Romans 13 - ASII LAKDAP Bible (BSI)

Mungtubi Wokhong Na Sichang

¹ Maiqse angu tarü ka mungtubi wokhong na sichang. Shiikeawe raq arang kehü miika, juwe riimin mung thaq na wela jalot mak. Krai mren, ümchaü mung rümti hokhambi sitlaq kriika, Shiikeawe raq ashong wan.

² Arkha maq, mung welabi aming tai mak, tsangshiq kiq khiiti ka Shiikeawe raq ashong, welabi roi wan ma mijaki. Kiimaq jurwa mung welabi kiq khü tlaq, kriika maiqmii khu thaq niili kha ma miho wan. Mungrümti raq apaiq ka atsa miraq.

³ Mungtubi wokhong na siti miika ahaisong chang jam min ahü. Shatmaq, jurwa abi klo tlaq, kriiti miika, ahai chang asi. Mungrümti welawe ma namshiq hai man sha? Hai tlan jiila, apaiq wokhong na ahea wiq maq sirong laq. Apaiq raq, namshiq ka ashom ra mirwan.

⁴ Ara jamkhano akha chongtiikang ngukla, mungtu we nguta sitlaq kriika, Shiikeawe jaqshi. Namshiq ka ahea maq rüm wan miitu sitlo. Shatmaq, namshiq raq abi jaqsham han jiila, apaiq ma hairong laq. Apaiq jaq na arang ho tlaq kiimaq namshiq ma sintsang mitiiho. Apaiq ka Shiikeawe luqkhap. Kiimaq apaiq raq mung khuthaq na arang hotlo. Kra arang maq, jurwa tri raütu ka jin raüta ashut klo tlaq, kriiti ka atsa riiwan tlo. Kiimaq sintsang maq tsat tlo.

⁵ Arkha maq, namshiq ka mungrümtibi wokhong na si rong laq. Shiikeawe sintsang hojiiq nguta, moho hai ma lamlamli ka riimak. Shatmaq, namshiq tsan mong niimin la, maiqse ngutlaq kriika, tri wokhong na sichang dea nguta asi.

⁶ Mungtu shiilangbi ka Shiikeawe raq ashong. Kriikha maq, tsangshiq raq mung peng tlaq kriika, Shiikeawe jaqsham. Krai mren, namshiq raq tsangshiq ma phunta kuq tlan.

⁷ Arkha maq, namshiq raq jamlai phan phunta kechang wa sitlaq, kra kuq rong laq. Pumsii miitu phunta, kiimaq tachong hupsam phunta jamlai wa ake chang asi, kra wiita kuq ronglaq. Kiimaq tsangshiq tarü ma, shreng manto tiichhi, shiipan pin ka kewan chang, kra wiita khum khum klo ronglaq.

Maiqse Ka Riilung Riiwii Maq Siwan Chang

⁸ Namshiq raq maiqtijong ka naqho rongkiq. Namshiq raq thiithamke chang homa howan tlan kriika, maiqse angu tarü rai, riilung riiwii maq shongnga wan holai howan tlan kli. Jurwa ara riikhaqli maq lang wan tlaq, kriiwe riika, Shiikeawe Thungtri aming ka riikhaqli maq lang wantlo ngushat.

⁹ Thungtri aming thun na akha chongtlo, “Maiqchak rai naq sra rongkiq; matwe ma naqja rongkiq; ahuk naqja rongkiq; maiqhup maiqsam chhi lanta, naq sü ram wan rongkiq.” Riita, ara chongtlaq aming thun nai aming ahin sitlaq kra thun kriika, aming ashi na siisaq li sup wan tlo. Ara chongtiikai tarü aming thun bomtsi kra tiiku wan chang aming sitlaq kriika, “Ümniiraq ümkhum ka jamkho lungwii tlaü, kiikhiisii hali ümjam thoti chiiti kiimin lungwii laq,” nguta chongtlo.

¹⁰ Namshiq raq juwa lungwii tlan, kriiwe miika ümtiikiimin abi klo man. Riita, maiq ma lungwiitsii rüm ngutiikai kriika, Thungtri aming ümchuwa sitlaq, kra lang raüta siwan miishe taitlo.

¹¹ Namshiq ka akha shongnga chang akhing she saü wato. Namshiq ka akon wa sam wan akhing she saüwato. Man na nashiq apha na kamwankai ranaiq kiimaq thi wan raüka, ümchaü sanha, nashiq tiichhii wan rahiq jipi akhing ka, aje niili she.

¹² Rawa luhea akhing ka lea wanto she. Ümchaü ka rawüho she. Ümchaü ka rawü she. Riita, ümchaü ka nashiq raq ranyaq jaqsham ümchuwa sitlaq kra, wiita she thaq baiq rong i. Kiimaq kra thaq baiq laita, rawii na rekhat wan chang miirii ümchuwa sitlaq, kriimaq tiimiikhiiq rong i. Laita re ka khat rong i.

¹³ Riita, ümchaü sanha rawü maiqse jamkho sitlaq, kiikha athuk atsom miishe shongnga rong i. Ümchaü sanha, hi-awaq ikha kiijoq kiicham, cherop tsampii riinyatshat ka raa mak she. Kiijoq kiicham maiqtsai ngamhai riinyatshat, tatso wawo maq, kiimaq makshu rashe maq siwan ka raa mak she.

¹⁴ Shatmaq, Tati Jesuq Khristo raq akuq rekhat chang miirii, khu aliiq, chuntsi nyiimwin kiimaq ko aliq thun kriimaq tiimiikhiiq laitiishe, tiijeshat maq rekhat miitu si rong i. Kiimaq namshiq khum wa ngarai han-ngam ramho jamlai phan wa sitlaq, kriika naq dung hiq rongkiq she.