Romans 3 - ASII LAKDAP Bible (BSI)

¹ Ikhiijiika Pongnok phan maiqse thaq na, Jehudinok phan maiqse ka Shiikeawe lamphan wan na sinkhu niidea wawan tlo nguta ngo chang ka asi sha? Lo, tsangshiq raq athohan tlaq kriika athii asi dea sha?

² O, phanrap na tsangshiq ka sinkhu niidea wawan tlo na! Arka tengto dea na. Apha na Shiikeawe raq, Jehudinok ma apaiq bomtsi kra rümkom wan miitu, arang kuqto.

³ Shatmaq, tsangshiq phong wa maiq wiijamti raq, Shiikeawe bomtsi ka samhea tsapkapkap maq, lang mak dea shishe tlo nguta, Shiikeawe riimin, Jehudinok ma apaiq bom khamkuqtaq kra, adü she dea sha mirbaiq?

⁴ Kiikhiika riimak! Shiikeawe raq jamlai bom wa khamtaq, kriika tiipoi mak phan! Maiqse angu thun riiwe kla ka, wiita joksaü liiqsetiim kong li jiimin, Shiikeawe ka tingting. Asii Bomtsi na akha chong tlo: “Ümniiriika tengteng bom li chong tlaü; jurmin ümniika rung maq tiijiqlot mak phan, ümkha ka ümniiraq tang chang dongdii.”

⁵ Shatmaq, nashiq raq ashut jaqsham tiikai kra riili, Shiikeawe raq tingting jaqsham tlaq kra, samhea wiq khangriri hea tiichhikuq tlaq jiikiiha? Riita, nashiq ashut kha na, apaiq raq nashiq ma mo tiiho tlaq kriika, ajiq tsatson tlo nguta, nashiq raq Shiikeawe ka mishra lot rong i sha? (Ara bom arka ju raq ngu raü min miwai li dongdii.)

⁶ Akha kla jurmin ngulot mai jo! Shiikeawe apaiq tingting maq simak ngu raü ka, apaiq raq mangjong maiqse kha ka jamkho, tingting ma mipho kuq?

⁷ Shatmaq, ngi raq arot akiq rilung sitiikang kra lümaq, Shiikeawe tingting khushü kriili jonghea tiijong wanwan tiijong kuq tlaq jiikiiha? Ikhiijiika, ngi ka ajiq we dea nguta shrabaiq mak chang kata?

⁸ Ikhiijiika akhli ngu rong i na, “Ai ahea dea. Ngarai khoti apapa tang laita sirong i na. Krai mren, Shiikeawe khushü ka jonghea tiijong ruq li riima,” nguta maiq wiijamti raq chong tlo. Maiq wiijamti raq, ngi raq nangnga akha bom tlo nguta, tsangshiq shut ka i nübok na sukkuq raüta, ngi ka trot kiq tlo! Shiikeawe raq tsangshiq ka akha, aku anong bom tlaq arkha na, kha ma ka jonghea mitiiho kuq wan.

Kechu Maiqse Ngutiika Jumin Ahü

⁹ Riita, ikhiijiika, nashiq Jehudinok ka Pongnok phan maiqse thaq na, holi kechu maiqse ngutiisha sitiikai? Riimak, kriika riimak! Ngi raq namshiq ma chongkuq kang she ihata. Jehudinok nai Pongnok phan maiqse, noknai ri ka khoshi na dea wanti siisaq li sitlo. Noknai ri arka ngarai kharü mong na, dikong siili sitlo.

¹⁰ Ara jamkhano chongtiikang ngukla, Asii bomtsi na akha chongtlo: “Jumin kechu maiqse nguta ahü.

¹¹ Jumin maiqshaq nguta ahü; jurmin Shiikeawe ka shomnoq mak.

¹² Shiikeawe wokhong wa shürang müra khoti pinho wito; tsangshiq tarü ka lamjiq na siisaq kihoto; jurmin lungwii tsantsii ka thü mak; maiq weshi ra dongdii min ahü.

¹³ Tsangshiq nübok ka maiq maakho linje athü ikha, tsangshiq tili ka paü lai tu ikha; maiqtsea chang liipu liqsinkii ikha.

¹⁴ Tsangbom tsangsa ka namtoktok; manson kiqsü tam li sitlo.

¹⁵ Tsangshiq ka mat-saü tsase lai dongdii.

¹⁶ Tsangshiq ümnüno khum tlaq, tsangshiq jijai niika jamkhiim wacha ikha, miqchup athen ajen wanli sitlo.

¹⁷ Tsangshiq raq hansang rilung lamphan ka sapmak.

¹⁸ Tsangshiq raq Shiikeawe ma haisong tsantsii rüm mak.”

¹⁹ Riita, ümchaü nashiq raq asap i, Thungtri sitlaq kriika, juwa Thungtri wokhong na misi rong i nguta sitlaq, kriiti miitu sitlo. Ara Thungtri sitlaq arka, maiqse angu raq jamkiq khii chang ahü she mirlaq nguta sitlo. Thungtri sitlaq kriika, mangjong maiqse hiq maq hutse Shiikeawe rung na tiichap miitu sitlo.

²⁰ Ara jamkhano chongtiikang ngukla, maiqse aja wa, jurmin Thungtri ka riikhaqli maq lang tlo nguta, Shiikeawe rai wehea shram raüta, kechu maiqse ma jawan lot mak. Thungtri raü sitlaq kriika, maiqse ma apaiq ka ajiq we dea, nguta kha nyanke miituli sitlo.

Maiqse Ka Kechu Ma Jamkho Tiija Wan Tla

²¹ Shatmaq, ümchaü ka Shiikeawe raq maiqse ka, apaiq rai wehea ma jamkho shram tlaq, kra lamlu kra tiichhi kuqto she. Arka Thungtri lang raüta riimak. Shatmaq tiina, Mosheq Thungtri nai shammibi lak niika ara chong tiikai, Shiikeawe rai shram wan lamlu ara miitu chong kuq thüto.

²² Shiikeawe raq maiqse ka, Jesuq Khristo ma kamtsantsii thü tlaq kra lümaq, apaiq rai wehea she, kechu maiqse she nguta shramtlo. Maiqse ümchu riiwa, Jesuq ma kamtsantsii thü tlaqti thun kunli ka, Shiikeawe raq apaiq rai wehea she nguta shramtlo. Jehudinok phan nai Pongnok phan maiqse liipan na, jamlai phan atiikhothiq chang min ahü she. Wiitarü adam ngarai maiqse siisaq li sitlo.

²³ Maiqse angu kunli raq ngarai ka tangto. Raüta Shiikeawe raq akuq rilung khushü khuphok kriika, phok lap mak dea ngarai mong na chhan wanto.

²⁴ Shatmaq, Shiikeawe raq maiqse ka apaiq raq phe maq akuq, kaphap mangchan, Jesuq pum lü miishe dok daa wan raüta, maiqse ka apaiq rai wehea she nguta shram wantlo.

²⁵ Shiikeawe raq apaiq ka honglu na kuqto. Kriika apaiq honglu na tsaitaq, kriikha maq jurwa apaiq ma kam tlaq, kriiti ngarai ka tsangshiq kamtsantsii thü tlaq kra lümaq diike miitu she tsaito. Shiikeawe raq ara tiichhii wan lam tankuq wantaq arka, apaiq raq maiqse ka apaiq rai jamkhiiwa wehea ma tiija wan tlaq, kra tiichhikuq tlo.

²⁶ Richü pat na apaiq raq, maiqse ngarai ka anin rea riiwanto. Kiimaq chhi mak ikhiili tlin phin baiq wanto. Shatmaq, ümchaü pat niika, Shiikeawe raq maiqse ngarai kha ka apho she riiwan tlo. Arka apaiq ka tingting Shiikeawe dea nguta, maiqse ma tiichhike miitu she, tsangshiq ngarai kha ka phokuqtlo. Riita, apaiq raq ara tiichhii wan lamlu tankuq wantaq ara lümiishe, maiqse ma apaiq ka asii tingting Shiikeawe dea, kiimaq apaiq raq ngarai maiqse thun ka jurwa Jesuq ma kam tlaq, kriiti ka apaiq rai wehea she dea shram wantlo nguta tiichhikuqtlo.

²⁷ Riita, ümchaü nashiq tiishom raa wan chang lamlu ka asi sha? Jammin ahü, siirai! Riita, arka jamlai ningkhan no? Nashiq raq Thungtri lang wan raa dea nguta ngo nang sha? Riimak, kiikhiika riimak. Shatmaq, nashiq raq kamtsantsii kli she thü wan chang nguta ngo nangnga chongtlo.

²⁸ Ara jamkhano chongtiikai ngukla, nashiq raq tri ka shat wan kai she, maiqse ka Shiikeawe rai kamtsantsii lümaq shram wan tlo, Thungtri aming lang wan raüta riimak nguta sap wankai she.

²⁹ Riita, shea Shiikeawe ka Jehudinok miituli nguta wa sitla? Apaiq ka Pongnok phan maiqse miitu min riimak sha? Riikhaqli, apaiq ka Pongnok phan maiqse miitu min sitlo.

³⁰ Jehudinok nai Pongnok phan maiqse miitu, Shiikeawe ka ashi li. Apaiq raq Jehudinok ka tsangshiq raq apaiq ma kamtlaq kra lümaq mishram wan. Kiimaq Pongnok phan maiqse kiimin, tsangshiq raq apaiq ma kamtsantsii thü tlaq kra lümaq mishram wan.

³¹ Riita, ikhiijiika, ara kamtsantsii ri thü wan kai she nguta, Thungtri ka brorii mai she sha miriirong i? Riimak, kiikhiika riimak. Ümchaü nashiq raq, Thungtri raü kha thun ka samhea she tiipha kha wan nong tiikai.