Romans 4 - ASII LAKDAP Bible (BSI)

Abraham Kamtsantsii Rilung

¹ Riita ümchaü nashiq raq nashiq nok phan maiqse ma tipai, nati Abraham rilung ka jamlai miishe wa mithap thi rong i? Apaiq ka arilung na Shiikeawe man na jamkho siwanta?

² Apaiq raq thungtri aming ka ahea wiq maq lang wan kha na, Shiikeawe raq apaiq ka kechu maiqse ma tiija wantaq, ngu raü jiiriiwe kla, apaiq raq atiishomra wan chang lam lu min misilo riila. Shatmaq, Shiikeawe man niika, apaiq tiishom raa wan chang lamlu ka jam min ahü.

³ Asii Bomtsi na, “Abraham raq Shiikeawe ma kamwanto. Krai mren, Shiikeawe raq apaiq ka kechu maiqse she nguta, awura miishe tiiham wanto,” nguta chongtlo.

⁴ Jurwa jaqsham tlaq, kriiti miika jaq maq mikuq. Kriika apaiq raq jaq shamtaq, kra ningchang jaq maq kuqtlo. Kriika phe maq akuq kongphiq ngutiika ngu mak. Kriika apaiq raq jaq shamtaq kra miitu ningchang lap wan tlo.

⁵ Shatmaq, jurwa apaiq riika Shiikeawe ma kamwan chang miraq, jaqsham ahea sham wan raüta, Shiikeawe tsan ka tiihea wanlot mak miraq, nguta sap tlaq, raüta Shiikeawe ma kam tlaq, krai mren, apaiq kamtsantsii thü tlaq, kra thaq na seng raüta, Shiikeawe raq apaiq ngarai ka diikuq tlaq, raüta akhu na phumram kham maq bat raüta, apaiq ka kechu maiqse she nguta, awura maq tiiham wan tlaq, raüta apaiq rai wehea she tiija wan tlaq, kriika kamtsantsii thaq seng raüta, kechu maiqse ma tiija wantlo. Apaiq raq Shiikeawe tsan tiihea wanli chang, jaqsham ahea sham raütiika riimak.

⁶ Riita Dawit raq Shomshi lak na Shiikeawe raq maiqse ashi ka apaiq raq thungtri ka ahea wiq tingting maq lang tlo nguta riimak, shatmaq apaiq raq kamtsantsii thü tlaq kriikha na, Shiikeawe raq apaiq wurakhong niishe tiishongnga wan tlaq kriiti ma achong lot mai pinthum chochi jonghea miraq nguta chong tlo. Arka akha chong tlo:

⁷ “Kechu jonghea, ju kha wa Shiikeawe raq aphoke kun she; kechu jonghea, ju ngarai wa Shiikeawe raq adiike kun she!

⁸ Kechu jonghea, ju ngarai wa Tati raq tsan na thü wan mak she!”

⁹ Riita, ara Dawit raq chong tlaq chochi rilung arka, athohanjeti maiqse sitlaq kriiti thun miitu li sha? Riimak, kiikhiika riimak! Arka athohan hüti maiqse sitlaqti rii min. Ara jamkhano akha chongtiikang ngukla, nashiq raq Asii bomtsi na, “Abraham raq Shiikeawe ma kamto. Krai mren, apaiq kamtsantsii thaq na seng raüta, Shiikeawe raq apaiq ka kechu maiqse she nguta ajam na tiidii wanto,” nguta chong tlo.

¹⁰ Riita, ara chongtiikai Shiikeawe raq, apaiq ka kechu maiqse she nguta, ajam na tiidii wantaq akhing ranaiq niika, Abraham raq athohan ka miklo wan shaq akhing niili, rairii wanto. Apaiq raq athohan poi klo jaitiq ka riimak.

¹¹ Apaiq raq athohan ka jai akhing niishetiq klo wanto. Apaiq raq atho hantaq kriika, apaiq raq atho min mihan shaq niili, apaiq raq Shiikeawe ma kamtsantsii thü wantaq, kiijaq seng raüta, Shiikeawe raq apaiq ka, kechu maiqse she nguta, akhu liiqkuq wanto she kiimaq ajam na tiidii wanto she nguta, tiichhike wan miitu she, apaiq raq athohan poi ka klo wanto. Riita, ara chong tiikai arai mren, ümchaü sanha, Abraham ka athohanhüti maiqse, ümchuro Shiikeawe ma kamtlaq, krai mren, tsangshiq raq athohan poi ka lang wan makli jiimin, tsangshiq raq Shiikeawe ma kamwan tlaq, kriijaq seng raüta, Shiikeawe raq tsangshiq ka kechu maiqsetiim she nguta, ajam jong na tiidii wan tlo. Kriiti thun, tarü ma, Abraham ka wenyi rilung na, awejong she jawanto.

¹² Abraham ka, Jehudinok athohan poi lang wan raüta siwanti, kiimaq athohan tri lang tlaq kra thaq niimin, Abraham raq apaiq raq athohan mikloshaq akhing na, Shiikeawe ma jamkho kamwantaq, kiikha Shiikeawe ma kamwantibi thun miimin, Abraham ka awejong she jawanto.

Shiikeawe Kiqkham Kamtsantsii Maq Lapto

¹³ Akhing ashi na Shiikeawe raq, Abraham nai apaiq lai ala phan maiqse ma, ara mangjong hiq arka, tsangshiq rii she mija wan nguta, kiqkham kongphiq raüpot khakuqto. Shiikeawe raq ara kiqkham kongphiq raüpot khakuqtaq arka, Abraham raq Thungtri ka samheawiq maq lang tlo nguta akuq ka riimak. Shatmaq, apaiq raq Shiikeawe ma kamtsantsii thü wantaq, kra thaq na seng raüta, apaiq ka Shiikeawe raq kechu maiqse she nguta, apaiq rai wehea she tiija wanto. Kra ningkhan tiina, apaiq ma kra kongphiq khakuq wantaq kra.

¹⁴ Ara jamkhano akha chong tiikai ngukla, Shiikeawe raq kiqkham kuq wantaq kriika, Thungtri lang wanti ma kuq wantaq ngu haü jiika, maiqse raq Shiikeawe ma kamtsantsii thü wan tlaq kriika, athii arii min ahü lishe mijaki. Kiimaq Shiikeawe kiqkham bomtsi kiimin thiihü lishe mijaki.

¹⁵ Thungtri riika Shiikeawe tsankhiq walü kli tiinyii chaq wan tlo. Shatmaq, thungtri raütu ka ahü ngu raüka, thungtri jin wantlo nguta maiqse ma, kha nyan wan chang lamlu min ahü she hali mirwa.

¹⁶ Riita ara chong tiikai arai mren, Shiikeawe raq Abraham ma kiqkham raüpot khakuq wantaq kriika, Abraham raq apaiq ma kamwantaq kra kha na kuqto. Riita, ara kongphiq khakuq wantaq arka, Shiikeawe raq maiqse ma, apaiq kaphap mangchan jonghea rüm tlaq kra tiichhike wan nguta, kuqto. Krai mren, ara kongphiq arka, Abraham saüse phan tarü kunli raq achü shiiman kra lap wan miitu kuqto. Arka Thungtri lang wantibi miitu li ka riimak. Shatmaq, Abraham raq jamkho Shiikeawe ma kam wantaq, kiikha kam wantibi tarü miitu kuqto. Ara jamkhano akha chong tiikai ngukla, Abraham ka nashiq tarü ma wenyi rilung na ati.

¹⁷ Asii bomtsi na, “Ngi raq ümniika maiqphan pahea ma awejong tiija wan kang,” nguta chongtlo. Ara chongtiikai ara ningkhan, ara kiqkham arka Abraham raq kamwantaq, Shiikeawe maiq amaa wa, atra tiidong wanti Shiikeawe, kiimaq phanrap ka jam min ahü wa, apaiq raq aming tat raüta phanrap tingsang anye tiidong tiiq wan phansang wanti we, Shiikeawe makki na athuk atsom pinthum bomtsi.

¹⁸ Abraham raq kra kiqkham kuqtaq kiima kamwanto. Kiimaq ran wanto. Kriika apaiq raq, aran phan wan chang ka riimak khan, shatmaq ranphan wanto. Krai mren, apaiq ka, “Maiqphan pahea ma awejong she,” jawanto. Arka Asii bomtsi na chong tlaq krai mren, “Ümsaü ümse ka ra na raiqsaiq diim tlaq kiikha, raham hiqham she mipu chi wan,” nguta chongtlaq kra phan phan she kupi wanto.

¹⁹ Kra akhing na, apaiq rawii ka wiiroq shishi ahong wa wishe riito. Kiitinkhan, kaüja kiija li jiimin, apaiq raq apaiq han-ngam ka arümkai wishe ikha, alai ala humti ka riimak she nguta tiima raüta, akamtsantsii ka tiijom mak riito. Kiimaq Sara ka ase humti ka riimak she, wikaü hea she nguta tiima raüta, apaiq tsaiji ka tran mak riito.

²⁰ Apaiq kamtsantsii ka atsan mong wa jam mak phan riito. Kiimaq apaiq raq Shiikeawe kiqkham ka tsan nai maq tiima wan mak phan riito. Apaiq kamtsantsii ka apa, tsan mong na atsaü maq pha wan wan khoti pha wanto. Kiimaq apaiq raq Shiikeawe kli she tiishomra wanto.

²¹ Apaiq tsan mong niika, kamto khekham maq, Shiikeawe kiqkham ka ümkhiiriita jiimin miku wan dongdii nguta kam raüta siwanto.

²² Kra ningkhan, Abraham ka Shiikeawe raq kamtsantsii lümaq, “Apaiq ka kechu maiqse she nguta ajam na tiidü wanto,” nguta chongtlo.

²³ Riita ara chong tlaq, “Apaiq ka kechu maiqse she nguta ajam na tiidii wanto,” nguta chong tlaq bomtsi waiqthütaq kriika, apaiq honhonse miituli ka riimak.

²⁴ Ara bomtsi waiqthütaq arka, nashiq miitu min riito. Arka nashiq phong wa, nashiq Tati Jesuq ka amaa wa tiidong wanti we, Shiikeawe apaiq ma kam tiikai, laita apaiq raq nashiq ka kechu maiqse she nguta ajam na tiidii wan tlaqti thun miitu riito.

²⁵ Nashiq ngarai ningkhan apaiq ka tiitsat baiqto. Kiimaq hali nashiq ka Shiikeawe rai kechu maiqse she nguta, apaiq rai shram wan miitu, apaiq ka amaa wa tiidong wanto.