Romans 5 - ASII LAKDAP Bible (BSI)

Nashiq Ka Shiikeawe Rai Wehea She

¹ Riita ümchaü nashiq ka Shiikeawe raq wehea she nguta ajam na tiidü wanto she. Arka nashiq raq apaiq ma kamtsantsii thü wan tiikai kra lümaq wehea tiija wanto. Krai mren, nashiq ka Jesuq Khristo lümaq Shiikeawe rai ari aram miishe sitiikai.

² Apaiq raq nashiq ka, nashiq kamtsantsii maq, ara Shiikeawe kaphap mangchan wura khong niishe tiishang kuq wanto. Ümchaü nashiq ka apaiq wokhong mong niishe sitiikai. Krai mren, nashiq riimin Shiikeawe chhainyii rilung kiimin mirsha lap wan rong i she nguta, tiishom raa tiikai!

³ Nashiq riika nashiq chamchao tiikai ara miitu min, tiishom ra tiikai. Ara jamkhano ngukla, nashiq raq asap i, chamchao walü riika, anin wan ningkun ka ache miishe mitiija wan.

⁴ Ache miishe jawan tlaq kra riika Shiikeawe raq ahea dea nguta mishreng wan. Kiimaq apaiq riishe, ahea nguta thi wantaq miiphat ka, nashiq ma aran chang asi she.

⁵ Riita ara ranphan tsii rüm tiikai ara riika nashiq ma tsiim tiijü mak she. Jamkhano ngukla, Shiikeawe raq apaiq mangchan tsii ka Asii Wenyi lümaq, nashiq tsan nai mongjii na araüke wan kun she. Ara raükuq wantaq Asii Wenyi arka, nashiq ma Shiikeawe apaiq raq akuq wan.

⁶ Arka akha jamkhano chong tiikai ngukla, nashiq ka tsaija chhunja ngila ngu raü chamchao rai tiikai bala shon niili, Khristo ka Shiikeawe raq rahiq tiihongtaq akhing bala riikhaqli na, nashiq akhnok abi ngarai maiqse, ara khupi wan miitu tsaito.

⁷ Kechu maiqse ashi sitlaq kra khupi miitu, maiq ahinti weshi ra raq ngi ka apaiq khupi ma mitsaiha nguta kiqkham wanli chap wan miika ajese ka riimak. Kra thaq na kaü raüta hali, maiqshaq weshi sitlaq kriiwe ka khupi wan miitu ngi mitsaiha nguta chap wanti maiq ka hum wan lot mai.

⁸ Shatmaq, Shiikeawe raq, nashiq ka ümtinkhan tsaü mo mangchan wantlaq, kra nashiq ma tiichhikuq wanto she. Arka apaiq raq, nashiq ka ngarai kharü mong na chamchao rai tiikai kriiwa, Khristo ka nashiq khupi miitu tiiki raüta tsaitaq, kra lümaq tiichhikuq wanto she!

⁹ Apaiq tsai wantaq kra lümaq, ümchaü nashiq ka wehea she nguta, Shiikeawe jam na tiidü wanto she. Ikhiijiika, ümtinkhan she wa apaiq raq, nashiq ka phangthum khapho ranaiq, Shiikeawe tsankhiq walü mong kiiwa mitiichhii kuq wan nong riila!

¹⁰ Akhing ashi na, nashiq ka Shiikeawe ma wesang ralii kong siwan kai. Shatmaq, apaiq raq nashiq ka Ase tsaitaq kra lümaq, ümchaü sanha apaiq khi alubi miishe tiija wanto. Riita, ikhiijiila, ümchaü sanha, nashiq khum na Khristo rilung sitlaq kriiraq tiichhii kuq wan lili raüta, nashiq ka ümtinkhan ajong alu ma tiija wan chang she wa sitla riila nya!

¹¹ Riita ara chong tiikai ara lamlam siili ka riimak. Arthaq niimin apa dea asi shaqli. Nashiq raq khoqriiq wan chang lamlu ka jonghea dea asi. Arka Shiikeawe raq Tati Jesuq Khristo pum lümaq, nashiq ka Shiikeawe khi alu bi miishe tiija kuq wantaq arkha maq khoqriiq siq tiikai.

Atam Nai Khristo Rilung Triingea Bom

¹² Ngarai ka ara mangjong hiq na maiq weshi lümaq li saükito. Kiimaq apaiq ngarai riili maiqse ma tsailam kli tan kuq wanto. Ara ningkhan, tsailam pi da raq mangjong maiqse kunli she nyam wanto. Ara jamkhano nyam wanta ngukla, maiqse angu tarü raq ngarai tang wanto.

¹³ Ara mangjong hiq na Mosheq ma Thungtri mikuq shaq niiphü dongdii, maiqse raq ngarai ka tang wanto. Shatmaq, ümriibaniiwa thungtri ahü, kiijiika ngarai raüpot paq thü chang min ahü.

¹⁴ Shatmaq, Atam pat maq pha raüta Mosheq pat na saüli, tsailam kharü riili, mangjong maiqse thun ka jamsha wanto. Atam raq jamkhiiwa Shiikeawe aming jin wantaq, kiikha ngarai tang wan maktibi thun kiimin, maiqse ngutaq miiphat, tsailam raq jamsha wanto. Atam ka jai na saüho tlaq we sham ari kra tiijishi wan süriiho kito.

¹⁵ Shatmaq, kra tsangnai wenai ka shamshi ngamshi ka riimak. Ara jamkhano akha chongtiikai ngukla, Shiikeawe raq phe maq akuq kongphiq ka, Atam ngarai kiikha ka riimak. Bomtsi ka tengto. Maiq weshi raq ngarai tang raüta, kra ngarai lümaq, maiq angu pahea raq tsailam humto. Shatmaq, Shiikeawe ramkhap mangchan ningkun ka, ngarai thaq na ajong pinthum. Riita, ara chongtiikai ramkhap mangchan arka, Shiikeawe raq maiqse angu pahea ma, maiq weshi Jesuq Khristo pum lümaq, asho awo she kuq wantlo.

¹⁶ Kiimaq ara Shiikeawe kongphiq nai maiqwe ashi ngarai liipan na, arai arii wan chang bomtsi ka jonghea asi. Atam raq ngarai tangjai na, “Ümniika ajiq we she,” nguta kha ka phokuq wanto. Shatmaq, maiqse raq pahea ngarai tang wan jai na, Shiikeawe raq tsangshiq ma, tsangshiq raq lap wan thek mak chang, mangchan jonghea kongphiq raütu khakuq wantaq kra lümiishe, “Ümngarai ka khoito she!” nguta kha ka phokuq wanto.

¹⁷ Riita, bomchong ka tengto. Maiq weshi Atam raq ngarai ka tangto. Raüta tsailam kilü ka tan wanto. Krai mren, atsai ningkun raq maiqse angu kunli ka jamsha wanto. Shatmaq, kra thaq na kaü raüta, ajong ahea pinthum ka, maiq weshi Jesuq Khristo pum lümaq kilü jonghea ashi she dikuq wanto. Kriika nü maq achong lot mai chang, jonghea pinthum she riito! Maiqse ümchu riiwa, Shiikeawe raq akuq wan, apaiq ramkhap wa asho awo achu shiiman kra lap wantaq, raüta Shiikeawe raq phe maq tsangshiq ka, apaiq rai wehea she nguta, ajam na tiidii wantaq, kriiti thun raq Jesuq Khristo pum lümaq, tsangshiq rilung na phanrap tang wan ruq raüta, srea nola rilung she misi wan.

¹⁸ Riita ara chong tiikai arai mren, maiq weshi ngarai lü maq mangjong maiqse kunli ka ngarai mong na tiidea baiqto. Kra niq riri sii hali, maiq weshi raq kechu jaqsham, lakshi shamkuq wan raüta, kra lümaq, mangjong maiqse kunli ka, kharü mong wa, kha thumto she nguta daakuq wanto. Raüta, tsangshiq ma rilung tsitsü she kuq wan tlo.

¹⁹ Kiimaq, maiq weshi Atam raq Shiikeawe bom tlea raüta, kra lümaq mangjong maiqse kunli ka ngarai maiqse ma tiija baiqto. Riita, kra jai tiijo wan hali, maiq weshi Jesuq raq, Shiikeawe bom ka phaqchii nichii maq tai raüta jaqsham wanto. Kra jaqsham wantaq kra lümiishe hali, tsangshiq wiitarü thun ka, Shiikeawe man na kechu maiqsetiim she nguta, tsangshiq ka Shiikeawe rai wehea miishe mitiija kuq wan nong.

²⁰ Riita, Shiikeawe raq Thungtri khakuq wantaq kriika, maiqse raq ngarai ka apapa mitang wan laq nguta ngo maq kuq wanto. Shatmaq, ümriibano ngarai ka pahea tang wan tlaq, kiijiika Shiikeawe kaphap mangchan tsii ka, akao pahea nyam wan wan khoti miraq.

²¹ Riita, ija, ara chong tiikai arai mren, maiqse ka ngarai ningkun raq atsai kharü mong na shaq raüta, jamkho jamsha wantaq, kra jai tiijo she hali, Shiikeawe raq kaphap mangchan jonghea maq, maiqse ka, apaiq rai wehea miishe tiija wantlo. Raüta kechu maiqse she nguta, ajam na tiidii wantlo. Raüta, nashiq ma pattup pat-sa rilung tsitsü raü ka, nashiq Tati Jesuq Khristo pum lümiishe kuqtlo.