Romans 2 - ASII LAKDAP Bible (BSI)

Shiikeawe Raq Wiitarü Kha Mipho

¹ Kongtitiim lei, namshiq raq nanok ka jaram wa sairan tlan? Namshiq ka juli riikan jiimin, hangkilot man. Jamkhano ngukla, namshiq raq nanok ka ajiq klo tlo nguta, sairan tlan. Shatmaq, tsangshiq raq jamlai wa ajiq klo tlaq, kra hali namshiq riimin klo tlan. Lanta, maiq ka shra tiikai angu, maiqmii kli ajiq we dea nguta, shra phaq tlan.

² Shiikeawe raq, akha ashut kiimungti maiqse kha ka, riikhaqli kappe maq shin raüta, phokuq tlo nguta, nashiq raq asap i.

³ Shatmaq, kongtitiim lei, namshiq raq nanok ka ashut klo tlo nguta shra tlan, kra tsangshiq shut tlaq lam na hali, namshiq maiqmii kiimin dea wan dam tlan! Riita, namshiq maiqmii ka Shiikeawe kappe mong kiiwa midongkilot rong i ngutiisha tiima rai tlan?

⁴ Arka namshiq raq, Shiikeawe raq namshiq ma, mangchan tsii jonghea rüm tlaq kra shishe lam na khat tlo. Kiimaq apaiq raq namshiq shutphit ka mangchan tsi ma, namshiq ka atsea wan chang wiimin, tsat son n mak maq, anin riiwan tlo, kiimaq ranaiq shishi kla, namshiq raq tsii michhi wan han ahiq, nguta tsan tiibum raüta, namshiq tsantsii klai wan ka khe tlo. Shiikeawe raq namshiq ka kai lungwii tlo nguta namshiq riimin asap han. Shiikeawe raq namshiq mangchan tlaq arka, namshiq raq ngarai tsantsii kra miklai tlo laq, nguta ngo maq mangchan tlo.

⁵ Shiikeawe raq namshiq ka, atinkhan mangchan taü miimin, namshiq tsantsii ka longkaü ikha atsin wiq, kiimaq namphaq namni ka, wanshakshak rüm tlan. Akha lanta, namshiq raq namshiq maiqmii kha ma kra, Phangthum Khapho Ranaiq miitu atlai li riiwan tlan. Kiimaq Shiikeawe raq namshiq kha ka, tri atsin miishe mipho kuq wan.

⁶ Shiikeawe raq maiq loweatek ma, maiqmii raq jamlai wa shamlam wantaq, kra phanphan jaq maq mikuq.

⁷ Maiq wiijamti riika, nok ma bin ma shamhea kaiwa, asap ada jaqsham kli shamkuq wan ruq sitlo. Kiimaq Shiikeawe jaq wa, asii khushü nai shreng manto kiimaq tsaiki mak phan tsitsü rilung kli rit wantlo. Tsangshiq miika, Shiikeawe raq pattup pat-sa rilung mikuq.

⁸ Shatmaq, maiq wiijamti riika, tatso niq wan kli, kiimaq tsangshiq raq tingting lamphan kra baiq thü raüta, ajiq lam kli phantlo. Tsangshiq thaq na Shiikeawe raq, atsankhiq walü wa miishe mishe chaq wan. Raüta mitiikhiim chaq baiq.

⁹ Shiikeawe raq maiqse angu thun ümchu riiwa, abi lamphan raüta sitlaq, kriiti thun ka tarü, pinthum mitiichamchao wan. Apha na Jehudinok ka mitiichamchao. Kra jai maq Pongnok phan maiqse kriishe mitiichamchao wan.

¹⁰ Shatmaq, maiqse angu ümchu riiwa, riikhaqli sham akai ka sham raüta siwantaq, kriiti thun tarü miika Shiikeawe raq khushü, shreng kiimaq hansang rakhang rilung mikuq wan. Apha na Jehudinok ma mikuq wan. Raütiishe Pongnok phan maiqse ma mikuq wan.

¹¹ Shiikeawe raq maiqse angu kunli ka, tri raü ashi miili shin wan tlo.

¹² Pongnok phan maiqse raq Mosheq Thungtri ka sapmak. Krai mren tsangshiq raq ngarai tang tlo. Raüta thungtri sap mak miili tsai wan tlo. Kiimahali Jehudinok riika, Mosheq Thungtri ka asap. Shatmaq ngarai tang wantlo. Krai mren, tsangshiq kha ka Thungtri raq pho raüta tsai wan tlo.

¹³ Ara jamkhano chongtiikai ngukla, Shiikeawe raq maiqse ka kechu maiqse she nguta, apaiq rai wehea ma shram wantlaq kriika, Thungtri aming ka miinan ni maq tai wantibi lamlam ka, shram wan mak. Shatmaq, jurwa Thungtri aming kra lang raüta sitlaq, kriiti ka Shiikeawe raq, apaiq rai kechu maiqse she nguta shram wan tlo.

¹⁴ Pongnok phan maiqse raq, Mosheq Thungtri ka lap wan mak dea riito. Li jiimin, ümtiikiiwa tsangshiq tsan mong na sitlaq, chongwa tsantsii raq, tsangshiq ka thaü wan tlaq, kiimaq kra phan phan, tsangshiq raq jaqsham wan tlaq, kriili she, tsangshiq ma thungtri. Tsangshiq raq Mosheq Thungtri lap wan mak dea riito li jiimin, tsangshiq tsan mong maq adong, tsantsii tri kriishe tsangshiq miika thungtri aming tai wan tlo.

¹⁵ Tsangshiq rong arai kra riili, tsangshiq tsan mong na Thungtri raü ka waiqthüje asi dea, nguta tiichhi kuq wan tlo. Arka tengto dea nguta tsangshiq tsaiji riimin, hakhi kuq wan tlo. Kiimaq tsangshiq maiqmii tiima tsantsii raq jangshi shi ka, jig laü dea nguta ashra riiwan tlo. Kiimaq jangshishi ka tsangshiq tiima tsantsii riili, riikhaqli dea klo wan laü nguta asom riiwan tlo.

¹⁶ Riita, ümchaü ara bomtsi chong tiikang arai mren, Phangthum Khapho Ranaiq niika Shiikeawe raq, maiqse angu thun wiitarü kriika, tsangshiq raq tsangshiq tsan among na, ümchuwa maiqse raq khonlot mai chang, ahuk apaü raüta ahea abi tiima tsantsii thü wan raüta siwantaq, kra thun ka ngi raq trahokuq wan tiikang Tsütsa Ahea armaq shin wan raütiishe, Jesuq Khristo lümaq, tsangshiq kha kra mipho kuq wan.

Jehudinok Nai Thungtri Liipan

¹⁷ Riita, namshiq kiiha? Namshiq raq, namshiq ka Jehudinok phan nguta tiitsaki rai tlan. Namshiq riika, Shiikeawe raq Thungtri ka, namshiq ma kuqto nguta tiima tlan. Kiimaq namshiq ka, Shiikeawe sengi nguta shiikong tlan.

¹⁸ Shiikeawe raq namshiq ma, jamlai phan jaq tiisham wa lungwii tlaq, kriika namshiq raq asap han. Kiimaq Thungtri wa riikhaqli maq jaqsham wan lamlu chong tlaq kriimin asap han she.

¹⁹ Namshiq ka makchukti ma lam sheati. Ranyaq mong na siti ma rawü li nguta kamto maq sitlan.

²⁰ Kiimaq angok angiti ma, sungkhu tsii lam chongketi, kiimaq tsiihüti maiqse ma tsii chongketi nguta sitlan. Kiimaq Thungtri wa namshiq raq phaqchi pinja tsii nai tengtlaq bomtsi ka, thumthum asap hai nguta tiima tlan.

²¹ Namshiq raq nanok ma shrinkuq tlan. Riita, namshiq maiqmii riika jamto shrin wan man? Namshiq raq nanok ma, “Ahuk naqja rongkiq” nguta traho kuq tlan. Shatmiitiq, namshiq maiqmii riili, ahuk jawan tlan nya?

²² Namshiq raq nanok ma, “Maiqchak rai naq sra rongkiq” nguta traho kuq tlan. Shatmiitiq, namshiq maiqmii kli maiqchak maiqse rai sraki tlan nya? Namshiq raq sumla phra shomnoq wantibi ka pinthum tsaihai tlan. Shatmiitiq, namshiq raq phra sumla shomjam thun wa, hupsam ka hukki tlan nya?

²³ Namshiq kli Shiikeawe Thungtri shamti nguta shiikong tlan. Shatmiitiq, namshiq riili Shiikeawe Thungtri ka jin nong tlan nya? Lanta, Shiikeawe mang ka tiibi tlan nya?

²⁴ Asii bomtsi na, “Namshiq Jehudinok lümaq Pongnok phan raq Shiikeawe ma abi bom tlo,” nguta chongtlo.

²⁵ Namshiq raq Thungtri ka riikhaqli maq lang lanta sitlan jiika, namshiq raq athohan tlan kiimin athii ka asi miraq. Shatmaq, Thungtri ka jin tlan jiila, namshiq raq athohan tlan kiimin, namshiq ka athohan hü maiq ikhli mijaki han.

²⁶ Pongnok phan maiqse raq atho ka han mak li jiimin, tsangshiq raq Thungtri aming ka lang raü jiika, Shiikeawe raq tsangshiq ka athohan jeti maiqse ikhiisii hali milang wan riimak sha?

²⁷ Kiimaq ara tri lam phan chongkuq tiikang arai mren, namshiq Jehudinok jaq na Thungtri waiqthüje ka asi li jiimin, kiimaq namshiq ka athohan jeti maiqse nguta sitlan li jiimin, namshiq raq Thungtri ka ajin riiwan tlan. Shatmaq, Pongnok phan riika, han-ngam na athohan hüli jiimin, tsangshiq raq Thungtri ka lang tlo. Kriikha na, tsangshiq raq Thungtri lang tlaq kra lümaq namshiq Jehudinok ka ashut maiqsetiim miishe mitiija wan.

²⁸ Riita, juwa chiisan Jehudi riikhaqli maq athohan jeti maiqse ka? Riikhaqli Jehudi phan maiqse ngutlaq kriika, han-ngam athohan lamlamli ka riimak.

²⁹ Shatmaq, riikhaqli Jehudinok phan maiqse dea nguta sitlaq kriika, ümriiti wa atsan among na, Jehudinok phan nguta sitlaqti kata. Kriika atsan among na atho ka hanje maq sitlaqti kra nangnga ngutlo. Riita, arka Shiikeawe Asii Wenyi jaqsham. Arka awaiq araq Thungtri jaqsham ka riimak. Riita, arti ka Shiikeawe raq shomra tlo. Maiqse riika shomra mak.