Romans 11 - ASII LAKDAP Bible (BSI)

Shiikeawe Raq Israilnok Tiikhup Wongkuqtlo

¹ Riita, ümchaü min, ngi raq bomtsi ka akha wai pha shaq. Riita, ija, Shiikeawe raq asengi Israilnok ka, tiishaü baiq tlii she dea sha tiishaü baiq ta? Tiishaübaiq tlii langlang kla tiishaü baiq mak dea! Kriika, ümkhiiriita jiimin tiishaü baiq mak. Ara akha jamkhano chongtiikai ngukla, ngi ahata Israilnok phan. Abraham saüse lai. I weraü mang ka Benjamin weraü.

² Shiikeawe riika, apaiq raq hiqpha rawa miiphü atsea arwan, asengi shaq ka shubaiq tlii ka, shubaiq mak dea. Asii bomtsi na Elija raq Israilnok ka Shiikeawe ma kamwan mak riitlo nguta shra wan bom chong tlaq kiijaq, Shiikeawe raq Elija bom ka jamkho tretaq kra namshiq raq phat tlan ahiq na. Elija riika akha achu jaüto.

³ “Tatiwe, Israilnok raq ümshammibi thun ka wiita thumthum she tsat baiq wanto. Raüta, ümnaq shomnoq wan chang aluchiim thun kiimin, wiita runbaiq wanto. Ümchaü ka, ngi laqlaqse lishe tiichong tiikang. Kiimaq tsangshiq raq ngi armin, atsea baiq nguta tankhantlo,” nguta tiipaiqnea achu jaüto kra chhi tiikai.

⁴ Riita, Shiikeawe raq kra bomtsi ka jamkho treta? Shiikeawe raq bomtsi ka akha treto, “Ngi raq i sengi ngi rii, maiq hingmiishi pong na rairii lata, thü wan kang she. Tsangshiq raq, arot phra Baal ka shomnoq wan mak dea,” nguta treto chhi tiikai.

⁵ Kra pat wa kra niq riri sii hali, ümchaü akhing niimin sitlo. Shiikeawe kaphap mangchan khoqram kii maq, arai rii wanwi she tsamso ikha, Israilnok phong wa, Shiikeawe jaiphan wanti maiq ka ümchaü min asi.

⁶ Kiitiina, apaiq raq ara tsangshiq tsea wantaq arka, apaiq kaphap mangchan jonglu khuthaq na seng raüta tsea wanto. Arka tsangshiq raq kechu lap wan li chang, Shiikeawe tsan tiihea wanli, jaq sham kuq wan raütiika riimak. Ara jamkhano chongtiikai ngukla, Shiikeawe raq maiqse ka, maiqse raq kechu jaqsham tlaq, kra thaq na seng raüta, tsangshiq ka tsea wan raü jiika, apaiq kaphap mangchang kriika, thiihüli she mijaki.

⁷ Ara chong tiikai arai mren, Israilnok riika tsangshiq raq jamlai wa rit wantaq, kriika hum wan mak dea riito. Shatmaq, Shiikeawe raq tsea wantaq phong wa, maiq atsapko riili Shiikeawe lamphan kra hum wanto. Maiq apako tiichong kitaq thun kra miika, Shiikeawe raq tsangshiq ni ka nilan miishe tiija baiq wanto.

⁸ Riita, arka Asii bomtsi na, “Shiikeawe raq tsangshiq khutsai ka shaqmii ma tiija baiq wanto she. Kiimaq tsangshiq tsan among ka, theapakpak miishe tiija baiq wanto. Ümchaü ranaiq na saüli, tsangshiq raq Shiikeawe bomchong ka tak wan lot mak. Kiimaq tsangshiq ni maq tai wan mak miili lea wan tlo,” nguta chong tlo. Ara Asii bomtsi na chong tlaq arphan phan she dea hongtha rai wantlaq chhi wan tiikai.

⁹ Kiimahali Dawit riimin la, Israilnok miitu bom ka akha chongtlo, “Tsangshiq poi tsampin thun kli, tsangshiq miatsii wan chang pithob ma tiija baiq wan laq. Kriika tsangshiq dea wan chang thiikho ma mija wan laq. Raüta kra thiikho na dea wan raüta mitsai laq.

¹⁰ Tsangshiq mak ka atiimii riibaiq wan laq; jam min chhi mak, makchuk ma tiija baiq wan laq. Raüta, tsangshiq rilung pattup, chamchao homa raq pat wan raüta mitsai laq,” nguta waiqthüto chhi tiikai.

¹¹ Ikhla, ngi raq bom ka akhiishe wainong pha: Riita, Jehudinok ka tsangshiq maiqmii shut phit wan tlaq kra thiikho mong na, tiimiqchup she, chongthum ma jawan tlii she dea sha thenjen wanta? Thummak! Miqchup ka miq mak dea! Tsangshiq raq ngarai tang wantaq kriikha maq, tiichhii wan rawüli kriika, Pongnok phan maiqse miishe kuq wanto. Arka, Jehudinok raq Pongnok phan maiqse tiichhii wan tlaq kra chhi raüta, tsangshiq mak kriishe mishu rai laq nguta, Pongnok phan maiqse miishe tiichhii wan rawüli ka kuq wanto.

¹² Riita, ija, Jehudinok raq ngarai tang wan raüta, mangjong maiqse ma achu shiiman jonghea tiisaü wanto chhi wan tiikai. Kiimaq tsangshiq ka wenyi lamphan na miitsan miijan maiqse ma jawantaq kriikha na, Pongnok phan maiqse ma, asho awo achu shiiman she kuq wanto chhi wan tiikai. Riita, ikhiijiila, Israilnok phan ka wiimungtam miishe, Shiikeawe wokhong na siwan raü jiika, Shiikeawe raq mangjong maiqse miika, ümtinkhan achu shiiman showo wa mikuq riila!

Pongnok Phan Maiqse Chhii Wan Tlo

¹³ Riita, ümchaü ka, ngi raq namshiq Pongnok phan maiqse miishe bom ka chongkuq pha. Ngi ka Jesuq Kiimwe ma jawan lata ara traho bomtsi chongkuq tiikang arka, namshiq Pongnok phan maiqse miitu shamkuq tiikang. Ngi ka ara kiimwe jaqsham sham tiikang ara miitu kai tiishom ra wan ruq latli misi wan ha.

¹⁴ Jursap, ngi raq ara rukwe kiimwe jaqsham wan tiikang ara chhi raüta, i phan i maq Jehudinok phan tsan atsii na, khunniitsi lo siwan jiiq riila. Lata, ara i jaq sham ara lümaq, tsangshiq phong wa maiq, wiijam wiini ra siilo Shiikeawe ma kamwan raüta tiichhii wan jiiq riila, nguta tsin ngin rai wan tiikang.

¹⁵ Ara jamkhano chong tiikang ngukla, Shiikeawe raq tsangshiq tiishaü baiq wan taq, kriikha na santla mangjong maiqse angu wiita ka, Shiikeawe rai wesang ralii kong wa, Shiikeawe khi alu nok miishe tiija wantaq. Riita, ikhiijiika, tsangshiq Jehudinok phan ka, wiitarü thum thum she, Shiikeawe wokhong na siwan raü jiika, mangjong maiqse angu ma achu shiiman ka ümtinkhan jonglu kewan chang she wa riila? Kriishe ngu raü jiika mangjong maiqse angu thun wiita ma, amaa wa atra siwan lamlu lishe misi wan!

¹⁶ Riita ija, winsii thop ashi kiiwa, phushi ka pan raüta, Shiikeawe ma honglu na kuq raü jiika, kra winsii thop kriika, wiithoptam Shiikeawe riishe miraq. Kiimaq, pechong ashi wa, arang thun kriika Shiikeawe ma honglu na keje she jiika, akü ako thun siwan tlaq kiimin, wiita Shiikeawe rii siisaq she miraq.

¹⁷ Riita, ija maiq raq jaq maq achhi arwan olip pechong wa, akü ako thun wiijam kriika, angei she riibaiq wanto. Raüta, kra nge baiq wan taq kü chong thun jami thaq kiijaq, rum na acham rai, rum olip pechong kiiwa, akü ashi kra nge wan raüta, kiijaq tiipop triiche chhi wanto. Riita, ümchaü namshiq Pongnok phan maiqse sitlan kriika, ara chong tiikang rum wa olip pechong kü ashi atriiche chhi wan taq kra siwan tlan. Kra ningkhan tiina, namshiq riimin Jehudinok rii, achu shiiman ümchuwa sitlaq kra, lap wan tlan.

¹⁸ Riita ija, ara chong tiikang arkha maq, namshiq Pongnok phan maiqse raq, tsangshiq chiisan olip kü thun ngei baiq rat wantaq thun kra naq shipoq rongkiq. Namshiq shiikong long wan lam ka asi sha? Namshiq ka akü ashi ikhli sitlan. Namshiq raq arang chong ka thüda wan lot man. Shatmaq, arangchong raq namshiq ka thüda wan tlo.

¹⁹ Shatmaq, namshiq raq bom ka akha motre wan mirhan, “Ala, kriika riikhaqli. Kra olip kü ako thun kra ngei baiq wan raütli, ümchaü naishiq arshe tiicham kuq wanto ahata” nguta mingu han

²⁰ Kriika riikhaqli tengto dea. Tsangshiq ngei baiq rat wantaq kriika, tsangshiq raq kamtsantsii thü wan mak kha na, ngeibaiq wanto. Kiimaq ümchaü namshiq ka tsangshiq cham chang chong na triiche cham tlan. Arka namshiq raq kamtsantsii thü tlan kra kha maq, tiichamkuq wantlo. Shatmaq, kra miitu namshiq ka naq shiikong rongkiq. Ashkong wan la na, namshiq ka tiihaisong shatmaq khoti singa ronglaq. Kra riihan jiika, namshiq ma ahea miraq.

²¹ Shiikeawe raq Jehudinok chongwa olip pechong kü ako thun riishatmaq santla, tsangshiq ka tiihang wan mak maq, ngei baiq wanto. I khiijiika, namshiq kriiri ta, atiihang mirkuq wan ngutiisha tiima rai tlan?

²² Riita, ara shiiton bomtsi chongkuq tlaq arwiili, Shiikeawe raq mangchan tsii jonghea rüm tlaq kriishe chhi wan tiikai. Kiimahali, apaiq raq pinthum tri atsin maq lang wan raüta, kha ka phokuq wantlo, kriimin chhi wan tiikai. Apaiq raq ngarai tang wanti thaq niika, tri atsin maq kha phokuq wantlo. Shatmaq, namshiq miika mangchan tsii jonghea rüm wan tlo. Ara mangchan tsii arka, namshiq ka apaiq wokhong na siruq sitlan wiiwii, thü wan ruq mithü wan. Shatmaq, namshiq raq ngarai la tang wan han jiila, namshiq kiimin, chiisan akü ako thun daq baiq wantaq kiikhiisii hali midaq baiq wan.

²³ Kiimahali, Jehudinok raq, tsangshiq lamkam wan mak tsantsii kra baiq raüta, apaiq ma kamtsantsii she thü wan raü jiila, tsangshiq chamchang kü ako thun kiijaq hali, tsangshiq ka mitiicham wan nong. Shiikeawe riika akha miklo wan lot.

²⁴ Namshiq Pongnok phan maiqse kriika, rum na acham olip pechong kü ako thun atiichiiq arki wa, wak na achhi olip chong kü ako thun thaq na atriiche wan ikha siwan tlan. Kriika pong phan pekü atiiche kuq wan ikha. Shatmaq, Jehudinok ka ara achhi arwan chiisan olip pechong kiikha. Kriikha maq, Shiikeawe raq tsangshiq ka, atiichiiq arki kü ako thun kra, tsangshiq chong kiijaq ümsmiiphü maiqmii chamchang dongdii kiijaq, triiche wan nong ka jeriiq riiq li she miraq.

Shiikeawe Raq Tarü Mangchan Tlo

²⁵ Phunainotiim lei, ngi raq ara apaü raüta athü wan, tengteng bomtsi ara namshiq ma chongke wan rotiikang. Arka namshiq raq sap wan chang akhek sitlo. Kra sap wan han jiila, namshiq tsan na, “Naishiq Pongnok phan maiqse dea taksu maiqse,” nguta tiishom ra man mirhan. Riita, ara chong tiikang tengteng bomtsi ka ara. Ümchaü Israilnok tsantsii wanshakshak rüm tlaq arka, pattup akhli ka wanwan mak miraq. Arka, Pongnok phan maiqse ka Shiikeawe puk na ümtinkhan shang wan chang wa siwan tlaq, kra thun kra kunli she shang wan akhing ranaiq na saüli niili Israilnok tsantsii ka mitsin wan.

²⁶ Kra jai miishe ka, Israilnok kiimin Shiikeawe riishe mitiichhii kuq wan. Arka Asii bomtsi na chong tlaq kiikha miraq. Asii bomtsi na akha chong tlo, “Chhii wanti we ka Jajon chela wa midong wan. Raüta, Jakob lai ala phan maiqse raq, abi ati ümtinkhan wa, ngarai tang wantaq kra thun ka, kunli she mitiisii he wan.

²⁷ Ngi raq tsangshiq ngarai diikuq wan tiikang akhing na, tsangshiq ka i tongshong ramkham miishe mitiiham kuq wan ha,” nguta chongtlo.

²⁸ Riita, Jehudinok raq Shiikeawe Tsütsa Ahea kra shishe wan kha na, tsangshiq ka Shiikeawe rai wesang ikha siwan tlo. Shatmaq, arka, namshiq Pongnok phan maiqse ma ahea miitu li. Shatmaq, Shiikeawe raq tsangtitiim ma kiqkham raüpot khakuq wantaq kra lamphan miika, tsangshiq ka Shiikeawe ma khi alunok nguta siwan tlo.

²⁹ Shiikeawe raq apaiq kongphiq ka ju rii ngutiiwa thiiq wantaq, kriika maiq ahinti miika kuq mak she. Apaiq raq ju wa tsea tsiiq wantaq kiimaq ju ma achu shiiman kewan chang ngutiiwa, thapthi wantaq, kra bom kha ka diibaiq wan mak she. Ju ma kewan chang wa kriika, mikuq wan dongdii she.

³⁰ Riita, ija, namshiq Pongnok phan maiqse raq richü pat niika, Shiikeawe kiq khü wan lanta siwan lan. Shatmaq ümchaü sanha, Jehudinok raq Shiikeawe kiq khü wan kha maq, namshiq raq Shiikeawe mangchan she lap wan lan.

³¹ Kra niq riri sii hali, namshiq Pongnok phan maiqse raq, Shiikeawe mangchan lap wan lan kha maq, Jehudinok riika ümchaü Shiikeawe kiq khii wan raüta siwan tlo. Arka ümchaü tsangshiq raq, Shiikeawe mangchan kra lap wan dam miitu hali riito.

³² Ara jamkhano akha chongtiikai ngukla, Shiikeawe raq maiqse angu kunli ka, nilan tsantsii kharü maq akha baiq wan kun siisaq she. Arka apaiq raq maiqse angu kun li ma, apaiq mangchan tsii kra tiichhike wan miitu riito.

Shiikeawe Tiitsam

³³ Riita, ija, Shiikeawe chiithe ngutlaq arka, maiqse raq nü maq achong aphan lot mai jonghea siwan tlo! Apaiq raq taksu tsii nai anyan phaqchi rüm wan tlaq kriika, tsaühea! Apaiq raq phanrap thapthi wan tlaq kriika, juwero michong kuq wan lot? Apaiq jaqsham kaiwa lam kriika, juwero mitak wan lot?

³⁴ Asii bomtsi na akha nguta chongtlo: “Tatiwe tiima tsantsii khon wanti ka ju wa? Juwero apaiq ma tsii michong kuq lot?

³⁵ Apaiq ma phanshi ra kene wanti maiq asi sha? Kra miitu apaiq raq atham asong kechang asi sha?”

³⁶ Ara jamkhano wai wan tiikai ngukla, phanrap phanrii ka, apaiq raq siisaq phansang kuq wanto. Kiimaq, phanrap siwan tlaq kriika, apaiq lümaq li atra siwan tlo. Kiimaq, apaiq miitu li phanrap ka siwan tlo. Riita, ija pattup pat-sa, Shiikeawe khushü kli dea mijong wan laq! Amen!