Romans 14 - ASII LAKDAP Bible (BSI)

Phunaino Naqsetsiiq Rongkiq

¹ Juwa kamasham na ningkun ajom, kriiti ka aheawiq maq boqpum ronglaq. Shatmaq, apaiq raq atsan na, arka ahea, arka abi, nguta jamlai phan wa chechiip tlaq, kra miitu ka apaiq rai naq riikhii lea rongkiq.

² Maiq weshi riika, apaiq kamtsantsii ngiim raq ajok ajok, phanrap aphaq asea wan nguli miraq. Shatmaq, juwa kamasham na ajom linti we riika, ngam angiq ka phaqsiq mak, jücha weashaü lamlam maq tsap raütli dung misiq.

³ Riita, jurwa phanrap ka aphaq asea nguli phaqsiq tlaq, kriiti raq, jurwa mophaq mosia phaqsiq mak, kriiwe ka setsiiq raa mak. Kiimahali, jurwa jücha weashaü lamlam miili dung tsapsiq tlaq, kriiwe riimin, arewe phanrap ngam angiq aphaq asea nguli we, kriika, setsiiq maimak. Shiikeawe raq apaiq kiimin, awokhong na atiinyap wan wishe.

⁴ Ümniika juwa, maiq luqkhapse kra setsiiq miika? Aluqkhapse ka maiqshaq sha, maiqkhü wa, kra shin wanti we ka, apaiq ma Atijong we asi. Apaiq ka maiqshaq ngo chang jiimin, maiqkhü ngo chang jiimin, Atijong we riitiq misap. Apaiq ka maiqshaq ma mija, jamkhano ngukla, Tati raq apaiq ka seshaq ma mitiija lot.

⁵ Maiq weshi riika, arka jipi jihea ranaiq, arka jipi jibi ranaiq, nguta ranaiq ka tsea tsiiq raüta lang tlo. Kiimaq maiq weshi riika, jipi lü na ranaiq ümchuwa sitlaq, kra jihea siisaq nguta kamtlo. Kriika maiqmiimii ji wea. Maiqmii ji wea kriika, maiqmii raq riikhaqli maq mithü laq.

⁶ Jurwa jipi wea stiq skhaq raüta sitlaq, kriika Tatiwe ma shreng raüta thü wan tlo. Kiimaq jurwa phanrap aphaq asea nguli pen mak maq, phaqsiq tlaq, kriimin Tatiwe mang na phaqsiq tlo. Ara jamkhano chongtiikang ngukla, tü adung phaqsiq tlaq, kra miitu Shiikeawe ma kechutum ramram raüta phaqsiq tlo. Kiimaq hali, jurwa kamliikam phaqsiq mak, wiijam ka apen raüta phaqsiq tlaq, kriimin Tati shreng raüta, phaqsiq tlo. Kra phaqsiqtlaq kra miitu, apaiq raq Shiikeawe ma kechutum ramram raüta sii hali phaqsiqtlo.

⁷ Nashiq phong wa maiqmii pumsii lamlam se miituli ka atra simai. Kiimahali, nashiq phong wa maiqmii pumsii lamlam se miituli ka jumin tsai mai.

⁸ Nashiq atra sitiikai wiiwii, Tatiwe khushü ka tiijong miitu li, atra sitiikai. Kiimaq ümkhiimiiwa, tsaiki hai jiimin, Tatiwe khushü ka tiijong miitu mitsai rong i. Kriikha maq, nashiq ka atra sikai lo, atsai riikai lo, nashiq ka Tatiwe rii she sitiikai.

⁹ Ara jamkhano chongtiikang ngukla, Khristo ka tsaito. Raüta, amaa wa atra she dong wanto. Kra dong wantaq krai mren, ümchaü apaiq ka maiq atrati nai amaati khu thaq na Tatiwe sitlo.

¹⁰ Riita, arkha maq, namshiq phong wa, maiq ümriiti riiwa, jücha weashaü lamlam miili dung ka tsapsiqtlan, kriiti raq, namphu nowe ka jam nguto sairan tlan? Kiimaq namshiq phong wa, maiq ümriiti riiwa, phanrap phanrii ka phaqsiq tlan, kriiti riimin, namphu nowe, jurwa namshiq kiikha phaqsiq makti we ka, jaram wa sairan tlan? Nashiq tarü ara, Shiikeawe man na chap wan chang siisaq. Kiijaq, apaiq riishe, nashiq ka kappe maq mishin wan.

¹¹ Arka, Asii bomtsi na Shiikeawe raq chongtlaq kra phan phan mihong tha wan. Asii bomtsi na akha chongtlo: “Ngi ka pattup atra sitiwe Tati. Ngi raq chongtiikang arka tengteng poimak phan. Maiqse angu tarü raq i jichong na bum raüta, ngi mishomnoq wan. Kiimaq maiq phan aweatek raq, ngi ardea Shiikeawe nguta, chiiriim raüta mitsaki wan.”

¹² Ara chong tlaq arai mren, nashiq wiitarü maiq khumtek raq, Shiikeawe ma maiqmii rilung na jamkho siwan tiikai, kiimaq jamlai wa sham wan tiikai, kra raüpot ka weake wan chang miraq.

Phunaino Ngarai Na Naq Tiidea Rongkiq

¹³ Arkha maq, nashiq liipan na, kongti ka sairan wan mai she riihai jaq ahea miraq. Ümra ranaiq jiimin, phunaino tiithap tha wan chang nai kongti ka ngarai na tiidea chang phan kriika, klo mai she nguta tsan na atsi maq thü ronglaq.

¹⁴ Ngi ka Tati Jesuq rai she pumshi hanshi tiipum lata sitiikang. Kriikha maq, ngi raq ara sap wan tiikang, aphaq asea chang phan sitlaq kriika, apii ashan wan chang ngutiika ahü. Shatmaq, jurwa arphan arka apii chang phan, aphaq asea maimak nguta tiima tlaq jiika, kriiwe miika kra phan ka ashe miraq.

¹⁵ Riita, arkha maq, namshiq raq jamlai wa phaqsiq tlan, kra lümaq, Phungmaiqse kongti we tsan kra tiibi han la, kriika lungwii tsii lam phan ka riimak she! Namshiq raq jamlai wa phaqsiq tlan, kra lümaq phuno we kamasham rilung kriika, naq shiithen baiq rongkiq. Apaiq miitu min Khristo tsaito.

¹⁶ Namshiq raq ahea nguta jamlai wa lang tlan, kriika nanok ahinti raq, arka abi nguta ngo chang kriika, naq klo rongkiq.

¹⁷ Shiikeawe sengi ma jawan rilung ngutlaq kriika, phaqsea khamnyang tiitsak khok wan khuthaq na seng raüta siwan rilung ka riimak. Shatmaq, ating arai, khusang rakhang, kiimaq chojong chise maq siwan rilung, kra chong tlo. Riita, arthun arka maiqse rilung na, Asii Wenyi riitiq, tiitsi ngo wan phan.

¹⁸ Krai mren, jurwa Khristo jaqsham ka, akha shampi tlaq, kra ngu raüka, Shiikeawe riimin, ahea dea nguta mikhoqriiq wan. Kiimaq maiqse riimin, ahea dea nguta mingu.

¹⁹ Arkha maq, nashiq raq wranaiqshe, jamlai phan jaqsham wan hai jiiwa, tarü ma khusang miraq, kiimaq kongti ma tsaido jido miraq, kra phan jaqsham miituli, nashiq tsan mong na hang laita, si rong i.

²⁰ Shiikeawe raq jaqsham ahea sham kuqtaq kriika, namshiq raq kongti maklii na hong mak phan phaqsiq tlan, kra lümaq shiithen baiq ka maimak. Phaq asea phan nguta sitlaq kriika, wiita ka asii, aphaq asea wan mimai siisaq. Shatmiitiq, jamlai phan phaqsiq raü jiiwa, kongti ka ngarai na midia, kra phan ka phaqsea maimak. Kriika ajiq.

²¹ Riita, akha raki tlaq arkha maq, namkongti we kra, ngarai na dea mak chang miitu, namshiq raq ngam ka naqphaq siq rongkiq li na. Che-atsam kiimin naq nyang wan rongkiq li na. Kiimaq jamlai phan sham raü jiiwa, namphuno we ka ngarai na chhan kai chang asi, kriika naq phaqsiq rongkiq na.

²² Riita, akha raki tlaq arkha maq, phaq nai sia lam na, ümniiraq jamlai wa ardea ahea nguta kam wan tlaü, kriika, Shiikeawe nai ümnaq liipan niili thülaq. Jurwa apaiq raq, ardea riikhaqli nguta lang tlaq, kra miitu, atsan na ajiq klo mang sha nguta, tsanko tsanki ahü miishe sitlaq, kriiti ma kechu jonghea miraq!

²³ Shatmaq, jamlai phan li jiimin, jurwa tsanko tsanki lam maq, phaqsiq tlaq, kriika Shiikeawe raq apaiq ma ajiq dea nguta mishra wan. Ara jamkhano chongtiikang ngukla, kriika apaiq raq, atsan mong maq, arka aphaq asea phan dea nguta, kam raüta aphaq siq wan riimak. Krai mren, jamlai phan li jiimin, kamtsantsii maq sham mak jiika, ngarai jaqsham ma mija.