Romans 7 - ASII LAKDAP Bible (BSI)

Maiq Riilam Thungtri

¹ Riita, phunainotiim, ümchaü ngi raq namshiq ma, jamlai bomtsi chongkeho wa dan tiikang, kriika namshiq riimin la asap han she. Ara jamkhano chongtiikang ngukla, namshiq tarü raq, thung alai ka kunli asap han she. Maiqse ngutlaq kriika, atra sitlaq liipan niili, Thungtri wokhong na sitlo. Alang pitkai jai she ka, thungtri raü tu raq, amaati kriika khalot mak she.

² Akhiisii hali, maiq ma waje jechak nyungshi sitlaq kriika, awese rai maiqlam thungtri wokhong na, ata-nyung ashi jamkha sichang wa kiikha siwan raa tlo. Atawe atra siruq wiiwii ka, maiqlam tri wokhong na sichang. Shatmaq, awese tsaikai jai she riiwe kla, apaiq ka kra tri mong wa adongho milot.

³ Kra ngutiikai arka, apaiq ka tsangwe atra sishat na, maiq ahinti rai sraki raü jiika, apaiq raq sumrai kha tangto nguta mingu. Shatmaq, awese tsai kai jai she, apaiq ka maiq wenye miishe wawan nong raü la, apaiq raq sumrai kha tangto ngutiika ngulot mai she. Maiqlam tri raq apaiq ka kharuq khalot mak.

⁴ Phunainotiim lei, ara chongtiikang tri bomtsi ara niq riri, namshiq kiimin sitlan. Thungtri nai namshiq liipan niika, lamphan railo ka atiipan kai kun she. Namshiq ka Thungtri kharü mong wa atsai kai wishe. Jamkhano ngukla, namshiq ka Jesuq Khristo khum sitlaq kra, pan athiq she sitlan. Kiimaq ümchaü namshiq ka amaa wa tiidong wantaq we kra rii ngutiishe sitlan. Arka, ümchaü sanha, nashiq tarü ka Shiikeawe kriili she shomnoq laita siwan miitu atra sitiikai.

⁵ Man na ji na, nashiq ka maiqse ngarai han-ngam phara rilung lamphan wan laitli siwan kai. Kra akhing na, nashiq khum na ngarai tsantsii sükha wa sitlaq kriika, Thungtri raq tiishai chaq wan tlaq ihata. Raüta, nashiq khum na, ngarai jaqsham wantlaq ihata. Krai mren, nashiq ka atsai kai lam nü niili shea wan raüta, tsai wan kai ihata.

⁶ Shatmaq, ümchaü riiwe kla, nashiq ka Thungtri kharü mong wiika daa wanto she. Thungri disetiim ma jawan laita siwan kai rilung irka, tsaiki kaishe. Thungtri raq man na, nashiq ka akharü maq kha raüta, rüm wanto. Ümchaü sanha, thungtri raq aming kuq tlaq, kra phan phan, Shiikeawe ka shomnoq mai she. Shatmaq, Asii Wenyi raq lam anye tankuq wantaq, kra lam phan phan she, shongnga tiikai.

Thungtri Raq Ngarai Na Tiishontlo

⁷ Riita, ikhiijiika ümchaü sanha, Thungtri kriika ngarai tu kaü dea ngutiishe sha mingu rong i? Riimak, kiikha kla riimak! Shatmaq, ngi ma ngarai ka jamlai nang wa ngutla, kra bomtsi kra tru chongketi ka Thungtri raq chongkuqto. Thungtri raq, “Maiqhuk maiqsam ma naq sü ramkiq,” nguta, ngi ma aming kuq mak ngu raü jiika, ngi raq sükha tsii ka jamlai ngo nang wa kra, sap mang mirha wa.

⁸ Shatmiitiq, thungtri raq aming athü wan kra sikai kha miishe, ngarai raq i pumsii miitu, phanrap phanrii kra, ngi riili siisaq lap ha jiilei nguta, i tsan mong na, sükha tsii ka tiinyai chaq wanto. Thungtri aming kra ahü ngu raü ka, ngarai ningkun tu kriika amaa.

⁹ Man na akhing ashi na, ngi ka thungtri aming sapmang maq, atra siwan kang. Shatmaq, ümtiikiiwa thungtri raq akuq aming kra, i khu thaq niishe saü wantaq, kra akhing miishe, ngarai ka i khum wa, ashai she riiwanto.

¹⁰ Raüta, ngi ka atsai she riikang. Kiimaq, ngi ara atra maq siwan miitu akuq wan, thungtri aming kra raq khoti, ngi arma, tsailam kilü kra khoti dikuq wanto.

¹¹ Akha, ngarai raq ngi ara laophaq wan miitu, thungtri aming lümaq, lamlu hum wanto. Raüta, ngi ka tsat baiq wanto.

¹² Riita, ija, ara chong tiikai arai mren, Shiikeawe raq akuq Thungtri raütu riiwe kla asii dea na. Kiimaq thungtri raq akuq aming thun kiimin asii. Kiimaq tingting. Kiimaq ahea athuk atsom nguta sitlo.

¹³ Kiikha shatmiitiq, ara jamlai phan wa ahea awa phan nguta thü wan tlaq, kra riika, ngi arka jamkho tsatbaiq wan phiita? Kiikha kla riimak! Ngi arka ngarai raq tiina tsatbaiq wantaq. Ngarai riika, jamlai wa ahea phan nguta sitlaq, kra lümaq ngi ara tsatbaiq wanto. Kriika, riikhaqli ngarai rong arai kra tiichhike wan miitu she riito. Kiimaq ara Thungtri aming thun ara lümaq, ngarai ningkun tu heng sitlaq kriika, aheng thaq niimin henghea, bihea sitlo nguta, kra tiichhi kuqtlo.

Maiqse Tsantsii Na Tatso Sitlo

¹⁴ Nashiq raq asap i, Thungtri sitlaq kriika nashiq tsaiji rilung ara asii lam na shunshea wan miitu akuq. Shatmaq, ngi arka han-ngam na siti maiqse, ranaiq shishi ka atsai kaiti we sitiikang. Ngarai jaqkhon mong na, ngarai di miitu asha phaq baiq wishe.

¹⁵ Ngi raq jamlai phan wa, sham tiikang, kriika ngi raq dongdii min sapmang lam miili sham rat wan tiikang. Ara jamkhano chongtiikang ngukla, ngi raq jamlai phan sham wan chang wa, kra riiwe ka sham wan mang riiraü, ngi raq jamlai phan wa, abi nguta shulii tiikang, kra phan kra khoti, lamlam ashamki kap shamrat tiikang.

¹⁶ Riita, ija ngi raq jamlai phan wa shamro mang, kra phan riiwe ka lamlam asham kikap sham tiikang jiika, ara wiili she dea, Thungtri raq chong tlaq arka ka tengteng dea riishatmaq, maiqse raq riiwe lang wan lot mai kha ana, ngutiishe tri ka tak wan tiikang.

¹⁷ Riita, riikhaqli maq liiwan raü jiila, arthun abi jaqsham wanti we arka, ngi dongdii we kla riimang. Arka, i tsan mong na ngarai tsii sitlaq, kriiraq sham rat tlo.

¹⁸ Ngi raq asapha, ngi raq i han-ngam ningkun miika, ahea awa phan jaqsham kriika, sham wan lot mang. Ara jamkhano chongtiikang ngukla, i tsan mong na, ahea awa phan jaqsham kriidea sham hajaq, ngutiika tiima tiikang dea na. Shatmiitiq, ngi raq kra i jaq miishe, ara sham la ngutiishe tiima tiikang niika, sham lot mang she riiki tiikang.

¹⁹ Ngi raq jamlai wa, ahea awa phan jaqsham kra shamlam la nguta, dan tiikang, kriika sham wan lot mang riiki tiikang. Shatmiitiq, kra rii na khoti miina, ngi raq jamlai phan wa, abi shamro mang nguta, tiima tiikang, kra phan riiwe kra khoti, lamlam ashamki kap sham tiikang.

²⁰ Riita, ikhiijiika, ngi raq jamlai phan wa, abi shamro mang nguta tiima tiikang phan, kra riiwe khoti lamlam, ashamki kap sham tiikang jiika, arka ngi raq asham wan ha ka riimak she. Ara jaqsham wanti we ka, i khum na ngarai bu sitlaq kriiraq shamtlo.

²¹ Riita, ara chong tiikang arai mren, ngi raq ara bomtsi ashi ara sap tiikang. I han-ngam phara tsantsii sükha ningkun raq, i mong jii na jaqsham wan tlo. Arkha maq, ngi raq ümtinkhan wa, ahea awa phan jaq dea sham hajaq nguta, tiima kang la, abi phan jaqsham kra khoti tiisham kiki li she riirai tlo.

²² I tsan i mong jii riika, Shiikeawe thungtri kra lang la tiidea siha jaq nguta, lungwii siq tlo.

²³ Shatmiitiq, ngi raq chhi tiikang, ara i khum na phanhin thungtri kiimin asi hali. Ara thungtri riika, i tsai i ji raq, jamlai phan wa ahea, nguta lungwii tlaq, kriika akhii riiwan tlo. Ara thungtri raq, ngi ka ngarai tri, i khum na atra sitlaq kra kharü maq kha raüta, dise ma tiija raüta, rümtlo.

²⁴ Arningkhan tiina, ngi arka pinthum chochi rilung ahü we, kiimhü pinthum we! Riita, ngi arka, ara atsai lam nü na hitho tlaq arwa, jurshe wa mitiichhii kuq nya?

²⁵ Shiikeawe miili kechutum ke chang jonghea sitlo! Apaiq raq nashiq Tati Jesuq Khristo lümaq, ara chong tiikai kharü mong arwa tiichhii kuq tlo! Riita, ara chong tiikang i rilung kharü arka, arshe: Ngi raq, Shiikeawe thungtri kriika, arka ahea awa phan dea nguta, han-ngam tiima niili thü wan lot tiikang. Riikhaqli ka lang wan lot mang. Shatmaq, ara i han-ngam khum sitlaq ara riiwe arkla, ngarai dise ma ja raütli dea sitlo.