PHOWEBI 9 - ASII LAKDAP Bible (BSI)

Abimelekh Raq Hokham Weraü Shong Wan Danto

¹ Arjai maq Gideon se Abimelekh ka Shekhem chela na anyung ma tanyang senobi sichang hiq na wawanto. Anyung ma tanyang senobi thun ka tlotli kiijaq siisaq sitlo. Kiimaq tsangshiq ma

² Shekhem chelati ma bom ka akha tiiwaito, “Namshiq raq jamkho rotlan? Namshiq ka Gideon setiim maiq roqmiishi raq peng wan kriisha lungwii tlan, shea wela weshi riili peng wan wa rotlan? Namshiq tsan na tiitsang ronglaq, Abimelekh ka namshiq ma tiijai han-ngam ashi.”

³ Krai mren, anyung ma tanyang senobi raq, Shekhem chelati rai apaiq miitu kra bom ka riichongto. Krai mren Shekhem chelati raq Abimelekh kriidea tsangshiq pengti wela shong chang nguta bom ka raito. Jamkhano ngukla, apaiq riiwe ka tsangshiq ma tanyang seno dongdii.

⁴ Krai mren, tsangshiq raq apaiq ma Baal Tongshong shomjam kiiwa kampho ngamsii ka siiroqmiishi kuqto. Kiimaq apaiq raq kra kampho maq pontiiwa na sitikong ka apaiq rai pongdam miitu jaq maq kuqto.

⁵ Raüta apaiq ka awe jam na, Ophra chela na wato. Raüta kiijaq longkaü kaüshi thaq niili, aphu anotiim roqmiishi, Gideon setiim ka jiipbaiqto. Shatmaq Gideon se nobungwe Jotham ka atiipaü riikito. Kriikha maq apaiq ka tsat lap mak dea riito.

⁶ Kiijiishe Shekhem chelati nai Bethmillo chelati ka adam na pong raüta, Shekhem chela na asii berong ok chong ji kiina kito. Raüta tsangshiq raq Abimelekh ka hokhamwe ma shongto.

Pechong Thun Manphan

⁷ Ümtiikiiwa Jotham raq ara tsütsa ka taitaq, apaiq ka Gerijim Hiqlam khupo kiina wawanto, raüta mungmaiqse ma tiihong raüta agilülü akha riimto, “Shekhem chelati singmung maiqse le ibom ara tai ronglaq! Kiimaq Shiikeawe riimin namshiq bom ka mitai laq!

⁸ Akhing ashi na pechong thun ka, tsangshiq hokham shong ma, ngongthunto. Raüta tsangshiq raq olip chong ma, ‘Ümniika naishiq hokham ma jalaq,’ nguta, chongto.

⁹ Olip chong raq treto, ‘Ngi ka namshiq hokham ma jaha jiila, sumla phra nai maiqse shreng chang, ikhum wa itsai tiidong ka, atsaq kai chang she miraq.’

¹⁰ Kiijiishe pechong thun raq, phupmup chong ma chongto, ‘Ikhla ümniika naishiq hokham jalaq,’

¹¹ Shatmaq phupmup chong treto, ‘Ngi ka namshiq hokham jaha jiika, itsi ingo ahom asum kra, tsi mangshe tsaqkai chang miraq.’

¹² Kiijiishe pechong thun raq, spiq raü ma chongto, ‘Ikhla ümniika naishiq hokham jalaq.’

¹³ Shatmaq spiq raü raq treto, ‘Ngi ka namshiq hokham jaha jiika, ngi raq itsi ingo spiqtsi ka, maiqse nai phrakaü thung tiichochi chang, i spiqtai tiidong ka atsaqkai chang she miraq.’

¹⁴ Kiijiishe pechong thun wiita raq, Shuktam chong ma chongto, ‘Ikhla ümniili she naishiq hokham ma jalaq.’

¹⁵ Kiijiishe shuktam chong raq treto, ‘Namshiq raq ngohea dea, ngi ka nam hokham ma shong rotlan jiika, ahea namshiq ka iwokhong na sironglaq, Kra riiman han la, ikü iko shuktam rong kiiwa, wa phok raüta namshiq ka, wiita mikhiim chaq laq. Raüta Lebanon pum wa sedar chongro kiimin, wiita mikhiim laq.’

¹⁶ Kiijaq tiitsuqsaq Jotham raq akha nguto, “Riita, ümchaü min namshiq raq Abimelekh hokhamwe ma shong lan kra ngohea shaqshaq lungwii lantiidea shea shonglan? Gideon raq namshiq miitu jaqsham kuq wantaq kra shreng tlan dea shea kiimaq apaiq raq jaq shamkuqtaq krai mren, ajamtitiim thun ka riikhaqli dea shea shreng tlan?

¹⁷ Tsan na tiitsang ronglaq, iwe raq namshiq tiichhunke miitu re khat wanto. Apaiq raq namshiq ka Midiannok jaqkhon mong wa tiiwongke wan miitu, apaiq miisaq ka jaqphi na chiim raüta siwanto.

¹⁸ Shatmaq ümchaü ranaiq, namshiq ka iwe ma ata awii thun kra namshiq raq wesang ralii miishe tiija wan lan. Namshiq raq asetiim kongnyung kaüshi weroqmiishi ka longkaü ashi thaq na tsatbaiqlan. Kiimaq iwe jaqshi nyungse Abimelekh kra, namshiq ma tanyang seno lam nguta, namshiq raq apaiq ka Shekhem chela hokham miishe shong lan.

¹⁹ Riita ümchaü min, namshiq raq Gideon jamtitiim khuthaq na jamlai wa klo lan, kriika namshiq tsan nai mong na ardea athuk atsom nguta tiima lan tiidea kiimung lan jiika, ahea jamra mak. Ahea namshiq ka Abimelekh wokhong na khusang maq shong nga ronglaq, kiimaq apaiq kiimin namshiq rai khoqriiq shishiiq miishe mishong nga laq.

²⁰ Shatmaq, kra riimak jiila, Abimelekh khum wa walü phok raüta, Shekhem chelati nai Bethmillo chelati thun ka, wa raq bunlak buncha mikhiim baiqlaq. Kiimaq Shekhem chelati khum wa kiimaq Bethmillo chelati khum wa watum phok raüta Abimelekh ka mikhiim baiqlaq.”

²¹ Kra manson kuq raütiishe, apaiq ka aphu Abimelekh ma ahai ningkhan, apaiq ka Beer chela na shongkai she juhoto.

Abimelekh Dea Wanto

²² Abimelekh raq Israil mung ka wiitsam langto.

²³ Kiijiishe Shiikeawe raq Abimelekh nai Shekhem chelati liipan na wesang ralii she tiijabaiqto. Krai mren, tsangshiq raq apaiq kiishe ngenghoto. Raüta apaiq wokhong na simak she riito.

²⁴ Ara tsangshiq liipan na wesang ralii miishe jawantaq arka, Shekhem chelati raq Abimelekh ma Gideon setiim weroqmiishi kra tseabaiq miitu raikao tattaq, kra mat kha thamke wan ngarai tsi she riito.

²⁵ Shekhem chelati raq Abimelekh sengi thun kra tiithüm miitu, thiimeaq tekti maiq ka pum thun kiijaq bom hairaüta thütlo. Krai mren tsangshiq raq maiq wanhiq khumti ka wiitarü thümtlo. Kra tsütsa ka Abimelekh ma tiitaito.

²⁶ Kiijiishe na Ebed se Gal ka Shekhem chela na aphu anotiim sheaho raüta kito. Kiimaq Shekhem chelati raq Gal ka wela ma shong i nguta kiq rito.

²⁷ Kiimaq tsangshiq tarü maiqmiimii spiqro na spiqtsi pankai kihoto. Raüta spiqtsi maq spiqtai kloto. Raüta poi kloto. Raüta tsangshiq ka tsangshiq raq noq tlaq sumla phra shomjam kiina wawanto. Kiijaq tsangshiq ka chenyang dungsea peokhiq peoto. Raüta tsangshiq raq Abimelekh ma shummii laqpii she saisito.

²⁸ Kiijiishe Gal raq akha bomnam nguto, “Riita nashiq Shekhem chelati artiq jamkhiinok maiq wa sitiikai nya? Nashiq ka Abimelekh wokhong na jam nguto sitiikai? Riita singmung lei, apaiq ka ju wiita? Apaiq ka Gideon se riimak shea! Kiimaq Jebul raq apaiq jaq wa aming jaü raüta mung pengtlaq kata, shamtaq nashiq ka apaiq wokhong na jaram wa sitiikai? Namshiq kaüwa weraü shong wantiwe Hamor wokhong na sirong liina, apaiq kata namta kaüwa weraü tipai!

²⁹ Ngiliishulai, akhiiwiqwiq! Ngi ka ara mungmaiqse pengti nguraüjaq! Ngi raq Abimelekh ka alam arbaiqha chang wa! Ngi raq apaiq ma akha anguha chang wa, ‘Ümsengi phenlabi kong ka sheaho laq, laüta kira! Laüta wara ana! Nanai riikhat i!’”

³⁰ Gal raq kra nguta kra tai raüta chela pengti we Jabul ka akhiq she riito.

³¹ Krai mren, apaiq raq Abimelekh ma Aruma chela na bom ka akhiishe tiichong wato, “Ebed se Gal nai aphu anotiim ka ana Shekhem chela na kito. Kiimaq tsangshiq raq ümniika chela na tiinyap mak she miraq.

³² Riita ümchaü min, ümniika ümsengi thun sheaho laüta, athi rawa liipan niili wak ram thun na bom hai laüta kheho lilaq.

³³ Laüta anap ranap chu maq rashe dong wan tlaq akhing na tiihanghiiq maq chela ka khat laq. Raüla Gal nai asenginok ümnaq khatkai miki. Kriiwa ümniiraq atangtang, tsangshiq ka tiinamtok thaübaiq laq!”

³⁴ Krai mren, Abimelekh nai asengibi wiita ka rawa na kihoto. Raüta Shekhem chela tho maq kongblai na tiipaü raüta kheto.

³⁵ Riita Abimelekh nai asengi kong raq, Gal ka kiraüta chela kilam chong na chapraqraq kra chhi raüta, tsangshiq ka tsangshiq tiipaü chang kiiwa dongrang she riito.

³⁶ Gal raq tsangshiq ka chhito, raüta Jebul ma, “Liilaq! pum thun thaq maq maiqkong ka ana akai rai!” nguta nguto. Kiijiishe Jabul raq treto, “Kriika maiqkong riimak.” “Kriika pum khuthaq na tsaijinyam thun li.”

³⁷ Kiijiishe Gal raq thongshi ri hali, “Liilaq! pumchit maq maiqkong satrai wantlo! Kiimaq kongshiti ka jaqliitiwe sichang ok chongji lam nü maq kiraitlo!” nguta nguto.

³⁸ Kiijiishe Jebul raq apaiq ma akhiishe nguto, “Ra na dü ma phipii tsütsit laü ira ümchaü ümbano? Ümniidea khata naishiq ma Abimelekh wokhong na jaram wa sitlan nguta ngotiwe ira. Ümniiraq thophi riiqphi saisi rat laüwetiim irka arshe kitlaq ahata. Ümchaü min tiido laüta tsangshiq ka khatki kiq na.”

³⁹ Krai mren, Gal raq Shekhem chelati ka sheaho raüta Abimelekh rai riikhatto.

⁴⁰ Shatmaq Gal ka aju rai riito. Kiiwiishe Abimelekh raq apaiq ka rot-rot johoto. Maiq ka pahea shophito, chela kilam chong niimin pahea shoto.

⁴¹ Abimelekh ka Aruma na shongto. Kiimaq Jebul raq Gal nai aphu ano thun ka Shekhem chela wa ajo riibaiqto. Krai mren, tsangshiq ka kiijaq silot mak she riito.

⁴² Kriimaq napjai ranaiq na Abimelekh raq Shekhem chelati ka rum na kainong chang nguta riichongto nguta taito.

⁴³ Krai mren apaiq raq asenginok kra shea raüta, kongtsam na triipheato. Raüta rum na bom hai raüta kheto. Krai mren, Apaiq raq nokmaiqse ka chela mong wa kinphai na dongho kra chhi raüta, apaiq ka bom mong kiiwa dongchhaq raüta tsangshiq ka khatto.

⁴⁴ Riita Abimelekh nai asengi kong thun ka, chela kilam chong kra shangbaiq wantlo miitu kilamchong nü kiina jutrangto. Kra liipan bala, niilishe asengi kongnai kriiraq maiqmii ba maq dong raü raüta, nokmaiqse ka wak ram binjü kiiwa khat-siqto. Raüta wiita jiipbaiqto.

⁴⁵ Kra rekhat ka ranaiq minru riikhat siqto. Abimelekh raq chela ka jiito. Raüta chelati thun ka wiita jiipbaiqto. Kiimaq chela ka wiita runbaiqto, kiimaq hiq ka shum maq shotbaiqto.

⁴⁶ Riita kra tsütsa Shekhem chelati aki miikiimbi chela tho na longperuk jam mong na atiipaüti raq taito. Kra tai raüta tsangshiq ka Baal Tongshong shomjam long maq ahai kiiniishe ju raüta tiipaü kito.

⁴⁷ Abimelekh ma tsangshiq ka kiijaq riitamtlo nguta bom ka chongto.

⁴⁸ Kra tai raütiishe Abimelekh ka Jalmon hiqlam kiijaq asengi shea raüta dü wanto. Kiijaq saü raüta, apaiq raq mang maq pekü ashi daqto. Raüta aphaq na pito. Raüta apaiq raq asengi thun kiimin, apaiq raq jamkho pekü pitlaq, kiikhiisii jaqlo thitthit klo ronglaq nguta chongto.

⁴⁹ Krai mren, maiq loweatek raq pekü ka achhuqchhuq daq raüta pito. Raüta tsangshiq ka Abimelekh jaiphan phan wato. Raüta kra re tiichang longjam kra tro na phong baiqto. Kiimaq maiq thun ka kra mong kiijaq wa miishe chaqto. Krai mren peruk jam mong na maiqkong thun ka wiita wa maq tiikhiim chaq baiqto. Kiijaq maiq ka jechak maiqwe tlotli hingshi tin jiimto.

⁵⁰ Kiimiishe Abimelekh ka Thebej chela khat wa wawanto. Raüta chela ka trotam kombaiqto. Raüta chela ka jiito.

⁵¹ Kra chela niimin longkham jam ashi asi riito. Kra chela na siti maiq jechak maiqwe, kiimaq welabi thun tarü kunli kra longkham jam kongmong chong mong kiina tiipaü jutrangto. Raüta tsangshiq raq kilü maq jam mong na tiishaq raüta, tsangshiq ka wukhu thung kiiniishe tiipaü wato.

⁵² Riita Abimelekh ka kongmong chong jam kra khatto. Raüta apaiq ka kilamchong kiijaq jam ka wa maq chaq baiq la nguta wato.

⁵³ Shatmaq Jechak nyung ashi raq wongtiikit chang longtham ka akhupo na tiidea thongto. Raüta, akhurii ka tiibunli riito.

⁵⁴ Kiijiishe, apaiq raq apaiq liiq nai ja wiketiwe kra jaqlo thit heato. Raüta apaiq ma aming akha kuqto, “Ümnep ja ka chat laq. Laüta ngi ara tsatbaiq laq. Ngi ka jechak nyung jaq na tsaito nguta ikhushü tiijam ka romang.” Krai mren, jerowe riimin anepja ka chat-hit raüta, Abimelekh dü na tlatchhat shukbaiqto. Kiimaq apaiq ka tsaito.

⁵⁵ Ümtiikiiwa Israilnok raq Abimelekh ka tsaito she nguta chhitaq, tsangshiq ka maiqmii jam na jang rang she wawanto.

⁵⁶ Riita Abimelekh raq aphu anotiim, tsangshiq weshisetiim, maiqwe roqmiishi tsatbaiqtaq, raüta mat tiidongtaq kra phuk lam she, Shiikeawe raq apaiq ka akha tsatbaiqto.

⁵⁷ Kiimahali, Shiikeawe raq Shekhem chelati raq abi pinthum ngarai tangtaq kra miitu, Gideon se Jotham raq man sontaq kra phan phan, tsangshiq ka tiichamchaoto.