Romans 6 - ASII LAKDAP Bible (BSI)

Jesuq Khristo Lümaq Nashiq Atra Sitiikai

¹ Riita ikhiijiika, nashiq raq jamlai she wa mingu rong i? Shiikeawe raq apaiq ramkhap ka, apapa tiishowo raüta, nashiq ma ram mitiibok kuq laq nguta, nashiq raq ngarai ka apapa tang wan wan, laita sha misi rong i?

² Kriika ümtiikiimin riimak! Nashiq ka ngarai lamphan na atsai kai kun she. Tsaiki kai she ningkhan, tiithong kiki ka, jamkho ngarai mong niili misi nong rong i?

³ Arka namshiq tarü raq samhea wiq asap han she. Ümra ranaiq wa nashiq raq, Jesuq mang na kham lam wan kai, kra ranaiq na, nashiq ka Jesuq rai pumshi tiipum wan dam laita, kham lam wankai. Kiimaq krai mren, nashiq ka apaiq pum na sam wan dam laita tsai wan damkai.

⁴ Kiimaq nashiq raq khamlam wankai kra lümaq, nashiq ka apaiq rai khoshi na lap wan damto. Raüta apaiq pum na tsai wan dam kai she. Ara tsai wan dam kai arka, Khristo ka achhai anyii Awe ningkun maq amaa wa jamkho tiidong wantaq kiikhiisii hali nashiq riimin rilung anye she lap wan laita siwan miitu tsaidam kai.

⁵ Riita, ija, nashiq ka apaiq rai pumshi maq tsai wan dam kai krai mren, apaiq ka jamkhiiwa amaa wa tiidong wantaq, kiikhiisii hali, nashiq armin amaa wa mitiidong wan nong.

⁶ Kiimaq ümchaü sanha, nashiq raq asap i, nashiq khum wa ngarai rilung achü ka, Khristo rai adam na pumsongkham na atübaiq wan wishe. Raüta atsaikai kun she. Kriika nashiq han wa ngarai khum kra, shiithen baiq miitu tiiq baiq wanto. Krai mren, nashiq ka ngarai dise miika jawan raa mak she.

⁷ Ara jamkhano akha chong tiikai ngukla, maiqse lang pitkai jai she ka, ngarai kharü raq, amaa khum kriika khalot mak she. Apaiq ka ngarai kharü mong wa adong wan kun she. Krai mren, apaiq ka wase miishe jaki tlo.

⁸ Riita, nashiq ka Khristo rai adam na tsai wan damkai she krai mren, nashiq min, apaiq rai misi wan dam rong i she dea nguta, kam laita sitiikai.

⁹ Ara jamkhano akha chong tiikai ngukla, nashiq raq asap i, Khristo ka amaa wa tiidong wanto she. Krai mren, apaiq ka ümtiikiimin tsai mak she. Atsai ningkun raq, apaiq ka ümchaü jamsha wanlot mak she.

¹⁰ Riita, ara chong tiikai, apaiq ka tsai wanto she. Kriikha maq, ngarai ningkun raq, apaiq ka ümchaü jamsha wanlot mak she. Riita, ümchaü apaiq atra she sitlaq rilung arka, Shiikeawe rai kongshi miishe sitlo.

¹¹ Ara chongtiikai akhiisii hali, ümchaü sanha, namshiq riimin, namshiq ka ngarai lamphan niika, atsai kaikun she nguta sap chang. Ngarai raq namshiq ka jamsha wanlot mak she, nguta sap chang. Shatmaq, ümchaü sanha, namshiq ka Jesuq Khristo lümaq, Shiikeawe rai kongshi miishe atra sitlan.

¹² Krai mren, ümchaü sanha, namshiq ka chongwa hanho ngarai sükha ramho jaqkhon mong niika, naq si rongkiq she. Ngarai han-ngam khum, hiqda ma jakai chang, kra miika naq tiijam sha rongkiq she.

¹³ Kiimaq, ümchaü sanha, namkhum wa ano ani phushi ra kra dongdii min, ngarai jaqkhon na, abi jaqshi ma tiija miitu ka, like maimak she. Kra rii na, Shiikeawe asii jaqsham kra miitu, namkhum ka amaa wa atiidong wan maiqse sitlaq ikha, wiipumtam maq, Shiikeawe miishe kiinong kuq lanta, si ronglaq.

¹⁴ Ümchaü sanha, namshiq raq ngarai ka namtijong we ma tiija wan raa mak she. Ümchaü, namshiq ka thungtri jaqkhon mong niika siman she. Shatmaq, Shiikeawe kaphap mangchan wokhong mong niishe sitlan.

Nashiq Ka Tingting Jaqsham Disetiim

¹⁵ Riita, ümchaü ka nashiq raq jamlai riichong chang she wiita? Ümchaü sanha, nashiq ri thungtri wokhong na simai she, shatmaq, Shiikeawe kaphap mangchan wokhong niishe sitiikai ngo kha maq, nashiq riika ngarai sha mitang rong i? Riimak! Kiikhiika ümtiikiimin riimak.

¹⁶ Namshiq raq asap han. Namshiq raq maiqtijong la howan han jiila, namshiq ka namtijong we kra puk niishe shang wan lan ngushat she. Namshiq ka namtijong we disetiim ngutiishe sitlan. Riita ngarai tijong la howan han jiila, tsailam mirhum han. Kiimaq Shiikeawe tijong hohan jiila, Shiikeawe raq namshiq ka kechu maiqsetiim nguta, apaiq rai wehea miishe mitiija wan. Raüta ajam na mitiidii wan.

¹⁷ Shatmaq nashiq raq Shiikeawe ma kechutum chang jonghea sitlo! Akhing ashi na, namshiq ka namshiq tsan na ngarai tsii raq jaü tlaq, kra bom tai lanta, ngarai disetiim ma jawan lanta silan. Shatmaq, ümchaü sanha, namshiq raq tsan atsii kunli kiinong kuq lanta, namshiq ma achongkuq tengteng bomtsi kra lang tlan.

¹⁸ Ümchaü, namshiq ka ngarai kharü mong wa daa wanto she. Raüta, athuk atsom jaqsham wanti, Shiikeawe disetiim miishe tiija wanto.

¹⁹ (Namshiq han-ngam ningkun ajom kha maq, namshiq raq i bom chong ara taktsü man riijiiq ngo maq, ngi raq joli bomtsi, maiqse rilung na ranaiqtek chhi wan tiikai, kra bomtsi maq shiiton kuq lata chongkuq tiikang.) Man na lea wan lan akhing na, namshiq raq namshiq khum ka wiipumtam maq, sethoq sepii ja, ashe ashi tiima tsantsii nai abi pinthum tsantsii wokhong na kiinong kuq wan lanta, kra abi tiima disetiim ma ja lanta, abi jaqsham lanta siwan lan ihata. Krai mren sii hali, ümchaü sanha, namshiq raq maiqmii khum ka, wiipumtam maq, asii minshiiq wan miitu li she, ating arai jaqsham wanti disetiim ma tiija wan raa tlo.

²⁰ Man na ji na, namshiq ka ngarai disetiim ma ja lanta sitlan akhing niika, Shiikeawe raq lungwii tlaq, tingting rilung jaqsham kriika, namshiq ma hiqtili ikhli riito. Namshiq raq kra thun jaqsham ka, akhiismin brorii wan chang ahüli riito.

²¹ Riita, man na ji na, namshiq raq ngarai minshiiq wan lan kra miitu, ümchaü ka ajiasi she riitlan. Riita kriiwa namshiq ma jamlai phan amet wa lap lan? Kra thun jaqsham wan lan, kra tsingo ka namshiq ma, atsai lam siisaqli tankuq wanto!

²² Shatmaq, ümchaü sanha, namshiq ka ngarai kharü mong wa ada wan kun she. Ümchaü sanha, namshiq ka, Shiikeawe disetiim she. Krai mren, namkhum ka ngamrea phu akuq ikha, Shiikeawe ma, namrilung ka kiinong kuq lan krai mren, namshiq rilung ka ümchaü asii she. Riita, akha sitlan ara tsingo ka, namshiq raq pattup pat-sa rilung she lap tlan.

²³ Ara jamkhano chong tiikang ngukla, ngarai tang wanti riika, atsai lam humtlo. Shatmaq, Shiikeawe riika maiqse ma, nashiq Tati Khristo Jesuq lümaq phemaq, pattup pat-sa rilung kuqtlo.