Romans 8 - ASII LAKDAP Bible (BSI)

Asii Wenyi Raq Shea Raüta Siwan Rilung

¹ Riita, ija ümchaü sanha, ara chongkai thun bom raü shat wan ka akhiishe shat wan i na. Juwa Khristo Jesuq rai pumshi hanshi miishe sitlaq, kriiti miika, Shiikeawe raq kha ka nyan mak she.

² Ara jamkhano ngutiikang ngukla, nashiq ma Khristo Jesuq pum lümaq, rilung tsitsü keti, Asii Wenyi raq ngi arka ngarai kharü mong wa nai tsailam kharü mong wa dokdaa wanto she.

³ Maiqse han-ngam ningkun ajom kha maq, Thungtri raq jamlai wa klo wan lot mak dea riitaq, kriika Shiikeawe riishe klo kuq wanto. Apaiq raq ngarai sitlaq kra, Ase shaq ka maiqse ngarai han-ngam ikha khum ashi na, tiipoki raüta, ngarai ka maiqse han-ngam wa, Ase tiikitaq kra lümiishe shra baiqto. Kiimaq, ngarai kharü ka chumbaiq wanto she.

⁴ Shiikeawe raq, ara dokdaa kuq wantaq arka, Thungtri raq asii arai rilung maq singa raa dongdii nguta maiqse khuthaq na, aming thü tlaq kra aming thun kra, Asii Wenyi wokhong na sitibi, nashiq khum na kunli, khutam maitam maq mihong wan laq, nguta dokda kuq wanto. Riita, arka maiqmii han-ngam tri wokhong maq singa wanti maiqse miitu ka riimak.

⁵ Juwa maiqmii han-ngam tiima sung atsii raq, thaü tlaq, kra phan phan singa wan tlaq, kriiti ka tsangshiq maiqmii han-ngam tiima sung atsii riili jamsha tlo. Kiimaq juwa, Asii Wenyi raq shunshea tlaq, kriiti tiima tsantsii ka, Asii Wenyi raq jamkhiiwa lungwiitlaq, kra phanphan sitlo.

⁶ Hanngam tiima tsantsii jaqkhon mong na siti ka atsai miraq. Shatmaq, Asii Wenyi wokhong na singa wanti ka atra misi. Kiimaq khusang rakhang rilung misi wan.

⁷ Arkha na tiina, juwa maiqmii han-ngam tiima tsantsii jaqkhon mong na sitlaq, kriiti ka Shiikeawe ma wesang. Ara jamkhano chongtiikang ngukla, apaiq ka Shiikeawe thungtri wokhong na silot mak. Kiimaq apaiq riika, ümkhiiriita jiimin, Shiikeawe tri aming ka lang lotmak.

⁸ Jurwa maiqmii, tsangshiq han-ngam tiima tsantsii wokhong mong niili sitlaq, kriiti riika, Shiikeawe ka tiichochi lot mak.

⁹ Shatmaq, namshiq ka ümchaü sanha, namshiq han-ngam tiima tsantsii raq thaü tlaq, kra phanphan ka singa man she. Kra rii na, namshiq ka Asii Wenyi raq shunshea tlo. Riita, namshiq khum na Asii Wenyi sitlaq jiila, akha miraq. Ümriiti khum niiwa Khristo Wenyi ka ahü, kriiti ka Jesuq rii ka riimak.

¹⁰ Shatmaq, Khristo ka namkhum na sitlaq jiika, Asii Wenyi ka namshiq tsitsü raütu she. Ara jamkhano chongtiikang ngukla, namshiq ka Shiikeawe rai wehea she tiija wanto. Raüta, ajam jong niishe tiidii wanto. Namshiq han-ngam pum riiwe kla, ngarai han-ngam phu kha maq, atsai mirwan.

¹¹ Riita, ara chong tiikai arai mren, Shiikeawe Asii Wenyi, Jesuq ka amaa wa tiidong wanti we kra, namshiq khum na sitlaq jiika, Shiikeawe apaiq riisii hali, Khristo ka amaa wa tiidong wantaq kiikhiisii, namshiq han-ngam ariim kai chang kiimiimin, tsitsü rilung she mithü kuq wan. Arka namshiq khum na Shiikeawe Asii Wenyi sitlaq kra ningkun lümaq mikuq wan.

¹² Riita, ara chong tiikang thun arkha miishe, i phu inotiim lei, ümchaü sanha, nashiq ka Shiikeawe Asii Wenyi raq jamkho shunshea tlaq, kra phan phan singa raa dongdii. Nashiq han-ngam tiima tsantsii raq thaü tlaq, kra phanphan ka singa raa mak she.

¹³ Ara jamkhano chong tiikang ngukla, namshiq rilung ka, han-ngam tiima tsantsii raq jamkho thaü tlaq, kra phanphan la shongnga han jiila, namshiq ka kamto mitsai han ngushat. Shatmaq, namshiq khum na ngarai jaqsham thun ümchuwa sitlaq kra, namshiq khum na Asii Wenyi sitlaq kra ningkun maq, wiita thumthum, tsatbaiq wan han jiila, namshiq ka atra misi han ngushat.

¹⁴ Shiikeawe wokhong na siraüta, Asii Wenyi raq shunshea wantlaq kra phanphan shongnga wanti thun kriika Shiikeawe setiim ngushat.

¹⁵ Ara jamkhano chongtiikang ngukla, Shiikeawe raq namshiq ma, Asii Wenyi kuq wantaq, kriiraq namshiq ka disetiim ma tiija raüta, shiinüm sha wan mak. Kiimaq namshiq ka tiihai miichhai, siakaq mak. Kra rii na, Asii Wenyi raq namshiq ka, Shiikeawe setiim miishe tiijatlo. Krai mren, nashiq tarü raq, Asii Wenyi ningkun maq, Shiikeawe nangnga, “I We loi! Nawe loi!” nguta riibom lot tiikai she.

¹⁶ Shiikeawe Asii Wenyi ka, nashiq tsaiji rai pumshi hanshi tiipum raütiishe, nashiq arka Shiikeawe setiim she dea, nguta rairai riirii maq hakhi kuq tlo.

¹⁷ Riita, ija, ümchaü sanha, nashiq ka asetiim she jawan kai kha maq, Shiikeawe apaiq raq, aphan amaq she nguta asengi miitu, achu shiiman ümtin khan wa rüm tlaq, kra thun ka wiita milap wan dam rong i. Kiimaq nashiq riika, Shiikeawe apaiq raq Khristo miitu, ümchuwa achu shiiman rüm tlaq, kra wiimin milap wan dam rong i. Riita arka, nashiq raq Khristo chamchao wantaq homa kra, jamkho riisha howan dam tiikai, kra tinkhan, nashiq raq apaiq achhai anyii khushü ngao kriimin, milap wan dam rong i.

Nashiq Khushü Ka Pinthum Ajong Miraq

¹⁸ Ngi raq chechiip wan lata sap wan tiikang, ara ümchaü pat na nashiq chamchao litkot wan tiikai arka, Shiikeawe raq rawiichii ji na, nashiq ma achhai anyii khushü ajong, tiichhi kuq wan tlaq, kiimaq nashiq ma kra kuq wan tlaq, kra rai saq thapthi wan chang ka riimak.

¹⁹ Shiikeawe raq phanrap ümchuwa phansang wantaq thun wiitarü raq, maklii khamthii maq, Shiikeawe raq asetiim thun kra tiichhi kuq wan tlo haü jiilei nguta, kai athei ange khe wan tlo.

²⁰ Arka, Shiikeawe raq ümchuwa phansang wantaq, kra raq tsangshiq ka jamlai miitu aphansang wan wa, kra riikhaqli thin wan mak miili she, thiihü miili she sumphaq wanto. Kriika tsangshiq maiqmii raq arit wan ka riimak. Shatmaq, Shiikeawe raq jamkho thapthi wantlaq, kra phanphan hongtha wanto. Kiikha sumphaq wantli jiimin, tsaiji riichoro wan chang lam lu kla, ümchaü min asi.

²¹ Shiikeawe raq phanrap ümchuwa phansang wantaq thun kunli raq, ranaiqshi shi akhing na, tsangshiq khum ka, arüm wan chang nai anam kai chang thiikho mong na ashaq baiq wan kiiwa, wiita adaa mirwan. Raüta, tsangshiq riimin, Shiikeawe setiim ma, achhai anyii wasetiim rilung achu shiiman pheakuq wantlaq, kra thun kra mirsha lap wan dam.

²² Ara jamkhano chongtiikang ngukla, nashiq raq asap i. Ümchaü pat na saüli, Shiikeawe raq aphansang wan thun kunli raq, nowüchhi tsi hannyi rai tlaq ikha, kra ariim kai chang thiikho mong wa, dong wan tlo hai jiilei nguta hannyi rai tlo.

²³ Shatmaq, ara ahut ahü wan trang la, hannyi rai wan tlaq arka, ara ra nai hiq phansang wantaq thun kra lamlamli ka riimak. Nashiq ara, Shiikeawe raq nashiq ma, Asii Wenyi ka pü tlo tsam nye sia wan ikha, nashiq ma kongphiq ka ake wan kun she taü maq dongdii min, nashiq tsan nai mong maq, ahan anyi watrang li sirai wan tiikai. Ara hannyi rai wan tiikai arka, Shiikeawe raq nashiq ara ümtincho she wa, asetiim ma mitiija wan nya, raüta nashiq khum thun ara, ara ariimkai chang thiikho mong arwa, daa wan tlo jiiq nya nguta, khewan lam maq thenge wan laita, hannyi rai wan tiikai.

²⁴ Nashiq ka, ara ran tsantsii thü wan tiikai ara lümaq, tiichhii kuq wanto. Shatmaq, nashiq raq, jamlai miitu wa ran tsantsii thü tiikai, kriika na mak maq rashra she chhi hai jiika, ran tsantsii thü wan ka riimak she miraq. Mak maq jamlai wa rashra chhi lot tiikai, kra miitu ka aran phan wan chang ngutiimin sha misi. Kriika namak mri rashra kata.

²⁵ Shatmiitiq, nashiq raq na mak maq, jamlai phan wa chhi mai sitlaq, kra phan kra miitu, nashiq raq ran tsantsii thü wan tiikai. Ara ran tsantsii thü wan tiikai arka, mongngam maq milap wan rong i she dongdii nguta, tsan tiibum laita khewan tiikai.

²⁶ Kra niq riri sii hali, Asii Wenyi raq nashiq ningkun ajom sirai tiikai kra chhi raüta, nashiq ara thüda kuq wan wan maq, khrum kuq wan tlo. Nashiq riika, jamkha achü jaü wan chang wa, kiimin tsin hon mai miili sirai tiikai. Kriikha maq, Asii Wenyi riili, Shiikeawe man na, nashiq miitu, maiqse bomtsi maq chong lot mai chang bomtsi maq, ahan anyi ikha achu jaükuq tlo.

²⁷ Krai mren, nashiq tiima tsantsii wiita khonti we, Shiikeawe riimin, Asii Wenyi raq nashiq miitu jamlai wa achu jaükuqtlaq, kriika asap. Ara jamkhano chongtiikai ngukla, Asii Wenyi raq Shiikeawe sengi miitu, achu jaükuqtlaq kriika, Shiikeawe raq jamkho thimi tlaq kra, tiiphan phan li achu jaükuqtlo.

²⁸ Nashiq raq asap i, Shiikeawe lungwii wanti maiqse ümchuwa siwa tlaq, kriiti miitu ka, apaiq raq phanrap phanrii na, ahea miituli klo wan tlo. Arka Shiikeawe apaiq raq, maiqse ümchuwa, apaiq raq jamlai phan wa thapthi wantaq, kra tiikupi wan miitu, hea wantiiti thun kra miitu chongtlo.

²⁹ Shiikeawe raq maiqse phong wa ümriiti wa, kongkhu miiphü tsea wantaq, kriiti ka Ase sham sham tiija wan miitu, athiiq raüta pong na rairii thü wanto. Krai mren, Ase ka aphu anotiim pahea siwan tlaq kra phong na, chhikhu pinthum we ma mija wan.

³⁰ Krai mren, Shiikeawe raq ümriiti wa pong na athiiq raüta rairii wantaq, kriiti ka hea wanto. Kiimaq maiqse ümchu wa apaiq raq hea wantaq, kriiti ka apaiq rai wehea ma tiija wanto. Kiimaq apaiq rai wehea ma tiija wantiiti thun miika, apaiq khushü ngao kriimin riisha kuq wanto.

Shiikeawe Mangchan Jesuq Lümaq Tiichhitlo

³¹ Riita, arthun chong wan kai arthaq na seng laita, nashiq raq jamlai she wa mingu rong i? Nashiq raq ong wan tiikai arka achong lot mai pahea she sitlo! Shiikeawe ri nashiq rai she jiika, nashiq ngeng wanti ka jushe wa misi? Ahü she!

³² Shiikeawe apaiq riili, Ase shaq santla, tiihang mak maq, nashiq tarü miitu honglu na kuqtaq! Apaiq raq nashiq ma, Ase santla kuqtaq, ikhiijiika, apaiq raq nashiq ma laihin ümchuwa raa wan tlaq, kriitiq sha phe maq kuq mak miraq?

³³ Shiikeawe riishe, asengi ma nguta atsea wan kun she sitlaq kriika, ajiq nguta jurshe wa mishra wan lot? Shiikeawe apaiq riishe, tsangshiq dü na, kha ahü she nguta, kha aphoke wan wishe!

³⁴ Riita, tsangshiq shra wanti ka jushe wa sitla? Ahü she! Ümchaü ka jumin ahü she. Nashiq khupi ma tsaiti we, raüta amaa wa dong wanti we, Jesuq Khristo ka ümchaü sanha, Shiikeawe rai adam na, Shiikeawe ngatlaq kiijaq, jaqtsi nü na nga raüta, Shiikeawe man na, nashiq ara tiikhup wongke miitu, kiimwe ma jatlo!

³⁵ Riita, ara chongtiikai, Khristo mangchan wokhong mong wa, nashiq ka jurwa mitriiphea wan lot? Nashiq ka chamchao ranaiq akhing riilo, alit akot riilo, maiq raq ngeng seng wan tlaq kra riilo, song aram tsi riilo, miitsan miijan riilo, haisi rasong riilo, kiimaq tsaimiq khusiq saü wan ranaiq riilo, nashiq ka Khristo mangchan wokhong mong wa, mitiitsü ngii lot sha?

³⁶ Asii bomtsi na akha nguta chongtlo: “Namshiq khum tiikhup wongke miitu, naishiq arka wranaiqshe, maiqse raq atsea ata wan ma tiiphiip jiip wan tlo. Naishiq arka skuse kong ataaphaq ma khaban je ikha, maiqse raq tiichamchao wan tlo.”

³⁷ Shatmaq, arthun chong kai chamchao litkot wa nai kham arthun arka, nashiq raq, nashiq mangchan wanti we lümaq, kunkun atang wan kun she!

³⁸ Ümchaü sanha, ngi raq kunli asapha, nashiq ka apaiq mangchan wokhong mong wa, jamlai phan ningkun riimin, triiphea baiq lot mak she. Nashiq ka atra sikai lo, kiimaq amaa sikai lo, apaiq mangchan wokhong mong niili she misi rong i. Rasetiim riilo, kiimaq ra na siti ra rümti riilo, kiimaq ramungtan na sitlaq ningkun ahin kra riilo, nashiq arka apaiq mangchan wokhong wa, triiphea lot mak she. Kiimahali, ümchaü pat na jamlai phan mra wa pin tlaq, kiimaq rawiichii ji na jamlai phan mrong mra wa pin wan jiiq, kra thun riimin, nashiq ka apaiq mangchan wokhong mong wa triiphea baiq lot mak.

³⁹ Kiimaq, nashiq khu thaq na, rawang win mong na ümchuwa mung sitlaq kra riimin, kiimaq nashiq takiq na, mung ümchuwa sitlaq kra riimin, Shiikeawe raq phanrap phanrii ümtinkhan wa phansang wantaq thun kriijaq siti ningkun thun raq, nashiq arka, nashiq Tati Khristo Jesuq lümaq Shiikeawe raq mangchan tlaq ara wokhong mong wiika, triiphea lot mak she.