Romans 16 - ASII LAKDAP Bible (BSI)

Paul Raq Rom Na Siti Ma Salam Tiitai Tlo

¹ Kenkrea phungtu na jaqsham wan damti, nanyino nyung Phobe ka namshiq rai mang triisap wan tiikang.

² Tatiwe mang na asii maiqsetiim raq kongti ka jamkhii tao chang wa, kiikha, apaiq ka tao ronglaq. Lanta, apaiq ma jamlai phan wa rongra tlaq, kra khrum kuq ronglaq. Apaiq ka nanok pahea rai mang arsap. Kiimaq ngi rai min, kongshi kiimshi maq siwanti maiq.

³ Khristo Jesuq mang na, ngi rai adam maq jaqsham wan damti, kongti Prisila nai Akoila miimin salam tiitai tiikang.

⁴ Tsangnai raq ngi miitu miisaq jaqphi na chiim wanto. Ngi raq tsangnai ma pinthum kechu tum tiikang. Kiimaq ngi riili min riimak, Pongnok phan phungtuti wiitarü raq, tsangnai ma kechu tum tlo.

⁵ Kiimaq tsangshiq jam na noqku wantlaq phungtuti miimin salam tiitai tiikang. Ngi ma lungwii phuno we Epanitas miimin salam tiitai tiikang. Apaiq ka Asia wang wa apha shaq shaq Phung na shang wanti.

⁶ Meriq, namshiq miitu pinthum jaqsham kewanti nyung miimin salam tiitai tiikang.

⁷ I kongti we nai Jehudinok wenai, Andronikas nai Junias miimin salam tiitai tiikang. Tsangnai ka ngi rai phaqtek na adam siwanto. Tsangnai ka kiimwebi tarü raq asap. Kiimaq tsangnai ka ngi mishang shaq niiphü, Phung na kongkhu shang wanti riito.

⁸ Ngi ma lungwii luwe Ampliatas, Tatiwe wokhong na siti we miimin salam tiitai tiikang.

⁹ Kiimahali naishiq rai Tati Khristo jaqsham wan damti kongti we, Urbanas ma nai ngi ma lungwii luwe Stakhis miimin salam tiitai tiikang.

¹⁰ Khristo ma rilung kuq raüta jaqsham wanti we maiqshaq ashi, Apelis miimin salam tiitai tiikang. Aristobulas jamtitiim miimin salam tiitai tiikang.

¹¹ Jehudinok phan wa phanshi maqshi kongti we, Herodion ma kiimaq Narsisas jamtitiim rai sitibi Phungmaiqsetiim sitlaq kiima min salam tiitai tiikang.

¹² Tatiwe jaqsham wanti Traiphena nai Traiphosa miimin salam tiitai tiikang. Kiimaq hali, ngi ma lungwii phuno we, Tatiwe jaqsham na kai shiikut raüta jonghea jaqsham wanti we Parsis miimin salam tiitai tiikang.

¹³ Tatiwe lam phan na, akhupo ashi ma jawan raüta jaqsham wanti we Ruphas, kiimaq anyung jong, ngi ka ase shaq ma mang raüta mangchanti, i nyung niimin salam tiitai tiikang.

¹⁴ Kiimaq, Asinkritas, Phlegon, Harmes, Patrobas, Harmas, kiimaq tsangshiq rai rintii shi maq sidamti Phungmaiqsetiim ahinti wiita ma salam tiitai tiikang.

¹⁵ Kiimaq Philogas nai Julia ma, kiimaq Nereuas nai ashea nyung ma, kiimaq Olimpas nai tsangshiq rai rintii shi maq siti Shiikeawe setiim wiita ma salam tiitai tiikang.

¹⁶ Namshiq liipan na, weshi raq weshi rai lungwii thea riishup lanta tao wan lili ronglaq. Arjaq siti Tati Jesuq Khristo Phungtuti thun wiita raq, namshiq ma salam tiitai tlo.

Bomshat Tsiichong

¹⁷ Phunainotiim lei, ngi raq namshiq ma phaqthak nithak lata, ara chongkuq tiipha ara tai ronglaq: Maiq triiphea baiqti nai kamtsantsii ka lamjiq na sheahoti sitlaq kra, maklii wa namshiq ka tsii lamshat maq sironglaq. Tsangshiq riika, namshiq raq jamlai wa tengteng bomtsi saptsin lan, kra bomtsi manphan kra jin raüta, ajiq bomtsi michong kuq. Tsangshiq rai ka arbom min naq riibom rongkiq! Namshiq ka tsangshiq maklii wa alu na sirong laq!

¹⁸ Akha hon atsii rümti arka, nashiq Tati Khristo jaqsham kewanti ka riimak. Tsangshiq arka maiqmii wokpo tiipao wan lam lu kra rit wanti li. Tsangshiq raq bom ka kai tiisum raüta, chongkuq tlo. Kiimaq maiq ka jutjü wantlii maq shomrasiq wantlo. Akha trahokuq tlaq ara lümaq, tsangshiq raq, juwa ajiq alam kra tsea tsiiq wan tsin makti ka, tsangshiq raq lamjiq nü na laolii holili riitlo.

¹⁹ Namshiq raq pharangrang maq, Asii Tsütsa ma kamwan tlan kriika, nanok wiitarü raq tai wanto she. Riita, ngi ka ara bomtsi ara tai wan lata, namshiq ma pinthum khoqriiq tiikang. Namshiq ka ahea lamphan lam niika, tsangtsang tsiitsii maq sirong laq. Shatmaq, abi lam phan niika, makchuk nibii ikhiili sironglaq.

²⁰ Kra riihan jiila, Shiikeawe, nashiq tarü khusang maq rüm wanti we raq, Thawe ka namshiq jitham takiq na tiibunlak mitiithenbaiq wan. Nashiq Tati Jesuq kaphap ka namshiq rai misilaq.

²¹ Ngi rai kongshi maq jaqshamti Timothi raq namshiq ma apaiq salam tiitai tlo. Kiimaq, i phan i maq Jehudinok phan wa kongtibi Lusias nai Jeson, kiimaq Sosipatar riimin, namshiq ma salam tiitai tlo.

²² Ngi, Tartias, ara lak waiqtiwe raq, namshiq ma Phungmaiqse salam tiitai tiikang.

²³ Ngi sitiikang jamchongti Gaias, apaiq jam na noqkutlaqwe raq namshiq ma apaiq salam tiiwantlo; Erastas, chela tsiiqtum khetiwe kiimaq naphunowe Kuartas raq namshiq ma tsangnai salam tiitaitlo.

²⁴ Tati Jesuq Khristo kaphap ka namshiq tarü rai misi laq. Amen.

Bomshat Wan Achu Jaü

²⁵ Shiikeawe khushü kli tiijong rong i! Apaiq raq namshiq ka kamasham na pharangrang maq mitiishong nga lot. Kriika ngi raq Jesuq Khristo bomtsi, Asii Tsütsa namshiq ma chongkuq tiikang kra phanphan miraq. Kiimaq aka rapha hiq wa niiphü, apaü raüta athü tengteng bomtsi riisham mak maq atiichhikuq kra phan miraq.

²⁶ Riita, ümchaü, shammibi raq waiqthütaq kra lümaq tengteng bomtsi ka wiitarü man na, linkuq wanto she. Kiimaq pattup pat-sa Shiikeawe aming maq, maiq mung thun wiita na tiitai kuq wanto she. Kriika tlotli mikam wanlaq nguta, kiimaq apaiq aming ka milang wan laq nguta kuqto.

²⁷ Apaiq kli Shiikeawe, apaiq kli tlotli thaq na taksma kiimiili, Jesuq Khristo lümaq khushü pattup pat-sa misi laq! Amen.