Romans 12 - ASII LAKDAP Bible (BSI)

Shiikeawe Minshiiq Siwan Rilung

¹ Riita, ija, ümchaü sanha, phunainotiim lei, Shiikeawe raq nashiq ma atinkhan jong tiikhup tiiwong maq mangchan tlaq arkha maq, ngi raq namshiq ma tsii chongkuq tiipha ara tai ronglaq: Namshiq raq maiqmii khum kriika, Shiikeawe ma atra maq honglu na wu tiida tlaq ikha kuq ronglaq. Lanta, apaiq rii she pong na, athiiq ikha siwan lanta, apaiq jaq kra sham wan lili ronglaq. Ahata riikhaqli maq Shiikeawe shomnoq rilung. Kiimaq apaiq rai tsanwa we ma jawan raüta siwan rilung.

² Namshiq rilung ka, ara mangjong hiq rilung thangpo mong na thü lanta naq tlo rongkiq. Shatmaq, namshiq tiima tsantsii kra anye tingsang ma tiija wantlii riili chang, Shiikeawe ma tiitiiq rong laq. Kra tiiq kuq wan haü jiitiq, Shiikeawe raq namshiq rilung miitu athuk atsom ahea awa jamlai wa tiihong tha kuq tlaq kra kiimaq apaiq raq jamlai phan wa lungwiitlaq kra, namshiq raq mikhonlot han.

³ Riita, Shiikeawe raq ngi ma wenyi kongphiq jonghea kuqtaq kriikha maq, ngi raq namshiq tarü loweatek ma, ara tsii chongkuq tiikang ara: Namshiq raq maiqmii ka, ajong ala, phanrap asap atsin hai siisaq nguta, tsan na naq tiima rongkiq. Shatmaq, sobsob bombom maq siwan lili ronglaq. Shiikeawe raq namshiq loweatek ma kamtsantsii ümchuwa kuqtaq kra khan khan, maiqmii thii ka shin wan lili lanta siwan lili ronglaq. Achan ana ka naq bom rongkiq.

⁴ Nashiq khum na hok ajaq, mak ajaq phanphan asi. Kiimaq arthun arma, maiqmiimii pongpong jaqsham asi.

⁵ Akhiisii hali, nashiq ka apum wea miika, maiq ka apawiq sitiikai. Li jiimin, nashiq tarü arka, Khristo pum lümaq, weshi ikhli sitiikai. Kiimaq, nashiq tarü arka, maiqpum shi na ahok, ajaq jamkho sitlaq, ikha nashiq min adam na, atiipumke wan wishe. Nashiq tarü arka, pumshili she sitiikai.

⁶ Riita, ija, ara chongtiikai arkha maq, Shiikeawe raq nashiq maiq loweatek ma, jamlai phan sham akai kongphiq wa pheakuqtaq, kra phanphan jaqsham wan hai jiika ahea miraq. Nashiq ma Shiikeawe bomtsi chongke miitu, kongphiq kuqtaq jiila, nashiq kamtsantsii ümtinkhan wa kuqtaq, kra khankhan, Shiikeawe bomtsi kra chongke chang li.

⁷ Riita, ija, nashiq ma nanok shiililii wan kongphiq kuqtaq jiika, nanok shiililii wan jaqsham wan chang. Kiimaq, nashiq ma Shiikeawe bomtsi shrinke wan kongphiq kuqtaq jiika, nanok ma Shiikeawe bomtsi kra shrinke wan chang.

⁸ Kiimaq nanok ma tsaiji doke wan kongphiq kuqtaq jiika, nashiq raq nanok ma, tsaido jido jaqsham kra shamke wan chang. Kiimaq, jurwa jaqchii jichii maq nanok khrum kuq wan tlaq, kriiti riimin, nanok khrumke wan jaqsham kra sham wan chang. Juwa maiqla ma jaraüta, se ano ka shun shea wan tlaq, kriiti raq pinthum jaqsham shiichaq wan chang. Kiimaq, jurwa nanok atsi asiti, alit akotti, wikaü tikiiti, kiimaq thümwaq mantibi ma khrum kuq wan tlaq, kriiti riimin chojong chise maq shamke wan chang.

⁹ Maiq ma lungwii tsii ka siirairai hea thü wan lili ronglaq. Jamlai wa abi phan, kriika atsaihai rii ronglaq. Jamlai wa ahea, kra jaqkhon tiipha lanta shamshat maq si ronglaq.

¹⁰ Phungmaiqse ka jamkhii riilungwii raüta siwan chang wa, kiikha riilungwii lanta shongnga ronglaq. Kiimaq ashi raq ashi ka shreng lanta si ronglaq.

¹¹ Namshiq ka howe minwe ma jawan lanta shongnga ronglaq. Roknin riishin miika naqja rongkiq. Tsantsii wiita kuq wan lanta, Shiikeawe jaq kra sham ronglaq.

¹² Shiikeawe ma ranphan wan tlan krai mren, chochikhiq maq si ronglaq. Namshiq ma chamchao saü tlaq ranaiq na, tsan tiibum lanta nin ronglaq. Kiimaq wranaiqshe achu jaüshat maq si ronglaq.

¹³ Namshiq jaq na jamlai wa asi kriimaq, namkongti Phungmaiqse alit akotti sitlaq kra, khrum kuq ronglaq. Kiimaq namshiq jam na Phungmaiqse wanhiq khumti dü wan miitu, hiqkhu ka chinshat maq thü ronglaq.

¹⁴ Namshiq tiichamchao wanti ma, Shiikeawe jaq wa achu shiiman kli jaükuq ronglaq. Arka ngohea shaqshaq chongtiikang. Achuli jaükuq ronglaq. Shiikeawe raq apaiq ma, manson kuq haü jaq ahea chang ngutiika naq jaü rongkiq.

¹⁵ Juwa acho achi maq sitlaq, kriiti rai chochi dam ronglaq. Juwa aho ajü sitlaq, kriiti rai aho ajü maq sidam ronglaq.

¹⁶ Wiitarü ka maklii ashi miili lii ronglaq. Ashkong ka naq shiikong rongkiq. Aranse ma ja lanta, kongti ka khrumkuq ronglaq. Namshiq ka nanok thaq na tsüwe tsitwe sitiikai nguta naq tiima rongkiq.

¹⁷ Ashi ra raq namshiq ma ashut klo raüla, apaiq ma namshiq raq ashut maq hali ka, naq songkuq rongkiq. Nanok tarü raq ardea ahea nguta liitlaq, kriili apaiq ma klo kuq ronglaq.

¹⁸ Namshiq raq ümtinkhan wa tang wan tlan kiitinkhan, nanok tarü rai ari aram maq shongnga wan miitu shiikut ronglaq.

¹⁹ Kongtitiim lei, namshiq raq ümtiikiimin maiqmii phuk ka naq lam rongkiq. Shatmaq, namshiq phuk ka Shiikeawe riitiq milam laq. Tatiwe raq Asii bomtsi na, “Ngi raq phuk milam ha. Nanok ma abi kloti phuk milam ha,” nguta chongtlo.

²⁰ Kra rii na, Asii bomtsi na, “Namshiq jaqti we ka amang, aramtsi jiila, dung tiisiq ronglaq. Apaiq ka letsi jiila, kham tsümkuq ronglaq; namshiq raq akha shiili han jiila, apaiq ka ajiasi raq atsai miraq,” nguta chongtlo.

²¹ Abi jaqsham ma namshiq ka naq tiitang rongkiq. Shatmaq, namshiq raq abi jaqsham ka, ahea jaqsham maq tang wan lili ronglaq.