Romans 10 - ASII LAKDAP Bible (BSI)

¹ I phu i notiim lei, ngi ara, i nok i bin Jehudinok phan ara tiichhii wan haü jiidea ahea riichang nguta, i tsan mong na tsihea holai howan lata sitiikang!. Ngi raq tsangshiq miitu ümtinkhan wa tsan tiitsi lata, Shiikeawe jaq wa achu jaü kuq tiikang!

² Ngi raq asapha, tsangshiq raq Shiikeawe ka tsantsii wiita kiinong kuq raüta dea shomnoq wantlo. Shatmaq, tsangshiq raq Shiikeawe shomnoq tlaq, kriika riikhaqli lam phan riimak.

³ Shiikeawe raq maiqse ka jamkho kechu maiqse ma tiija wan tlaq, raüta apaiq rai wehea miishe tiija wan tlaq, raüta awura maq tiiham wan tlaq, kra tri lamphan ka tsangshiq raq takmak miili sirai tlo. Tsangshiq riika Shiikeawe raq atankuq wan riikhaqli tri lam kra phan wan rii na, tsangshiq maiqmii tri lam tan raüta, kra lam ka phan raüta sitlo. Krai mren, tsangshiq raq, Shiikeawe raq atan kuq riikhaqli kechu maiqse ma jawan lam, kriika phan mak riitlo.

⁴ Ara jamkhano chongtiikai ngukla, ümchaü sanha, Khristo raq Thungtri lamphan ka atiisup shat wan wishe. Krai mren, ümchaü sanha, jurwa Shiikeawe ma kamtsantsii thü tlaq, kriiti ka Shiikeawe raq kechu maiqse she nguta, apaiq rai wehea miishe shram wantlo.

Tiichhii Wan Lam Ka Wiitarü Miitu

⁵ Mosheq raq maiqse ka Jehudinok Thungtri kra lang raü jiitiq Shiikeawe raq, apaiq rai wehea ma tiija wan tlo, nguta chongkuq tlaq kiijiika, “Jurwa Thungtri aming thun kra lang raüta sitlaq, kriiti ka thungtri aming lang tlaq kra lümaq, atra misi wan,” nguta waiqthüto.

⁶ Shatmiitiq Asii bomtsi na hali, maiqse ka kamtsantsii lü miitiq, Shiikeawe raq apaiq rai wehea ma tiija wantlo, nguta chongkuq tlaq lak jaq niika, “Ümtsan mong niika, Ramungtan niika juwa midü wa lot?” ngutiika naq riiwea kiq. (Arka ümniiraq, ümniika ramungtan na walaüta, Khristo nangnga, mangjong hiq na satki nongkiq, nguta ngo liichum ikhiima mijaki.)

⁷ “Kiimaq hali, Wulum mung niika juwa miki?” ngutiimin naq waikiq. (Kriika, ümniiraq Khristo ka amaa wa sheakai nong bom ikhiima mija.)

⁸ Asii bomtsi niika, “Shiikeawe raq achongkuq tsütsa bomtsi ka, ümtho niishe. Ümniiraq ümnübok maq bomtlaü kra. Kiimaq ümmong jii na asi she,” nguta chong tlo. Arka naishiq raq chong kuq tiikai akamsea chang, Shiikeawe tsütsa ahea ara nangnga ngutlo.

⁹ Ara chongkuq tiikai arai mren, ümniiraq ümnübok maq, Jesuq kriidea Tatiwe nguta, kiimaq Shiikeawe raq apaiq ka amaa wiidea tiidong wanto nguta, ümtsan mong maq kamwan laüta, nokwe man na linham linhok hakhi kuq haü jiila, ümkhum ka Shiikeawe raq mitiichhii kuq.

¹⁰ Ara jamkhano akha chong tiikai ngukla, nashiq raq tsan mong na, Shiikeawe ma kamtsantsii thü tiikai kra lümaq, nashiq ka Shiikeawe raq kechu maiqse she nguta, apaiq rai wehea miishe tiija wantlo. Raüta, ajam jong niishe tiidii wan tlo. Kiimaq, nashiq raq na nübok maq, Jesuq kiidea Tatiwe nguta hakhi kuq tiikai kra lümaq, nashiq ka tiichhii kuq tlo.

¹¹ Arka, Asii bomtsi na chongkuq tlaq kra phanphan hong wan tlo. Asii bomtsi na, “Jurwa Shiikeawe ma kam tlaq, kriiti miika, apaiq raq jea tiingaü mak miraq,” nguta chong tlo.

¹² Arka wiitarü miitu she. Shiikeawe raq Jehudinok nai Pongnok phan maiqse kriika, lamphan ashi miili she tiichhii kuq wantlo. Shiikeawe ka maiqse angu tarü miitu Tatiwe. Kiimaq apaiq puk na nyap wanti, maiqse angu tarü ma, apaiq raq, mren mra chhaq siisaq, tümlüm tümli, kaütak rishi maq, achu shiiman kuq tlo.

¹³ Arka Asii bomtsi na chong tlaq ara phanphan hongtha wan tlo. Asii bomtsi na, “Juwa Tatiwe puk na nyap tlaq, kriiti ka mitiichhii kuq,” nguta chong tlo.

¹⁴ Shatmaq, tsangshiq raq apaiq ma kamwan hü miika, tsangshiq ka apaiq puk na, jamkho minyap wan? Kiimaq, apaiq raq achongkuq tsütsa ahea kra, tsangshiq raq tai wan hü miika, tsangshiq ka apaiq ma jamkho mikam wan? Kiimaq, apaiq tsütsa ahea kra chiiriim raüta, chongke wanti maiq siwan hü miika, apaiq tsütsa ahea kra, tsangshiq raq jamkho mitai wan?

¹⁵ Kiimaq, Shiikeawe raq apaiq tsütsa ahea kra, chiiriim raüta chongke wan miitu, bin na tsütsa chongke wantibi tiikai hü miika, juro michong kuq wan? Arka, Asii bomtsi na, “Tsütsa ahea chongke wantibi saü wan tlaq kriika, pinthum ahea riito!” nguta chong tlo.

¹⁶ Shatmaq, ara chong wan tiikai, Tsütsa Ahea chongkuq wantaq arma, tsangshiq wiitarü raq kamwan mak dea riito. Tsangshiq wiitarü raq kamwan mak dea riito nguta arka, Shammi Isaia raq hali, “Tatiwe, naishiq raq chongkuq wankai tsütsa ahea kiima maiq ümchuro kamwan ta?” nguta waitlaq arwa sap tiikai.

¹⁷ Riita ara chong tiikai arai mren, tsangshiq raq tsütsa ahea kra tai raütiitiq, tsangshiq raq kamtsantsii ka thü wan tlo. Kiimaq, tsütsa ahea ngutlaq kriika, Khristo tsütsa ahea chongkuqtlaq kra nangnga ngutlo.

¹⁸ Riita, bom ka akha hali wainong i na: Riita, tsangshiq raq tsütsa ahea kriika tai wan lap mak dea sha riita? Atai kla achan ana tai wan ngo li kha. Taimak dea ka riimak. Asii bomtsi na akha nguta chongtlo: “Tsangshiq traho bom chongke riinya raq, mangjong tlotli nyam wanto; Tsangshiq bomtsi ka mangjong hiq angu na, shokrap norii wiita na nyam wanto!”

¹⁹ Ikhla, ngi raq jangshi ri hali bom ka wainong pha: Riita, Israilnok raq kra tsütsa chongkuq wantaq kra sap wan mak dea sha riita? Ara bomtre ti ka, Mosheq raq awaiq thü na, “Ngi raq Pongnok phan maiqse ka, i puk na mitiinyap wan ha. Lata i sengi phan Israilnok maklii ka, sipe tsantsii ikha wesang ma mitiija wan ha,” nguta, Shiikeawe raq tre wan nongtlo.

²⁰ Kiimaq arthaq niimin, Shammi we Isaia riika, Shiikeawe mang na, bom ka atsin miishe hali, “Junok riiwa ngi miitu dadü wan mak dea, kra nok raq khoti ngi ka hum wanto. Junok riiwa ngi ka ritkot wan mak dea, kra nok rai ngi sham riichhi wan kang,” nguta, chongtlo.

²¹ Shatmaq, Israilnok miitu apaiq raq akha ngutlo, “Ngi raq ara i kiq khü wantinok, kiimaq i bomchong tai mak tlea wanti, nilan nok ara, tao wan miitu ranaiq minru i jaq tiipii lata, noho ikha tlin wan kang,” nguta ngutlo.