hali, joli han-ngam maq adong wan setiim kriika, Shiikeawe setiim ngutiika wea wan mak. Shatmaq, Shiikeawe raq, tiitsangdada Abraham ma kiqkham kuqtaq, kra tiiku wan miitu rawii chhi wantaq setiim kra thun kriili, chiisan Shiikeawe setiim dea nguta wea wan tlo.

⁹ Ara akha jamkhano chong tla ngukla, Shiikeawe raq Abraham ma kiqkham kuqtaq akhing na, “Akhing riikhaqli na, ngi ka misaüki nong kang. Kiimaq krai mren, ümjamti nyung Sara raq ase ashi mihum,” nguta, Shiikeawe raq chongkuqto.

¹⁰ Kiimaq bom ka, ara chongtiikai ara lamlam li min riimak, Nati Isak nai tsang-nyung Rebeka se ka wenai humto.

^11-12 Riita, tsangnai siphu wenai kiiwa, weshi tsea wantaq kriika, Shiikeawe apaiq raq thapthi tlaq kra phanphan tsea wanto nguta tiichhike miitu, Shiikeawe raq Rebeka ma, “Ümse wenai kiiwa, aphu we ka ano we jaqkhong na misi,” nguta chongkuqto. Shiikeawe raq ara Rebeka ma chongkuqtaq arka, tsangnai siphu rawii min michhi shaq niiphü chong kuqto. Kiimaq tsangnai raq, tsangnai jaq maq jamlai phan ahea abi sham akai min, misham wan shaq niiphü, Shiikeawe raq, ara bom ara chongkuqto. Krai mren, Shiikeawe raq tsangnai siphu wa, weshi tsea wantaq kriika, Shiikeawe apaiq raq kiqkham wantaq, kra thaq na seng raüta, chechiip wanto. Tsangnai raq Shiikeawe man na, jamlai phan Shiikeawe tsan tiiheali chang, jaqsham ahea sham raüta tsea wan ka riimak.

¹³ Arka, Asii bomtsi na akha nguta chong taq, kra phan phan tsea rairii wanto. Asii bomtsi na, “Ngi raq Jakob ka tsea wankang. Shatmaq, Isaü ka achiip riibaiq wan kang!” nguta chongtlo.

¹⁴ Riita, ikhiijiika, ara chong tiikai arkha maq, Shiikeawe raq tri raü ka, tingting maq sham wan mak nguta, nashiq raq apaiq ma mingu lot rong i sha? Riimak, nashiq raq kiikha ka ngulot mai.

¹⁵ Akha, jamkhano ngulot mai ngukla, apaiq raq Mosheq ma, “Ngi raq ju miiwa atiihangke wan lungwii tiikang, kriiti ka mitiihang kuq wan ha. Kiimaq ngi raq ju miiwa, mangchan tiichhi ke wan lungwii tiikang, kriiti ma, mangchan mitiichhi kuq wan ha,” nguta chongkuqto.

¹⁶ Riita, ara chong tiikai thun arwiishe chhi wan tiikai. Phanrap lam niika maiqse raq jamlai phan wa thapthi wantlaq, kra phanphan ka kuwan mak. Kiimaq maiqse raq jamlai wa sham lam wan tlaq, kra khuthaq na seng raüta min tiihong kuq wan mak. Shatmaq, Shiikeawe apaiq raq jamlai phan wa apaiq tiihang wan mangchan tsantsii maq tiihong kuq wan tlaq, kra phan phan li tiihongkuq tlo nguta sap tiikai.

¹⁷ Riita, arkha miitiina, Shiikeawe raq Asii bomtsi na, Ejip mung hokham we ma, “Ngi raq ümniika hokham ma shong wan kang arka, ümniiliimaq, i ningkun jong nai i khushü jong ara, mangjong hiq tlotli na tiiphoi wan miitu tiina, shong wan kang,” nguta chongkuq wanto chhi tiikai.

¹⁸ Ara chong tiikai arkha miitiina, Shiikeawe raq maiqse ka, ümriitiwa apaiq raq atiihangke wan lungwii tlaq, kriiti ka atiihang riikuq wantlo. Kiimaq, ümriitiwa, apaiq raq lanlaqlaq tsantsii maq misi laq nguta thikuq wantlaq, kriiti ka lanlaqlaq tsantsii rümti ma, tiija baiq wan tlo.

Shiikeawe Tsankhiq Nai Apaiq Mangchan

¹⁹ Shatmaq, namshiq phong wa maiq weshi ra riika, ngi ma akha mingu han, “Riita, ara chongtlaü ardea tengtlaq jiika, Shiikeawe raq maiqse ka ashut we dea ngutiika, jamkho mitiishut wan? Shiikeawe apaiq raq, jamlai phan wa thimi tlaq, kriika juwero mikhii lot?”

²⁰ Shatmaq, i phuno we, riita, ümniika ju wiita, Shiikeawe kiq kra khü wan miika? Hamtak ashi riika, apaiq tiiq lowanti we kiima, “Ümniiraq ngi arka, akha jam nguto tiiq laü?” nguta bom ka wai mak.

²¹ Ara jamkhano akha chongtiikai ngukla, hamtak kriika jamkha lowan chang wa, kriika atiiqti we arang li. Hiq da dashi kra wiili, tak ka anai lowan raüta, ashi ka akhek anaq poi na lang wan miitu mithü wan. Kiimaq ashi kriika, akha miinan joli na lang wan miitu mithü wan.

²² Krai mren sii hali, Shiikeawe riimin maiqse ka phanrap na seng raüta tiipok wan tlo! Arka, Shiikeawe raq apaiq tsankhiq nai apaiq ningkun jong kra, tiichhi kuq wan tlaq kiijaq chhi wan tiikai. Arka, apaiq tsankhiq ka ümriiti khuthaq niiwa siwan tlaq, ümriiti wa chongthum walü maq tiikhiim chaq baiq wan chang sitlaq, kriiti thun miimin, apaiq riika, pinthum anin riiwan raüta, khebom wan tlo chhi wan tiikai.

²³ Kiimahali, apaiq raq nashiq ma, apaiq achhai anyii khushü tum jonghea towantlaq kriimin, nashiq ma tiichhike wan rotlo. Ara apaiq khushü tum kaü towan tlaq kriiwa, nashiq ma riisha raükuq wanto. Nashiq ka apaiq raq kongkhu miiphü dongdii, apaiq tiihang wan mangchan khoqram kii maq rairii wanje she dongdii riito.

²⁴ Ara jamkhano chongtiikai ngukla, nashiq arka, apaiq raq ashea wan maiqsetiim nguta sitiikai. Nashiq phong wa maiq wiijamti ka, Jehudinok phan wa atsea wan. Kiimaq wiijamti ka Pongnok phan maiqse wa atsea wan.

²⁵ Shiikeawe raq, Hosea shammi we lakdap na akha ngutlo: “Junok wa i sengi riimak, tsangshiq ka ngi raq, ‘Namshiq ka i sengi she,’ nguta mingu wan ha. Ngi raq lungwii wan mang mungti ka, ‘Namshiq ka ngi ma tsanwa nok she,’ nguta mingu wan ha.

²⁶ Kiimaq Shiikeawe raq junok miiwa, ‘Namshiq ka i sengi riimak,’ nguta ngu wantaq, kra nok ma, ‘Namshiq ka i setiim she,’ nguta mingu wan.”

²⁷ Krai mren, shammi we Isaia riimin, Israilnok miitu ka akha chongkuq wanto, “Israilnok ka sammok- tra jüphii na kumtsai phong ikha puchi rai wan raü min, tsangshiq phong wiika, aso atiichongki, kriili mitiichhii kuq wan.

²⁸ Ara jamkhano chongtla ngukla, Tatiwe raq, ara mangjong maiqse kha arka, tri raü atsin maq shin wan raüta, jaqlo miili she mipho kuq wan. Raüta, ajiqti thun kra mitiichamchao wan.”

²⁹ Ara khapho kewan arka, Isaia raq man na bom chong thütaq kra phan phan miraq. Apaiq raq akha nguta chongthüto, “Tatiwe Ningkun Ajong Pinthumwe raq, nashiq lai ala phan arwa, phanshi ra aso ano tiichong kuq wan mak dea ngu raü jiika, nashiq nok arka, Sodom nai Gommora chelati ikha, chongthum ma mija rong i wa,” nguta chongtlo.

Tsütsa Ahea Ka Israilnok Miitu Min Kata

³⁰ Riita, ara chong wan tiikai bomtsi arka ara nangnga ngutiikai. Pongnok phan maiqse riika, Shiikeawe rai jam riidü wan chang sham nguta, jam min tiima wan mak nok raq khoti, ümchaü sanha, tsangshiq ka Shiikeawe raq, ajam mong niishe tiidii wanto. Arka tsangshiq raq, Shiikeawe ma kamtsantsii thü wan tlaq kra, lümiishe tiidii wanto. Raüta, Shiikeawe rai wehea miishe tiija wanto. Tsangshiq ka, Shiikeawe raq apaiq khoqramkii maq raikuq wanto she.

³¹ Shatmaq, Shiikeawe raq atsea wan Israilnok riika, thungtri raütu kra lang wan raüta, Shiikeawe rai wehea riija wan chang nguta, thungtri wokhong na siwantlo. Shatmaq, tsangshiq ka Shiikeawe rai wehea riija wan lot mak dea riito.

³² Riita, ara tsangshiq raq riikhaqli lamlu ka jamkhano hum wan mak dea riita? Kriika, tsangshiq raq, kamtsantsii maq ritwan mak dea riito. Kriikha miitiina, tsangshiq raq hum wan mak dea riitaq ara. Tsangshiq riika, tsangshiq maiqmii raq, jaqsham wan tlaq, kra thaq na seng raüta, kechu maiqse ma jawan lam kra rit wanto. Kra kha miitiina, tsangshiq raq lap wan mak dea riitaq ara. Krai mren, tsangshiq ka, “hok tiithaü chang longkaü,” kiijaq khoti tiithap rai wanto.

³³ Tsangshiq tiithap rai wantaq longkaü miitu ka, Asii bomtsi na Shiikeawe raq akha chongkuq wantaq ara phan phan tiithap rai wan tlo: “Liirong laq, ngi raq Jajon hiq na longkaü ashi tiibum tiikang. Ara longkaü na maiq mitiithap wan. Ara longkaü ajong arjaq tiitaü rai wan raüta, tsangshiq ka akii ashii miishe mija wan. Shatmaq, jurwa apaiq ma kamtlaq, kriiti miika apaiq raq jea tiingaü mak she miraq.”