Romans 15 - ASII LAKDAP Bible (BSI)

Nanok Tiichochi Laq, Maiqmii Riimak

¹ Kiimahali, nashiq liipan na juwa kamasham na maiqla nguta sitiikai, nashiq ka nahan tiihang laita, na laqlaqse peo sea ka raa mak. Nashiq raq nakongti, juwa kamasham na ningkun ajom sitlaq, kriiti ka, tsangshiq maiqmii holai kra howan lam na khrumke chang.

² Shatmaq, nashiq wiitarü raq naphu nano sitlaq kiima ahea lamlu na, jaqshamke chang. Kra shamkuq tiikai kra lümaq, tsangshiq ka kamasham rilung na mijong luwan.

³ Ara jamkhano chong tiikang ngukla, Khristo raq arilung ka, apaiq honhonse polosea na, tiisung mak dea. Kra rii na, apaiq ka maiqse miitu siwanto nguta chong tlo. Arka, Asii bomtsi wa chhi tiikai. Asii bomtsi na, “Namshiq ma maiqse raq, ümtinkhan wa shummii thoda tho kuq wantaq, kriika i khu thaq na saüto,” nguta chong tlo.

⁴ Riita, ara chong tiikai arai mren, Tongshong Chü na ümchuwa waiq wantaq, kriika, nashiq ma sungkhu tsiilam tiichhike wan miitu waiqto. Arka, Asii bomtsi na waiq wantaq, anin wan bom chong tlaq kra nai tsaijido kewan, tsii chongkuq tlaq kra lümaq, nashiq raq rawiichii rilung miitu, ran tsantsii rüm tiikai kriika, milap rong i dongdii she nguta, mongngam maq siwan miitu waiq thüto.

⁵ Riita, ija, ara chong tiikang arai mren, anin wan ningkun kewanti nai tsaido jido kewanti Shiikeawe raq, Jesuq jamkho siwantaq kiikha, apaiq jaiphan phan, namshiq liipan niimin, kiqshi tsiimshi maq siwan miitu ningkun mikuq laq, nguta achuli jaü tiikang.

⁶ Krai mren, namshiq tarü raq, Shiikeawe, kiimaq nashiq Tati Jesuq Khristo ma Awe Shiikeawe ka, dang ashi maq tiitsam kam rong laq.

Pongnok Phan Ma Tsütsa Ahea Chongkuq Tlo

⁷ Riita, ümchaü sanha, Khristo raq namshiq ka jamkho tao wantaq, kiikha namshiq liipan niimin, weshi raq weshi ka tao wan rong laq. Namshiq ka akha shongnga wan kra chhi raüta, maiqse raq Shiikeawe ka mitiitsam kam wan.

⁸ Ara jamkhano ngutiikang ngukla, Khristo kitaq kriika, Jehudinok khrumkai nguta kito. Apaiq saükitaq arka, Shiikeawe raq Jehudinok titiim ma, kiqkham raüpot khakuq wantaq kra tiikupikai nguta kito.

⁹ Kiimaq kra thaq niimin, apaiq raq Pongnok phan maiqse kra khup wong kuq wan tlaq kra miitu, tsangshiq raq apaiq ka mitiitsam kam laq nguta kito. Arka Asii bomtsi na waiq thütaq ara tiiku wan miitu she hongtha wanto. Asii bomtsi na akha chongtlo, “Riita ara chongtiikai arai mren, ngi raq ümniika, Pongnok phan maiqse phong na mitiitsam kam wankang. Ngi raq ümniima shomshi mishi wan kang.”

¹⁰ Kiimahali Asii bomtsi na, “Pongnok phan maiqse lei, Shiikeawe raq atsea wan asenginok rai, adam na khoqriiq wan ronglaq!” nguta chongtlo.

¹¹ Kiimahali Asii bomtsi na, “Pongnok phan maiqse wiita raq, apaiq li tiitsamkam ronglaq; maiqse angu wiita raq, apaiqli tiitsam ronglaq!” nguta chongtlo.

¹² Kiimahali Isaia raq, “Jessi lai wa maiq ashi misaüho, apaiq ka Shiikeawe raq amaa wa mitiidong wan. Raüta Pongnok phan maiqse mung ka mirüm wan. Kiimaq tsangshiq raq, apaiq ma ran raüta misi wan,” nguta waiqthüto.

¹³ Riita, ija, ümchaü min, wiitarü ma tsaiji tlamke wanti Shiikeawe raq, namshiq ma chochi tsantsii ka, asho awo miishe mikuq laq. Kiimaq kiqkap jaqshap rilung kra, Shiikeawe ma kamtsantsii thü tlan kra lümaq mitiishowo kuq laq. Krai mren, namshiq ran tsantsii rüm tlan kriika, Asii Wenyi ningkun maq, jonglu wan ruq li mirlaq.

Paul Raq Kiq Atsin Maq Jamto Waiqtaq

¹⁴ I phu i notiim lei, ngi riika namshiq ma kai riichopi lata sitiikang. Ngi raq asapha, namshiq ka sobsob bombom maq, phanrap sham akai na ahea asap han she. Kiimaq namshiq ka maiqmii liipan na sungkhu tsiilam riichong phan min asaphan she.

¹⁵ Li jiimin la, ümchaü lak arka, ngi raq ara lak arjaq, namshiq ma bomkhupo wiijam ka, kiq atsin maq waiq wan tiikang. Arka, namshiq ma thongshiri hali bomtsi ka tiipha chongkuq wan nong tiikang. Kra ngo maq, ara kholam kholiiq maq waiq tiikang. Arka Shiikeawe raq ngi ma apaiq jaqsham kra kewan kha maq waiq tiikang.

¹⁶ Shiikeawe raq ngi ka Khristo Jesuq jaqshi se ma shongto. Arka ngi raq, namshiq Pongnok phan maiqse ma, Khristo Jesuq tsütsa ahea kra chongke wan miitu shongto. Ngi ka Shiikeawe raq akuq Tsütsa Ahea ara chongketi ramwe. Ara ramwe jaqsham tiikang arka, Pongnok phan maiqse wa maiq ümchuwa sitlaq kra thun ka, Shiikeawe ma akuq honglu ikha misi laq nguta ngo maq sham tiikang. Raüta, Asii Wenyi raq tsangshiq ka siirairai she ngamrea ikhiishe, Shiikeawe ma mikuq wan.

¹⁷ Ngi ka Khristo Jesuq rai pumshi hanshi she sitiikang. Krai mren, ngi raq ara Shiikeawe jaqsham wan tiikang ara miitu, ngi ma atiishom raa wan chang lam ka asi.

¹⁸ Ngi raq bom ka kholam kholiiq chongkuq tiikang. Arka ngi lümaq, Khristo raq Pongnok phan maiqse ka, Shiikeawe puk na tiinyap wanto nguta chong kuq tiikang. Shiikeawe raq tsangshiq ka, trahokuq kang bomtsi kra tai raüta nai awang chang jaqsham tiichhi kuq wan raüta, apaiq puk na tiinyap wanto.

¹⁹ Shiikeawe raq ngi lümaq awang chang nai amao chang jaqsham pahea sham wanto. Arthun awang chang nai amao chang jaqsham wantaq arka, Shiikeawe Asii Wenyi ningkun maq sham wanto. Ara trahoke wan jaqsham arka, ngi raq Jerusalem maq pha wan lata, Illirikam chela na saüli, hiqshi na tra hokuq wan wan maq, khum wan lata chongkuq wankang. Ngi raq Khristo Tsütsa Ahea kra arang chong maq tiichap wan lata, atsii na saüli, tiitho tiipha chongkuq wankang.

²⁰ I rilung na hang ajong ashi rüm wan tiikang kriika, Khristo Tsütsa Ahea kra, maiq mung mangtang sitlaq, nanok ahinti raq Tsütsa Ahea kra michong kuq wan shaqli sitlaq, kriijaq walata chongke wa, kriili hang tiikang. Arka, maiq ahinti raq, rum achhin wan wishe, maiqjamkhü na ngi raq jam ka hai wan mang chang miitu hang tiikang.

²¹ Riita, arka Asii bomtsi na chongtlaq kra tiihong wan miitu. Asii bomtsi na, “Apaiq tsütsa tiitaihü mungti raq apaiq sham michhi, kiimaq apaiq tsütsa taimak dea ti riimin, apaiq rai mang mirsap wan,” nguta chongtlo.

Paul Ka Rom Na Wa Miitu Tiijetlo

²² Riita, ija, ngi ma akhing ahea riihong tha wan mak dea kha maq, ngi ka namshiq pha na walap mang dea, akhing pahea lea wanto.

²³ Shatmaq, ümchaü riiwe ka, arbinjü thun wa i jaqsham ka kun wan kang she. Kiimaq, ngi riika man niiphü, namshiq rai sham riichhi watlo hajaq nguta, i tsan na atsi maq siwan kang, krai mren,

²⁴ ümchaü she miwaha nguta tiima wan tiikang. Ngi ka Spen mung na kaiho lam maq, namshiq rai, heashi mirhum thü ha nguta tiima tiikang. Namshiq rai heashi haithü latiishetiq, Spen mung niika mikiha nguta thapthi wan tiikang. Kiimaq namshiq raq ngi ka kiina kai miitu mikhrum kuq dam han nguta tiima tiikang.

²⁵ Ümchaü bala liipan niiriiwe kla, ngi ka Jerusalem na, kiijaq siti Shiikeawe setiim ma khrum kongphiq kra kekai nguta kiho tiikang.

²⁶ Arka Mesidonia nai Akaia wang na siti phungtuti thun raq, tsangshiq maiqmii tsiitsii maq, khoqriiq shishiiq maq, Jerusalem na siti Shiikeawe setiim liipan na, miitsan miijan maiqse sitlaq kra khrumke miitu, alu ahi kongphiq.

²⁷ Ara tsangshiq raq thapthi wantaq arka, tsangshiq tsiitsii maq archong wan. Shatmaq, riikhaqli maq liiwan raü jiika, tsangshiq raq Jehudinok ma, jaqsong khrum kewan chang ka asi dea na. Jehudinok raq tsangshiq Pongnok phan maiqse ma, kamasham tsiiq anyam ka phea kuq wanto kriikha maq, tsangshiq riimin la, tsiiq nai nyam ka, Jehudinok ma kran kewan ka alam asi.

²⁸ Riita, ngi raq ara tsangshiq miitu honglu ahi kampho ara kunli, tsangshiq jaq na kuq thü lot la tiishetiq, ngi ka Spen mung na wawan lam miishetiq, namshiq rai ka mirhum kang nguta thapthi wan tiikang.

²⁹ Riita, ngi riika asapha. Khristo raq akuq, achu shiiman ka, asho awo howan latiishetiq, ngi ka namshiq phana misaü wan kang.

³⁰ Riita, ümchaü min, phunainotiim lei, nashiq raq Tati Jesuq ma kamwan tiikai, kiimaq Wenyi raq nashiq ma lungwii tsantsii kuqtlaq arkha maq, namshiq ka ngi rai adam maq, ngi miitu tsan tiitsi lanta, achu jaü kuq han jiika ahea miraq nguta, namshiq ma, ara athü ada wan bomtsi tiitai wan tiikang.

³¹ Judia wang na siti Jesuq Khristo ma kamwan makti jaq wa, ngi ara mitiikhup wongkuq laq nguta, kiimaq ngi raq, Jerusalem na siti Shiikeawe setiim ma khrum kongphiq kuqki tiikang arka, Shiikeawe setiim maklii na athuk atsom jaqsham ashi mirlaq nguta, ngi miitu achu jaükuq han jaq ahea miraq.

³² Riita, kra jaqsham kun jai she, Shiikeawe raq arka thuktlo dea nguta thapthi raüla, ngi ka chojong chise maq, namshiq phana misaü wan ha ahiq nguta tiima tiikang. Lata, namshiq rai tsailam jilam, khoqriiq shishiiq maq heashi haisea wan nguta tiima tiikang.

³³ Riita, ümchaü min, Shiikeawe, nashiq tarü khusang maq rüm wanti we ka, namshiq tarü rai adam misi laq nguta achuli jaü tiikang. Amen.